Chuna la Jesús, xatapaxuwan kalichuwinaw Dios

1. ¿Tuku xlakata xtatayananin Jehová ni xtachuna la tiku kaj wankgo pi kstalaninanin Cristo litaxtukgo?

AKININ xtatayananin Jehová ni xtachuna la tiku kaj wankgo pi kstalaninanin Cristo litaxtukgo. Akinin lu xatapaxuwan kalitachuwinamputunaw Dios latamanin (Tito 2:14). Maski chuna, max namin kilhtamaku ni katilichuwinamputuw Dios. Max namakgkatsiyaw chuna la chatum kgolotsin xalak congregación tiku wa: «Min kilhtamaku ni klichuwinamputun Dios».

2. ¿Tuku xlakata min kilhtamaku tuwa makgkatsiyaw chuntiya xatapaxuwan nalichuwinanaw Dios?

² Max anan tuku tlakg lipaxuwayaw chuna la skujnanimaw Dios nixawa nakalitachuwinanaw amakgapitsin xpalakata. ¿Tuku xlakata? Xlakata akxni makgtayananaw niku katlawakan o kakaxtlawakan Pukgalhtawakga, niku wi tuku masputunalh o akxni kamakgpuwantiniyaw kinatalankan, tunkun akxilhaw pi tlan kinkakitaxtuniyan chu tlan makgkatsiyaw. Nachuna, akxni akxtum kataskujaw kinatalankan, tlan makgkatsiyaw xlakata anan takaksni, tapaxkit chu katsiyaw pi xlakan xtapalh liʼakxilhkgo tuku tlawayaw xpalakatakan chu kinkapaxtikatsinikgoyan. Pero maski max akglhuwata kata lichuwinamaw Dios niku kinkalakgchanan, max ni lhuwa latamanin kinkakgaxmatnikgoyan. Chu max asta makgapitsin nitlan kinkalikatsinikgoyan. Na katsiyaw pi chuna la talakatsuwitilhama xlisputni uma kakilhtamaku, max tlakg nakinkaputsastalanikanan (Mat. 10:22). ¿Tuku nakinkamakgtayayan chuntiya xatapaxuwan nalichuwinanaw Dios?

3. ¿Tuku kinkamasiyaniyan Lucas 13:​6-9 xlakata Jesús?

³ Pulaktum tuku nakinkamakgtayayan xatapaxuwan nalichuwinanaw Dios, wa pi nalilakpuwanaw tuku tlawalh Jesús. Akxni xlama kKatiyatni, chuna la titaxtulh kilhtamaku tlakg xatapaxuwan lichuwinalh Dios (kalikgalhtawakga Lucas 13:​6-9). Jesús lichuwinalh akgtum liʼakxilhtit niku tamalakxtumilh taskujut nema xla xtlawanit xtachuna la tuku tlawalh chatum chixku tiku chalh akgatum higo chu kuentajtlawalh akgtutu kata, pero ni mastalh xtawakat. Xtachuna la uma, xla akgtutu kata kalitachuwinalh judíos xtachuwin Dios, pero ni lhuwa tiku kstalaninanin litaxtukgolh. Maski chuna, xtachuna la chixku tiku chuntiya liskujli xlakata xakiwi higo xmastalh xtawakat, Jesús ni taxlajwanilh, chu chuntiya xatapaxuwan kalitachuwinalh Dios amakgapitsin. Liskujli xlakata xkalakgchalh kxnakujkan.

4. ¿Tuku nalichuwinanaw k’uma artículo?

⁴ Kʼuma artículo nalichuwinanaw la limasiyalh Jesús pi lu xatapaxuwan lichuwinalh Dios xaʼawatiya akgchaxan papaʼ nema latamalh kKatiyatni. Nalichuwinanaw pulaktati tuku tlawalh Jesús chu la nastalaniyaw xliʼakxilhtit: 1) lu liskujli natlawa xtalakaskin Jehová, 2) kuenta tlawalh la xkgantaxtuma tuku xlichuwinankanit pi xʼama la, 3) lipawa pi Jehová xʼama makgtaya, chu 4) ni taxlajwanilh chu wa lilakpuwa pi wi tiku xʼamakgo kgaxmatnikgo.

LU LISKUJLI NATLAWA XTALAKASKIN JEHOVÁ

5. ¿La limasiyalh Jesús pi lu xliskuja natlawa xtalakaskin Dios?

⁵ Jesús xatapaxuwan lichuwinalh «xatlan tamakatsinin xla xTamapakgsin Dios» xlakata xkatsi pi wa tuku Dios xlakaskin pi xtlawalh (Luc. 4:43). Wa tuku tlakg xlakaskinka xliʼakxilha kxlatamat. Asta akxni nialh lhuwa papaʼ xtsankga namasputu xtaskujut kKatiyatni, alh «kʼakgatunu laklanka kachikinin chu klaktsu kachikinin» chu «xkamasiyanitilha latamanin» (Luc. 13:22). Na kamasiyanilh tlakg lhuwa xtamakgalhtawakgen xlakata na xlichuwinankgolh Dios chuna la xla (Luc. 10:1).

6. Xliputum taskujut nema tlawayaw xpalakata Jehová, ¿la makgtanuma chuna la lichuwinanaw Dios? (Na kaʼakxilhti dibujos).

⁶ La uku, tuku Jehová chu Jesús lakaskinkgo pi tlakg xlakaskinka kaliʼakxilhwi wa pi nalichuwinanaw xatlan tamakatsinin (Mat. 24:14; 28:​19, 20). Putum taskujut nema tlawayaw xpalakata Jehová, makgtanuma chuna la lichuwinanaw xatlan tamakatsinin. Akgtum liʼakxilhtit, makgtlawayaw Pukgalhtawakga xlakata latamanin tiku kalitachuwinanaw Dios tlan anta nakakninanikgo Jehová. Putum taskujut nema tlawamaka kBetel makgtayanan xlakata tlakg nalichuwinankan Dios. Chu makgtayananaw akxni wi tuku masputunan xlakata kinatalankan nakgalhiparakgo tuku maklakaskinkgo chu xlakata tunkun naliskujparakgo tuku xla xtakanajlakan, chuna la nalichuwinankgo Dios. Ankgalhin kalakapastakwi pi tuku Jehová lakaskin pi tlakg xlakaskinka kaʼakxilhwi wa pi nalichuwinanaw xatlan tamakatsinin. Komo chuna natlawayaw, tlakg nalichuwinamputunaw Dios. János, chatum kgolotsin xalak congregación tiku lama kʼHungría, wan: «Ankgalhin klakapastaka pi maski tipalhuwa la kskujnanima Jehová, chuntiya talakaskin naklichuwinan xTachuwin. Wa uma tlakg xlakaskinka taskujut nema kinkalakgayawakanitan».

7. ¿Tuku xlakata Jehová lakaskin pi chuntiya kalichuwinaw xtachuwin? (1 Timoteo 2:​3, 4).

⁷ Pulaktum tuku nakinkamakgtayayan xatapaxuwan nalichuwinanaw Dios, wa pi nakaʼakxilhaw latamanin chuna la kaʼakxilha Jehová. Xla lakaskin pi lhuwa latamanin kakgaxmatkgolh chu kamakgamakglhtinankgolh xatlan tamakatsinin (kalikgalhtawakga 1 Timoteo 2:​3, 4). Xlakata tuku nakalitachuwinanaw tlan nakalakgmaxtu, Jehová kinkamakgtayayan tlakg liwana nakatachuwinanaw. Akgtum liʼakxilhtit, folleto Kakapaxki latamanin kinkamakgtayayan tlakg tlan natsukuyaw katachuwinanaw latamanin, natsukuyaw kamakgalhtawakgeyaw chu nakamakgtayayaw kstalaninanin Cristo nalitaxtukgo. Maski la uku ni nakgaxmatputunkgo tuku nakalitachuwinanaw, max akxni nina sputa nawan lhuwa tapatin, natatayakgo xaxlikana. Tuku nakawaniyaw la uku, max wa tuku nakamakgpuwantini chuna natlawakgo. Wa xlakata lu xlakaskinka pi la uku chuntiya nalichuwinanaw Dios.

KUENTA TLAWALH LA XKGANTAXTUMA TUKU XLICHUWINANKANIT

8. ¿Tuku tlawalh Jesús xlakata xkatsi la xʼama kgantaxtu tuku xlichuwinankanit?

⁸ Jesús xkatsi la xʼama kgantaxtu tuku xlichuwinankanit, chu wa xlakata xkatsi pi kaj akgtutu kata aitat xʼama lichuwinan Dios (Dan. 9:​26, 27). Na xkatsi la xʼamaka makgnikan chu tuku kilhtamaku, xlakata na xlichuwinankanit (Luc. 18:​31-34). Xlakata Jesús xkatsi la xʼama kgantaxtu putum uma, liwana limaklakaskilh xkilhtamaku xlakata xatapaxuwan xmakgantaxtilh tuku Dios xlakgayawanit.

9. ¿Tuku xlakata kinkamakgpuwantiniyan xatapaxuwan nalichuwinanaw Dios tuku xlichuwinankanit pi xʼama la?

⁹ Komo liwana naʼakgatekgsaw la kgantaxtuma tuku xlichuwinanit Biblia pi xʼama la, nakinkamakgtayayan chuntiya xatapaxuwan nalichuwinanaw Dios. Katsiyaw pi uma kakilhtamaku nialh makgas namasputukan. Tuku lama chu la likatsikgo latamanin kinkamasiyaniyan pi kgantaxtuma tuku Biblia wa pi xʼama la kxaʼawatiya kilhtamaku. Akgatekgsaw la kgantaxtuma tuku xlichuwinankanit pi xʼama la xpalakata mapakgsina xalak sur (kakilhchanima Reino Unido chu Estados Unidos) chu mapakgsina xalak norte (kakilhchanima Rusia chu tiku tatayakgo) (Dan. 11:40). Na akgatekgsaw pi xtantun imagen nema lichuwinan Daniel 2:​43-45 kilhchanima lanka tamapakgsin niku makgtanumakgo Reino Unido chu Estados Unidos. Akxni liwana lakputsananiyaw tuku xlichuwinanit Biblia xlakata uma, tlakg liwana kanajlayaw pi nialh makgas xTamapakgsin Dios nakamalakgsputu putum tamapakgsin xalak katiyatni. Putum tuku xlichuwinankanit pi xʼama la kinkamasiyaniyan tuku kilhtamaku lamaw chu tlawa pi tlakg namalakapaliyaw chuna la lichuwinanaw Dios.

10. Kalichuwinanti atanu la kinkamakgtayayan tuku wan Biblia xlakata xatapaxuwan nalichuwinanaw Dios.

¹⁰ Biblia na lhuwa tuku lichuwinanit nema aku nakgantaxtu nema lu kalitachuwinamputunaw latamanin. Chatum tala puskat tiku wanikan Carrie chu makgtayanama kRepública Dominicana, wan: «Akxni klilakpuwan xalakstlan xtamalaknun Jehová nema aku namakgantaxti, lu kkalitachuwinamputun amakgapitsin. Akxni kakxilha putum taʼakglhuwit nema kgalhikgo latamanin, klilakpuwan pi Jehová ni kaj akit kintlawaninit umakgolh tamalaknun, wata na katlawaninit umakgolh latamanin». Tuku wan Biblia kinkamakgpuwantiniyan nalichuwinanaw xalaktlan tamakatsinin xlakata kinkamalakapastakayan pi Jehová nakinkamakgtayayan namakgantaxtiyaw uma taskujut. Leila, chatum tala xalak Hungría, wan: «Isaías 11:​6-9 kimasiyani pi Jehová tlan nakamakgtaya kaxatikawa latamanin xlakata nalakgpalikgo xlatamatkan. Chu uma kimakgpuwantini nakkalitachuwinan xTachuwin Dios putum latamanin, asta tiku tasiya pi ni katikgaxmatputunkgolh». Chu Christopher, chatum tala xalak Zambia, lichuwinan: «Chuna la wan Marcos 13:​10, xalaktlan tamakatsinin lichuwinamaka kxlikalanka katiyatni, chu akit lanka talakgalhaman kliʼakxilha pi kmakgtayanama xlakata nakgantaxtu uma tuku xlichuwinankanit». ¿Chu wix? ¿Tuku makgpuwantiniyan chuntiya nalichuwinana Dios?

LIPAWA PI JEHOVÁ XʼAMA MAKGTAYA

11. ¿Tuku xlakata xtalakaskin pi Jesús xlipawa Jehová xlakata chuntiya xatapaxuwan xlichuwinalh xatlan tamakatsinin? (Lucas 12:​49, 53).

¹¹ Jesús lipawa pi Jehová xʼama makgtayaw chuntiya xatapaxuwan xlichuwinalh xTachuwin. Maski Jesús xkalimasiyani kakni akxni xkalitachuwinan Dios, xkatsi pi lhuwa latamanin ni xʼamakgo lakgatikgo pi xkalitachuwinanka xatlan tamakatsinin (kalikgalhtawakga Lucas 12:​49, 53). Nachuna, xpulalinanin takanajla lu ksitsinikgo xlakata tuku xlichuwinan, chu wa xlakata makglhuwa litsakgsakgolh namakgnikgo (Juan 8:59; 10:​31, 39). Maski chuna, Jesús chuntiya lichuwinalh xatlan tamakatsinin xlakata xkatsi pi Jehová xʼama makgtaya. Xla wa pi xTlat xmalakgachanit chu ni x’akstu xmakgxtakgnit, xlakata putum kilhtamaku xtlawa tuku xmakgapaxuwa (Juan 8:​16, 29).

12. ¿Tuku kawanilh Jesús kstalaninanin xlakata chuntiya xlichuwinankgo Dios maski xkaputsastalanika?

¹² Jesús kamalakapastakalh kstalaninanin pi tlan xlipawankgolh pi Jehová xʼama kamakgtaya. Xlakata xkatsi pi xʼamaka kaputsastalanikan, makglhuwa kawanilh pi Jehová xʼama kamakgtaya (Mat. 10:​18-20; Luc. 12:​11, 12). Nachuna, kawanilh pi skgalalh xlatamakgolh (Mat. 10:16; Luc. 10:3). Kawanilh pi komo latamanin ni xkakgaxmatniputunkgolh, ni xafuerza xkawanikgolh (Luc. 10:​10, 11). Na kawanilh pi xtsalakgolh akxni xkaputsastalanika (Mat. 10:23). Maski Jesús xlipawan Jehová chu xatapaxuwan xlichuwinan xatlan tamakatsinin, ni kalipekua xwili xlatamat akxni ni xtalakaskin (Juan 11:​53, 54).

13. ¿Tuku xlakata liwana katsiyaw pi Jehová nakinkamakgtayayan?

¹³ La uku na kinkaputsastalanikanan, wa xlakata lakaskinaw pi Jehová nakinkamakgtayayan xlakata chuntiya xatapaxuwan nalichuwinanaw xtachuwin (Apoc. 12:17). ¿Tuku xlakata liwana katsiyaw pi Jehová nakinkamakgtayayan chatunu akinin? Xlakata oración nema tlawalh Jesús nema tatsokgtawilanit kJuan capítulo 17. Jesús skinilh xTlat pi xkakuentajtlawalh apóstoles, chu Jehová kgaxmatnilh. Libro xla Hechos lichuwinan la kamakgtayalh apóstoles xlakata chuntiya xatapaxuwan xlichuwinankgolh xatlan tamakatsinin maski xkaputsastalanimaka. Jesús na skinilh Jehová pi xkakuentajtlawalh putum tiku xkanajlakgolh tuku apóstoles xlichuwinamakgo. Chu uma na kinkakilhchaniman akinin. Wa xlakata liwana katsiyaw pi Jehová chuntiya nakgalhti xʼoración Jesús chu nakinkamakgtayayan chuna la kamakgtayalh apóstoles (Juan 17:​11, 15, 20).

14. ¿Tuku likatsiyaw pi tlan chuntiya xatapaxuwan nalichuwinanaw xatlan tamakatsinin? (Na kaʼakxilhti dibujo).

¹⁴ Max chuna la natalakatsuwitilha xlisputni uma kakilhtamaku, tlakg tuwa namakgkatsiyaw xatapaxuwan nalichuwinanaw Dios. Pero Jesús kinkawanin pi xʼama kinkamakgtayayan (Luc. 21:​12-15). Xtachuna la Jesús chu xtamakgalhtawakgen, kamastaw talakaskin pi wa latamanin nalaksakkgo komo nakinkakgaxmatnikgoyan, chu ni kakatalawaniw. Asta kkachikinin niku ni mastakan talakaskin pi kinatalankan nalichuwinankgo Dios, xlakan tekgskgonit la tlan nalichuwinankgo xatlan tamakatsinin xlakata lipawankgo Jehová chu ni wa lipawankgo xlitliwakgakan. Xtachuna la kxapulana siglo Jehová kamaxkilh litliwakga kskujnin xlakata “lakgatum xlichuwinankgolh xatlan tamakatsinin”, la uku na kinkamaxkiyan litliwakga xlakata tlan nalichuwinanaw xatlan tamakatsinin asta akxni xla nawan pi nialh katlawaw uma taskujut (2 Tim. 4:17). Liwana kakatsiw pi komo nalipawanaw Jehová, tlan chuntiya xatapaxuwan nalichuwinanaw xatlan tamakatsinin.

LILAKPUWA PI WI TIKU XʼMA KGAXMATNI

15. ¿Tuku likatsiyaw pi Jesús xlilakpuwan pi wi tiku xʼamakgo kgaxmatnikgo?

¹⁵ Jesús xkanajla pi xʼanankgo latamanin tiku xkgaxmatputunkgolh xatlan tamakatsinin, chu uma makgtayalh chuntiya xatapaxuwan xlichuwinalh Dios. Akxni ksputmaja kata 30, Jesús akxilhli pi xʼanankgo lhuwa latamanin tiku xkgaxmatputunkgo xatlan tamakatsinin chu katamalakxtumilh la akgtum tachanan nema tlantiya xmakika (Juan 4:35). Titaxtulh max akgtum kata, Jesús kawanilh xtamakgalhtawakgen: «Tachanan lu lhuwa» (Mat. 9:​37, 38). Chu alistalh kawanipa: «Tachanan lu lhuwa, […] lu kaskinitit xMalana tachanan pi kakamalakgachalh tiku namakikgo xtachanan» (Luc. 10:2). Jesús ankgalhin lilakpuwa pi xʼanankgo lhuwa latamanin tiku tlan xʼamakgo makgamakglhtinankgo xatlan tamakatsinin, chu akxni wi tiku xkgaxmatni, xla lu xpaxuwa (Luc. 10:21).

16. ¿Tuku liʼakxilhtit lichuwinalh Jesús xlakata nakamasiyani xtamakgalhtawakgen pi tlan xʼama kakitaxtuni akxni xlichuwinankgolh xatlan tamakatsinin? (Lucas 13:​18-21; na kaʼakxilhti dibujo).

¹⁶ Jesús kamasiyanilh xtamakgalhtawakgen pi xlilakpuwankgolh pi wi tiku xʼama kakgaxmatni. Uma xʼama kamakgtaya xlakata chuntiya xatapaxuwan xlichuwinankgolh Dios. Kalichuwinaw akgtiy liʼakxilhtit nema lichuwinalh (kalikgalhtawakga Lucas 13:​18-21). Pulana lichuwinalh pi tamakatsinin xla Tamapakgsin, xtachuna xwanit la xtalhtsi mostaza nema akxni staka akgatum lanka kiwi litaxtu. Akxni lichuwinalh uma, maʼakgatekgsninalh pi lhuwa latamanin xʼamakgo makgamakglhtinankgo xatlan tamakatsinin chu nitu xʼama malakgachokgo. Nachuna, wa pi tamakatsinin xla Tamapakgsin xʼama litaxtu xtachuna la limaxkutin. Chuna maʼakgatekgsninalh pi xatlan tamakatsinin xʼamaka lichuwinankan kxlikalanka Katiyatni chu xʼama tlawa pi latamanin xlakgpalikgolh xlatamatkan, maski max ni tunkun xtasiyalh pi chuna xtlawamakgo. Akxni lichuwinalh umakgolh liʼakxilhtit, kamakgtayalh xtamakgalhtawakgen naʼakxilhkgo pi tlan xʼama kakitaxtuni akxni xlichuwinankgolh Dios.

17. ¿Tuku xlakata chuntiya kalitachuwinamputunaw latamanin xatlan tamakatsinin?

¹⁷ Pulaktum tuku kinkamakgpuwantiniyan chuntiya xatapaxuwan nalichuwinanaw xatlan tamakatsinin wa akxni akxilhaw putum tuku tlan kitaxtuma xlakata tlawamaka uma taskujut. Akgatunu kata, lhuwa millón latamanin ankgo akxni lakapastakkan Cristo chu kalimakgalhtawakgemaka Biblia. Chu lhuwa mil latamanin tiku tsukukgonit lichuwinankgo Dios chu tamunukgonit. Ni katsiyaw la xlilhuwa latamanin natimakgamakglhtinankgo xatlan tamakatsinin. Tuku liwana katsiyaw wa pi Jehová chuntiya kamamakxtumima lhuwa latamanin tiku nalakgtaxtukgo akxni lama nawa lhuwa tapatin (Apoc. 7:​9, 14). Jehová, xMalana tachanan, katsi pi wilakgojku lhuwa latamanin tiku nakgaxmatkgo xatlan tamakatsinin. Putum uma limasiya pi tipalhuwa tuku xlakata talakaskin chuntiya nalichuwinanaw Dios.

18. ¿Tuku lakaskinaw pi kaʼakxilhkgolh latamanin?

¹⁸ Chuna la titaxtutilhanit kilhtamaku, xaxlikana kstalaninanin Jesús ankgalhin kalilakgapaskanit pi xatapaxuwan lichuwinankgo Dios. Akxni latamanin akxilhkgolh pi apóstoles ni xpekuankgo chu xatapaxuwan xlichuwinankgo Dios, «katsikgolh pi akxtum xtalamakgolh Jesús» (Hech. 4:13). Akinin na lakaskinaw pi akxni latamanin nakinkaʼakxilhkgoyan, naʼakxilhkgo pi xatapaxuwan lichuwinanaw Dios chuna la xtlawa Jesús.