«La uku kalaksaktit tiku naskujnaniyatit»

1. ¿Tuku kilitlawatkan xlakata xlikana napaxuwayaw? (Isaías 48:​17, 18).

KINTLATKAN xalak akgapun lu kinkapaxkiyan chu lakaskin kalipaxuwaw latamat la uku chu kkilhtamaku nema aku mima (Ecl. 3:​12, 13). Kinkamalakatsukin xlakata tipalhuwa tuku tlan natlawayaw. Pero ni kinkamalakatsukin xlakata kiʼakstukan natapakgsiyaw chu ni kinkalakgchanan nalaksakaw tuku tlan chu tuku nitlan (Ecl. 8:9; Jer. 10:23). Xla katsi pi xlakata xlikana napaxuwayaw, talakaskin naskujnaniyaw chu nakgalhakgaxmataw (kalikgalhtawakga Isaías 48:​17, 18).

2. ¿Tuku lakaskin Satanás pi kalakpuwaw, chu la limasiyanit Jehová pi uma kaj taʼakgsanin?

² Satanás lakaskin kalakpuwaw pi ni talakaskin pi Jehová nakinkamapakgsiyan xlakata tlan napaxuwayaw chu pi tlan kiʼakstukan natapakgsiyaw (Gén. 3:​4, 5). Xlakata Jehová xlimasiyalh pi uma akgtum taʼakgsanin, mastalh talakaskin pi latamanin xʼakstukan xtapakgsikgolh. Chu uku liwana litasiya tuku nitlan kitaxtunit xlakata latamanin xʼakstukan tapakgsikgonit. Pero Biblia kalichuwinan lhuwa lakchixkuwin chu lakpuskatin tiku paxuwakgolh xlakata skujnanikgolh Jehová. Chatum tiku lu paxuwalh xlakata skujnilh Jehová wa Jesucristo. Kʼuma artículo nalichuwinanaw tuku xlakata Jesús laksakli naskujnani Jehová. Na nalichuwinanaw tuku xlakata lakgchan naskujnaniyaw kinTlatkan xalak akgapun, chu nalakapastakaw tuku xlakata laksakwi naskujnaniyaw Jehová.

¿TUKU XLAKATA JESÚS LAKSAKLI NASKUJNANI JEHOVÁ?

3. ¿Tuku wa Satanás pi xʼama maxki Jesús, chu tuku tlawalh Jesús?

³ Akxni Jesús xlama kKatiyatni, talakaskilh nalaksaka tiku xʼama skujnani. Akxni aku xtamununit, Satanás wanilh pi xʼama maxki putum tamapakgsin xalak kakilhtamaku komo xlakgtatsokgostalh chu kaj makgtum xkakninanilh. Pero Jesús kgalhtilh: «¡Kapit Satanás!, xlakata chuna tatsokgnit: “Wa Jehová miDios tiku xlilat nakakninaniya chu kajwatiya xla nakgalhakgaxpatniya”» (Mat. 4:​8-10). ¿Tuku xlakata Jesús laksakli kajwatiya Jehová nakakninani? Kaʼakxilhwi.

4, 5. ¿Tuku xlakata Jesús laksakli naskujnani Jehová?

⁴ Jesús laksakli naskujnani xTlat xlakata paxki xliputum xnaku (Juan 14:31). Nachuna, Jesús skujnani Jehová xlakata katsi pi chuna xlilat (Juan 8:​28, 29; Apoc. 4:11). Katsi pi wa Jehová tiku kinkamaxkin latamat, lhuwa tuku xatapaxuwan kinkamaxkin chu tlan lipawanaw (Sal. 33:4; 36:9; Sant. 1:17). Jehová nikxni xʼakgskgawinit Jesús, chu putum tuku xla xkgalhi wa xTlat xmaxkinit (Juan 1:14). Pero Satanás nichuna likatsi la Jehová, Satanás tlawalh pi latamanin makglakgalhinanin xlitaxtukgolh chu xnikgolh. Na xaʼakgsanina, lakgkatsalakaninan chu xʼakstu paxkikan (Juan 8:44). Jesús liwana lakgapasa Jehová chu na liwana lakgapasa Satanás, wa xlakata nikxni lakpuwa pi nalikatsi chuna la Satanás chu natalalakatawaka Jehová (Filip. 2:​5-8).

⁵ Atanu tuku xlakata Jesús laksakli naskujnani Jehová wa pi xkatsi putum tuku tlan xʼama kitaxtu komo xla ni xmakgxtakgli (Heb. 12:2). Xkatsi pi xʼama masantujli xtukuwani xTlat chu pi xʼama sputa putum tapatin nema anan.

¿TUKU XLAKATA WA JEHOVÁ LAKGCHAN NAKAKNINANIYAW?

6, 7. 1) ¿Tuku xlakata lhuwa latamanin ni skujnanikgo Jehová? 2) ¿Tuku xlakata kajwatiya Jehová lakgchan nakakninaniyaw?

⁶ La uku, lhuwa latamanin ni skujnanikgo Jehová xlakata ni lakgapaskgo. Ni katsikgo xalaktlan tayat nema xla kgalhi chu putum tuku tlawa xpalakatakan. Umakgolh latamanin, xtachuna la tiku apóstol Pablo kalitachuwinalh Dios kʼAtenas, tiku na ni xlakgapaskgo Jehová (Hech. 17:​19, 20, 30, 34).

⁷ Pablo kalitachuwinalh pi xaxlikana Dios, «kamaxki putum latamanin latamat chu tajaxanat chu putum tuku maklakaskinkgo». Chu kawanilh pi «xpalakata xla kgalhiyaw latamat chu tatsuwiyaw chu lamaw». Na kawanilh pi Dios «tlawalh pi kaj chatum chixku xlikilhtsukukgolh putum [tiku] xlatamakgolh kxlikalanka katiyatni». Xlakata Jehová wa kiMalakatsukinakan, kajwatiya xla lakgchan nakakninaniyaw (Hech. 17:​25, 26, 28).

8. ¿Tuku nikxni katitlawalh Jehová?

⁸ Komo Jehová chuna xlakaskilh tlan xkamafuerzajlinilh latamanin naskujnanikgo, xlakata xla wa Malakatsukina chu wa tiku lakgchan namapakgsinan. ¡Pero Jehová nikxni chuna katitlawalh! Wata lakaskin pi lhuwa latamanin xʼamigo kalitaxtukgolh putum kilhtamaku (1 Tim. 2:​3, 4). Wa xlakata, lhuwa tuku tlawanit nema limasiya pi xla lama chu pi lu kinkapaxkiyan. Na wa uma tuku xpalakata kinkamasiyaniyan la nakamasiyaniyaw amakgapitsin latamanin tuku natlawa xpalakatakan chu la namakgantaxti (Mat. 10:​11-13; 28:​19, 20). Nachuna, kalakkaxwilinit congregaciones chu tiku nakinkapulalinkgoyan xlakata nakinkakuentajtlawakgoyan (Hech. 20:28).

9. ¿La limasiya Jehová pi lu xapaxkina?

⁹ Jehová limasiya pi lu xapaxkina, xlakata la kalikatsini tiku ni kanajlakgo pi xla lama. Chuna la titaxtunit kilhtamaku, lhuwa latamanin laksakkgonit xʼakstukan natapakgsikgo. Pero xlakata Jehová lu tlan likatsi, kamaxki putum tuku maklakaskinkgo xlakata tlan nalatamakgo chu nalipaxuwakgo latamat (Mat. 5:​44, 45; Hech. 14:​16, 17). Na tlan kgalhikgo xfamiliajkan, kamanan, amigos chu lipaxuwakgo tuku tlan kakitaxtuni xlakata palha skujkgo (Sal. 127:3; Ecl. 2:24). Putum uma limasiya pi kinTlatkan xalak akgapun lu kapaxki latamanin (Éx. 34:6). Pero kalichuwinaw tsinu tuku xlakata akinin laksakwi naskujnaniyaw Jehová chu la xla kinkasikulunatlawayan.

¿TUKU XLAKATA LAKSAKWI NASKUJNANIYAW JEHOVÁ?

10. 1) ¿Tuku xlakata skujnaniyaw Jehová? (Mateo 22:37). 2) ¿La litamakgtayanita wix xlakata Jehová tapatinan? (Salmo 103:​13, 14).

¹⁰ Xtachuna la Jesús, skujniyaw Dios xlakata paxkiyaw xliputum kinakujkan (kalikgalhtawakga Mateo 22:37). Akxni tlakg lakgapasaw Jehová tlakg lakgatiyaw la likatsi. Kalilakpuwaw chuna la xla kinkatapatiyan. Akxni israelitas ni xkgalhakgaxmatkgo, Jehová ankgalhin xkawani: «Katlawatit litlan, kamakgxtakgtit ni xatlan mintijikan» (Jer. 18:11). Jehová lakapastaka pi akinin kaj pokgxni (kalikgalhtawakga Salmo 103:​13, 14). Akxni lilakpuwanaw la kinkatapatiyan Jehová chu kinkalimasiyaniyan atanu lu xatlan tayat, ¿ni xlikana pi uma tlawa pi naskujnaniputunaw putum kilhtamaku?

11. Kalichuwinanti makgapitsi tuku xlakata skujnaniyaw kinTlatkan xalak akgapun.

¹¹ Atanu tuku tlawa pi naskujnaniputunaw Jehová wa pi katsiyaw pi chuna xlilat (Mat. 4:10). Na katsiyaw tuku tlan kitaxtuma xlakata ni makgxtakgaw Jehová: makgtayanamaw natasantujli xtukuwani, limasiyamaw pi Satanás xaʼakgsanina chu makgapaxuwamaw kinTlatkan xalak akgapun. Chu komo la uku nalaksakaw naskujniyaw Jehová, tlan nalatamayaw putum kilhtamaku chu naskujnaniyaw (Juan 17:3).

12, 13. ¿Tuku kinkamasiyaniyan tuku titaxtukgolh Jane chu Pam?

¹² Lata laktsujku akinin, tlan natsukuyaw paxkiyaw Jehová xliputum kinakujkan chu tlan chuntiya napaxkiyaw maski natitaxtu kilhtamaku. Kalichuwinaw tuku titaxtukgolh chatiy laktsuman linatalan, Jane chu Pam.a Chatum xkgalhi 11 kata chu achatum xkgalhi 10 kata akxni tsukuka kalimakgalhtawakgekan Biblia. Maski xnatlatnikan ni kgalhtawakgaputunkgolh, kamaxkikgolh talakaskin pi xkatakgalhtawakgakgolh xtatayananin Jehová pero chuntiya xʼankgolh kxpusikulankan. Jane wan: «Tuku kimasiyanikgolh xtatayananin Jehová xlakata Biblia kimakgtayalh ni nakmaklakaskin drogas chu ni naktlawa talakgxtumit nema ni xlitatlawat chuna la xtlawakgo kincompañeros xalak escuela».

¹³ Akxni aku kstakmakgo, Jane chu Pam publicadoras litaxtukgolh. Titaxtulh kilhtamaku, precursoras litaxtukgolh chu na xkakuentajtlawakgo xnatlatnikan tiku xlinkgoya kata. Jane kinkalitachuwinanan la makgkatsi akxni lilakpuwan putum tuku Jehová tlawanit xpalakata: «Kakxilhnit pi Jehová ankgalhin kakuentajtlawa xʼamigos, xlakata 2 Timoteo 2:19 wan pi “Jehová kalakgapasa tiku tapakgsinikgo”». Xlikana pi Jehová kakuentajtlawa tiku paxkikgo chu skujnanikgo.

14. ¿La tlan nakgalhmakgtayayaw Jehová? (Na kaʼakxilhti dibujos).

¹⁴ Akinin makgtayanamputunaw xlakata natasantujli xtukuwani Jehová. Kalilakpuwaw pi kgalhiyaw chatum amigo tiku lu tlan likatsi chu lhuwa tuku xatapaxuwan maskiwinan. Pero ¿tuku xtlawaw komo akgtum kilhtamaku xkgaxmatwi pi wi tiku lichuwinama pi kiʼamigojkan nitlan likatsi chu xaʼakgsanina? Max tunkun xkgalhmakgtayaw. Xtachuna la uma, akxni kgaxmataw pi wi tiku wan tuku ni xaxlikana xlakata Jehová, akinin lichuwinamputunaw tuku xaxlikana chu kgalhmakgtayaputunaw kinTlatkan xalak akgapun (Sal. 34:1; Is. 43:10). Tuku wanaw chu tuku tlawayaw limasiya pi skujnaniputunaw Jehová xliputum kinakujkan.

15. ¿Tuku tasikulunalin makglhtinalh apóstol Pablo xlakata laksakli naskujnani Jehová? (Filipenses 3:​7, 8).

¹⁵ Xatapaxuwan lakgmakganaw tuku xlakpuwanitaw pi natlawayaw kkilatamatkan xlakata namakgapaxuwayaw Jehová chu tlakg naskujnaniyaw. Chatum tiku chuna tlawalh wa apóstol Pablo. Maski xla lu xlakaskinka xlitaxtu kxlakgstipankan judíos, lakgmakgalh uma xlakata nastalani Cristo chu naskujnani Jehová (Gál. 1:14). Xlakata chuna tlawalh, lu paxuwalh kxlatamat chu kgalhilh talakgalhaman xlakata akxtum natamapakgsinan Cristo kʼakgapun. Pablo nikxni lakpuwa pi nitlan tuku xtlawanit akxni laksakli naskujnani Jehová. Chu komo akinin nalaksakaw naskujnaniyaw Jehová, na nakinkakitaxtuniyan chuna la Pablo (kalikgalhtawakga Filipenses 3:​7, 8).

16. ¿Tuku kinkamasiyaniyan tuku titaxtulh Julia? (Na kaʼakxilhti dibujos).

¹⁶ Komo wa tlakg xlakaskinka naliʼakxilhaw naskujnaniyaw Jehová, nakgalhiyaw lhuwa tasikulunalin la uku chu kkilhtamaku nema aku mima. Kalichuwinaw tuku titaxtulh chatum tala tiku wanikan Julia. Akxni aktsujku xwanit xmakgkilhtli kxpusikulan. Xlakata Julia lu stlan xkilhtli, chatum tiku lu xkatsini xkilhtli wanilh pi xʼama masiyani xlakata tlakg tlan xkilhtlilh. Ni lhuwa kilhtamaku titaxtulh, Julia lu xlakaskinka litaxtulh chu tsukulh kilhtli niku xkilhtlikgo tiku lu xkalakgapaskan. Akxni xkgalhtawakgama kʼakgtum lu xlakaskinka escuela niku masiyakan xlakata tatlakgni, chatum xcompañero litachuwinalh xlakata Dios chu wanilh pi Dios wanikan Jehová. Alistalh, Julia tsukuka limakgalhtawakgekan Biblia makgtiy akgtum semana. Titaxtulh kilhtamaku, xla lakpuwa naskujnani Jehová chu nialh lakpuwa naliskuja nakilhtli. Uma lu tuwa makgkatsilh. Xla wan: «Lhuwa latamanin xkiwanikgo pi kaj paxkat xaktlawa tuku xakkatsini xaktlawa, pero akit xakmaklakaskimputun kilatamat xlakata xakskujnanilh Jehová». La uku titaxtunita liwaka 30 kata lata Julia laksakli uma, ¿tuku lakpuwan xlakata tuku laksakli? Xla wan: «Lu kpaxuwa, chu liwana kkatsi pi kkilhtamaku nema aku mima Jehová nakimaxki putum tuku lakaskin kinaku» (Sal. 145:16).

CHUNTIYA KASKUJNANI JEHOVÁ

17. 1) ¿Tuku xlitlawatkan tiku nina skujnanimakgo Jehová, chu tuku xlakata? 2) ¿Tuku katsikgo tiku skujnanimakgo Jehová?

¹⁷ Nialh makgas kilhtamaku tsankga xlakata nalakgsputa uma xalixkajni kakilhtamaku. Apóstol Pablo tsokgwililh: «Xlakata “nialh makgas kilhtamaku”, “tiku mima nachin chu ni katimakgapalalh”» (Heb. 10:37). Umakgolh tachuwin masiya pi tiku nina skujnanimakgo Jehová, nialh lhuwa kilhtamaku kgalhikgo xlakata nalaksakkgo naskujnanikgo Jehová (1 Cor. 7:29). Chu tiku skujnaniyaw Jehová, kinkamalakapastakayan pi maski natitaxtuyaw tuku tuwa, nialh makgas kilhtamaku natalakaskin natayaniyaw.

18. ¿Tuku lakaskinkgo Jehová chu Jesús pi katlawaw?

¹⁸ Jesús kamakgpuwantinilh latamanin pi kstalanikgolh chu ankgalhin chuna xtlawakgolh (Mat. 16:24). Wa xlakata, komo makgasata skujnanimaw Jehová, ni kataxlajwaniw. Xlikana pi min kilhtamaku tuwa tamakgkatsi chu talakaskin lu naliskujaw xlakata chuntiya naskujnaniyaw Jehová. Pero maski chuna, lhuwa tasikulunalin kgalhiyaw chu lhuwa tuku lipaxuwayaw akxni skujniyaw Jehová (Sal. 35:27).

19. ¿Tuku kinkamasiyaniyan tuku titaxtulh Gene?

¹⁹ Makgapitsi latamanin lakpuwankgo pi xlakata tlan naskujnanikgo Jehová talakaskin lhuwa tuku nalimakgxtakgkgo. Komo wix aku stakpat, ¿lakpuwana pi komo naskujnaniya Jehová wi tuku ni lipaxuwapat nawan? Chatum kgawasa tiku wanikan Gene, wan: «Xaklakpuwan pi xtatayananin Jehová lu lhuwa tuku nila xaktlawayaw. Xakakxilha pi lhuwa kintalakgkgawasan tiku akxtum xakkatastaknit, tlan xʼankgo kfiestas, xʼankgo katapaxialhnankgo laktsuman o tlan xlikgamanankgo xalixkajni videojuegos. Pero akit kajwatiya xakkan ktamakxtumit chu xakkan lichuwinan Dios». ¿Tuku kitaxtunilh Gene xlakata chuna xlakpuwan? Xla wan: «Tsekg ktsukulh tlawa tuku nitlan, chu klipaxuwalh, pero uma ni makgapalalh. Ni xlikana xakpaxuwa. Wa xlakata ktsukulh lilakpuwan tuku xakkatsininit kBiblia nema ni xakmakgantaxtima, chu ktsukulh lilakpuwan tuku tlan xʼama kinkitaxtuni komo xaklilatamalh. Wa xlakata klaksakli nakskujnani Jehová xliputum kinaku. Kmakgkatsi pi lata ama kilhtamaku, Jehová kgalhtinit putum kiʼoraciones».

20. ¿Tuku liwana lakpuwanitaw natlawayaw?

²⁰ Chatum tiku tsokgwililh Salmo, wanilh Jehová: «Paxuwa chixku tiku wix laksaka chu litana kmimpaxtun xlakata nalatama kminchik» (Sal. 65:4). Wa xlakata, chuntiya kaskujniw Jehová chu katlawaw chuna la Josué, tiku wa: «Kifamilia chu akit, nakskujnaniyaw Jehová» (Jos. 24:15).