Lu nalitamakgtayayaw komo nakatalalinaw kinatalankan

1, 2. ¿Tuku lu xlakaskinka akxilha Jehová, chu tuku lakaskin pi katlawaw?

JEHOVÁ lu xlakaskinka liʼakxilha la kalikatsiniyaw amakgapitsin. Jesús masiyalh pi kilipaxkitkan kintalatamankan chuna la kiʼakstukan kinkapaxkikanan (Mat. 22:​37-39). Uma wamputun pi tlan nakalikatsiniyaw putum latamanin, asta tiku ni kakninanikgo Jehová. Komo chuna natlawayaw, stalanimaw nawan kinTlatkan xalak akgapun, tiku «tlawa pi nataxtu chichini xpalakatakan tiku lixkajni likatsikgo, chu tiku tlan likatsikgo chu tlawa pi namin sen xpalakatakan tiku tlawakgo tuku xaʼakgstitum chu tiku ni tlawakgo tuku xaʼakgstitum» (Mat. 5:45).

² Maski Jehová kapaxki putum latamanin, tlakg kapaxki tiku kgalhakgaxmatkgo (Juan 14:21). Xla lakaskin pi nachuna katlawaw, chu kinkawaniyan pi “lu kakapaxkiw” kinatalankan. Akxni lilakpuwanaw pi wi tiku lu kilipaxkitkan, max lakapastakaw la kapaxkiyaw tiku xalak kifamiliajkan o chatum kiʼamigojkan (1 Ped. 4:8; Rom. 12:10).

3. ¿Tuku kilitlawatkan xlakata tlakg napaxkinanaw?

³ Tapaxkit xtachuna la akgatum xanat nema talakaskin namunuwiliyaw chu nakuentajtlawayaw xlakata nastaka. Apóstol Pablo kawanilh kstalaninanin Cristo: «Kalakgalhinitit tapaxkit xtachuna nema lakgalhinikan kfamilia» (Heb. 13:1). Jehová lakaskin pi chuntiya kastakli tapaxkit nema kakgalhiniyaw amakgapitsin. Kʼuma artículo, nalichuwinanaw tuku xlakata xlakaskinka tlakg tlan nakatalalinaw kinatalankan chu la tlan chuna natlawayaw.

¿TUKU XLAKATA TALAKASKIN TLAKG TLAN NAKATALALINAW KINATALANKAN?

4. ¿Tuku nakinkamakgtayayan chuntiya xtapalh naliʼakxilhaw pi xkachikin Jehová makxtum wi chuna la wan Salmo 133:1? (Na kaʼakxilhti dibujos).

⁴ (Kalikgalhtawakga Salmo 133:1). Xtachuna la salmista, akinin lakpuwanaw pi «lu tlan chu lu lipaxuw» pi kiʼamigoskan litaxtukgo tiku paxkikgo Jehová. Pero komo ni kuenta xtlawaw, max nialh xlakaskinka xliʼakxilhwi pi xkachikin Jehová makxtum wi. Max xkinkaʼakgspulan chuna la chatum lataman tiku chali chali akxilha akgatum lanka chu lu stlan kiwi, pero chuna la titaxtu kilhtamaku nialh xlakaskinka liʼakxilha xlakata xchaliyan watiya tuku akxilha. ¿Tuku nakinkamakgtayayan chuntiya xtapalh nakaʼakxilhaw kinatalankan maski max makglhuwa kaʼakxilhaw akgatunu semana? Nalimaxtuyaw kilhtamaku xlakata nalilakpuwanaw tuku xlakata xtapalh kaliʼakxilhaw chu tuku xlakata xtapalh litaxtukgo kcongregación.

5. ¿La kamakgpuwantini amakgapitsin tapaxkit nema lalimasiyaniyaw?

⁵ Akxni latamanin xlimakgtumku minkgo kkintamakxtumitkan, lu kaks kamalakawani tapaxkit nema lakgalhiniyaw chu wa xlakata kanajlakgo pi tekgskgonit xaxlikana. Jesús wa: «Wa uma tuku nalitalakgapasatit pi wixin kintamakgalhtawakgen: komo lapaxkiyatit» (Juan 13:35). Kalichuwinaw tuku titaxtulh Chaithra, chatum tsumat tiku xkgalhtawakgama kʼuniversidad akxni tsukuka limakgalhtawakgekan Biblia. Tala tiku xmakgalhtawakgema invitarlilh kʼakgtum asamblea regional, chu akxni kitaspitkgolh xapulana kilhtamaku, uma tsumat wanilh tala: «Kinatlatni nikxni kiʼakgpixtiyakgonit. ¡Pero xapulana kilhtamaku nema kkilalh kmiʼasamblea, 52 tiku kiʼakgpixtiyakgolh! Uma familia kilimasiyani pi Jehová lu kimpaxki. Akit na kmakgtapakgsiputun kʼuma familia». Chaithra chuntiya limakgalhtawakgeka Biblia chu tamunulh kkata 2024. Xlikana pi akxni latamanin akxilhkgo pi tlawayaw tuku tlan chu lapaxkiyaw, kamakgpuwantini pi na naskujnanikgo Jehová (Mat. 5:16).

6. ¿La litamakgtayayaw akxni tlakg tlan katalalinaw kinatalankan?

⁶ Akxni tlakg tlan katalalinaw kinatalankan na kinkamakgtayayan ni nataxlajwani kintakanajlakan. Pablo kawanilh kstalaninanin Cristo: «Chali chali chuntiya kalamatliwakglhtit chatunu chatunu […] xlakata nipara chatum wixin namasta talakaskin pi xlitliwakga talakgalhin nema akgskgawinan namapalhi minakujkan» (Heb. 3:13). Komo xtaxlajwaniw chu xtsukuw pataxtutayayaw kxatlan tiji, Jehová tlan namaklakaskin chatum tala xlakata nakinkamakgtayayan (Sal. 73:​2, 17, 23). ¡Lu tlan pi kgalhiyaw uma tamakgtay!

7. ¿Tuku xlakata wanaw pi tapaxkit makgtayanan makxtum natawilayaw? (Colosenses 3:​13, 14).

⁷ Akinin makgtapakgsiyaw kʼakgtum takanajla niku latamanin lu liskujkgo xlakata nalalimasiyani tapaxkit, chu wa xlakata kgalhiyaw lhuwa tasikulunalin (1 Juan 4:11). Kalilakpuwaw uma, tapaxkit kinkamakgtayayan nalatatayaniyaw, chu uma kinkamakgtayayan xlakata makxtum natawilayaw (Efes. 4:​2-6; kalikgalhtawakga Colosenses 3:​13, 14). Wa xlakata kkintamakxtumitkan liwana tasiya pi lapaxkiyaw, ni xtachuna la atanu takanajla.

KALALIMASIYANIW KAKNI

8. ¿La kinkamakgtayayan Jehová makxtum natawilayaw?

⁸ Kajwatiya Jehová tlan tlawa pi latamanin tiku makglakgalhinanin, makxtum natawilakgo (1 Cor. 12:25). Biblia wan: «Dios kamasiyaninitan nalapaxkiyatit chatunu chatunu» (1 Tes. 4:9). ¿La kinkamasiyaniyan Jehová? Limaklakaskin xTachuwin xlakata nakinkawaniyan tuku kilitlawatkan xlakata tlakg tlan nalatalalinaw. Chu akinin mastayaw talakaskin pi Jehová kakinkamasiyanin akxni likgalhtawakgayaw chu lakputsananiyaw tuku xla kinkawaniyan kxTachuwin chu lilatamayaw (Heb. 4:12; Sant. 1:25). Wa uma tuku xtatayananin Jehová lu liskujkgo natlawakgo.

9. ¿Tuku kinkamasiyaniyan Romanos 12:​9-13 xlakata la nalalimasiyaniyaw kakni?

⁹ ¿La nakinkamakgtayayan xTachuwin Dios tlakg tlan nakatalalinaw kinatalankan? Kaʼakxilhwi tuku wa Pablo kRomanos 12:​9-13 (kalikgalhtawakga). Kalilakpuwaw niku wan: «Wixin pulana kamasiyatit pi kamaxkiyatit kakni amakgapitsin». ¿Tuku wamputun uma? Pi kiliputsatkan la nakalimasiyaniyaw tapaxkit kinatalankan. Kalimasiyaniyaw tapaxkit akxni katapatiyaw, xatapaxuwan kamakgamakglhtinanaw chu wi tuku xatapaxuwan kamaxkiyaw (Efes. 4:32). Ni kakgalhkgalhiw pi amakgapitsin kakinkatalakatsuwinikgon, wata akinin kalipulaw. Komo chuna natlawayaw, naʼakxilhaw pi lu xlikana tuku wa Jesús: «Tlakg anan tapaxuwan akxni mastakan nixawa akxni makglhtinankan» (Hech. 20:35).

10. Akxni talakaskin nakamakgtayayaw amakgapitsin, ¿la limasiyayaw pi ni “lhkititnanaw”? (Na kaʼakxilhti dibujo).

¹⁰ Akxni Pablo aku xlichuwinanit pi talakaskin nalipulayaw nakalimasiyaniyaw kakni amakgapitsin, wa: «Ni kalhkititnantit kmintaskujutkan». Chatum tiku “ni lhkititnan”, xatapaxuwan chu liwana tlawa taskujut nema lakgayawakan. Proverbios 3:​27, 28 kinkawaniyan: «Kakamakgtaya tiku maklakaskinkgo tamakgtay, komo kmimakan wi tlan nakamakgtayaya». Wa xlakata, komo akxilhaw pi wi tiku maklakaskin tamakgtay, katlawaw tuku matlaniyaw. Ni kalakpuwaw pi alistalhku namakgtayayaw, o pi wi atanu tiku namakgtaya (1 Juan 3:​17, 18).

11. ¿Tuku nakinkamakgtayayan tlakg tlan nakatalalinaw kinatalankan?

¹¹ Atanu la nakalimasiyaniyaw kakni amakgapitsin, wa pi tunkun nakatapatiyaw. Efesios 4:26 wan: «Ni chuntiya sitsipatit nawan asta akxni natsankga chichini». ¿Tuku xlakata lu xlakaskinka uma? Versículo 27 wan pi xlakata “ni namaxkiyaw talakaskin Akgskgawini wi tuku nakinkamatlawiyan”. Anta kxTachuwin, Jehová makglhuwa kinkawaniyan pi kilitapatinatkan. Colosenses 3:13 kinkawaniyan: «Chuntiya […] lu kalatapatiputuntit». Akxni katapatiyaw kinatalankan tuku nitlan kinkatlawanikgoyan, kinkamakgtayayan tlakg tlan nakatalalinaw. Makgtayananaw xlakata “makxtum natawilayaw chu ni nalatakgalhiyaw taʼakglhuwit” (Efes. 4:3). Komo ni xlatapatiw, nila makxtum xtawilaw chu nila xʼanalh takaksni.

12. ¿La kinkamakgtayayan Jehová nakatapatiyaw amakgapitsin?

¹² Max tuwa namakgkatsiyaw natapatiyaw tiku kinkatlawaninitan tuku nitlan. Pero xʼespíritu Dios tlan nakinkamakgtayayan chuna natlawayaw. Biblia ni kajwatiya kinkawaniyan pi kalalimasiyaniw tapaxkit chu ni kalhkititnaw, wata na wan: «Kamastatit talakaskin pi espíritu santo nakalimatsamayan tapaxuwan». Uma wamputun pi xʼespíritu santo Dios tlan nakinkamakgtayayan pi lu nalapaxkiyaw chu xatapaxuwan nalatapatiyaw (Rom. 12:11). Wa xlakata katasaskiniw Jehová pi kakinkamakgtayan (Luc. 11:13).

«NI KAʼANALH TAPAPITSIT KMILAKGSTIPANKAN»

13. ¿Tuku max xkinkamapapitsin?

¹³ Kcongregaciones anankgo tanu tanu latamanin (1 Tim. 2:​3, 4). Xlakata tanu tanu la kinkamakgastakkanitan, ni lakxtum tuku laksakaw xlakata la natakaxtayayaw, tuku nalikuchunaw chu tuku nalilakgastananaw. Komo ni kuenta xtlawaw, uma max xtsukun kinkamapapitsiyan (Rom. 14:4; 1 Cor. 1:10). Pero Dios kinkamasiyaninitan pi kilalipaxkitkan kinchatunukan, wa xlakata nila wanaw pi tuku akinin laksakaw tlawayaw tlakg tlan nixawa tuku laksakkgo amakgapitsin (Filip. 2:3).

14. ¿Tuku ankgalhin kiliskujatkan natlawayaw, chu tuku xlakata?

¹⁴ Atanu tuku tlan natlawayaw xlakata ni naʼanan tapapitsit kcongregación, wa pi lu naliskujaw ankgalhin nakamakgpuwantiniyaw chu tlan nakamamakgkatsiniyaw amakgapitsin (1 Tes. 5:11). La uku, lhuwa tiku nialh xlichuwinankgo Dios o xkatamakxtukanit kcongregación, lakgtaspitkgonit Jehová. Akinin xatapaxuwan kamakgamakglhtinanaw (2 Cor. 2:8). Chatum tala puskat tiku 10 kata lata xtamakgatlininit Dios, wan la makgkatsilh akxni taspitli kPukgalhtawakga: «Putum natalan xatapaxuwan minkgolh kimpakgachipakgo» (Hech. 3:19). ¿La limakgkatsilh uma tala tuku tlawakgolh natalan? Xla wan: «Kmakgkatsilh xtachuna la Jehová xkimpakgachipalina xlakata xaktaspitli niku anan xaxlikana tapaxuwan». Akxni liskujaw xlakata nakamakgpuwantiniyaw amakgapitsin, Jesús tlan nakinkamaklakaskinan xlakata tlan nakamamakgkatsini tiku “lu tsinka xtakukakan” (Mat. 11:​28, 29).

15. ¿Tuku atanu tlan natlawayaw xlakata namakgtayananaw makxtum natawilayaw? (Na kaʼakxilhti dibujo).

¹⁵ Atanu la namakgtayananaw xlakata makxtum natawilayaw wa pi kuenta natlawayaw tuku wanaw. Kalilakpuwaw uma, chatum tiku tlawa liwat ankgalhin pulana kgalhwanan xliwat akxni nina kamujuni amakgapitsin xlakata nakatsi komo kgama. Xtachuna la uma, akxni nina chuwinanaw ankgalhin kililakpuwanatkan tuku nawanaw xlakata tlan nakamamakgkatsiniyaw amakgapitsin, chu nalitamakgtayakgo tuku nawanaw (Sal. 141:3; Efes. 4:29).

16. ¿Tiku tlakg xliskujatkan xlakata tlan namamakgkatsininan xtachuwinkan?

¹⁶ Lakchixkuwin tiku makgaxtokgkgo, natlatni chu natsetni tlakg xliskujatkan xlakata xtachuwinkan tlan namamakgkatsininan (Col. 3:​19, 21; Tito 2:4). Lakgkgolotsin xalak congregación na kuenta xlitlawatkan la chuwinankgo xlakata talakaskin pi nakamakgpuwantinikgo chu tlan nakamamakgkatsinikgo xlakskujnin Jehová (Is. 32:​1, 2; Gál. 6:1). Libro xla Proverbios kinkawaniyan: «Akgtum tachuwin nema wankan akxni lakgchan, ¡lu tlan!» (Prov. 15:23).

KALIMASIYAW KINTAPAXKITKAN

17. ¿Tuku tlan natlawayaw xlakata nakapaxkiyaw kinatalankan xliputum kinakujkan?

¹⁷ Apóstol Juan, wa: «Ni kalimasiyatit mintapaxkitkan kaj xlakata tuku wanatit, wata liwana kalimasiyatit xlakata tuku tlawayatit chu xliputum minakujkan» (1 Juan 3:18). ¿Tuku tlan natlawayaw xlakata nakapaxkiyaw kinatalankan xliputum kinakujkan? Akxni tlakg limaxtuyaw kilhtamaku akxtum nakatatawilayaw kinatalankan, tlakg tlan katalalinaw chu tlakg kapaxkiyaw. Wa xlakata, kalimaxtuw kilhtamaku nakatachuwinanaw kinatalankan ktamakxtumit, akxtum naʼanaw katalichuwinanaw Dios chu nakalakgapaxialhnanaw. Komo chuna natlawayaw, nawankan umakgolh tachuwin kimpalakatakan: «Dios kamasiyaninitan nalapaxkiyatit chatunu chatunu» (1 Tes. 4:9). Na naʼakxilhaw pi «lu tlan chu lu lipaxuw pi natalan akxtum natawilakgo» (Sal. 133:1).