Nikxni kiʼakstukan wilaw

1, 2. 1) ¿Tuku xlakata wanaw pi nikxni kiʼakstukan wilaw maski titaxtumaw tuku tuwa? 2) ¿Tuku nalichuwinanaw kʼuma artículo?

KOMO titaxtumaw tuku lu tuwa, max makgkatsiyaw chuna la akgtsankgatapulinitaw chu kiʼakstukan wilaw k’akgtum lanka kakiwin. Pero akinin ni kiʼakstukan wilaw, xlakata kinTlatkan xalak akgapun akxilha tuku titaxtumaw chu kinkamalaknuninitan pi nikxni kintikamakgxtakgni. Jehová kawani chatunu xlakskujnin tiku ni makgxtakgkgo: «Akit nakmakgtayayan» (Is. 41:10).

² Kʼuma artículo nalichuwinanaw pulaktati la kinkamakgtayayan Jehová: 1) kinkapulalinan, 2) kinkamaxkiyan tuku maklakaskinaw, 3) kinkakuentajtlawayan chu 4) tlan kinkamamakgkatsiniyan. Xla malaknunit pi kaxatukawa tuku natitaxtuyaw kkilatamatkan, nikxni kintikapatsankgan chu nikxni kintikamakgxtakgni. Wa xlakata, nikxni kiʼakstukan katitawilaw.

JEHOVÁ KINKAPULALINAN

3, 4. ¿La kinkapulalinan Jehová? (Salmo 48:14).

³ (Kalikgalhtawakga Salmo 48:14). Jehová katsi pi nila kiʼakstukan nakinkapulalinkanan, chu wa xlakata kinkamakgtayayan. Pulaktum tuku kinkalipulalinan wa Biblia (Sal. 119:105). Jehová limaklakaskin xTachuwin xlakata nakinkamakgtayayan tlan tuku nalaksakaw, nakgalhiyaw laktlan tayat nema nakinkamakgtayayan napaxuwayaw la uku chu tlan nalatamayaw putum kilhtamaku.a Kalilakpuwaw uma, anta kxTachuwin kinkawaniyan pi nakamatsankgenaniyaw amakgapitsin chu ni nasitsiyaw, akgstitum nalatamayaw chu lu nakapaxkiyaw amakgapitsin xliputum kinakujkan (Sal. 37:8; Heb. 13:18; 1 Ped. 1:22). Komo nakgalhiyaw umakgolh tayat, nakinkamakgtayayan tlakg tlan nakalikatsiniyaw kinkamanankan, tiku tamakgaxtokgaw chu kiʼamigoskan.

⁴ Anta kBiblia, Jehová na matsokgwilininanit tuku titaxtukgolh latamanin xalamakgasa tiku na kgalhikgolh taʼakglhuwit chu xmakgkatsikgo chuna la akinin (1 Cor. 10:13; Sant. 5:17). Akxni likgalhtawakgayaw tuku titaxtukgolh chu lilatamayaw tuku kinkamasiyaniyan xliʼakxilhtitkan, pulaktiy la litamakgtayayaw. Pulana, akxilhaw pi ni kaj kiʼakstukan titaxtumaw tuku tuwa kkilatamatkan, lhuwa latamanin na titaxtukgonit tuku tuwa chu tayanikgonit xlakata Jehová kamakgtayanit (1 Ped. 5:9). Chu xlipulaktiy, kinkamasiyaniyan tuku tlan natlawayaw xlakata natayaniyaw (Rom. 15:4).

5. ¿Tiku kalimaklakaskin Jehová xlakata nakinkapulalinan?

⁵ Atanu tuku kinkalipulalinan Jehová wa kinatalankan.b Superintendentes de circuito kalakgapaxialhnankgo congregaciones chu mastakgo taʼakgchuwin nema matliwakglha kintakanajlakan chu kinkamakgtayayan chuntiya makxtum natawilayaw (Hech. 15:​40–16:5). Lakgkgolotsin xalak congregación na lu kalilakgaputsakgo chu kamakgtayakgo chatunu natalan (1 Ped. 5:​2, 3). Natlatni kamasiyanikgo xkamanankan napaxkikgo Jehová, tlan tuku nalaksakkgo chu naliskujkgo tuku xla xtakanajlakan (Prov. 22:6). Chu natalan lakpuskatin tiku linkgoya kata kawilinikgo lu tlan liʼakxilhtit natalan laktsuman, kastakyawakgo chu kamatliwakglhkgo (Tito 2:​3-5).

6. ¿Tuku kilitlawatkan xlakata nalitamakgtayayaw xtapulalit Jehová?

⁶ Jehová kinkapulalinan, ¿pero tuku kilitlawatkan xlakata nalitamakgtayayaw xtapulalit chu nalimasiyaniyaw Jehová pi paxtikatsiniyaw? Proverbios 3:​5, 6 wan: «Kalipawanti Jehová xliputum minaku, chu ni wa mintalakapastakni kalipawanti». ¿Tuku nakitaxtu? «Xla namatsaja mintiji». Uma tachuwin kilhchanima pi xla nakinkamakgtayayan ni nakgalhiyaw lhuwa taʼakglhuwit chu tlakg napaxuwayaw. ¡Lu paxtikatsiniyaw Jehová pi lu kinkapaxkiyan chu kinkamaxkiyan tastakyaw nema maklakaskinaw! (Sal. 32:8).

JEHOVÁ KINKAMAXKIYAN TUKU MAKLAKASKINAW

7. Chuna la wan Filipenses 4:​19, ¿la kinkamakgtayayan Jehová?

⁷ (Kalikgalhtawakga Filipenses 4:19). Jehová ni kajwatiya kinkapulalinan, na kinkasikulunatlawayan xlakata lu liskujaw nakgalhiyaw tuku maklakaskinaw, chuna la liwat, lhakgat, chu niku natawilayaw (Mat. 6:33; 2 Tes. 3:12). Putum akinin lilakgaputsayaw tuku maklakaskinaw, pero Jehová kinkawaniyan pi ni lu snun kalilakgaputsaw uma (Mat. 6:25). ¿Tuku xlakata? Xlakata kinTlatkan xalak akgapun kinkamalaknuninitan pi nikxni katikamakgxtakgli xlakskujnin (Mat. 6:8; Heb. 13:5). Liwana kakatsiw pi xla namakgantaxti tuku malaknunit chu nakinkamaxkiyan tuku maklakaskinaw.

8. ¿La makgtayalh Jehová David?

⁸ Kalilakpuwaw la Jehová makgtayalh David akxni mapakgsina Saúl xputsastalanima. Putum uma kilhtamaku, Jehová kamaxkilh David chu ksoldados putum tuku xmaklakaskinkgo. Akxni David xlilakpuwama putum tuku xtitaxtunit, tsokgwililh: «Kgawasa xakwanit chu la uku klina kata, pero nikxni kakxilhnit pi akgxtakgmakgankanit tiku xa’akgstitum chu nipara xkamanan skiwampulakgo kaxtalanchu» (Sal. 37:25). Max wix na akxilhnita la maxkinitan Jehová putum tuku maklakaskinita o la kamaxkinit natalan tuku maklakaskinkgo.

9. ¿La kamakgtaya Jehová xlakskujnin tiku lamakgo niku wi tuku masputunalh? (Na kaʼakxilhti dibujos).

⁹ Jehová na kamaxki tuku maklakaskinkgo xlakskujnin akxni wi tuku masputunan. Kalilakpuwaw tuku lalh kxapulana siglo. Kstalaninanin Cristo tiku xlamakgo kJerusalén ni xkgalhikgo tuku xmaklakaskinkgo xlakata xʼanan tatsinkstat, pero natalan xalak alakatanu kachikinin kamalakgachanikgolh tamakgtay (Hech. 11:​27-30; Rom. 15:​25, 26). Kkinkilhtamakujkan, xkachikin Dios nachuna tlawakgo. Xlakata Jehová kinkapaxkiyan, akxni wi tuku masputunan, kamalakpuwani natalan xlakata nakalinikgo liwat, chuchut, lhakgat chu likuchun natalan tiku lamakgo niku wi tuku masputunalh. Na wilakgo natalan tiku makgtayanankgo xlakata nakakaxtlawanikan xchikkan kinatalankan o Pukgalhtawakga nema lakxlakgolh. Chu xkachikin Jehová tunkun lakkaxwilikgo tuku natlawakan xlakata tlan nakamamakgkatsinikan chu nakamatliwakglhnikan xtakanajlakan kinatalankan tiku makgatsankgakgolh xchikkan o nilh chatum tiku xalak xfamilia.c

10, 11. ¿Tuku masiyaniyan tuku titaxtulh Boris?

¹⁰ Jehová lu xalakgalhamanina chu na kamaxki tuku maklakaskinkgo tiku ni skujnanikgo. Akinin stalaniyaw xliʼakxilhtit chu kamakgtayayaw latamanin tiku ni xtatayananin litaxtukgo (Gál. 6:10). Xlakata chuna tlawayaw, lhuwa latamanin lakgapaskgonit xaxlikana. Kaʼakxilhwi tuku titaxtulh Boris, chatum director xalak escuela kʼUcrania. Maski xla ni xtatayana Jehová, ankgalhin tlan kalikatsininit kamanan tiku xtatayananin Jehová litaxtukgo. Akxni tsukulh guerra kʼUcrania, xla taxtulh niku xlama chu alh latama alakatanu niku ni lu kalipekua xwanit, chu natalan lu makgtayakgolh. Titaxtulh kilhtamaku, Boris kilalh ktamakxtumit akxni lakapastakka akxni tinilh Cristo. Chu akxni lilakpuwan la makgtayakgolh natalan, Boris wan: «Xtatayananin Jehová lu kimakgtayakgolh chu lu kinkuentajtlawakgolh. Lu kkapaxtikatsini».

¹¹ Putum akinin tlan nastalaniyaw xliʼakxilhtit kinTlatkan xalak akgapun chu nakamakgtayayaw tiku maklakaskinkgo tamakgtay, maski ni xtatayananin Jehová (Luc. 6:​31, 36). Liwana katsiyaw pi akxni kalimasiyaniyaw tapaxkit, max nakamakgpuwantini tlakg nalakgapasputunkgo Jehová chu akxtum nakinkataskujnanikgoyan (1 Ped. 2:12). Pero maski nichuna xtlawakgolh, tlan namakgkatsiyaw xlakata katsiyaw pi akxni mastayaw xlikana paxuwayaw (Hech. 20:35).

JEHOVÁ KINKAKUENTAJTLAWAYAN

12. ¿Tuku malaknunit Jehová pi natlawa xpalakata putum xkachikin? (Salmo 91:​1, 2, 14).

¹² (Kalikgalhtawakga Salmo 91:​1, 2, 14). Jehová malaknunit pi nakakuentajtlawa xlakskujnin xlakata nitu nalaktlawa xtakanajlakan. Nikxni katimastalh talakaskin pi Satanás nalaktlawa xaskulunku takaknin (Juan 17:15). Chu liwana katsiyaw pi akxni natsuku «lhuwa tapatin», Jehová namakgantaxti tuku malaknunit: nikxni katimastalh talakaskin pi wi tuku nalaktlawa xtakanajlakan xlakskujnin chu nakalakgmaxtu (Apoc. 7:​9, 14).

13. ¿La kinkakuentajtlawayan Jehová chatunu xlakskujnin?

¹³ ¿Chu la kinkakuentajtlawayan Jehová chatunu chatunu xlakskujnin? Pulaktum tuku limaklakaskin wa Biblia xlakata nakinkamakgtayayan nakatsiyaw tuku tlan chu tuku nitlan (Heb. 5:14). Akxni lilatamayaw xtastakyaw Biblia, xtachuna la xlimaklakaskiw akgtum escudo nema kinkamakgtayayan nitu nakinkaʼakgspulayan kkilatamatkan chu kkintakanajlakan (Sal. 91:4). Atanu tuku Jehová maklakaskin xlakata nakinkakuentajtlawayan wa congregación (Is. 32:​1, 2). Akxni akxtum katalayaw tiku paxkikgo Jehová chu kgalhakgaxmatkgo, kinkamakgpuwantiniyan chu kinkamakgtayayan nalakgmakganaw tuku nitlan (Prov. 13:20).

14. 1) ¿Tuku xlakata Jehová ni ankgalhin katimapanulh tuku nitlan kinkaʼakgspulayan? 2) ¿Tuku kinkamasiyaniyan Salmo 9:10? (Na kaʼakxilhti nota).

¹⁴ Makgasa, milh kilhtamaku Jehová kakuentajtlawalh xlakskujnin xlakata nitu xkaʼakgspulalh, pero ni ankgalhin chuna tlawalh. Biblia masiya pi kimputumkan max wi «tuku kaj xalan» nakinkaʼakgspulayan (Ecl. 9:11). Chu xtachuna la makgasa, la uku, Jehová na masta talakaskin pi xlakskujnin nakaputsastalanikan o asta max nanikgo. ¿Tuku xlakata? Xlakata nalimasiya pi Satanás chatum akgsanina (Job 2:​4-6; Mat. 23:34). Jehová ni ankgalhin katimapanulh tuku nitlan kinkaʼakgspulayan, pero liwana katsiyaw pi nikxni kintikamakgxtakgni (Sal. 9:10).d

JEHOVÁ TLAN KINKAMAMAKGKATSINIYAN

15. ¿La limaklakaskin Jehová xTachuwin, natalan chu oración xlakata tlan nakinkamamakgkatsiniyan? (2 Corintios 1:​3, 4).

¹⁵ (Kalikgalhtawakga 2 Corintios 1:​3, 4). Min kilhtamaku putum akinin nitlan makgkatsiyaw, lipuwanaw o lu lakgaputsayaw. Max la uku titaxtumaw tuku lu lilakgaputsayaw chu makgkatsiyaw pi kiʼakstukan wilaw. Maski lakpuwanaw pi niti akgatekgsa tuku lakpuwamaw o tuku makgkatsimaw, Jehová kinkaʼakgatekgsniyan. Chu xla ni kajwatiya kinkaʼakgatekgsniyan, wata nachuna «tlan kinkamamakgkatsiniyan xliputum taʼakglhuwit nema titaxtuyaw». ¿La tlawa? Limaklakaskin Biblia, natalan chu oración. Akxni likgalhtawakgayaw xTachuwin, akxilhaw pi lu kinkapaxkiyan, kinkamaxkiyan laktlan tastakyaw chu tlan makgkatsiyaw xlakata liwana katsiyaw pi nakgalhiyaw tlakg xatlan latamat. Akxni anaw ktamakxtumit, tlan makgkatsiyaw xlakata akxtum katatawilayaw kinatalankan, chu kgaxmataw tuku wan Biblia nema kinkamakgtayayan. Chu akxni tlawaniyaw oración Jehová, xla kinkamaxkiyan «takaksni nema latamanin nila akgatekgskgo» (Filip. 4:​6, 7).

16. ¿Tuku masiyaniyan tuku titaxtukgolh Nathan chu Priscilla?

¹⁶ Xlakata naʼakxilhaw la limaklakaskin Jehová xTachuwin xlakata tlan nakinkamamakgkatsiniyan chu nakinkamatliwakglhan, kaʼakxilhwi tuku titaxtukgolh Nathan chu Priscilla, tiku lamakgo kʼEstados Unidos. Xlakan xʼankgonit makgtayanankgo niku tlakg xtalakaskin pi xlichuwinanka Dios. Nathan wan: «Liwana xakkatsi pi Jehová xʼama kinkasikulunatlawayan». Pero akxni chankgolh kxasasti xcongregaciónkan, tsukukgolh tatatlakgo chu ni xkgalhikgo tumin. Wa xlakata, taspitkgolh kxkachikinkan pero chuntiya xtitaxtumakgo tuku tuwa xlakata ni xkaʼakchani xtuminkan. Nathan wan: «Ktsukulh lilakpuwan tuku xlakata Jehová ni xkinkasikulunatlawanitan chuna la xaklakpuwanitaw. Asta ktsukulh lakpuwan pi max wi tuku nitlan xaktlawanit». Pero titaxtulh kilhtamaku, Nathan chu Priscilla akxilhkgolh pi Jehová nitu xkamakgxtakgnit. Nathan wan: «Maski xaktitaxtumaw uma tuku lu tuwa, akxni xaklikgalhtawakga Biblia xtachuna la xakkgaxmatnima chatum kiʼamigo tiku xkimatliwakglhma chu xkimaxkima laktlan tastakyaw. Nialh wa lu klilakpuwaw tuku xaktitaxtumaw, wata ktsukuw lilakpuwanaw la xkinkamakgtayaman Jehová naktayaniyaw. Chu putum uma kinkamakgtayanitan nakkatsiyaw tuku naktlawayaw akxni naktitaxtuyaw tuku tlakg tuwa».

17. ¿Tuku tlawalh Jehová xlakata tlan xmamakgkatsinilh Helga? (Na kaʼaxilhti dibujos).

¹⁷ Chuna la akxilhwi, kinatalankan na tlan nakinkamamakgkatsinikgoyan. Kalichuwinaw tuku titaxtulh Helga, tiku lama kʼHungría. Akglhuwa kata, xla lhuwa tuku tuwa titaxtulh nema lu nitlan xmamakgkatsini chu xlilakgaputsa. Pero la uku, akxni lilakpuwan kilhtamaku akxni xtitaxtuma tuku lu tuwa, wan pi Jehová ankgalhin kamaklakaskilh natalan xlakata tlan xmamakgkatsinilh. Xla wan: «Jehová ankgalhin kimakgtayanit akxni nialh xakkgalhi litliwakga chu nialh xakkatsi tuku naktlawa: kiliskujat xwanit, kilikuentajtlawat xwanit kinkgawasa tiku xtatatla chu xakkgalhi atanu taʼakglhuwit. Titaxtunita 30 kata, chu putum uma kilhtamaku kkakxilhnit pi Jehová ankgalhin tlan kimamakgkatsininit, nikxni kimakgxtakgnit. Makglhuwa kamaklakaskilh natalan xlakata xlakan xkiwanikgolh laktlan tachuwin, xkiwanikgolh pi xkimpaxkikgo chu tlan xkimamakgkatsinikgolh. Xkimalakgachanikgo mensajes, maktum tarjeta o xkiwanikgo laktlan tachuwin akxni tlakg xakmaklakaskima».

18. ¿Tuku tlan natlawayaw xlakata tlan nakamamakgkatsiniyaw amakgapitsin?

¹⁸ Kgalhiyaw lanka talakgalhaman pi tlan nastalaniyaw xliʼakxilhtit kiDioskan chu tlan nakamamakgkatsiniyaw amakgapitsin. ¿Tuku tlan natlawayaw? Nakakgaxmatniyaw, nakalimatliwakglhaw kintachuwinkan chu nakamakgtayayaw (Prov. 3:27). Chu ni kajwatiya kinatalankan tlan kamamakgkatsiniyaw, wata nachuna putum latamanin tiku patinamakgo, asta tiku nina skujnanikgo Jehová. Komo titaxtumakgo tuku tuwa, komo kgalhikgo akgtum tajatat o nilh tiku xalak xfamiliajkan, anaw kalakgapaxialhnanaw, kakgaxmatniyaw chu kalimatliwakglhaw tuku wan Biblia. Komo nastalaniyaw xliʼakxilhtit «Dios tiku tlan kamamakgkatsini latamanin xliputum tuku titaxtukgo», ni kajwatiya katikamakgtayaw kinatalankan natayanikgo tuku tuwa titaxtumakgo, wata nachuna namakgtayananaw pi latamanin tiku nina skujnanikgo Jehová nalakgapasputunkgo (Mat. 5:16).

JEHOVÁ NIKXNI KINTIKAMAKGXTAKGNI

19. ¿Tuku tlawa Jehová kimpalakatakan, chu la tlan nastalaniyaw xliʼakxilhtit?

¹⁹ Jehová kinkalilakgaputsayan putum akinin tiku paxkiyaw chu ni kinkamakgxtakgan akxni titaxtuyaw tuku tuwa. Kinkakuentajtlawayan chu kinkapaxkiyan xtachuna la chatum tlat kuentajtlawa chu paxki aktsu xkgawasa. Kinkapulalinan, kinkamaxkiyan tuku maklakaskinaw, kinkakuentajtlawayan chu tlan kinkamamakgkatsiniyan. Chu akinin na tlan nastalaniyaw xliʼakxilhtit komo nakamakgtayayaw chu nakamatliwakglhaw tiku titaxtumakgo tuku tuwa. Maski lhuwa tuku tuwa natitaxtuyaw kkilatamatkan, liwana kakatsiw pi Jehová nikxni kintikamakgxtakgni, xlakata xla kinkamalaknuninitan: «Ni kapekuanti, xlakata akit ktawilan» (Is. 41:10). ¡Lu tlan limakgkatsiyaw pi Jehová nikxni kiʼakstukan kinkamakgxtakgan!