¿Tuku militlawat xlakata nalipaxuwaya tuku kgalhiya?

1. ¿Tuku wamputun pi nalipaxuwayaw tuku kgalhiyaw chu tuku ni wamputun?

¿LIPAXUWAYA wix tuku kgalhiya? Komo chuna, wamputun pi paxuwaya chu ni lu lakgaputsaya, xlakata wa lilakpuwana tasikulunalin nema kgalhiya chu ni wa lilakpuwantawilaya tuku ni kgalhiya. Pero nalipaxuwayaw tuku kgalhiyaw, ni wamputun pi nialh kuenta natlawayaw chuna la linaw kilatamatkan. Lu xlakaskinka pi naliskujaw tlakg naskujnaniyaw Jehová (Rom. 12:1; 1 Tim. 3:1). Pero komo xlikana lipaxuwayaw tuku kgalhiyaw, ni katilisitsiw komo la uku ni kinkalakgayawakanan taskujut o talakgatay nema lakaskinaw kxkachikin Jehová.

2. ¿Tuku xlakata lu nitlan kitaxtu akxni nialh lipaxuwayaw tuku kgalhiyaw?

² Komo ni lipaxuwayaw tuku kgalhiyaw, max tsinu tsinu xtsukuw tlawayaw tuku lu nitlan. Kalilakpuwaw uma, wi tiku lu lhuwa horas skujkgo xlakata natamawakgo tuku ni maklakaskinkgo. Asta makgapitsi natalan kgalhankgonit tumin chu atanu tuku xtapalh nema xlakan xkgalhiputunkgo. Max lakpuwankgolh: «Kilakgchan nakkgalhi uma», «Nialh kkgalhkgalhiputun» o «Tlan naklin uma tumin chu alistalh naklakgxokgo». Pero Jehová ni lakgati pi nakgalhananaw xlakata maxkajwi xtukuwani (Prov. 30:9). Amakgapitsin natalan, lu lilipuwankgonit xlakata ni kamaxkikanit talakgatay nema xlakaskinkgo chu wa xlakata nialh skujnanikgo Jehová (Gál. 6:9). ¿Pero tuku xlakata chatum kskujni Jehová kilakpuwan natlawa uma? Max xlakata tsinu tsinu nialh lipaxuwalh tuku xkgalhi.

3. ¿Tuku kinkamasiyaniyan Filipenses 4:​11, 12?

³ Max tuwa nalipaxuwayaw tuku kgalhiyaw, pero tlan nakatsiniyaw chuna natlawayaw. Apóstol Pablo “katsinilh nalipaxuwa tuku xkgalhi maski tanu tanu tuku xtitaxtuma” (kalikgalhtawakga Filipenses 4:​11, 12). Akxni Pablo tsokgwililh umakgolh tachuwin, kpulachin xwi, pero xla chuntiya xpaxuwa. Tuku Pablo wa chu tuku titaxtulh kinkalimasiyaniyan pi putum akinin tlan nalipaxuwayaw tuku kgalhiyaw maski tuwa makgkatsiyaw chuna natlawayaw. ¿Tuku nakinkamakgtayayan nalipaxuwayaw tuku kgalhiyaw? Kʼuma artículo nalichuwinanaw pulaktutu tuku nakinkamakgtayayan.

KAPAXTIKATSININAW

4. ¿La kinkamakgtayayan akxni paxtikatsininanaw? (1 Tesalonicenses 5:18).

⁴ Komo lu napaxtikatsiniyaw Dios tuku kgalhiyaw, tlakg napaxuwayaw (kalikgalhtawakga 1 Tesalonicenses 5:18). Kalilakpuwaw uma, komo xlikana paxtikatsiniyaw Jehová xlakata kgalhiyaw tuku maklakaskinaw, ni wa katililakpuwantawilaw tuku ni kgalhiyaw. Komo xtapalh liʼakxilhaw xlakata la uku tlan skujnaniyaw Jehová, natlawayaw putum tuku matlaniyaw xlakata tlakg tlan chuna natlawayaw chu ni wa katililakpuwantawilaw talakgatay nema lakaskinaw pi xkinkamaxkikan. Wa xlakata Biblia kinkawaniyan pi kapaxtikatsiniw Jehová kkiʼoracioneskan. Akxni paxtikatsiniyaw Dios, kgalhiyaw «takaksni nema latamanin nila akgatekgskgo» (Filip. 4:​6, 7).

5. ¿Tuku xtlawanit Jehová xpalakatakan israelitas nema tlan xtilipaxtikatsinikgolh? (Na kaʼakxilhti dibujo).

⁵ Kalilakpuwaw tuku tlawakgolh israelitas. Makglhuwa litaʼakglhuwinikgolh Jehová xlakata xlakapastakkgo liwat nema xkgalhikgo kʼEgipto (Núm. 11:​4-6). Xlikana pi kdesierto ni kalilakgatit xwanit. Pero komo wa xtililakpuwankgolh tuku Jehová xtlawanit xpalakatakan, tlakg xpaxuwakgolh. Xtalakaskin xlakapastakkgolh pi skujnin xlitaxtukgo kʼEgipto chu lu nitlan xkalikatsinikan, chu pi Jehová malakgachalh pulakkaw plagas xlakata xkalakgmaxtulh. Akxni taxtukgolh kʼEgipto, israelitas «kamakglhtikgolh egipcios tuku xkgalhikgo», chuna la plata, oro chu lhakgat (Éx. 12:​35, 36). Nachuna, Jehová maklakaskilh xlitliwakga xlakata xmapapitsilh xaSpinini pupunu chu chuna tlan xkatsalanikgolh ksoldados faraón. Chu akxni xlamakgo kdesierto, kamaxkilh maná xlakata xkalimawilh chali chali. ¿Pero tuku xlakata ni xpaxuwakgo? Ni wa xlakata xkatsankgani liwat, wata ni xpaxuwakgo xlakata ni xpaxtikatsinikgo Jehová putum tuku xtlawanit xpalakatakan.

6. ¿Tuku nakinkamakgtayayan napaxtikatsininanaw?

⁶ ¿Tuku nakinkamakgtayayan napaxtikatsininanaw? Pulana, kalimaxtuw kilhtamaku chali chali xlakata nalilakpuwanaw tuku tlan kgalhiyaw. Max tlan natsokgwiliyaw pulaktiy o pulaktutu tuku paxtikatsiniputunaw Jehová (Lam. 3:​22, 23). Xlipulaktiy, chali chali kakapaxtikatsiniw amakgapitsin tuku tlawakgo kimpalakatakan. Pero tiku tlakg kilipaxtikatsinitkan wa Jehová (Sal. 75:1). Xlipulaktutu, kakatalaliw tiku na paxtikatsininankgo xlakata nachuna nalikatsiyaw (Deut. 1:​26-28; 2 Tim. 3:​1, 2, 5). Komo nalakputsayaw la tlan napaxtikatsininanaw, nakinkamakgtayayan ni nalisitsiyaw tuku ni kgalhiyaw.

7. ¿Tuku makgtayalh Aci tlakg napaxuwa?

⁷ Aci, chatum tala puskat tiku lama kʼIndonesia, wan: «Kpandemia xla COVID-19, ktsukulh tamalakxtumi tuku akit xaktitaxtuma chu tuku xtitaxtumakgo amakgapitsin natalan, chu uma tlawalh pi nialh xakpaxuwalh» (Gál. 6:4). ¿Tuku makgtayalh Aci? Xla wan: «Ktsukulh lilakpuwan tasikulunalin nema kimaxki Jehová chali chali chu tuku tlan xakkgalhi xlakata kmakgtapakgsi kxkachikin. Wa xlakata kpaxtikatsinilh Jehová, chu uma kimakgtayalh tlakg nakpaxuwa». Komo natlawayaw chuna la uma tala, nakinkamakgtayayan napaxuwayaw maski tuwa tuku titaxtumaw.

KATAKTUJUW

8. ¿Tuku akgspulalh Baruc?

⁸ Milh kilhtamaku, ksecretario palakachuwina Jeremías tiku xwanikan Baruc, nialh lipaxuwalh tuku xkgalhi. Xtaskujut lu tuwa xwanit, xlimakgtayat xwanit Jeremías xlakata xkamakatsinilh israelitas tuku nitlan xʼama kaʼakgspula xlakata ni xkgalhakgaxmatkgonit Jehová. Baruc nialh lakapastakli pi tuku tlakg xlakaskinka xwanit wa pi xtlawalh tuku Jehová xlakaskin, chu wa tlakg tsukulh lilakgaputsa tuku xkgalhiputun chu tuku xtlawaputun. Jehová maklakaskilh palakachuwina Jeremías xlakata xwanilh Baruc: «Pero wix lhuwa tuku putsapat kaj mimpalakata. Nialh kaputsa uma» (Jer. 45:​3-5, La Biblia. Traducción del Nuevo Mundo, TNM). O xtachuna la Jehová xwanilh: «Kalipaxuwa tuku kgalhiya». Baruc makgamakglhtinalh tastakyaw chu uma makgtayalh chuntiya xtalalilh Jehová.

9. ¿Tuku kinkamasiyaniyan 1 Corintios 4:​6, 7? (Na kaʼakxilhti dibujos).

⁹ Max namin kilhtamaku chatum tala nalakpuwan pi lakgchan wi tuku nalakgayawakan kxkachikin Jehová. Max lhuwa tuku katsini tlawa, lu palha skuja o max akglhuwata kata skujnanima Jehová. Maski chuna, max amakgapitsin natalan nakamaxkikan tuku xla makglhtinamputun. ¿Tuku namakgtaya ni nalisitsi? Tlan nalilakpuwan tuku wa apóstol Pablo k1 Corintios 4:​6, 7 (kalikgalhtawakga). Putum tuku kgalhiyaw wa Jehová kinkamaxkinitan, chu putum tuku katsiniyaw tlawayaw wa Jehová kinkamakgtayanitan. Ni kililakpuwanatkan pi kinkalakgchanan uma. Jehová kinkamaxkiyan umakgolh tamaskiwin xlakata kinkalakgalhamanan chu kinkapaxkiyan (Rom. 12:​3, 6; Efes. 2:​8, 9).

10. ¿Tuku nakinkamakgtayayan nataktujuyaw?

¹⁰ Komo nalilakpuwanaw xliʼakxilhtit Jesús, nakinkamakgtayayan nataktujuyaw. Kalakapastakwi pi xla katuchakgelh xtamakgalhtawakgen maski xkatsi pi xKgawasa Dios xwanit chu xkgalhi lhuwa limapakgsin. Apóstol Juan lichuwinalh pi maski «Jesús xkatsi pi xaTlat putum xmakamaxkinit kxmakan, chu pi wa Dios xmalakgachanit, chu wa xlakgamapa, […] tsukulh kachakgeni xtantunkan xtamakgalhtawakgen» (Juan 13:​3-5). Jesús tlan xtilakpuwa pi wa xtamakgalhtawakgen xkalakgchan xtuchakgekgolh. Pero nikxni lakpuwa pi xlakgchan xlakskujnika o pi lhuwa tuku xlikgalhit xwanit (Luc. 9:58). Xla xtaktuju, chu wa xlakata xlipaxuwa tuku xkgalhi. Jesús kinkawilinin lu tlan liʼakxilhtit (Juan 13:15).

11. ¿Tuku makgtaya Dennis tlakg napaxuwa?

¹¹ Dennis, chatum tala chixku xalak Países Bajos wan pi lu liskuja xlakata nataktuju chuna la Jesús, pero min kilhtamaku tuwa makgkatsi. Xla wan: «Akxni kakxilha pi atanu maxkikan talakgatay nema xaklakaskin, klisitsi tsinu xlakata klakpuwan pi akit xkilakgchan. Akxni chuna kiʼakgspula, ktsuku klakputsanani tuku wan Biblia xlakata taktujut. Kʼaplicación JW Library^® kkawilininit etiquetas makgapitsi textos nema lichuwinankgo xlakata taktujut, xlakata lakapala nakkatekgsa chu nakkalikgalhtawakgapara. Na kmaktinit makgapitsi taʼakgchuwin nema lichuwinankgo xlakata taktujut chu tunkun kkakgaxmata.a Putum uma kimasiyaninit pi tuku ktlawa, xlimalankit Jehová chu ni wata akit nakimalankikan. Taskujut nema tlawayaw wa tapakgsini Jehová chu xla kinkamaxkiyan talakaskin namakgtayayaw». Komo namin kilhtamaku namakgkatsiyaw chuna la Dennis, kaliskujwi xlakata tlakg nataktujuyaw. Komo chuna natlawayaw, tlakg tlan natalalinaw Jehová chu tlakg napaxuwayaw (Sant. 4:​6, 8).

KALILAKPUWAW TUKU KGALHKGALHIMAW

12. ¿Tuku nakinkamakgtayayan nalipaxuwayaw tuku kgalhiyaw la uku? (Isaías 65:​21-25).

¹² Komo nalilakpuwanaw tuku Jehová kinkamalaknuninitan, nakinkamakgtayayan tlakg nalipaxuwayaw tuku kgalhiyaw la uku. Libro xla Isaías kinkamasiyaniyan pi Jehová akgatekgsa pi kilatamatkan la uku lu tuwa, pero anta na wan pi namasputu putum kintaʼakglhuwitkan (kalikgalhtawakga Isaías 65:​21-25). Kxasasti kakilhtamaku, kimputumkan nakgalhiyaw xalakstlan chiki chu putum tuku maklakaskinaw, nakgalhiyaw xatlan taskujut chu xalakgkgama liwat nema ni kintikamakgatatatlan. Nialh katililakgaputsaw pi nakinkaʼakgspulayan tuku nitlan o pi kinkamanankan nakaʼakgspula tuku nitlan (Is. 32:​17, 18; Ezeq. 34:25). Tuku Jehová kinkamalaknuninitan lu tlan chu xlikana nakgantaxtu.

13. ¿Tuku kilhtamaku tlakg xlakaskinka nalilakpuwanaw tuku Jehová kinkamalaknuninitan?

¹³ ¿Tuku xlakata la uku tlakg xlakaskinka nalilakpuwanaw tuku kgalhkgalhimaw pi nakgantaxtu? Xlakata lamaw «kxaʼawatiya kilhtamaku» chu putum titaxtuyaw tuku «lu tuwa» (2 Tim. 3:1). Jehová kinkapulalinan chu kinkamaxkiyan litliwakga xlakata natayaniyaw chali chali (Sal. 145:14). Nachuna, tamalaknun nema kinkatlawaninitan Jehová pi nalimin akgtum xasasti kakilhtamaku, kinkamakgtayayan natayaniyaw akxni titaxtuyaw tuku tuwa. Max la uku talakaskin palha naskujaw xlakata nakamaxkiyaw kifamiliajkan tuku maklakaskinkgo o xlakata nakinkaʼakchaniyan tumin. Pero katsiyaw pi uma ni putum kilhtamaku chuna katiwa, xlakata Jehová kinkamalaknuninitan pi kParaíso lhuwa tuku nakinkamaxkiyan, chu ni kajwatiya tuku maklakaskinaw (Sal. 9:18; 72:​12-14). O max la uku kinkamakgapatinaman akgtum xasnun tajatat, kgalhiyaw takatsanajwat o kgalhiyaw tajatat xla talipuwan. Pero ni putum kilhtamaku chuna katimakgkatsiw, xlakata Dios malaknunit pi kxasasti kakilhtamaku nialh katiʼanalh tajatat nipara linin (Apoc. 21:​3, 4). Umakgolh tamalaknun kinkamakgtayayan nialh lu nalilakgaputsayaw chu ni nalisitsiyaw tuku titaxtumaw. Maski kinkatlawanikanan tuku nitlan, tatatlayaw, niy tiku lu xpaxkiyaw o kaxatukawa atanu tuku tuwa titaxtuyaw, tlan napaxuwayaw xlakata katsiyaw pi tuku titaxtumaw ni putum kilhtamaku katimakgapalalh chu katsiyaw pi kxasasti kakilhtamaku tapatin namalakgsputukan (2 Cor. 4:​17, 18).

14. ¿Tuku tlan natlawayaw xlakata tlakg nakanajlayaw tuku kgalhkgalhimaw nakgantaxtu?

¹⁴ Xlakata takgalhkgalhin lu kinkamakgtayayan nalipaxuwayaw tuku kgalhiyaw la uku, ¿tuku tlan natlawayaw xlakata tlakg nakanajlayaw pi nakgantaxtu? Kintakgalhkgalhinkan xtachuna la lentes nema kinkamakgtayayan naʼakxilhlakachanaw la nawan kilatamatkan kParaíso. Wa xlakata komo lilakgaputsayaw xlakata ni kinkaʼakchaniyan tumin, tlan nalilakpuwanaw la nawan kilatamatkan akxni nialh nalimaklakaskinaw tumin, nialhtu nalaklinaw chu nialh naʼanan talimaxkget. Komo lisitsiyaw tsinu xlakata ni kinkamaxkikanitan akgtum taskujut o talakgatay kxkachikin Jehová, kalilakpuwaw pi uma nialhpara tsinu katililakgaputsaw akxni nialh nakgalhiyaw talakgalhin chu akxni akglhuwata kata la skujnanimaw nawan Jehová (1 Tim. 6:19). Max la uku tuwa makgkatsiyaw nalilakpuwanaw Paraíso xlakata kgalhiyaw lhuwa taʼakglhuwit. Pero komo tlakg nalimaxtuyaw kilhtamaku nalilakpuwanaw uma, tsinu tsinu nialh tuwa katimakgkatsiw naʼakxilhlakachanaw.

15. ¿Tuku kinkamasiyaniyan xliʼakxilhtit Christa?

¹⁵ Kalichuwinaw tuku kinkamasiyaniyan xliʼakxilhtit Christa, xpuskat Dennis, tiku lichuwinaw kpárrafo 11. Christa wan: «Kkgalhi akgtum tajatat nema chali chali tlakg maxlajwani kimakni, wa xlakata kmaklakaskin silla de ruedas. Ankgalhin kma kputama chu ankgalhin kkatsanajwa. Nina makgas makuchina kiwanilh pi nialh ktipaksli. Pero akit ni klilipuwa, xla ni katsi tuku akit kkgalhkgalhima kkilhtamaku nema aku mima. Chu uma kimakgtaya ni lu naklakgaputsa. La uku ni anan atanu tuku tlan naktlawa, kajwatiya naktayani, ¡pero kkatsi pi kxasasti kakilhtamaku lu nakpaxuwa!».

«NITU KATSANKGANI TIKU PEKUANIKGO» JEHOVÁ

16. ¿Tuku xlakata David wa pi «nitu katsankgani tiku pekuanikgo» Jehová?

¹⁶ Maski liskujaw nalipaxuwayaw tuku kgalhiyaw la uku, katsiyaw pi natitaxtuyaw tuku tuwa. Kalilakpuwaw mapakgsina David, nikgolh kgalhtutu xlakgkgawasan, limawakaka tuku nitlan, makgxtakgkgolh tiku xla xkalipawan chu akglhuwa kata putsastalanika xlakata xmakgniputunkan. Maski chuna, David xpaxuwa. Wa uma tuku wa xpalakata Jehová: «Nitu katsankgani tiku pekuanikgo» (Sal. 34:​9, 10, TNM). Chuna wa xlakata xkatsi pi maski Jehová ni malakgachokgo tuku tuwa kinkalakgchinan, xla ankgalhin kinkamaxkiyan tuku maklakaskinaw (Sal. 145:16). Xtachuna la David, akinin na paxuwayaw xlakata liwana katsiyaw pi Jehová nakinkamakgtayayan kaxatukawa tuku natitaxtuyaw.

17. Kalichuwinanti tuku xlakata wix katsiniputuna nalipaxuwa tuku kgalhiya maski tanu tanu tuku natitaxtuya.

¹⁷ Jehová lakaskin pi kapaxuwaw maski tanu tanu tuku titaxtuyaw (Sal. 131:​1, 2). Kʼuma artículo katsininitaw tuku nakinkamakgtayayan. Wa xlakata kaliskujwi napaxtikatsiniyaw Jehová chu amakgapitsin tuku tlawakgo kimpalakatakan. Na kaliskujwi xlakata nataktujuyaw chu nalilakpuwanaw tuku kgalhkgalhimaw nakgantaxtu. Komo chuna natlawayaw, na tlan nawanaw: «Kkatsininit naklipaxuwa tuku kkgalhi» (Filip. 4:11).