Tunkun kakamakgtayaw tiku lakgapasputunkgo Dios

1. ¿Tuku tlawakgo latamanin akxni kalitachuwinanaw Dios? (Hechos 13:​47, 48; 16:​14, 15).

KXAPULANA siglo, lhuwa latamanin tunkun makgamakglhtinankgolh xaxlikana akxni kalitachuwinanka (kalikgalhtawakga Hechos 13:​47, 48; 16:​14, 15). La uku, na anankgo latamanin tiku tunkun makgamakglhtinankgo xatlan tamakatsinin. Chu wilakgo makgapitsi tiku xapulana max ni makgamakglhtinamputunkgo xaxlikana, pero alistalh katsiniputunkgo xlakata Dios. ¿Tuku kilitlawatkan akxni katekgsaw latamanin tiku “makgamakglhtinamputunkgo xaxlikana”?

2. ¿Tuku xlakata wanaw pi akxni lichuwinanaw Dios xtachuna la akxni chanananaw?

² Akxni lichuwinanaw Dios xtachuna la akxni wi tuku chanaw. Akxni chatum chanana chan chu kuentajtlawa tuku chanit, max naʼakxilha pi akgatum kiwi kgalhiya xachan xtawakat. Wa xlakata tunkun an chu puxa. Xtachuna la uma, akxni liskujmaw xlakata nakamakgtayayaw latamanin naʼakgatekgskgo pi lhuwa xtapalh tuku masiya Biblia, max nakitekgsaw chatum tiku tunkun namakgamakglhtinamputun xaxlikana. Wa xlakata, katlawaw putum tuku matlaniyaw xlakata namakgtayayaw (Juan 4:​35, 36). Komo kuenta natlawayaw, naʼakxilhaw tiku talakaskin tsinu tsinu nalitachuwinanaw Biblia chu tiku tunkun namakgamakglhtinamputun xaxlikana. Kʼuma artículo nalichuwinanaw tuku tlan natlawayaw komo natekgsaw tiku tunkun namakgamakglhtinamputun xaxlikana. Na nalichuwinanaw tuku kilitlawatkan xlakata chuntiya natatliwakglha xtakanajla.

KOMO TIKU TACHUWINAMAW TLAKG KATSIPUTUN

3. Komo akxni lichuwinamaw Dios tekgsaw tiku tlakg katsiputun xaxlikana, ¿tuku kilitlawatkan? (1 Corintios 9:26).

³ Komo akxni lichuwinamaw Dios tekgsaw tiku tlakg katsiputun xaxlikana, tunkun kamakgtayaw xlakata natsuku tlawan ktiji nema linan klatamat. Ni kakgalhkgalhiw natitaxtu kilhtamaku, tunkun kamalaknuniw takgalhtawakga xalak Biblia chu kawaniw pi kaʼalh ktamakxtumit (kalikgalhtawakga 1 Corintios 9:26).

4. Kalichuwinanti tuku limasiya pi wilakgo tiku tunkun makgamakglhtinankgo akgtum takgalhtawakga.

⁴ Kamalaknuni takgalhtawakga xalak Biblia. Wilakgo latamanin tiku makgamakglhtinankgo takgalhtawakga xalak Biblia lata akxni xapulana katachuwinankan. Kalichuwinaw tuku lalh kCanadá. Akgtum kilhtamaku akxni jueves xwanit, chatum tsumat talakatsuwilh kcarrito chu tiyalh folleto Kalipaxuwa latamat. Tala puskat tiku xwi anta wanilh pi kalimakgalhtawakgeyaw latamanin uma folleto chu pi ni taxokgo. Tsumat wanilh pi tlakg xkatsiputun, chu wa xlakata lamaxkilh xnúmerojkan. Watiya uma kilhtamaku, tsumat malakgachanilh mensaje tala xlakata xkgalhskilh xlakata takgalhtawakga. Tala wanilh pi tlan xkgalhtawakgakgolh ksputat semana, pero tsumat kgalhtilh: «¿Chu komo xkgalhtawakgaw chali? Kkgalhi kilhtamaku». Lichali tsukukgolh likgalhtawakgakgo Biblia, chu ksputat uma semana tsumat kilalh ktamakxtumit, chu lata ama kilhtamaku lakapala tsukulh tatliwakglha xtakanajla.

5. ¿Tuku kililakapastakatkan akxni malaknuyaw takgalhtawakga xalak Biblia? (Na kaʼakxilhti dibujos).

⁵ Xlikana pi ni putum tiku nakalitachuwinanaw Dios natlawakgo chuna la uma tsumat. Kililakapastakatkan pi makglhuwa, max pulana natalakaskin nakalitachuwinanaw latamanin tuku xlakan lakgatikgo xlakata tsinu tsinu tlakg nakatsiputunkgo tuku masiyayaw. Maski chuna, komo chuntiya xatapaxuwan nakalitachuwinanaw chu nalimasiyayaw pi xlikana kamakgtayaputunaw, max ni xlimakgas namakgamakglhtinankgo akgtum takgalhtawakga. ¿Tuku tlan nawanaw akxni namalaknuyaw takgalhtawakga xalak Biblia? Wa uma tuku kakgalhskinka natalan tiku ni tuwa makgkatsikgo natsukukgo kalimakgalhtawakgekgo Biblia latamanin. Kaʼakxilhwi tuku kgalhtinankgolh.

6. ¿Tuku tlan natlawayaw xlakata lataman chuntiya nakinkamaxkiyan talakaskin nalitachuwinanaw Biblia?

⁶ Umakgolh natalan wankgolh pi kmakgapitsi kachikinin tlakg tlan ni namaklakaskinaw tachuwin takgalhtawakga xalak Biblia. Tlakg tlan kitaxtu komo nawanaw pi tlan tlakg nakalitakgalhchuwinanaw Biblia o pi tlan tlakg nalakgapaskgo Biblia. Xlakata tlan nakawaniyaw pi nakalakgtaspitparayaw, natalan wankgo pi tlan nakawaniyaw: «Lu kaks malakawaninan pi anta kBiblia tlan natekgsaw xatakgalhtin laktuwa takgalhskinin» o «Biblia ni kajwatiya lichuwinan xlakata takanajla, wata na kinkamaxkiyan laktlan tastakyaw». Chu na tlan nawaniyaw: «Maski kaj puntsu, lhuwa tuku nakatsiniya nema lu namakgtayayan». Ni talakaskin nawaniyaw pi nalakganaw akgatunu semana xlakata ni namakgapekuanaw chu ni nalakpuwan pi xafuerza talakaskin nakinkatakgalhtawakgayan akgatunu semana.

7. ¿Tuku kamakgtayanit makgapitsi latamanin nakatsikgo pi tekgskgonit xaxlikana? (1 Corintios 14:​23-25).

⁷ Kawani pi kaʼalh ktamakxtumit. Anan tuku limasiya pi kxkilhtamaku apóstol Pablo, makgapitsi latamanin katsikgolh pi xtekgskgonit xaxlikana akxni kilakgolh ktamakxtumit nema xtlawakgo kstalaninanin Cristo (kalikgalhtawakga 1 Corintios 14:​23-25). La uku nachuna la. Lhuwa latamanin, tlakg lakapala matliwakglhkgo xtakanajlakan akxni ankgo ktamakxtumit. Pero ¿tuku kilhtamaku tlan nawaniyaw chatum lataman pi kaʼalh ktamakxtumit? Klibro Kalipaxuwa latamat limin akgtum invitación ktakgalhtawakga 10, pero ni talakaskin nakgalhiyaw asta akxni nakichanaw anta. Tlan nawaniyaw pi kaʼalh ktamakxtumit nema tlawakan ksputat semana lata akxni xapulana natachuwinanaw. Max tlan nalitachuwinanaw tuku litapakuwi taʼakgchuwin nema namastakan, o tlan nalitachuwinanaw pulaktum tuku natalichuwinan kʼartículo xla revista Makatsinina xla uma semana.

8. Komo wi tiku nawaniyaw pi kaʼalh ktamakxtumit, ¿tuku talakaskin nalitachuwinanaw? (Isaías 54:13).

⁸ Akxni wi tiku nawaniyaw pi kaʼalh ktamakxtumit, kalitachuwinaw pi ni tlawayaw tuku tlawakgo amakgapitsi takanajla niku max xla kilanit. Akxni chatum puskat tiku limakgalhtawakgemaka Biblia, kilalh ktamakxtumit niku likgalhtawakgakan Makatsinina, kgalhskilh tala tiku makgalhtawakge: «Chixku tiku xtlawama takgalhskinin, ¿kalakgapasa xtukuwanikan putum tiku xwilakgo anta?». Tala wanilh pi congregación litaxtu chuna la akgtum familia. Wa xlakata kimputumkan liskujaw nakatsiyaw tuku kawanikan chatunu natalan. Uma puskat wanilh pi anta kxpusikulan ni lhuwa tiku lalakgapasa. Xtachuna la uma puskat, lhuwa latamanin max na ni katsikgo tuku xlakata tlawayaw kintamakxtumitkan, wa xlakata tlan nawan komo nakalitachuwinanaw (kalikgalhtawakga Isaías 54:13). Tamakxtumiyaw xlakata nakakninaniyaw Jehová, nakatsiniyaw xpalakata chu nalamakgpuwantiniyaw kinchatunukan (Heb. 2:12; 10:​24, 25). Wa xlakata, tuku lakkaxwilikanit nalichuwinankan ktamakxtumit, kinkamakgtayayan tlakg nakatsiniyaw tuku masiya Biblia chu ni watiya watiya tuku tlawayaw chuna la amakgapitsi takanajla (1 Cor. 14:40). Xlakata anaw katsiniyaw tuku masiya Biblia, Pukgalhtawakga katlawakanit xlakata ni kapukswa natasiya. Nachuna, xlakata ni makgtanuyaw tuku xalak kakilhtamaku, ni lichuwinanaw política chu ni tatayayaw nipara akgtum partido. Ktamakxtumit na ni lalitataʼakglhuwiyaw tuku lakpuwanaw kinchatunukan. Xlakata lataman nakatsi tuku tlawayaw kkintamakxtumitkan, tlan namasiyaniyaw video ¿Tuku tatlawa kPukgalhtawakga?

9, 10. Komo wi tiku nawaniyaw pi kaʼalh ktamakxtumit, ¿tuku tlan nalitachuwinanaw xlakata nialh napekuan chu naʼan? (Na kaʼakxilhti dibujo).

⁹ Makgapitsi latamanin ni amputunkgo ktamakxtumit xlakata lakpuwankgo pi nakawanikan pi xtatayananin Jehová kalitaxtukgolh. Wa xlakata, kawaniw tiku tachuwinamaw pi na tlan naʼankgo ktamakxtumit tiku ni xtatayananin Jehová litaxtukgo. Komo xla amputun, tlan naʼan kgaxmata tuku lichuwinamaka chu niti katiwanilh pi katlawalh tuku akinin tlawayaw o pi kalakgpalilh xtakanajla. Ni tlawakan atanu tamakxtumit niku kajwatiya kamanan ankgo, wata putum familia tlan akxtum natawilakgo xlakata nakgaxmatkgo tuku nalichuwinankan. Chuna ni talakaskin pi natlatni xʼakstukan nakamakgxtakgkgo xkamanankan (Deut. 31:12). Na ni pukikan tumin, xlakata stalaniyaw xtastakyaw Jesús: «Kaj xachunata makglhtinantit; kaj xachunata kamastatit» (Mat. 10:8). Nachuna, tlan nawaniyaw tiku tachuwinamaw pi ni talakaskin nalin xatapalaxla lhakgat, xlakata Dios ni wa akxilha la tasiyayaw, wata akxilha tuku wi kkinakujkan (1 Sam. 16:7).

¹⁰ Komo tiku tachuwinaw naʼan ktamakxtumit, tlan kalikatsiniw xlakata tlan namakgkatsi. Tlan nakamalakgapasniyaw lakgkgolotsin xalak congregación chu amakgapitsi natalan. Komo tlan namakgkatsi, max naʼamputumpara. Komo ni lin xBiblia, kamasiyaniw textos kkibibliajkan chu kamasiyaniw la naputsa tuku lichuwinamaka.

AKXNI WI TIKU LIMAKGALHTAWAKGEYAW BIBLIA

11. ¿La limasiyayaw pi xlakaskinka liʼakxilhaw xkilhtamaku tiku natsukuyaw makgalhtawakgeyaw?

¹¹ Akxni wi tiku natsukuyaw limakgalhtawakgeyaw Biblia, talakaskin nalimasiyayaw pi xlakaskinka liʼakxilhaw xkilhtamaku. Akgtum liʼakxilhtit, komo waniw tuku hora nalakganaw, kamakgantaxtiw kintachuwinkan, maski latamanin niku lamaw max ni xlakaskinka liʼakxilhkgo uma. Nachuna, akxni xapulana natakgalhtawakgayaw, ni lhuwa kilhtamaku kamakgapalaw. Makgapitsi natalan tiku lu katsinikgo makgalhtawakgenankgo, wankgo pi tlan ni namalakatsaliyaw kilhtamaku nema litalakkaxlaw, maski xla tikgalhtawakgaputun. Chu ni lhuwa kachuwinaw, kamastaw talakaskin pi wa nachuwinan (Prov. 10:19).

12. ¿Tuku lakaskinaw katlawakgolh latamanin akxni tsukuyaw kamakgalhtawakgeyaw?

¹² Akxni wi tiku tsukuyaw limakgalhtawakgeyaw Biblia lakaskinaw pi kakalakgapasli chu kakapaxkilh Jehová chu Jesús. Xlakata tlan chuna natlawayaw, talakaskin pi kBiblia nakikilhtiyayaw putum tuku nakamasiyaniyaw (Hech. 10:​25, 26). Akxni apóstol Pablo xlichuwinan Dios, ankgalhin lichuwinalh Jesucristo, tiku Jehová makamilh xlakata nakinkamakgtayayan nalakgapasaw chu napaxkiyaw (1 Cor. 2:​1, 2). Xla na wa pi lu xlakaskinka nakamakgtayayaw latamanin nakgalhikgo laktlan tayat nema lu xtapalh litaxtukgo chuna la oro, plata chu xalakstlan chiwix (1 Cor. 3:​11-15). Makgapitsi tuku xlikgalhitkan wa takanajla, liskgalala, taʼakgatekgsni chu napekuanikgo Jehová (Sal. 19:​9, 10; Prov. 3:​13-15; 1 Ped. 1:7). Kastalaniw xliʼakxilhtit Pablo chu kakamakgtayaw latamanin namatliwakglhkgo xtakanajlakan chu tlan natalalinkgo xapaxkina kinTlatkan xalak akgapun (2 Cor. 1:24).

13. ¿La nalimasiyayaw pi ni lakapala tasitsiyaw tiku makgalhtawakgemaw chu pi akgatekgsniyaw? (2 Corintios 10:​4, 5; na kaʼakxilhti dibujo).

¹³ Kastalaniw xliʼakxilhtit Jesús chu ni lakapala katasitsiw chu kaʼakgatekgsniw tiku makgalhtawakgemaw. Ni katlawaniw takgalhskinin nema nitlan namamakgkatsini. Komo akxilhaw pi wi tuku ni liwana akgatekgsa, ni katachokgow, wata kalikgalhtawakgaw tuku stala chu atanu kilhtamaku tlakg liwana nalitachuwinanaw tuku ni akgatekgsli. Chu komo wi akgtum tamasiy nema tuwa makgkatsi namakgamakglhtinan, ni xafuerza kawaniw pi kalakgpalilh xtapuwan, wata kamastaw talakaskin pi tuku xaxlikana, tsinu tsinu nalakgchan xnaku (Juan 16:12; Col. 2:​6, 7). Biblia tamalakxtumi ni xaxlikana tamasiy xtachuna tuku tliwakglh wilakgo nema talakaskin nalaktilhaw (kalikgalhtawakga 2 Corintios 10:​4, 5). Max tiku makgalhtawakgemaw tuwa namakgkatsi nialh nakanajla tuku makgasata kanajlanit o lismaninit natlawa. Wa xlakata, pulana kamakgtayaw nalipawan Jehová chu naliʼakxilha la xputatsekgni (Sal. 91:9).

KOMO LATAMAN NAʼAN KTAMAKXTUMIT

14. ¿La nakalikatsiniyaw latamanin tiku minkgo ktamakxtumit?

¹⁴ Jehová lakaskin pi ni kalaksakpaxkinaw chu tlan kakalikatsiniw putum latamanin tiku minkgo ktamakxtumit, maski tanu xtalismaninkan, tanu xkilhtsukutkan o komo kgalhikgo tumin o ni (Sant. 2:​1-4, 9). Kalichuwinaw tuku tlan natlawayaw.

15, 16. ¿Tuku tlan natlawayaw xlakata tlan namakgkatsikgo tiku xlimakgtumku minkgo ktamakxtumit?

¹⁵ Wilakgo latamanin tiku ankgo ktamakxtumit kaj xlakata katsiputunkgo tuku tlawayaw anta o xlakata tiku lama kʼalakatanu kachikin kawaninit pi kaʼankgolh. Wa xlakata komo wi tiku namin ktamakxtumit, tlan kamakgamakglhtinaw chu ni katlawaw tuku nitlan namamakgkatsini. Tlan nawaniyaw pi komo lakaskin, kakinkapaxtutawilan. Tlan namaxkiyaw maktum Biblia o likgalhtawakga, o tlan namasakuaniyaw kilakan. Kalilakpuwaw atanu tuku tlan natlawayaw xlakata tlan namamakgkatsiniyaw. Akgtum liʼakxilhtit, chatum chixku tiku kilalh kPukgalhtawakga lakapastaka pi lu xpekuama xlakata xlakpuwan pi ni liwana klhakgananit. Chatum tala wanilh pi ni xlilakgaputsalh, wanilh pi maski xtatayananin Jehová liwana lhakgananaw akxni anaw ktamakxtumit ni wamputun pi tlakg xlakaskinka litaxtuyaw. Titaxtulh kilhtamaku, uma chixku tamunulh chu nikxni patsankgalh tuku wanilh tala. Pero maski tlan nakalikatsiniyaw tiku ankgo ktamakxtumit, kuenta natlawayaw ni namakgtanuyaw tuku ni kilikatsitkan (1 Ped. 4:15).

¹⁶ ¿Tuku atanu tlan natlawayaw xlakata tlan nakamakgamakglhtinanaw tiku minkgo ktamakxtumit? Kuenta kilitlawatkan tuku wanaw xpalakata tiku ni xtatayananin Jehová akxni katachuwinanaw makgapitsi natalan, akxni mastayaw kintakgalhtinkan o akxni wi tuku matitaxtiyaw ktamakxtumit. Ni kawaw tuku nitlan nakamamakgkatsini xlakata max natlawa pi nialh namimputumparakgo (Tito 2:8; 3:2). Akgtum liʼakxilhtit, nitlan xkitaxtulh komo nitlan xkalichuwinaw tuku kanajlakgo amakgapitsin (2 Cor. 6:3). Natalan tiku mastakgo taʼakgchuwin na lu kuenta xlitlawatkan tuku nawankgo. Nachuna, max natalakaskin nawankgo tuku kilhchanima makgapitsi tachuwin nema maklakaskinaw xtatayananin Jehová, xlakata tiku xlimakgtumku minkgonit ni akgatekgskgo.

17. ¿Tuku kilitlawatkan komo natekgsaw tiku “makgamakglhtinamputunkgo xaxlikana”?

¹⁷ Chuna la titaxtuma kilhtamaku tlakg talakaskin nalichuwinanaw Dios, chu anankgojku latamanin tiku “makgamakglhtinamputunkgo xaxlikana” (Hech. 13:48). Wa xlakata, komo nalitachuwinanaw Dios tiku makgamakglhtinamputun xaxlikana, tunkun kamalaknuniw takgalhtawakga xalak Biblia chu kawaniw pi kaʼalh ktamakxtumit. Chuna namakgtayayaw natsuku an ktiji nema linan “klatamat nema ni kgalhi xlisputni” (Mat. 7:14).