1925: titaxtunita akgtum ciento kata

TUKU NI KGANTAXTULH

Lhuwa xLikgalhtawakgananin Biblia xlakpuwankgo pi kkata 1925, Katiyatni akgtum paraíso xʼama litaxtu. ¿Tuku xlakata? Titaxtulh kilhtamaku, tala Albert Schroeder, tiku xkatatapakgsi Lakgkgolotsin tiku Pulalinankgo, wa: «Xaklakpuwanaw pi tiku xatalaksakni xʼamaka kalinkan kʼakgapun xlakata xtamapakgsinankgolh Cristo, chu pi amakgapitsin kskujnin Dios chuna la Abrahán, David chu atanu, xʼamakgo lakastakwanankgo chu príncipes xʼamakgo litaxtukgo xlakata xmapakgsinankgolh unu kKatiyatni chu chuna xmakgtayakgolh xTamapakgsin Dios». Pero xlakata nichuna lalh, lhuwa natalan lu lilipuwankgolh (Prov. 13:12).

Maski ni kgantaxtulh tuku xlakpuwankgonit, lhuwa xLikgalhtawakgananin Biblia lu palha skujkgolh xlakata xlichuwinankgolh Jehová chu tsinu tsinu akgatekgskgolh pi uma wa tuku tlakg xlakaskinka xwanit. Kaʼakxilhwi la limaklakaskinkgolh radio xlakata xlichuwinankgolh Dios niku tlakg lakgamakgat.

TLAWAKAN ATANU ESTACIONES DE RADIO

Akxni akxilhkgolh tuku lu tlan kitaxtulh kkata 1924 xlakata xmaklakaskimakgo estación de radio WBBR, xLikgalhtawakgananin Biblia tlawakgolh atanu estación lakatsu kChicago (Illinois). Uma estación tlakg lakgamakgat xkichan chu limapakuwikgolh WORD. Ralph Leffler, chatum tiku na makgtlawalh estación, wa: «Papaʼ akxni lu xlonkgnan, lhuwa latamanin xkgaxmatkgo tuku xlichuwinankan kʼuma estación asta maski lu lakgamakgat xwilakgo». Akgtum liʼakxilhtit, akgtum familia tiku xlama liwaka 5,000 kilómetros xlimakgat, kPilot Station (Alaska), tlan kgaxmatkgolh tuku xapulana matitaxtika. Akxni sputli programa, uma familia katsokgnanikgolh tiku kskujkgo kʼestación xlakata xkapaxtikatsinikgolh pi matitaxtikgolh uma programa nema lu kamakgpuwantinilh.

Revista Makatsinina xa’inglés 1 xla diciembre kata 1925 lichuwinalh la xlilakgamakgat xtakgaxmata estación de radio WORD. Wa: «Uma estación nema wi kʼEstados Unidos na wa nema tlakg makgat kichan. Tlan takgaxmata lata kxʼeste Estados Unidos chu kxʼoeste, kCuba chu pakganacha kxnorte Alaska. Lhuwa latamanin tiku nikxni xkgaxmatkgonit xatlan tamakatsinin, la uku tlakg katsiputunkgo».

Watiya uma kata, xLikgalhtawakgananin Biblia na xlimaklakaskimputunkgo radio xlakata xlichuwinankgolh xatlan tamakatsinin kCanadá. Kkata 1924 natalan tlawakgolh estación de radio CHUC, anta kSaskatoon (Saskatchewan). Uma estación na wa nema xapulana tsukuka limaklakaskinkan xlakata xlichuwinanka tuku xla Dios kCanadá. Pero kkata 1925, natalan akxilhkgolh pi xtalakaskin xputsakgolh niku tlakg kalakgmakgat xwa xlakata xwilika uma estación. Wa xlakata Sociedad Watch Tower tamawalh uma estación chu lilh kRegent Building. Uma akgtum teatro xwanit kSaskatoon nema natalan tamawakgolh xlakata anta xtawi estación.

Xlakata xlimaklakaskimaka uma radio, lhuwa tiku lakgamakgat xwilanikgo kachikin Saskatchewan, xlimakgtumku kgaxmatkgolh xatlan tamakatsinin. Akgtum li’akxilhtit, Graham, chatum puskat tiku lu lakgamakgat xwi, malakgachalh akgtum tatsokgni xlakata kskilh makgapitsi likgalhtawakga akxni kgaxmatkgolh tuku lichuwinanka kradio. Tala George Naish, lichuwinalh: «Xtakgaxmata pi uma puskat lu xlakaskima uma likgalhtawakga, wa xlakata kmalakgachaniw putuminika Estudios de las Escrituras». Ni makgas kilhtamaku titaxtulh, Graham xlichuwinama uma tamakatsinin niku tlakg lakgamakgat.

TUKU XASASTI KATSINIKGOLH

Revista Makatsinina xa’inglés 1 xla marzo kata 1925 xlimin akgtum lu xlakaskinka artículo nema xwanikan: «Lakatsukulh xasasti kachikin». ¿Tuku xlakata lu xlakaskinka xwanit uma artículo? Xlikgalhtawakgananin Biblia xkatsikgo pi Satanás xkamapakgsi demonios, ni xaxlikana takanajla, laklanka stananin tiku lhuwa tuku kgalhiputunkgo chu mapakgsinanin xalak uma kakilhtamaku. Pero «skujni xatalipaw chu xaskgalala» limaklakaskilh uma artículo xlakata xkamakgtayalh natalan na’akgatekgskgo pi Jehová na kgalhi akgtum kachikin. Uma kachikin nipara tsinu xtachuna la xla Satanás chu talalakatawaka tuku tlawa xkachikin Satanás (Mat. 24:45). Nachuna, skujni xatalipaw kalitachuwinalh natalan pi xTamapakgsin Dios tsukulh mapakgsinan kkata 1914, chu watiya uma kata, lalh guerra k’akgapun chu Satanás chu xdemonios katamakxtuka k’akgapun chu kamakaminka kKatiyatni (Apoc. 12:​7-9).

Makgapitsi xLikgalhtawakgananin Biblia tuwa makgkatsikgolh namakgamakglhtinankgo xasasti ta’akgatekgsni. Wa xlakata watiya uma artículo, wa: «Komo wi tiku ni lakgati tuku lichuwinan unu, kkawaniyan pi ni lakapala kasitsitit, kalipawantit Jehová chu chuntiya xatapaxuwan kaskujnitit».

Chatum colportor (nema la uku lilakgapaskan precursor), Tom Eyre xalak Gran Bretaña, lichuwinalh tuku tlawakgolh lhuwa xLikgalhtawakgananin Biblia akxni likgalhtawakgakgolh uma artículo: «Natalan lu lipaxuwakgolh akxni akgatekgskgolh tuku lichuwinan Apocalipsis capítulo 12. Akxni k’akgatekgswi pi xTamapakgsin Dios xmapakgsinamaja k’akgapun, xatapaxuwan kkalitachuwinaw amakgapitsin. Uma kinkamakgpuwantinin tlakg xaklichuwinaw Jehová chu xakakxilhwi la xpulalima xkachikin xlakata tlakg lhuwa tuku xtlawalh».

AKGATEKGSKGO PI LU XLAKASKINKA NALICHUWINANKGO JEHOVÁ

La uku, xtatayananin Jehová liwana katsiyaw tuku wa palakachuwina Isaías: «Wixin kintatayananin, wa tuku wan Jehová, kilakskujni nema klaksaknit» (Is 43:​10, La Biblia. Traducción del Nuevo Mundo, TNM). Pero akxni nina xchan kata 1925, uma texto ni lu xlichuwinankan kkilikgalhtawakgakan. Pero uma x’ama talakgpali, xlakata watiya uma kata 11 revistas xa’inglés lichuwinankgolh tuku wan Isaías 43:​10, 12.

Akxni ksputmaja agosto kata 1925, xLikgalhtawakgananin Biblia kilakgolh k’akgtum asamblea k’Indianápolis (Indiana). Kprograma xla asamblea, tala Joseph Rutherford wi tuku matsokgninalh. Anta xwan: «Minitaw k’uma asamblea xlakata kiMalanakan nakinkamatliwakglhan, chu chuna akxni nataspitaw xatapaxuwan nalichuwinanaw». Uma asamblea makgapalalh akgtsayan kilhtamaku. Anta kamakgpuwantinika putum tiku kilakgolh pi xlichuwinankgolh Jehová putum kilhtamaku.

Sábado 29 xla agosto, tala Rutherford mastalh akgtum taʼakgchuwin nema xwanikan: «Kinkatasanikan xlakata wi tuku kilitlawatkan». Kʼuma taʼakgchuwin lichuwinalh pi lu xlakaskinka nalichuwinanaw Dios. Wa: «Jehová kawani kskujnin: “Wixin kintatayananin, […] chu akit Dios”». Chu alistalh lichuwinalh uma limapakgsin: «Kayawatit tuku naʼakxilhkgo kachikinin» (Is. 43:12; 62:​10, TNM). Alistalh wampa: «Kajwatiya xkachikin Jehová tlan napalakachuwinankgo, xlakata xlakan kgalhikgo xʼespíritu santo».

Akxni masputulh xtaʼakgchuwin, tala Rutherford likgalhtawakgalh maktum tratado nema xwanikan: «Akgtum tamakatsin nema kinkamaxkiyan takgalhkgalhin». Uma tratado xlichuwinan pi «kajwatiya xTamapakgsin Dios nalimin takaksni, natlawa pi lhuwa tuku nakgalhiyaw, nialh natatatlayaw, tlan nalatamayaw chu nakgalhiyaw xaxlikana tapaxuwan». Putum tiku anta xwilakgo lu tlan makgamakglhtinankgolh uma. Alistalh, uma tuku likgalhtawakgalh tala Rutherford matitaxtika ktipalhuwa tachuwin chu imprimirlika. Maʼakgpitsika max 40 millones tratados.

Maski xLikgalhtawakgananin Biblia nina kalimapakuwika xtatayananin Jehová uma kata, xlakan liwana xkatsikgoya pi lu xlakaskinka xwanit xlichuwinankgolh Jehová.

KAWANIKAN PI KAKALAKGTASPITKGOLH LATAMANIN

Xlakata uma kilhtamaku tlakg lhuwa xLikgalhtawakgananin Biblia xʼanankgo kxlikalanka Katiyatni, xkachikin Jehová kamakgpuwantinilh pi xkalakgtaspitkgolh tiku xkgaxmatkgonit xatlan tamakatsinin. Akxni ksputnita campaña xlakata xmaʼakgpitsika tratado «Akgtum tamakatsin nema kinkamaxkiyan takgalhkgalhin», Bulletina kawanilh: «Kalakkaxwilitit nakalakgtaspitatit tiku makgamakglhtinankgolh tratado».

Bulletin xla enero kata 1925 lichuwinalh tuku wa chatum tala xalak Plano (Texas): «Kakxilhnitaw pi tlakg tlan kinkakitaxtuniyan akxni ktaspitaw niku makglhuwata klichuwinanitaw Dios, nixawa niku xlimakgtumku kkanaw. Wi akgtum aktsu kachikin niku makgkitsis kkilanitaw akgkaw kata. […] Nina makgas, tala Hendrix chu kintse kilaparakgolh kʼuma kachikin chu tlakg lhuwa libros kimaʼakgpitsikgolh nixawa atanu kilhtamaku».

Chatum colportor xalak Panamá, tsokgwililh: «Lhuwa latamanin tiku kimalakchuwanikgolh xmalakcha akxni xlimakgtumku kkilalh, nialh chuna kilikatsinikgo akxni xlimakgtiy o xlimakgtutu kkakilakgla. Uma kata tlakg liwana klimaklakaskima kinkilhtamaku xlakata nakkalakgtaspita latamanin, chu lu tlan kinkitaxtunima».

TUKU XTALAKASKIN XTITLAWAKGOLH

Akxni ksputmaja kata 1925, tala Rutherford katsokgnanilh putum colportores. Kawanilh tuku tlan xtlawakgonit uma kata chu tuku xtalakaskin xtitlawakgolh. Xla wa: «Kata nema titaxtulh kamakgoxamixitit lhuwa latamanin tiku xlipuwamakgo. Uma taskujut lu kamakgapaxuwayan. […] Kkata nema aku mima tlan chuntiya napaxuwayatit xlakata chuntiya nalichuwinanatit Dios chu xTamapakgsin, chu nakamasiyaniyatit kachikinin tiku xaxlikana kskujnin Dios. […] Chuntiya akxtum kamalankiw kiDioskan chu kiMapakgsinakan».

Akxni ksputmaja kata 1925, natalan xlakkaxwilimakgo natlawakgo akgtum sucursal kBrooklyn (Nueva York). Kkata 1926, xkachikin Jehová xʼama matsuki akgtum lanka taskujut nema nikxni chuna xtlawanit.