Jehová kinkamaxkiyan «xaxlikana tapaxuwan»

1, 2. 1) ¿La makgkatsikgo lhuwa latamanin la uku? 2) ¿Tuku nalichuwinanaw kʼuma artículo?

KKAKILHTAMAKU niku lamaw, lhuwa latamanin kajwatiya putsakgo tapaxuwan. Pero maski lu liskujkgo, tapaxuwan nema kikgalhikgo, ni makgapala. Lhuwa tiku lu lakgaputsakgo chu ni paxuwakgo. Chu max asta makgapitsi kskujnin Jehová nachuna makgkatsikgo. Xlakata lamaw «kxaʼawatiya kilhtamaku», titaxtuyaw tuku «lu tuwa» chu nitlan makgkatsiyaw (2 Tim. 3:1).

² Kʼuma artículo nalichuwinanaw tuku max xtlawalh pi nialh xpaxuwaw chu tuku tlan natlawayaw xlakata napaxuwaparayaw. Pero pulana kalichuwinaw tiku tlan nakinkamaxkiyan xaxlikana tapaxuwan.

¿TIKU TLAN NAKINKAMAXKIYAN XAXLIKANA TAPAXUWAN?

3. ¿Tuku kinkamasiyaniyan tamalakatsukin xpalakata Jehová? (Na kaʼakxilhti dibujos).

³ Jehová xapaxuwana, chu lakaskin pi akinin na kapaxuwaw. Wa xlakata lhuwa tuku tlan tlawanit nema kinkamakgapaxuwayan. Lu stlan la malakatsukinit kimpulatamankan, tlawanit tipalhuwa colores, lakgkgama liwat chu animales nema kinkamakgapaxuwakgoyan akxni akxilhaw la kgamanankgo. Putum uma limasiya pi Jehová kinkapaxkiyan chu lakaskin kalipaxuwaw latamat.

Xaskgata elefante: Image © Romi Gamit/Shutterstock; laktsu pingüinos: Vladimir Seliverstov/500px via Getty Images; laktsu chivos: Rita Kochmarjova/stock.adobe.com; tantiy delfines: georgeclerk/E+ via Getty Images

4. 1) ¿Tuku xlakata Jehová paxuwa maski akxilhma putum tapatin nema anan kkakilhtamaku? 2) ¿Tuku tlawa Jehová kimpalakatakan? (Salmo 16:11).

⁴ Maski Jehová wa «xapaxuwana Dios», liwana lakgapasa tapatin nema anan kkakilhtamaku (1 Tim. 1:11). Pero ni masta talakaskin pi uma natlawa pi nialh napaxuwa. Xla katsi pi uma tapatin ni putum kilhtamaku katimakgapalalh. Laklhkawilinita kilhtamaku akxni namasputu putum takatsanajwat chu tapatin, chu kgalhkgalhima kalakgchalh uma kilhtamaku. Pero xlakata nina chin uma, xla lu kuenta tlawa la makgkatsiyaw chu kinkamakgtayayan napaxuwayaw (kalikgalhtawakga Salmo 16:11). Kaʼakxilhwi la makgtayalh xKgawasa napaxuwa.

5, 6. ¿Tuku xlakata Jesús paxuwa?

⁵ Atanu tiku na lu paxuwa, wa Jesús. ¿Tuku xlakata? Pulaktum wa pi «watiya tayat» kgalhi chuna la xTlat (Col. 1:15; 1 Tim. 6:15). Atanu wa pi lhuwa kilhtamaku akxtum talatamanit Jehová, tiku masta xaxlikana tapaxuwan.

⁶ Nachuna, Jesús paxuwa xlakata ankgalhin tlawa tuku lakgati xTlat (Prov. 8:​30, 31; Juan 8:29). Xlakata Jesús kgalhakgaxmatnan, Jehová sikulunatlawa chu tlan akxilha (Mat. 3:17).

7. ¿Tuku kilitlawatkan xlakata nakgalhiyaw xaxlikana tapaxuwan?

⁷ Akinin na tlan nakgalhiyaw xaxlikana tapaxuwan komo tlakg natalakatsuwiniyaw Jehová. Akxni tlakg nakatsiniyaw xpalakata, tlakg tlan nastalaniyaw xliʼakxilhtit chu tlakg napaxuwayaw. Atanu tuku na lu kinkamakgapaxuwayan, wa akxni tlawayaw xtalakaskin Jehová chu akxni makgapaxuwayaw (Sal. 33:12).a Maski chuna, max namin kilhtamaku nialh napaxuwayaw. ¿Wamputun uma pi Jehová nialh tlan kinkaʼakxilhan? Nichuna. Jehová akgatekgsa pi akinin makglakgalhinanin chu pi min kilhtamaku nitlan makgkatsiyaw, lipuwanaw chu lakgaputsayaw (Sal. 103:14). La uku kalichuwinaw tuku tlan xtlawalh pi nialh xpaxuwaw chu tuku tlan natlawayaw xlakata napaxuwaparayaw.

NITU KATLAWALH PI NIALH NAPAXUWAYA

8. ¿La makgkatsiyaw akxni titaxtuyaw tuku lu tuwa?

⁸ Xlipulaktum tuku tlawa pi nialh napaxuwayaw: tuku tuwa titaxtuyaw. Max patinamaw xlakata kinkaputsastalanimakan, wi tuku masputunalh niku lamaw, ni anan tumin, tatatlayaw o linawa kata. Putum uma tlan xtlawalh pi nialh xpaxuwaw, liwaka komo nila lakgpaliyaw tuku titaxtumaw. Biblia wan pi «akxni naku lakgaputsama lu maxlajwaninan» (Prov. 15:​13, TNM). Kalichuwinaw tuku xmakgkatsi chatum kgolotsin xalak congregación akxni nina xnikgo xnatlatni chu xtala. Xla wan: «Xakmakgkatsi pi kiʼakstu xakwi chu pi nitila xkimakgtaya. Lhuwa tuku tuwa xaktitaxtuma chu nitlan xaklimakgkatsi pi nila akxtum xakkatatawila kinatlatni chu kintala maski chuna xaktlawaputun». Xliʼakxilhtit uma kgolotsin kinkamasiyaniyan pi tuku tuwa titaxtuyaw, tlan nakinkamakgatlakgwanan chu lu nakinkamalakgaputsiyan.

9. ¿Tuku tlan natlawayaw xlakata napaxuwaparayaw? (Jeremías 29:​4-7, 10).

⁹ ¿Tuku tlan natlawayaw xlakata napaxuwaparayaw? Ni wa kalilakgaputsaw tuku nila lakgpaliyaw chu kapaxtikatsininaw xlakata tuku tlan kgalhiyaw. Kakilhtamaku kinkamalakpuwaniputunan pi xlakata napaxuwayaw, talakaskin ankgalhin tlan natawilayaw. Pero uma ni xlikana. Kalilakpuwaw tuku Jehová kawanilh judíos tiku xkachilinkanit kBabilonia. Maski tuwa tuku xtitaxtumakgo, kawanilh pi xliskujkgolh xlakata xlipaxuwakgolh xlatamatkan anta (kalikgalhtawakga Jeremías 29:​4-7, 10). ¿Tuku kinkamasiyaniyan uma? Kalilakpuwanti tuku tlan kgalhiya chu kalipaxuwa uma. Kalakapastakti pi Jehová ankgalhin namakgtayayan (Sal. 63:7; 146:5). Efi, chatum tala tiku akgspulalh tuku nitlan nema tlawalh pi nialhla xtatsuwilh, wan: «Jehová, kifamilia chu natalan xalak congregación lu kimakgtayakgonit. Klimasiyaputun pi kkapaxtikatsini putum tuku tlawakgo kimpalakata. Wa xlakata lu kliskuja naklipaxuwa kilatamat».

10. ¿Tuku xlakata tlan chuntiya napaxuwayaw maski natitaxtuyaw tuku tuwa?

¹⁰ Maski titaxtuyaw tuku tuwa o kaʼakgspula tuku lu nitlan kifamiliajkan, tlan chuntiya napaxuwayaw (Sal. 126:5).b ¿Tuku xlakata? Xlakata akinin ni kajwatiya paxuwayaw akxni tlan wilaw. Chatum precursora tiku wanikan María, wan: «Akxni titaxtuyaw tuku tuwa, chuntiya paxuwayaw xlakata lakapastakaw tuku Jehová kinkamalaknuninitan. Pero uma ni wamputun pi ni xlilat natasayaw o nawanaw tuku makgkatsiyaw. KinTlatkan nakinkamakgtayayan chuntiya napaxuwayaw kaxatukawa tuku natitaxtuyaw». Maski la uku kilatamatkan lu tuwa, kalakapastakwi pi kintaʼakglhuwitkan ni putum kilhtamaku katimakgapalalh. Kintaʼakglhuwitkan xtachuna la akxni wi tiku tlawan kxkilhtun pupunu chu tasiya niku tatutanit, pero kaj xlipuntsu chuchut mapanu chu nialhpara tsinu tasiya niku xtlawankanit. Nialh makgas, Jehová namapanu putum tuku kinkamakgapatinanan.

11. ¿La makgtayayan xliʼakxilhtit apóstol Pablo?

¹¹ ¿Tuku tlan natlawayaw komo natsukuyaw lakpuwanaw pi kgalhiyaw taʼakglhuwit xlakata Jehová nialh kinkamakgtayaman? Pulaktum tuku nakinkamakgtayayan wa pi nakalilakpuwanaw xlakskujnin Jehová tiku titaxtukgolh tuku tuwa. Kalilakpuwaw xliʼakxilhtit apóstol Pablo. Jesús lakgayawalh akgtum xlakaskinka taskujut: xkalitachuwinalh xatlan tamakatsinin «kachikinin chu nachuna mapakgsinanin chu xkamanan Israel» (Hech. 9:15). Pero Pablo lhuwa tuku tuwa titaxtulh (2 Cor. 11:​23-27). ¿Xwamputun uma pi Dios nialh xmakgtayama? ¡Nichuna! Xlakata Pablo xtayanima tuku tuwa xtitaxtuma, xlimasiya pi Jehová xmakgtayama (Rom. 5:​3-5). Kalilakpuwanti tuku wix titaxtupat. Komo ni makgxtakgpat Jehová maski titaxtupat tuku tuwa, uma limasiya pi Jehová makgtayaman chu tlan akxilhan.

12. ¿Tuku xlakata akxni ni kgantaxtu tuku lakaskinaw, max xtlawalh pi nialh xpaxuwaw?

¹² Xlipulaktiy tuku tlawa pi nialh napaxuwayaw: akxni ni kgantaxtu tuku lakaskinaw (Prov. 13:12). Xlakata paxkiyaw Jehová chu paxtikatsiniyaw tuku tlawa kimpalakatakan, wi tuku lakgchamputunaw xlakata tlakg naskujnaniyaw. Pero talakaskin nalilakpuwanaw tuku xlikana tlan nalakgchanaw. Komo xtlawaputuw tuku ni matlaniyaw, max xkinkamakgalipuwan (Prov. 17:22). Holly, chatum precursora, wan: «Xakkamputun kʼEscuela xla Tiku lichuwinankgo xTamapakgsin Dios, xakkamputun lichuwinan Dios kʼatanu país o xakmakgtayanalh ktaskujut nema tlawamaka kRamapo. Pero wi tuku talakgpalilh kkilatamat chu nialhla ktlawalh nipara pulaktum tuku xaklakpuwanit. Lu makgalipuwanan akxni nila makgantaxtiya tuku tlawaputuna». Lhuwa natalan nachuna makgkatsikgo la Holly.

13. Maski nila lhuwa tuku tlawaya chuna la wix lakaskina, ¿tuku tlan nalilakpuwana?

¹³ ¿Tuku tlan natlawayaw xlakata napaxuwaparayaw? Kalakapastakti pi Jehová ni skiniyan tuku nila tlawaya. Jehová xtapalh liʼakxilha xatlan mintayat chu ni wa la xlilhuwa skujnaniya. Xla lakaskin pi ni kamakgxtakgti chu pi kalakapastakti pi nila putum tlan tlawaya (Miq. 6:8; 1 Cor. 4:2). Wa xlakata, komo Jehová ni skiniyan tuku nila tlawaya, na ni xlilat xafuerza natlawaputuna tuku ni matlaniya.c Komo nila lhuwa tuku tlawaya chuna la wix lakaskina, ni wa kalilakgaputsa, wata kalilakpuwanti tuku matlaniya. Max tlan xʼamigo xlitaxtuni chatum kgawasa o tsumat xalak mincongregación xlakata xmakgtaya tlakg naskujnani Jehová. Tlan xkamakgtaya natalan tiku linkgoya kata. Na tlan xliskujti nalakgapaxialhnana chatum tala, natachuwinana kteléfono o namalakgachaniya akgtum mensaje xlakata namatliwakglha. Komo nalakputsaya tuku tlan tlawaya xlakata nakamakgtayaya amakgapitsin, Jehová nasikulunatlawa mintaskujut. Chu kalilakpuwanti pi nialh makgas kxasasti kakilhtamaku tlan lhuwa tuku natlawaya xpalakata Jehová, tlan natlawaya tuku asta max ni lakpuwanita. Holly, tiku lichuwinaw kpárrafo 12, wan: «Akxni kmakgkatsi pi ktaxlajwanima, ktsuku klilakpuwan pi kxasasti kakilhtamaku tlan ankgalhin nakskujnani Jehová. Klilakpuwan tuku tlan naktlawa anta, chu Jehová nakimakgtaya nakmakgantaxti».

14. ¿Tuku atanu tlan xtlawalh pi nialh xpaxuwaw?

¹⁴ Xlipulaktutu tuku tlawa pi nialh napaxuwayaw: akxni kaj miʼakstu nalilakgaputsakana. Makgapitsin maklakaskinkgo redes sociales xlakata namalakpuwaninankgo pi komo paxuwaputunaw talakaskin napaxialhnanaw, natamawananaw chu natlawayaw tuku lakgatiyaw. Ni talakgalhin nalipaxuwayaw tuku akinin lakgatiyaw. Jehová kinkamalakatsukin xlakata tlan chuna xtlawaw. Pero lhuwa latamanin akxilhkgonit pi ni kalimininit tapaxuwan tuku xlakpuwankgo pi xʼama kamakgapaxuwa. Eva, chatum precursora, wan: «Akxni kaj miʼakstu nalilakgaputsakana chu kajwatiya nalilakpuwana tuku tlawaputuna, nikxni katilipaxuwa, ankgalhin namakgkatsiya pi wijku tuku lakaskina». Uma tapuwan ni makgapaxuwanan, wata limin talipuwan.

15. ¿Tuku kinkamasiyaniyan tuku akgspulalh mapakgsina Salomón?

¹⁵ Kalilakpuwaw tuku akgspulalh mapakgsina Salomón. Xla xkatsiputun komo xlikana limin tapaxuwan akxni tlawakan putum tuku tlawaputunkan. Wa xlakata tlawalh putum tuku xlakgati. Lipaxuwalh xatlan liwat, tatlakgni chu kgalhilh putum tuku lhuwa xtapalh nema xʼanan kxkilhtamaku. Pero uma ni liminilh tapaxuwan, chu wa: «Lakgastapu nikxni lipaxuwa putum tuku akxilha chu takgen nikxni lipaxuwa putum tuku kgaxmata» (Ecl. 1:8; 2:​1-11, TNM). Latamanin lakpuwankgo pi komo nakgalhiya lhuwa tumin chu natlawaya putum tuku tlawaputuna, napaxuwaya. Pero maski tasiya pi uma limin tapaxuwan, ni xlikana chuna kitaxtu.

16. ¿Tuku xlakata napaxuwayaw komo nakamakgtayayaw amakgapitsin? (Na kaʼakxilhti dibujos).

¹⁶ ¿Tuku tlan natlawayaw xlakata napaxuwaparayaw? Jesús masiyalh pi «tlakg anan tapaxuwan akxni mastakan nixawa akxni makglhtinankan» (Hech. 20:35). Alekos, chatum kgolotsin xalak congregación, wan: «Lu kliskuja xlakata nakkamakgtaya amakgapitsin. Akxni tlakg kkalilakgaputsa amakgapitsin, kimakgtaya ni kajwatiya naklilakpuwantawila tuku akit klakaskin, chu uma kimakgapaxuwa». ¿Tuku tlan xtlawa xpalakata amakgapitsin? Komo katsiya pi wi tiku titaxtuma tuku tuwa, kamatliwakglhti. Max nila katilakkaxtlawa xtaʼakglhuwit, pero lu nalimakgtayaya komo nakgaxpatniya, nalimasiyaniya talakgalhaman chu namalakapastakaya pi tlan nawani Jehová putum tuku makgkatsi (Sal. 55:22; 68:19). Na kamalakapastaka pi Jehová chuntiya makgtayama (Sal. 37:28; Is. 59:1). Asta na tlan nalipiniya liwat. Kawani pi akxtum kataʼan talichuwinanan Dios xlakata uma lu namatliwakglha. Komo nakalilakgaputsaya amakgapitsin chu ni miʼakstu nalilakgaputsakana, Jehová tlan namaklakaskinan xlakata nakamakgtaya amakgapitsin, chu uma naliminiyan tapaxuwan (Prov. 11:25).

17. Komo xlikana paxuwaputunaw, ¿tuku kilitlawatkan? (Salmo 43:4).

¹⁷ Komo tlakg natalakatsuwiniyaw kinTlatkan xalak akgapun, nakgalhiyaw «xaxlikana tapaxuwan». Biblia wan pi Jehová wa tiku kinkamaxkiyan xaxlikana tapaxuwan (kalikgalhtawakga Salmo 43:​4, TNM). Wa xlakata, maski natitaxtuyaw tuku tuwa, ni kalakgaputsaw. Ankgalhin kalipawaw Jehová, chu xla nakinkamakgtayayan napaxuwayaw putum kilhtamaku (Sal. 144:15).