Xtapaxkit Dios makgapala putum kilhtamaku

1, 2. ¿La makgkatsikgo lhuwa natalan akxni titaxtukgo tuku tuwa?

KALILAKPUWANTI akgtum barco nema wi kxlakʼitat pupunu chu lu mima sen. Pupunu lipekua taʼakgayawama chu anu anu lin barco, chuchut tliwakga tawakaniyacha barco chu tsinu tsinu makgat lin. Xlakata barco ni lu natalakchiki chu ni makgat nalinkan, talakaskin namujukan kchuchut tuku nalimachokgowilikan.

² ¿Titaxtupat tuku lu tuwa? Komo chuna, max makgkatsiya chuna la uma barco. Tuku tuwa titaxtupat max tlawa pi puntsu napaxuwaya chu kaj lipuntsu nalipuwamparaya. Akgtum kilhtamaku liwana kanajlaya pi Jehová paxkiyan chu makgtayaman, pero lichali tsukuya lakpuwana pi xla nipara tsinu lilakgaputsa tuku titaxtupat (Sal. 10:1; 13:1). Max chatum miʼamigo nawaniyan laktlan tachuwin chu uma tlan namamakgkatsiniyan (Prov. 17:17; 25:11). Pero alistalh max nitlan natsukuparaya makgkatsiya. Max asta nalakpuwana pi Jehová nialh lilakgaputsayan. Komo chuna titaxtupat, ¿tuku namakgtayayan chuntiya nakanajlaya pi Jehová paxkiyan chu makgtayayan?

3. 1) ¿Tuku kilhchanima tapaxkit nema ni makgxtakgnan? (Salmo 31:7; 136:1). 2) ¿Tuku xlakata wanaw pi tiku tlakg tlan limasiya uma tapaxkit wa Jehová? (Na kaʼakxilhti dibujo).

³ Pulaktum tuku nakinkamakgtayayan natayaniyaw akxni titaxtuyaw tuku tuwa, wa pi nalakapastakaw xtapaxkit Jehová nema ni makgxtakgnan (kalikgalhtawakga Salmo 31:7; 136:1). Tachuwin: «tapaxkit nema ni makgxtakgnan», kilhchanima akxni lu paxkikan chatum lataman chu ni makgxtakgkan. Tiku tlakg limasiya uma wa Jehová, xlakata Biblia wan pi «litsama tapaxkit nema ni makgxtakgnan» chu pi uma tapaxkit nema kalimasiyani xlakskujnin «lu lanka» (Éx. 34:​6, 7; Sal. 86:​5, TNM). Uma wamputun pi Jehová nikxni kamakgxtakga xlakskujnin tiku ni makgxtakgkgo. Komo nalakapastakaw uma, nakinkamakgtayayan akxni natitaxtuyaw tuku tuwa (Sal. 23:4).

KALAKAPASTAKTI PI BIBLIA MASIYA PI JEHOVÁ KINKAPAXKIYAN

4. 1) Kalichuwinanti makgapitsi tuku pulana katsini akxni tsuku likgalhtawakgaya Biblia. 2) ¿Tuku xlakata ni xkanajla komo wi tiku xwanin pi uma ni xaxlikana?

⁴ Atanu tuku nakinkamakgtayayan chuntiya nakanajlayaw pi Jehová kinkapaxkiyan akxni titaxtuyaw tuku tuwa, wa pi nalakapastakaw pi kBiblia katsiniw pi Jehová kinkapaxkiyan. Kalilakpuwanti akxni tsuku likgalhtawakgaya Biblia. Wix katsini pi xtukuwani Dios wa Jehová, pi Jesús wa xachastum xKgawasa, pi tiku nikgonita nialhtu katsikgo, pi Katiyatni akgtum paraíso nawan chu pi latamanin anta nalatamakgo putum kilhtamaku (Sal. 83:18; Ecl. 9:5; Juan 3:16; Apoc. 21:​3, 4). ¿Xkanajla komo wi tiku xwanin pi uma ni xlikana? Nichuna, xlakata wix katsiya pi putum uma anta takilhtiyanit kBiblia. Xtachuna la umakgolh tamasiy, wix tlan nakanajlaya pi Jehová paxkiyan chu lilakgaputsayan xlakata Biblia chuna masiya. Tlakg kalichuwinaw uma.

5. ¿Tuku makgtaya chatum lataman nalakgmakgan ni xaxlikana tamasiy?

⁵ Akxni tsuku likgalhtawakgaya Biblia, ¿tuku makgtayan nalakgmakgana ni xaxlikana tamasiy nema max xkanajlaya? Max tamalakxtupi tuku xmasiya mintakanajla chu tuku masiya Biblia. Max xkanajlaya pi Jesús wa Dios, pero akxni tlakg likgalhtawakgatilha Biblia, max lakpuwanti: «¿Xlikana uma tuku kkanajla?». Tlakg tsuku lakputsananiya tuku wan Biblia chu akxni akxilhti pi uma ni xlikana xwanit, lakgmakganti uma tamasiy chu kanajla pi Jesús wa «xapulana kam xliputum tamalakatsukin» chu pi wa «xachastum xKgawasa Dios» (Col. 1:15; Juan 3:18). Pero katsiyaw pi ni xaxlikana tamasiy xtachuna tuku lu «tliwakglh wilakgo», wa xlakata tuwa kitaxtu nalaktilhaw (2 Cor. 10:​4, 5). Pero akxni lakgmakganaw umakgolh ni xaxlikana tamasiy, nialh mastayaw talakaskin pi wi tiku nakinkaliʼakgskgawiparayan (Filip. 3:13).

6. ¿Tuku xlakata kSalmo 136 makglhuwa min tachuwin, «xtapaxkit nema ni makgxtakgnan putum kilhtamaku makgapala»?

⁶ Akxni titaxtupat tuku tuwa chu lakpuwana pi Jehová ni paxkiyan, tlan xlilakpuwanti: «¿Xlikana uma?». Alistalh tlan natamalakxtupiya tuku wix lakpuwana chu tuku masiya Biblia xlakata xtapaxkit Jehová nema lichuwinan Salmo 136:​1, niku takilhtiyanit uma artículo. ¿Tuku xlakata Jehová wan pi xtapaxkit ni makgxtakgnan? ¿Tuku xlakata kʼuma salmo makglhuwa limin tachuwin «xtapaxkit nema ni makgxtakgnan putum kilhtamaku makgapala»? Chuna la akxilhaw, Biblia masiya pi Dios kalimasiyani tapaxkit nema ni makgxtakgnan xlakskujnin, chu Biblia ni akgsaninan. Wa xlakata, komo lakpuwana pi Jehová ni paxkiyan, tunkun kalakgmakganti uma talakapastakni xlakata uma ni xlikana.

7. Kalichuwinanti makgapitsi textos nema kinkawaniyan pi Jehová kinkapaxkiyan.

⁷ Anta kBiblia tekgsaw lhuwa atanu textos nema kinkawaniyan pi Jehová kinkapaxkiyan. Kalichuwinaw pulaktiy. Jesús kawanilh kstalaninanin: «Wixin tlakg xtapalh litaxtuyatit nixawa lhuwa laktsu tsiktsi» (Mat. 10:31). Xla ni wa: «Wixin max tlakg xtapalh litaxtuyatit nixawa lhuwa laktsu tsiktsi». Chu Jehová kawanilh xkachikin: «Akit nakmatliwakglhan. Chuna, akit nakmakgtayayan. Naklimatliwakglhan xaʼakgstitum kimpakgastakat» (Is. 41:​10, TNM). Xla ni wa: «Max xamakgtum nakmakgtayayan». Chuna la akxilhaw, umakgolh textos ni wan pi max, wata kinkawaniyan pi xlikana xtapalh litaxtuyaw chu xlikana nakinkamakgtayayan Jehová. Wa xlakata, komo akxni natitaxtuya akgtum taʼakglhuwit nalakpuwana pi Jehová ni paxkiyan, umakgolh textos namakgtayakgoyan tlakg tlan namakgkatsiya chu nakanajlaya pi Jehová xlikana paxkiyan. Kalilakpuwanti umakgolh textos chu kalitachuwinanti Jehová tuku makgkatsiya. Komo chuna natlawaya, na namakgkatsiya la wan 1 Juan 4:16: «Akinin katsinitaw pi Dios kinkapaxkiyan chu liwana kanajlayaw uma».a

8. ¿Tuku tlan xtlawaw komo chuntiya lakpuwanaw pi Jehová ni kinkapaxkiyan?

⁸ ¿Tuku tlan xtlawaw komo chuntiya lakpuwanaw pi Jehová ni kinkapaxkiyan? Katamalakxtumiw tuku makgkatsiyaw chu tuku katsiyaw. Maski max makgkatsiyaw pi Dios ni kinkapaxkiyan, katsiyaw pi uma ni xlikana, xlakata Biblia kinkamasiyaniyan pi Jehová kinkapaxkiyan. Kalakapastakwi pi Biblia nikxni akgsaninan, pero tuku makgkatsiyaw tlan nakinkaʼakgskgawiyan. Komo xkanajlaw pi Dios ni kinkapaxkiyan, xtachuna la xwaw pi ni xlikana pi Dios tapaxkit (1 Juan 4:8).

KALILAKPUWAW PI «XATLAT» KINKAPAXKIYAN

9, 10. ¿Tuku xlichuwinama Jesús akxni wa «XaTlat kapaxkiyan»? (Juan 16:​26, 27; na kaʼakxilhti dibujo).

⁹ Atanu tuku nakinkamakgtayayan nakanajlayaw pi Jehová kinkapaxkiyan, wa pi nalilakpuwanaw tuku Jesús kawanilh kstalaninanin: «XaTlat kapaxkiyan» (kalikgalhtawakga Juan 16:​26, 27). ¿Tuku xlakata chuna kawanilh? ¿Chuna kawanilh kaj xlakata tlan xkamamakgkatsiniputun? Nichuna, putuminika tuku lichuwinan Juan capítulo 16 masiya pi Jesús ni xlichuwinama tuku xmakgkatsikgo kstalaninanin, wata xlichuwinama oración.

¹⁰ Jesús aku xkawaninit pi akxni xtlawakgolh oración, kskinkgolh kxtukuwani, pero ni wa Jesús tiku xtlawanikgolh oración (Juan 16:​23, 24). Lu xlakaskinka xwanit pi xkatsikgolh uma. ¿Tuku xlakata? Xlakan lu tlan xtalalinkgo Jesús. Wa xlakata akxni xmalakastakwanikanita, max tlan xlakpuwankgolh pi wa tiku tlan xtlawanikgolh oración. Max xlakpuwankgolh pi xlakata Jesús xkapaxki wa xʼama kakgaxmatni xʼoracioneskan chu alistalh xʼama wani xTlat. Pero Jesús liwana kawanilh pi nichuna xʼama la. Xla kawanilh: «XaTlat kapaxkiyan». Xlakata Jehová lu kinkapaxkiyan, ni atanu tiku skini pi kakgaxmatli kioracioneskan, wata wa kinkakgaxmatniyan. Uma tamasiy xlakata oración, na wa pulaktum tuku katsiniw akxni tsukuw likgalhtawakgayaw Biblia. Chu la uku nachuna kitaxtu mimpalakata: akxni tsuku kgalhtawakgaya, wix tlakg tsuku lakgapasa Jesús chu tlakg tsuku paxkiya (Juan 14:21). Pero chuna la kstalaninanin xalak pulana siglo, tlan natlawaniya oración Jehová chu tlan nalipawana pi xla kgaxmatniyan chu paxkiyan. Akxni tlawaniya oración Jehová, limasiyaya pi kanajlaya pi «xaTlat» paxkiyan (1 Juan 5:14).

KALAKAPASTAKWI NIKU MINACHA UMA TAPUWAN

11. ¿Tuku xlakata Satanás paxuwa akxni tsukuyaw lakpuwanaw pi Jehová ni kinkapaxkiyan?

¹¹ ¿Niku minacha tapuwan pi Jehová ni kinkapaxkiyan? Max nalakpuwanaw pi wa Satanás lakaskin chuna kalakpuwaw, chu uma xlikana. Akgskgawini «putsama tiku tlan nawa» chu lakaskin kalakpuwaw pi Jehová ni kinkapaxkiyan (1 Ped. 5:8). Akinin katsiyaw pi Jehová kinkapaxkiyan chu wa xlakata makamilh xKgawasa xlakata xkinkalakgmaxtun, pero Satanás lakaskin kalakpuwaw pi ni kinkalakgchanan uma tamaskiwin (Heb. 2:9). ¿Tiku paxuwa akxni lakpuwanaw pi Jehová ni kinkapaxkiyan? Wa Satanás. ¿Tiku paxuwa akxni mastayaw talakaskin nakinkamakgatlajayan kintaʼakglhuwitkan? Na wa Satanás. Pero tiku Jehová nialh paxki wa Satanás chu ni wa akinin, pero xla lakaskin kalakpuwaw pi Jehová ni kinkapaxkiyan chu pi nitlan kinkaʼakxilhan. Wa uma pulaktum liʼakgsiyat nema xla limaklakaskin (Efes. 6:11). Akxni liwana katsiyaw tuku tlawaputun Satanás, kinkamakgtayayan ni napekuaniyaw chu tlakg ni tuwa namakgkatsiyaw nalakatitayayaw (Sant. 4:7).

12, 13. ¿Tuku xlakata talakgalhin nema kinkamatitaxtinikanitan kinkamalakpuwaniyan pi Jehová ni kinkapaxkiyan?

¹² Pero ni kajwatiya Satanás kinkamalakpuwaniyan pi Jehová ni kinkapaxkiyan. Talakgalhin nema kinkamatitaxtinikanitan, na tlawa pi chuna nalakpuwanaw (Sal. 51:5; Rom. 5:12). Talakgalhin tlawanit pi natamakgatliniyaw kiMalakatsukinakan chu na laktlawanit kintalakapastaknikan, kinakujkan chu kimaknikan.

¹³ Talakgalhin lu nitlan kinkamamakgkatsiniyan, tlawa pi namakgkatsiyaw pi linaw kuenta, nalakgaputsayaw, napekuanaw chu namaxananaw. Max chuna tsukuyaw makgkatsiyaw akxni tlawayaw akgtum talakgalhin o akxni kilakapastakaw pi akinin makglakgalhinanin lata akxni lakachinaw chu ni lamaw la Jehová xlakaskin pi xlatamaw (Rom. 8:​20, 21). Xlakata akinin makglakgalhinanin, litaxtuyaw la putlaw nema pankgnit akgtum xllanta. Nila liwana makgantaxtiyaw tuku Jehová lakaskin katlawaw. Wa xlakata lakgachunin lakpuwanaw pi Jehová ni kinkapaxkiyan. Akxni chuna natsukuyaw makgkatsiyaw, kalakapastakwi pi Jehová, «Dios tiku lanka xlakatsukut chu kgalhi lhuwa litliwakga, […] kalimasiyani tapaxkit nema ni makgxtakgnan tiku paxkikgo chu kgalhakgaxmatkgo xlimapakgsin» (Neh. 1:​5, TNM).

14. ¿Tuku xlakata wanaw pi talakgmaxtut kinkamakgtayayan nialh nalakpuwanaw pi Jehová ni kinkapaxkiyan? (Romanos 5:8; na kaʼakxilhti recuadro «Katamakgatlini “xlitliwakga talakgalhin nema akgskgawinan”»).

¹⁴ Max namin kilhtamaku nalakpuwanaw pi ni kinkalakgchanan pi Jehová nakinkapaxkiyan. Chu uma xlikana, ni anan tuku tlan xtlawaw xlakata tlan xkgalhiw xtapaxkit Jehová. Maski chuna, xla mastalh talakgmaxtut xlakata tlan xkinkatapatin kintalakgalhinkan. Wa uma tuku tlawa pi xtapaxkit Jehová lu lanka xtapalh nalitaxtu (1 Juan 4:10). Kalakapastakwi pi Jesús milh kKatiyatni xlakata xkalakgmaxtulh tiku makglakgalhinanin (kalikgalhtawakga Romanos 5:8). Jehová liwana katsi pi nila putum tlan tlawayaw xlakata akinin makglakgalhinanin. Akxni akgatekgsaw pi talakgalhin tlawa pi nalakpuwanaw pi Jehová ni kinkapaxkiyan, kinkamakgtayayan namakgatlajayaw uma ni xatlan tapuwan (Rom. 7:​24, 25).

KALAKKAXWILIW NI NAMAKGXTAKGAW JEHOVÁ

15, 16. Komo ni namakgxtakgaw Jehová, ¿tuku natlawa xla, chu tuku xlakata liwana katsiyaw uma? (2 Samuel 22:26).

¹⁵ Akxni titaxtuyaw tuku tuwa kkilatamatkan, Jehová lakaskin pi kalaksakwi tuku tlan chu ni kamakgxtakgwi (Deut. 30:​19, 20). Komo akinin ni namakgxtakgaw, xla na ni kintikamakgxtakgni kaxatukawa tuku nala (kalikgalhtawakga 2 Samuel 22:26).

¹⁶ Chuna la akxilhnitaw, akxni titaxtuyaw tuku tuwa, tuku tlan natlawayaw wa pi namujuyaw tuku limachokgowilikan barco: uma wamputun pi nalakapastakaw pi Jehová kinkapaxkiyan chu pi ankgalhin nakinkamakgtayayan. Komo namin kilhtamaku nalakpuwanaw pi Jehová ni kinkapaxkiyan, kalakapastakwi pi ni watiya kilhchanima tuku katsiyaw chu tuku makgkatsiyaw. Ankgalhin kalipawaw pi xtapaxkit Jehová nema ni makgxtakgnan putum kilhtamaku makgapala, xlakata Biblia chuna masiya.