Kalaksakwi lakwan amigos kʼuma xaʼawatiya kilhtamaku
«Katalalinkan tiku nitlan likatsikgo tlawakgo pi namakgxtakgaw xatlan talismanin.» (1 COR. 15:33, TNM)
1. ¿La wi kakilhtamaku niku lamaw?
LA UKU lu katuwa kkakilhtamaku lamaw. Kata 1914 litsukulh «xaʼawatiya kilhtamaku». Lata ama kilhtamaku, tlakg nitlan tawilama (2 Tim. 3:1-5, TNM). Chu liwana katsiyaw pi tlakg nitlan natawila, xlakata Biblia lichuwinanit pi latamanin tlakg nitlan xʼamakgolh likatsikgo kʼuma kakilhtamaku (2 Tim. 3:13).
2. ¿Tuku lakgatikgo tlawakgo la uku lhuwa latamanin? (Kaʼakxilhti xapulana dibujo.)
2 La uku, lhuwa latamanin lakgatikgo tlawakgo tuku Jehová xkajni, latlawanikan tuku nitlan, talakgxtumit xalimaxana, taskuwan o tuku xla demonios. Masiyakan kʼInternet, ktelevisión, kcine, klibros chu krevistas pi umakgolh talismanin tlan natlawakan. Kmakgapitsi países, kalakgpalikanit limapakgsin chu la uku mastakan talakaskin natlawakan tuku makgasa nitlan xʼakxilhkan. Pero Jehová ni lakgpalinit xlimapakgsin chuntiya xkajni umakgolh tuku nitlan (kalikgalhtawakga Romanos 1:28-32).
3. ¿La kinkaʼakxilhkgoyan lhuwa latamanin xlakata kgalhakgaxmataw xlimapakgsin Dios?
3 Akxni xlamakgolh xapulana kstalaninanin Cristo, latamanin na xlilakgastanankgo talakgxtumit xalimaxana chu akxni xlatlawanikan tuku nitlan. Pero kstalaninanin Cristo ni xtlawakgo uma, xlakan xmakgantaxtikgo xtalakaskin Dios. Wa xlakata, lhuwa latamanin xlakpuwankgo pi tanu xwanit xtayatkan, xkalikgalhkgamanankan chu xkaputsastalanikan (1 Ped. 4:4). La uku na kgalhakgaxmataw xlimapakgsin Dios. Wa xlakata lhuwa latamanin lakpuwankgo pi tanu tayat kgalhiyaw. Biblia liwana kinkawaniyan pi putum tiku natlawakgo la tlawalh Cristo nakaputsastalanikan (2 Tim. 3:12).
NI KAKATALALIW TIKU NITLAN XTAYATKAN
4. Komo kgalhakgaxmatputunaw Dios, ¿tuku ni kilitlawatkan?
4 Komo kgalhakgaxmatputunaw Dios, ni kilipaxkitkan kakilhtamaku chu tuku anan (kalikgalhtawakga 1 Juan 2:15, 16, TNMa). Biblia wan pi wa Satanás akgchipanit kakilhtamaku. Limaklakaskin takanajla, mapakgsinanin, tuku natamawaputunkan o wi tuku nastaputunkan kkakilhtamaku, Internet, televisión chu radio xlakata nakaʼakgskgawi latamanin (2 Cor. 4:4; 1 Juan 5:19). Komo ni lakaskinaw pi uma kakilhtamaku nakinkaʼakgskgawiyan, kuenta kilitlawatkan tiku nakatalalinaw. Biblia liwana kinkawaniyan pi ni kamastaw talakaskin nakinkaʼakgskgawikanan, wan: «Katalalinkan tiku nitlan likatsikgo tlawakgo pi namakgxtakgaw xatlan talismanin» (1 Cor. 15:33, TNM). (Kaʼakxilhti recuadro «¿Tuku kilhchanima?».)
5, 6. 1) ¿Tiku ni nakatalalinaw? 2) ¿Tuku xlakata ni nakatalalinaw tiku tlawakgo tuku nitlan?
5 Komo chuntiya tlan xʼamigo Dios wamputunaw, ni kiʼamigoskan nakatlawayaw tiku tlawakgo tuku nitlan. Na ni kiʼamigoskan nakatlawayaw tiku wankgo pi skujnanikgo Jehová pero ni kgalhakgaxmatkgo. Wa xlakata, komo wi tiku natlawa talakgalhin chu ni makgxtakga, nialh tachuwinanaw (Rom. 16:17, 18).
6 Komo natalalinaw tiku tlawa tuku nitlan, alistalh max na natlawayaw tuku nitlan. ¿Tuku xlakata? Xlakata latamanin lakaskinkgo pi tlan kakaʼakxilhkgolh xʼamigos chu kamakgapaxuwaputunkgo. Akgtum liʼakxilhtit, komo akinin natalalinaw tiku tlawa talakgxtumit xalimaxana, max na natlawayaw. Makgapitsi xtatayananin Jehová chuna kaʼakgspulanit. Wilakgolh tiku makgxtakgkgolh talakgalhin, pero makgapitsi ni makgxtakgkgolh, chu katamakxtuka kcongregación (1 Cor. 5:11-13). Komo chuntiya natlawakgo talakgalhin, nakaʼakgspula tuku wan 2 Pedro 2:20-22 (kalikgalhtawakga).
7. ¿Tiku tlan nakatalalinaw?
7 Xlikana pi tlan nakalikatsiniyaw putum latamanin. Pero ni nakatalalinaw tiku ni kgalhakgaxmatkgo Dios. Akgtum liʼakxilhtit, ni xlilat pi chatum kstalanina Cristo xlitatawilat natlawa tiku ni tamununit. Tlakg xlakaskinka xʼamigos Dios nawanaw nixawa tiku ni paxki Jehová. Kajwatiya nakatalalinaw tiku lilatamakgo xtalakaskin Dios. Jesús wa: «Sampi kaxatikawa nti xtlawalh xtalakaskin Dios, wa yuma nkintala» (Mar. 3:35).
Tlakg xlakaskinka xʼamigos Dios nawanaw nixawa tiku ni paxki Jehová
8. ¿Tuku lanikgolh israelitas xlakata katalalinkgolh tiku nitlan xlikatsikgo?
8 Tiku katalalin tiku nitlan likatsikgo kalimini laklanka taʼakglhuwit. Akgtum liʼakxilhtit, akxni israelitas xʼamakgolh chankgo kTiyat nema xKawanikanit pi Nakamaxkikan, Jehová liwana kawanilh pi ni xkatalalinkgolh latamanin tiku anta xlamakgolh. Xla wa: «Ni nalakgtakilhputaya xdioseskan chu ni namakgpuwantinikana nakaskujnaniya, chu ni natlawaya xtalismaninkan, wata nalakxpulaya chu nalakxtlawaya xposteskan xasagrados chu wixin wa Jehová miDioskan naskujnaniyatit» (Éx. 23:24, 25). Pero tlakg lhuwa israelitas ni kuentajtlawakgolh chu tlawakgolh laklanka talakgalhin (Sal. 106:35-39). ¿Tuku lalh alistalh? Jehová lakgmakgalh kachikin Israel chu tlawalh pi congregación xla kstalaninanin Cristo wa xkachikin xlitaxtulh (Mat. 23:38; Hech. 2:1-4).
KUENTAJKATLAWAW TUKU AKXILHAW, LIKGALHTAWAKGAYAW CHU KGAXMATAW
9. ¿Tuku xlakata lu nitlan makgapitsi películas, likgalhtawakga, tatlakgni chu páginas xla Internet?
9 Lhuwa películas, likgalhtawakga, tuku titaxtu ktelevisión, tatlakgni chu tuku tasiya kʼInternet lu nitlan naʼakxilhaw o nakgaxmataw xlakata natlawakgo pi nialh nakinkatalalinan Jehová. Litaxtukgo xtachuna latamanin tiku nitlan katalalinkan xlakata tlawakgo pi wa nalipawanaw xkakilhtamaku Satanás chu ni wa katilipawaw Jehová chu tuku wanit natlawa. Wa xlakata kuenta kilitlawatkan. Nikxni kaʼakxilhwi, kalikgalhtawakgaw nipara kakgaxmatwi tuku natlawa pi nakgalhiputunaw tuku anan kʼuma kakilhtamaku (Tito 2:12).
10. ¿Tuku nakatlawanikan películas, likgalhtawakga, tatlakgni chu tuku tasiya kʼInternet nema xalaklixkajnit?
10 Nialh makgas xkakilhtamaku Satanás namasputukan chu nialh katiʼanalh películas, likgalhtawakga chu tuku tasiya kʼInternet nema xalaklixkajnit. Biblia wan pi uma kakilhtamaku namasputukan, pero tiku tlawakgo xtalakaskin Dios putum kilhtamaku nalatamakgo (1 Juan 2:17). Libro xla Salmos na lichuwinan pi latamanin tiku nitlan likatsikgo nakamasputukan, pero latamanin tiku tlan likatsikgo xatapaxuwan nalatamakgo putum kilhtamaku kKatiyatni niku nialh naʼanan taʼakglhuwit (Sal. 37:9, 11, 29).
11. ¿La kinkamakgtayayan Jehová xlakata ni namakgxtakgaw?
11 Kʼakgtum oración nema tlawalh Jesús, lichuwinalh pi komo latamaputunaw putum kilhtamaku, talakaskin liwana nalakgapasaw Jehová chu xKgawasa (Juan 17:3). Wa Dios tiku kinkamakgtayayan kalakgapaswi chu ni namakgxtakgaw. ¿La tlawa? Limaklakaskin xkachikin, uma tlawa likgalhtawakga, videos chu páginas xla Internet, pero umakgolh, kinkamasiyaniyan tuku kilitlawatkan xlakata nalatamayaw putum kilhtamaku. Nachuna, xkachikin Dios kinkamasiyaniyan anta kkintamakxtumitkan nema wilakgolh liwaka 110,000 congregaciones kxlikalanka Katiyatni. Tuku katsiniyaw kkintamakxtumitkan chu klaklanka tamakxtumit kinkamakgtayayan tlakg nalipawanaw Jehová chu tuku wanit pi natlawa (Heb. 10:24, 25).
KAJWATIYA NATATAMAKGAXTOKGAW TIKU «KANAJLANIY NKIMPUCHINAKAN»
12. ¿Tuku wamputun kajwatiya natatamakgaxtokgaw tiku «kanajlaniy nkimPuchinakan»?
12 Komo lu tamakgaxtokgputunaw, lu kuenta kilitlawatkan. Biblia liwana kinkawaniyan pi ni natatamakgaxtokgputunaw tiku ni skujnani Jehová, xlakata ni katatalakxtumiyaw, xtachuna xkgakganat chu kapukswa ni lakxtum (2 Cor. 6:14). Biblia na kinkawaniyan pi kajwatiya natatamakgaxtokgaw tiku «kanajlaniy nkimPuchinakan» (1 Cor. 7:39). Uma wamputun pi kajwatiya natatamakgaxtokgaw tiku xtatayana Jehová nema tamununit chu tlawa xtalakaskin Dios. Komo wa natatamakgaxtokgaw tiku paxki Jehová, nakinkamakgtayayan ni namakgxtakgaw Dios.
Tatamakgaxtokgkan tiku paxki Jehová, makgtayayanan ni namakgatsankgananiyaw Jehová
13. ¿Tuku kalimapakgsilh Jehová israelitas xlakata tamakgaxtokgat?
13 Jehová katsi tuku tlakg tlan nakinkakitaxtuniyan. Putum kilhtamaku kalimapakgsinit kskujnin pi kajwatiya natatamakgaxtokgkgo tiku skujnanikgo. Akgtum liʼakxilhtit, Jehová kalimapakgsilh israelitas pi ni xtatamakgaxtokgkgolh tiku xkakninanikgo ni xaxlikana dioses. ¿Tuku xlakata? Amakgolh latamanin xtlawakgolh pi na xkakninanikgolh atanu dioses. Nachuna, Jehová kawanilh pi komo ni xkgalhakgaxmatkgolh, lu xkasitsinilh chu xkamasputulh (Deut. 7:3, 4).
14, 15. ¿Tuku lanilh Salomón xlakata ni kgalhakgaxmatli Jehová?
14 Akxni mapakgsina litaxtulh Salomón kʼIsrael, skinilh Jehová pi xmakgtayalh xlakata skgalala xwa. Jehová kgalhtilh xʼoración, chu Salomón lu lakgapaska xlakata lu skgalala mapakgsina litaxtulh chu xlakata lhuwa tuku xkgalhi xkachikin. Biblia lichuwinan pi asta chatum puskat tiku mapakgsina xwanit lakgapaxialhnalh, xlakata xwanikanit pi lu skgalala xwanit chu lhuwa tuku xkgalhi. Chu akxni lakgapasli lu kaks malakawanilh (1 Rey. 10:7). Maski lu skgalala xwanit alistalh tlawalh tuku nitlan, uma kinkamasiyaniyan pi nachuna nakinkaʼakgspulayan komo ni nakgalhakgaxmataw xlimapakgsin Jehová chu natatamakgaxtokgaw tiku ni skujnani (Ecl. 4:13).
15 Maski Jehová lhuwa tuku maxkilh Salomón, xla ni kgalhakgaxmatnilh chu katatamakgaxtokgli «lhuwa lakpuskatin tiku xalak atanu país». ¡Chu 1,000 lakpuskatin kgalhilh! ¿Tuku lanilh xlakata ni kgalhakgaxmatli Jehová? Akxni kgololh, amakgolh lakpuskatin tlawakgolh pi Salomón xmakgxtakgli Jehová chu xkakninanilh atanu dioses (1 Rey. 11:1-6). Xlakata Salomón chuna akgspulalh maski skgalala xwanit, akinin max nachuna nakinkaʼakgspulayan. Wa xlakata nipara tsinu nalakapastakaw natatamakgaxtokgputunaw tiku ni paxki Jehová.
16. Komo chatum xtatayana Jehová tatamakgaxtokgnit tiku ni skujnani Jehová, ¿tuku xlitlawat?
16 Pero, ¿tuku tlan natlawa tiku tamakgaxtokgnitta chu alistalh xtatayana Jehová nalitaxtu pero tatamakgaxtokgnit tiku ni skujnani Jehová? Biblia kgalhtinan: «Kalakgachixkuwitit minchixkukan; lakimpi na chuna wa minchixkukan nti ni kanajlakgoy xtachuwin Dios, nalitlajakgoyatit nakanajlakgoy ni wa xpalakata mintachuwinkan, wampi xpalakata ntu ntlan milatamatkan» (1 Ped. 3:1). ¿Tuku wamputun uma? Komo chatum puskat lu tlan nalikatsini xchixku chu natlawa xtastakyaw Biblia, max xchixku naʼakxilha pi chuna la titaxtutilhama kilhtamaku tlakg tlan tayat kgalhi chu max nalakpuwan xtatayana Jehová nawan. Chuna kakitaxtuninit lhuwa tamakgaxtokgat. Nachuna xlitlawatkan natalan tiku tatamakgaxtokgnit puskat tiku ni xtatayana Jehová chuna la wan 1 Pedro 3:1.
WA KAKATALALIW TIKU PAXKIKGO JEHOVÁ
17, 18. 1) ¿Tuku makgtayalh Noé xlakgtaxtulh kMunkaklat? 2) ¿Tuku kamakgtayalh xapulana kstalaninanin Cristo xlakgtaxtukgolh akxni masputuka Jerusalén?
17 Katalalinkan tiku ni tlan likatsikgo natlawakgo pi ni nakgalhakgaxmataw Jehová. Pero tiku tlan likatsikgo tlan nakinkamakgtayakgoyan ni namakgatsankgananiyaw. Kalakpuwaw xliʼakxilhtit Noé. Akxni xlama, lhuwa latamanin kajwatiya xlakpuwankgo natlawakgo tuku nitlan putum kilhtamaku (Gén. 6:5). Lu nitlan xlikatsikgo latamanin wa xlakata Jehová lakpuwa nakamasputu. Pero Biblia wan pi Noé xaʼakgstitum xwanit chu putum kilhtamaku kgalhakgaxmatli Jehová (Gén. 6:7-9). ¿La tlawalh xlakata ni xmakgatsankgananilh Dios?
18 Noé nikxni akxtum katalalh tiku ni xpaxkikgo Jehová. Wata akxtum xtatawila xpuskat, xkamanan chu xlakpuskatin xkamanan, chu lu liskujkgolh natlawakgo arca chu nalichuwinankgo Dios (2 Ped. 2:5). Uma kamakgtayalh xlakata nalakgtaxtukgo kMunkaklat. La uku, putum akinin xkamanan Noé litaxtuyaw. Wa xlakata kilipaxtikatsinitkan pi kgalhakgaxmatnankgolh chu ni akxtum katalakgolh tiku nitlan xlikatsikgo. Nachuna, xapulana kstalaninanin Cristo kgalhakgaxmatkgolh Dios chu ni akxtum katalakgolh tiku ni xpaxkikgo. Uma kamakgtayalh nalakgtaxtukgo akxni masputuka Jerusalén kkata 70 (Luc. 21:20-22).
Komo nakatalalinaw tiku paxkikgo Jehová, nakinkamalakpuwaniyan la nawan kilatamatkan kParaíso (Kaʼakxilhti párrafo 19)
19. Komo ni makgatsankgananiputunaw Jehová, ¿tuku kilitlawatkan?
19 Komo ni makgatsankgananiputunaw Jehová kʼuma xaʼawatiya kilhtamaku, ¿tuku kilitlawatkan? (1 Cor. 16:13; Prov. 13:20.) Nachuna natlawayaw la Noé, xfamilia chu xapulana kstalaninanin Cristo. Nikxni nakatalalinaw latamanin tiku ni paxkikgo Jehová.
a 1 Juan 2:15, 16, (TNM): «Ni kapaxkitit kakilhtamaku chu tuku anan kkakilhtamaku. Komo wi tiku paxki kakilhtamaku, xaTlat ni paxki. Xlakata putum tuku wi kkakilhtamaku, tuku tlawaputun kimaknikan chu tuku akxilhputun kilakgastapukan, lhuwa masiyakan tuku kgalhikan klatamat, ni wa xaTlat masta, wata wa tuku malaknu kakilhtamaku».