Tuku katsiputunkgo tiku likgalhtawakgakgo

¿Tuku kilhchanima Hebreos 4:12 akxni wan pi «xtachuwin Dios xastakna chu masta litliwakga»?

Tuku tatsokgnit pulana chu alistalh kinkamasiyaniyan pi «xtachuwin Dios» nema Pablo xlichuwinama, wa xtamakatsin Dios xlakata xtalakaskin, chuna la wan Biblia.

Kkilikgalhtawakgakan, makglhuwa kmaklakaskinaw Hebreos 4:12 xlakata nakmasiyayaw pi Biblia kgalhi litliwakga xlakata nakalakgpali latamanin. Chu uma xlikana. Pero na kiliʼakgatekgsatkan tuku xlichuwinama Pablo akxni tsokgli uma versículo. Xla xkamaʼakgpuwantinima kstalaninanin Cristo tiku hebreos xwankgonit xlakata xmakgtayanankgolh nakgantaxtu xtalakaskin Dios. Uma tuku Dios natlawa xlitachuwinan kTatsokgni. Ama kilhtamaku, Pablo maklakaskilh xliʼakxilhtit israelitas tiku Dios xkalakgmaxtunit kʼEgipto. Xlakan tlan xtanukgolh «katiyatni niku lhuwa anan leche chu ksakgsi cera», akgtum katiyatni nema Dios xkamalaknuninit. Anta tlan xkgalhikgolh xaxlikana tajaxni (Éx. 3:8; Deut. 12:9, 10).

Wa uma tuku Dios xlakaskin. Pero israelitas ni limasiyanikgolh takanajla Jehová chu ni kgalhakgaxmatkgolh, wa xlakata lhuwa tiku ni tanukgolh kxtajaxni Dios (Núm. 14:30; Jos. 14:6-10). Maski chuna, Pablo wa pi «tlanku nkinkalakgchanan ntamalaknun lantla nalitanuyaw [kxtajaxni]» Dios (Heb. 3:16-19; 4:1). Liwana tasiya pi uma «ntamalaknun» na kilhchanima tuku Dios kinkawaninitan xlakata xtalakaskin. Chuna la kstalaninanin Cristo tiku hebreos xwankgonit, akinin na tlan nalikgalhtawakgayaw xlakata uma chu tlan namakgtayananaw. Xlakata Pablo xlimasiyalh pi uma tamalaknun anta takilhti kBiblia, lichuwinalh tuku wan Génesis 2:2 chu Salmo 95:11.

Lu lipaxuwayaw katsimaw pi «ntamalaknun lantla nalitanuyaw [kxtajaxni]» Dios chuntiyaku wi. Kanajlayaw pi tlan natanuyaw kxtajaxni Dios, chuna la wan Biblia. Wa xlakata lu liskujaw xlakata tlan natanuyaw. ¿La tlawayaw? Ni stalaniyaw xlimapakgsin Moisés chu na ni tlawayaw tuku tlan kaj xlakata Dios tlan nakinkaʼakxilhan. Wata xatapaxuwan makgtayananaw pi nakgantaxtu xtalakaskin Dios chu chuntiya namakgtayananaw xlakata kanajlaniyaw Dios. Lhuwa mil latamanin xlikalanka katiyatni tsukukgonit likgalhtawakgakgo Biblia chu katsinimakgo tuku Dios masiya xlakata tuku natlawa. Uma tlawanit pi lhuwa umakgolh latamanin nalakgpalikgo xlatamatkan, nalimasiyakgo takanajla chu natamunukgo. Putum uma limasiya pi «xtachuwin Dios xastakna chu masta litliwakga». Tuku Dios kinkawaninitan xlakata tuku natlawa lakgpalinita kilatamatkan chu chuntiya nalakgpali.