¿Xkatsiyata?
Kilhtamaku nema lichuwinan Biblia, ¿xlikana xʼanankgo latamanin tiku xchankgo nixatlan tuwan kxkapukuxtun amakgapitsin?
Uma copia xla Digesto nema tsokgli mapakgsina Justiniano kata 1468 kaj pulaktum xlilhuwa tatsokgni nema lichuwinan taʼakglhuwit nema xkgalhikgokan makgasa.
CHUNA la wan Mateo 13:24-26, Jesús wa: «Wa ntapakgsin xala kʼakgapun, [...] xtachuna nchatum nchixku nti ntlan lichanat nchalh kxpukuxtu. Wampi xlimakgwa klhtatamakgo nchixkuwin, milh xtalatlawana, na wa nchalh nkatuwaj tuwan kxlakgstipan xtrigo, pus ya tialh. Cha nchu mpi pulhli wa ntu xtachanit, na mastalh xatawakat, pus chi na tasiyulh nchu wa mpalhma» o tuwan. Makgapitsi tiku lu katsinikgo ni lu kanajlakgo pi uma liʼakxilhtit xaxlikana. Pero makgapitsi kapsnat xalak makgan Roma, masiya pi chuna xla.
Chuna la lichuwinan maktum diccionario xla Biblia, limapakgsin xalak Roma xwan pi xlakatsala limapakgsin tiku xchan nixatlan tuwan kxkapukuxtun achatum xlakata nalimalakgaxokge. Komo xtalakaskin akgtum limapakgsin la uma, limasiya pi chuna xla. Chatum tiku lu katsi xlakata limapakgsin, Alastair Kerr, wan pi kata 533 akxni xminita Cristo mapakgsina Justiniano xalak Roma, maxtulh maktum tatsokgni wanikan Digesto. Uma tatsokgni xlimin pulaklhuwa limapakgsin xalak Roma niku xwan tuku xwankgonit tiku lu xlakgapaskgo limapakgsin kkata 100 chu 250 akxni xminita Cristo. Tatsokgni Digesto lichuwinan Ulpiano, chatum tiku lu xkatsi, Ulpiano lichuwinan chatum tiku chalh nixatlan tuwan kxkapukuxtun atanu lataman chu laktlawanilh xtachanan. Na wan pi tiku xlaktlawanit tachanan xlakgchan naxokgoni tiku xtapakgsini tachanan.
Chuna la akxilhaw, uma chuna xla kxtamapakgsin romanos. Uma limasiya pi liʼakxilhtit nema lichuwinalh Jesús, xlikana.