¿Tuku nala komo kinatlatni nialh nakimaxkikgo talakaskin nakmaklaklakaskin redes sociales?

Tasiya pi putum miʼamigos maklakaskinkgo redes sociales chu putum kilhtamaku wa lichuwinankgo. Max asta nalikgalhkgamanankgoyan xlakata wix ni kgalhiya. ¿Tuku milikatsit xlakata uma? ¿Chu tuku militlawat?

Tuku milikatsit

Ni mi’akstu chuna makgkatsiya. Lhuwa natlatni ni kamaxkikgo talakaskin xkamanankan namaklakaskinkgo redes sociales. Max akxilhkgonit pi redes sociales tlawakgonit pi nakalimini:

• tajatat xla talipuwan.

• na’akxilhkgo pornografía, sexting, ciberacoso.

• latata’akglhuwikgo amigos.

Lhuwa kamanan laksakkgonit nialh nalimaklakaskinkgo redes sociales. X’akstukan akxilhkgolh pi ni xkamakgtayama wata xkatlawanima tuku nitlan. Ka’akxilhwi tuku titaxtukgonit makgapitsin lakkamanan:

• Priscilla akxilhli pi xmakgatsankgama kilhtamaku nema tlan xlimaklakaskilh xlakata xtlawalh tuku tlakg xlakaskinka.

• Jeremy ni xlakgati pi ni la xmachokgo na’akxilha tuku nitlan nema tasiyakgo kredes sociales.

• Bethany akxilhli pi redes sociales xtlawama pi tlakg kuenta xkatlawa tuku xtlawamakgo amakgapitsi latamanin.

«Klaksakli nialh nakmaklakaskin redes sociales, chu kpaxuwa pi chuna ktlawalh. Chu ni klilipuwan wata klipaxuwa pi tlakg kkgalhi kilhtamaku naklimaklakaskin kimpalakata» (Sierra).

«Ni xaklakgati xlakata xaksmanipasanit redes sociales, lakgachunin xaklilakgaputsa tuku xwankgo amakgapitsin xlakata tuku xakmawaka. Tuwa kmakgkatsilh nialh nakmaklakaskin pero akxni chuna ktlawalh tlakg kpaxuwalh. Chu la uku tlakg kgalhi takaksni» (Kate).

Tuku tlan natlawaya

Katataya tuku lakkaxwilikgo minatlatni. Kalimasiya pi liwana lakapastaknana, katlawa tuku lakkaxwilikgonit, ni kasitsi chu katlawa tuku wanikgoyan.

Tuku wan Biblia: «Tiku xatonto tunkun maxtu putum xtasitsi, pero tiku xaskgalala machokgo xtasitsi» (Proverbios 29:11).

Wi tiku max nastakyawakgoyan pi tsekg kamaklakaskinti redes sociales o katlawa akgtum cuenta chu ni nakawaniya minatlatni. ¡Uma lu nitlan! Tuku matsekgpat natlawa pi nitlan namakgkatsiya. Komo nakatsikgo minatlatni nakgalhiya ta’akglhuwit chu uma natlawa pi nialh katilipawankgon.

Tuku wan Biblia: «Akgstitum klatamaputunaw putum kilhtamaku» (Hebreos 13:18).

Wix kalaksakti. Xtachuna la lakkamanan tiku kalichuwinaw, max na nalaksaka nialh namaklakaskina redes sociales. Liwana tasiya pi maklakaskinkan redes sociales ni wa tuku tlakg tlan mimpalakata, wa xlakata nialh kamaklakaskinti, ni kaj xlakata minatlatni chuna wanimakgon wata xlakata wix chuna nalaksaka. Komo tiku katapina k’escuela nakgalhskinkgoyan tuku xlakata ni maklakaskina redes sociales ni katimamaxanikgon chu uma max natlawa pi ni katilikgalhkgamanankgon.

Tuku katsiniw: Katataya tuku wanikgoyan minatlatni chu kalaksaktit tuku minatlatni chu wixin namatlaniyatit, xlakata tuku xlakan nalaksakkgo wa tuku wix na nalakgatiya. Max la uku, tlan ni nakgalhiya redes sociales.