¡SKGALALH KATAWILA!
Tuku tuwa titaxtukgo tiku tsalataxtukgonit: Lhuwa latamanin tsalataxtumakgo k’Ucrania
24 xla Febrero kata 2022 Rusia akgchipalh Ucrania, uma tlawalh pi kachikin tuwa xtawi chu lhuwa tsalataxtukgolh.a
«Xtaktakgoyachi bombas chu lhuwa xpankgnama. Lu xakpekuama asta nila kwan tuku xakmakgkatsi. Akxni kkatsiw pi latamanin x’amakgo ktrenes xlakata xtsalakgolh, na anta kkaw. Chatunu akinin kajwatiya tlan xaklinaw akgtum aktsu mochila anta niku xakmujuw putum tuku xakmaklakaskiw, kajwatiya kliw kinkapsnatkan, likuchun, chuchut chu tsinu liwat nema xakwaw. Putum kmakgxtakgwi chu kkaw niku xtaxtumakgo trenes» (Natalia de Járkov, Ucrania).
«Ni xaklakpuwanaw pi xʼama tawila guerra. Ktsukulh kgaxmata la xpankgmakgo bombas chu asta ventanas xtachikimakgo. Klakpuwa pi xaktaxtulh chu kajwatiya klilh tuku xakkama maklakaskin. Ktaxtulh kkinchik kamakgnajatsa tsisa chu ktawakalh ktren nema xʼama Lviv chu alistalh ktawakapa kʼautobús nema xʼama kPolonia» (Nadia de Járkov, Ucrania).
K’uma artículo na’akxilhaw makgapitsi takgalhskinin:
¿Tuku tlawa pi latamanin katsalataxtukgolh xkachikinkan?
Maski xkuenta Rusia tuku titaxtumakgo tiku tsalataxtukgonit, Biblia tlakg kinkawaniyan tuku xlakata chuna lama:
Mapakgsinanin xalak kakilhtamaku nila kamaxkikgo putum tuku maklakaskinkgo latamanin. Wata limaklakaskinkgo xlimapakgsinkan xlakata nakamakgapatinan (Eclesiastés 4:1; 8:9).
Satanás, «xmapakgsina kakilhtamaku» kamatlawi tuku nitlan latamanin chu pi asta Biblia wan: «Putum kakilhtamaku wi kxmakan Akgskgawini» (Juan 14:30; 1 Juan 5:19).
Maski makgasa ananit lhuwa tuku nitlan, la uku lamaw kilhtamaku nema Biblia limapakuwi xaʼawatiya kilhtamaku, niku tuwa natitaxtukan chu lu kalipekua nawan (2 Timoteo 3:1). Kxa’awatiya kilhtamaku x’ama litasiya talachipat, tuku masputunan, na’anan tatsinkstat chu laklixkajni tajatat. Wa uma tuku xtlawalh pi latamanin xtsalataxtukgolh (Lucas 21:10, 11).
¿Niku tlan natekgskgo takgalhkgalhin tiku tsalataxtukgonit?
Biblia masiya pi kimalakatsukinakan Jehová,b chatum Dios tiku kapaxki tiku tsalataxtukgonit chu latamanin tiku makgxtakgkgonit kxchikkan kalimasiyani talakgalhaman (Deuteronomio 10:18). Xla malaknu pi nalakkaxtlawa tuku titaxtumakgo tiku tsalataxtumakgo. Nalimaklakaskin xTamapakgsin Dios, akgtum tamapakgsin nema wi k’akgapun chu xlakgxokgo nawan putum tamapakgsin xalak kkatiyatni (Daniel 2:44; Mateo 6:10). Jehová nalimaklakaskin xTamapakgsin xlakata namasputu Satanás (Romanos 16:20). Namapakgsinan kxlikalanka katiyatni chu nialh kati’analh tapapitsit kkachikinin. Putum latamanin akgtum familia nawankgo xlikalanka katiyatni. Nialhti katimakgxtakgli xchik, xlakata Biblia malaknu: «Chu xlikana chatunu chatunu natawila xtampin xakiwi xʼuvas chu xtampin xhiguera, chu ni katiʼanalh tiku nakamakgapekuan; xlakata xkilhni Jehová tiku pulalin lhuwa soldados chuna lichuwinanit» (Miqueas 4:4).
Kajwatiya xTamapakgsin Dios tlan namapanu xliputum kilhtamaku tuku tuwa titaxtumakgo tiku tsalataxtumakgo la uku. Jehová nalimaklakaskin xTamapakgsin xlakata namasputu ta’akglhuwit nema tlawa pi latamanin namakgxtakgkgo xchikkan. Ka’akxilhwi makgapitsi li’akxilhtit:
Guerras. «[Jehová] masputu guerra» (Salmos 46:9). Xlakata tlakg nakatsiya la Dios namasputu umakgolh taʼakglhuwit, kaʼakxilhti artículo «¿Cómo llegará a haber paz en la Tierra?».
Ta’akglhuwit chu tuku nitlan lama. «[Jehová] nakalakgmaxtu kta’akglhuwit chu tuku nitlan lama» (Salmo 72:14). Xlakata na’akgatekgsa la latamanin tlan nalakgpalikgo xtalakapastaknikan, ka’akxilhti makgapitsi artículos xla serie nema wanikan «¿Tlan namakgatlajaya tasitsi?».
Talimaxkget. «[Jehová] nalakgmaxtu tiku pixlanka skima tamakgtay» (Salmo 72:12). Xlakata nakatsiya la namasputu Dios tuku tlawa pi ka’analh talimaxkget, kalikgalhtawakga artículo «¿Es realista esperar un sistema justo?».
Tatsinksni. «Lhuwa namakgalanankan kkatiyatni» (Salmo 72:16). Dios natlawa pi nialhti natitaxtu tatsinkstat, xlakata tlakg nakatsiya kalikgalhtawakga artículo «¿Un mundo sin hambre?».
¿Tlan nakamakgtaya Biblia la uku tiku tsalataxtukgonit?
Chuna, ni kajwatiya kamaxkima takgalhkgalhin tiku tsalataxtukgonit, wata Biblia nakamaxki tastakyaw la uku xlakata natayanikgo taʼakglhuwit nema titaxtumakgo.
Tuku wan Biblia: «Tiku ni skgalala kanajla putum tuku wanikan, pero tiku skgalala liwana lakapastaka tuku natlawa» (Proverbios 14:15).
Tuku kilhchanima: Kalilakpuwanti tuku taʼakglhuwit max natitaxtuya chu la tlan kuenta natlawaya. Skgalalh katawila xlakata nitu natlawanikgoyan tiku lixkajni likatsikgo. Xlakan putsakgo tiku ni xalak xpaiskan chu kamakgapekuankgo xlakata nitu katsikgo.
Tuku wan Biblia: «Komo kgalhiyaw liwat chu lhakgat, nalipaxuwayaw uma» (1Timoteo 6:8).
Tuku kilhchanima: Ni kalilakpuwanti tuku tlan xkgalhi, kajwatiya kalipaxuwa tuku kgalhiya la uku.
Tuku wan Biblia: «Chuna la lakaskinatit nakalikatsinikgoyan latamanin, nachuna wixin kakalikatsinikgotit» (Mateo 7:12).
Tuku kilhchanima: Tlan kalikatsi chu kakgalhkgalhinanti. Komo chuna likatsiya uma natlawa pi amakgapitsin namaxkikgoyan kakni chu tlan namakgamakglhtinankgoyan xalak kʼuma kachikin.
Tuku wan Biblia: «Ni kalitamakgapuspittit tuku nitlan akxni nakatlawanikanatit tuku nitlan» (Romanos 12:17).
Tuku kilhchanima: Akxni nitlan nalikatsinikana, ni kamasta talakaskin pi mintasitsi natlawa natamakgapuspita. Uma natlawa pi tlakg naʼanan taʼakglhuwit.
Tuku wan Biblia: «Putum tlan ktlawa xlakata Dios kimaxki litliwakga» (Filipenses 4:13).
Tuku kilhchanima: Pulana Dios kawili kmilatamat chu akxni natlawaniya oración kaskini litliwakga xlakata tlan natayaniya. Xlikana pi xla namakgtayayan.
Tuku wan Biblia: «Nitu kalilakgaputsatit, wata putum kilhtamaku kamakatsinitit Dios mintalakgaputsitkan, chu katasaskinitit xliputum minakujkan chu kapaxtikatsinitit akxni tlawaniyatit oración; chu Dios nakamaxkiyan takaksni nema latamanin nila akgatekgskgo, chuna, xpalakata Jesucristo xla nakuentajtlawa minakujkan chu mintapuwankan» (Filipenses 4:6,7).
Tuku kilhchanima: Kaxatukawa taʼakglhuwit nema titaxtupat, kaskini Dios pi kakgalhi takaksni kmintalakapastakni chu kminaku. Kaʼakxilhti artículo «Filipenses 4:6, 7 | “No se inquieten por nada”».
a Lichali akxni akgchipaka Ucrania, Alto Comisionado de las Naciones Unidas para los Refugiados (ACNUR) xla kamakgtayama asta niku matlani tiku tsalataxtukgonit. Kajwatiya xtitaxtunit akgkutiy kilhtamaku, liwaka akgtiy millones latamanin xalak Ucrania xtsalakgonit atanu kachikinin chu akgtum millón latamanin na ankgonit kʼatanu kachikinin antiya k’Ucrania.
b Jehová wa xtukuwani Dios (Salmo 83:18). Ka’akxilhti artículo «¿Tiku Jehová?».