¿Tuku xlakata política lu kamapapitsi latamanin? ¿Tuku kinkawaniyan Biblia?

Kxlikalanka katiyatni, lhuwa países lu tapitsikgonit kaj xlakata política. Kkata 2022, centro de investigación Pew Research Center, «katlawanilh takgalhskinin latamanin xalak 19 países, chu liwaka itat tiku katlawanika takgalhskinin wankgolh pi kxpaiskan, latamanin tapitsikgonit kaj xlakata tanu tanu partido político tatayakgo».

Chu niku wix lapat, ¿tapitsikgonit latamanin kaj xlakata política? ¿Tuku xlakata chuna la? ¿Wi tuku tlan nakamakgtaya? Kaʼakxilhti tuku wan Biblia.

Tayat nema kamapitsi latamanin

Biblia lichuwinalh pi kkilhtamaku niku lamaw, nema limapakuwi “xaʼawatiya kilhtamaku», lhuwa latamanin xʼamakgo kgalhikgo nixatlan tayat nema kamapitsi latamanin.

• «Kxaʼawatiya kilhtamaku, tuku natitaxtukan lu tuwa nawan chu lu kalipekua nawan. Xlakata lakchixkuwin xʼakstukan nakapaxkikan, […] nila wi tuku nakatalakkaxlakan» (2 Timoteo 3:1-3).

Maski lhuwa latamanin lu liskujkgo xlakata gobiernos xalak katiyatni liwana naskujkgo, uma nichuna kitaxtuma. Wilakgolh tiku lu tanu tuku lakpuwankgo, chu wa xlakata tuwa kitaxtu pi xlakan chu amakgapitsin makxtum naskujkgo xlakata nasputa taʼakglhuwit kkatiyatni. Putum uma limasiya pi lu xlikana tuku Biblia lichuwinalh makgasa.

• «Chixku akgchipanit chixku xlakata natlawani tuku nitlan» (Eclesiastés 8:9).

Pero Biblia na lichuwinan akgtum tamapakgsin nema napulalin chatum tiku tlan masputu putum taʼakglhuwit nema kamapatini latamanin.

Chatum tlan pulalina tiku kalilakgaputsa latamanin

Biblia lichuwinan chatum pulalina tiku niti xtachuna, chatum pulalina tiku kgalhi tayat nema talakaskin xlakata nalakkaxtlawa taʼakglhuwit. Ama pulalina wa Jesucristo. Xla kgalhi litliwakga, maxkikanit limapakgsin chu xlikana kamakgtayaputun latamanin xlakata nakgalhikgo takaksni chu makxtum natawilakgo.

• «Tiku xaʼakgstitum napulha la tuwan, chu lhuwa naʼanan takaksni» (Salmo 72:7).

• «Putum kachikinin naskujnanikgo» (Salmo 72:11).

Jesús wa tlakg xatlan pulalina nema anan, xlakata xlikana kalilakgaputsa latamanin chu kamakgtayaputun, liwaka tiku katlawanikan tuku ni xaʼakgstitum.

• «Xla nalakgmaxtu tiku pixlanka skima tamakgtay, nachuna tiku taktuju chu putum tiku ni kgalhi tiku namakgtaya. Nalakgalhaman tiku ni tlankajwa chu tiku limaxkgen, chu nalakgmaxtu xlatamatkan tiku lakglimaxkgenin. Nakalakgmaxtu ktaʼakglhuwit chu tuku nitlan lama» (Salmo 72:12-14).

Tlakg kakatsini xlakata xTamapakgsin Dios nema Jesús pulalin, chu kakatsi la uma tamapakgsin namakgtayayan kmilatamat chu tuku militlawat xlakata natatayaya.

• Kaʼakxilhti video ¿Tuku xTamapakgsin Dios?

• Kalikgalhtawakga artículo «Wa xTamapakgsin Dios: akgtum tamapakgsin nema xaʼakgstitum».