Lu lhkaknan kxlilakgatum katiyatni kata 2023 | ¿Tuku kinkawaniyan Biblia?

Latamanin kxlilakgatum katiyatni titaxtumakgo kalipekua lhkakna chu tuku masputunan xpalakata uma nema nikxni chuna xlanit. Ka’akxilhti makgapitsi tamakatsinin:

• «Kxlilakgatum katiyatni, kJunio titaxtukgolh lu kalipekua lhkakna nema nikxni chuna xlanit lata 174 kata akxni tsukuka lhkawilikan chu putsananikan tuku lama kkakilhtamaku» (Oficina Nacional de Administración Oceánica y Atmosférica, Departamento de Comercio de Estados Unidos, 13 xla Julio 2023).

• «Italia, España, Francia, Alemania chu Polonia titaxtumakgo tliwakga lhkakna chu takgalhkgalhi pi kʼislas xla Sicilia chu Cerdeña nataliwaka asta 48°C. Max wa niku tlakg taliwakanit nema nikxni chuna xlanit kʼEuropa» (Agencia Espacial Europea, 13 xla Julio 2023).

• «Akxni chichijwan katiyatni tlawa pi tlakg tliwakga namin sen, tlakg nasenan chu asta natsuku litatsamanan chuchut kkachikinin» (Stefan Uhlenbrook, director de la Sección de Hidrología, Recursos Hídricos y Criosfera de la Organización Meteorológica Mundial, 17 xla Julio 2023).

¿Lilakgaputsaya xlakata anan lhuwa tamakatsinin xpalakata la wi kilhtamaku? Ka’akxilhti tuku wan Biblia xlakata uma.

¿Xlichuwinanit Biblia pi lipekua x’ama lhkaknan, senan chu lokgnan?

Chuna. Akxni kalipekua lhkaknan chu atanu tatalakxtumi tuku xlichuwinan Biblia pi x’ama la kkinkilhtamakujkan. Kalichuwinaw uma, Jesús lichuwinalh pi «natasiya tuku makgapekuanan» (Lucas 21:11; Serafin de Ausejo, 1975). Lhuwa pekuankgo xlakata taliwakanit lhkakna kxlilakgatum katiyatni chu pi latamanin namasputukgo katiyatni.

¿Nialh la katilatamaw kkatiyatni?

Ni chuna. Dios malakatsukilh katiyatni xlakata anta xlatamaw putum kilhtamaku chu ni katimastalh talakaskin pi chixku namalakgsputu (Salmo 115:16; Eclesiastés 1:4). Wata tuku xla wanit wa pi “nakamalakgsputu tiku malakgsputumakgolh katiyatni” (Apocalipsis 11:18).

Biblia masiya pi Dios kgalhi litliwakga xlakata katiyatni nitu naʼakgspula xpalakata tuku la kkakilhtamaku, chu chuna natlawa.

• “[Dios] makaksa tliwakga un; takakskgo xtakgayawana pupunu” (Salmo 107:29). Dios kgalhi litliwakga xlakata namakaksa xlitliwakga katuxawat o tuku anan kkatiyatni. Tlan nalakkaxtlawa tuku nitlan wi kkatiyatni nema tlawa pi lu nasenan, namin tliwakga un chu lu nalhkaknan, chu kamakgapatinankgo latamanin.

• «Wix kuentajtlawaya katiyatni chu tlawaya pi lu namakgalanan chu lu namasta xtawakat» (Salmo 65:9). Dios natlawa pi katiyatni akgtum paraíso nawan.

Xlakata tlakg nakatsiya xtamalaknun Biblia niku wan pi katiyatni natakalaktlani, kaʼakxilhti artículo «¿Quién salvará el planeta?».