Tuku nitlan katlawanikan lakpuskatin | ¿Tuku wan Biblia?

Madhua xalak India, wan: «Akxni aktsujku xakwanit, kintala kgawasa chali chali xkiwilini chu xkiwani laklixkajni tachuwin. Chu akxni ktamakgaxtokgli, kimputiatse na lu nitlan xkilikatsini. Kimputiatse chu kimputiatlat lu xkimaskujukgo. Klakpuwa pi kiʼakstu nakimakgnikan».

Organización Mundial de la Salud wan: «Kxlikalanka Katiyatni wi tuku nitlan katlawanikanit lakpuskatin». Nachuna, wan pi chatum lata kgalhtutu lakpuskatin wi tuku nitlan katlawanikanit o kalikgamanankanit.

Komo chuna akgspulanitan, max namakgkatsiya pi wi tuku natlawanikana kaxanikuta niku napina. Xlakata nitlan kalikatsinikan lakpuskatin, max namakgkatsiya pi putum latamanin lakpuwankgo pi lakpuskatin nitu litaxtukgo. Pero ¿xlikana pi Dios kalilakgaputsa lakpuskatin?

¿Tuku lakpuwan Dios xlakata lakpuskatin?

Texto xalak Biblia: «Xakgawasa chu xatsumat kamalakatsukilh [Dios]» (Génesis 1:27).

¿Tuku wamputun uma?: Dios kamalakatsukilh xachixku chu xapuskat. Chu akxtum lu xlakaskinka kaliʼakxilha. Nachuna, Dios kgalhkgalhi pi chixku «xlipaxkit xpuskat chuna la xʼakstu paxkikan», ni natlawani tuku nitlan, ni nawani lixkajni tachuwin chu nipara nawilini (Efesios 5:33; Colosenses 3:19). Liwana tasiya pi Dios kalilakgaputsa lakpuskatin.

María xalak Argentina, wan: «Lata aktsinajku xakwanit makgapitsi xalak kifamilia kilikgamanankgolh. Chu akxni xakkgalhi 17 kata, kimalana kiwanilh pi komo ni xaktatalakgxtumilh x’ama kimakglhti kintaskujut. Chu la uku kinchixku, kinatlatni chu tiku lakatsu ktawilakgo nitlan kilikatsinikgo. Chuna la titaxtulh kilhtamaku, klakgapasli kiMalakatsukina Jehová.b Xla kamaxki kakni lakpuskatin. Uma kimasiyanilh pi kimpaxki chu xtapalh klitaxtu kxlakatin».

¿Tuku namakgtayayan tlan namakgkatsiya?

Texto xalak Biblia: «Wi chatum amigo tiku tlakg tlan talalipina nixawa mintala» (Proverbios 18:24).

¿Tuku wamputun uma?: Chatum xaxlikana amigo namakgtayayan. Kawani putum tuku makgkatsiya komo lakpuwana pi uma tlakg tlan namamakgkatsiniyan.

Elif xalak Turquía, wan: «Titaxtulh 20 kata chu niti klitachuwinalh pi xkilikgamanankanit. Wa xlakata akxni kstakli ni xakpaxuwa, chu xaklilipuwan. Lu skayaj kmakgkatsilh akxni wi tiku klitachuwinalh tuku nitlan xaktitaxtunit».

Texto xalak Biblia: «Kawilitit putum mintalakgaputsitkan kxmakan [Dios] xlakata xla kalilakgaputsayan» (1 Pedro 5:7).

¿Tuku wamputun uma?: Akxni tlawaniya oración Dios xlikana kgaxmatniyan (Salmo 55:22; 65:2). Dios lu paxkiyan, chu wa xlakata tlan namakgtayayan namakgkatsiya pi wix lu xlakaskinka litaxtuya.

Ana xalak Belice, wan: «Jehová lu kimakgtayanit tlan nakmakgkatsipara maski kintlawanikanit tuku nitlan. La uku tlan ktlawani oración Dios. Chu xla litaxtu la chatum amigo tiku ki’akgatekgsni tuku kmakgkatsi».

¿Tuku natlawa Dios xlakata tuku nitlan katlawanikan lakpuskatin?

Texto xalak Biblia: «Jehová [...] wix kamakgtayaya tiku lipuwamakgo chu tiku nialhti xnatlatnikan, xlakata latamanin nialh nakamakgapekuankgo» (Salmo 10:​17, 18).

¿Tuku wamputun uma?: Dios nialh makgas namasputu tuku ni xa’akgstitum, uma namakgtanuma tuku nitlan katlawanikan lakpuskatin.

Roberta xalak México, wan: «Akxni kkatsinilh pi Jehová nialh makgas namasputu putum tuku nitlan katlawanikan lakpuskatin chu laktsuman, uma kimaxkilh takaksni».

Komo tlakg katsiputuna takgalhkgalhin nema masta Biblia chu tuku xlakata tlan nalipawana tuku malaknu, xtatayananin Jehová tlan nalimakgtayakgoyan Biblia, kaskinti nalakgpaxialhnankana.

Kamakti uma artículo xlakata naʼimprimirliya.