Komo miʼakstu makgkatsiya, ¿tuku tlan natlawaya? | ¿Tuku kinkawaniyan Biblia?

Kxlikalanka katiyatni, lhuwa latamanin xʼakstukan kamakgkatsikan chu ni kgalhikgo amigos. Makgapitsi makuchinanin wankgo pi akxni kamakgtayayaw amakgapitsin kinkamakgtayayan ni kiʼakstukan namakgkatsiyaw.

• «Akxni kamakgtayayaw tiku maklakaskinkgo tamakgtay tlawa pi tlakg napaxuwayaw chu ni kiʼakstukan namakgkatsiyaw chu ni namakgkatsiyaw pi nila katalalinaw amakgapitsin» (Institutos Nacionales de la Salud, xalak Estados Unidos).

Biblia kinkawaniyan tuku tlan natlawayaw xlakata nakamakgtayayaw amakgapitsin. Komo natlawayaw tuku kinkawaniyan, nakinkamakgtayayan nialh kiʼakstukan namakgkatsiyaw.

Tuku tlan natlawaya

Kamasta tuku kgalhiya. Kakamaxki amakgapitsin tuku kgalhiya, chuna la minkilhtamaku. Kaputsa kilhtamaku akxni tlan akxtum nakatatawilaya amakgapitsin, chu ni kajwatiya nakatachuwinana kteléfono. Akxni lismaniya wi tuku kamaxkiya amakgapitsin, xlakan lu napaxtikatsinikgoyan, chu uma natlawa pi miʼamigos nalitaxtukgo.

• Texto xalak Biblia: «Kalismanitit namastayatit, chu na nakamaxkikanatit» (Lucas 6:38).

Kakamakgtaya amakgapitsin. Kalakputsa la nakamakgtayaya tiku titaxtumakgo tuku tuwa. Kaks kakakgaxpatni, kaliskujti naʼakgatekgsa tuku wanikgoyan, o kakakgalhskinti tuku lakaskinkgo pi natlawaya xpalakatakan xlakata ni lu tuwa namakgkatsikgo tuku titaxtumakgo.

• Texto xalak Biblia: «Xaxlikana amigo putum kilhtamaku paxkinan» (Proverbios 17:17).

Komo tlakg katsiputuna la tlan nakgalhiya amigos, kalikgalhtawakga artículo «La familia y los amigos».