Biblia xlichuwinanit taʼakglhuwit nema kgalhikgo mapakgsinanin
La uku, latamanin lu tapitsikgonit xlakata política. Makgapitsin tatayakgo limapakgsin nema anan kxkachikinkan pero amakgapitsin talalakatawakakgo umakgolh limapakgsin. Chu tiku lakkaxwilikgo limapakgsin o tiku skujkgo kpumapakgsin na tanu tanu tuku lakpuwankgo chu lalitataʼakglhuwikgo. Putum uma tlawa pi nila tliwakglh natawila akgtum gobierno chu nila liwana makgantaxtikgo taskujut nema xlitlawatkan.
Lu xlakaskinka nalichuwinanaw taʼakglhuwit nema kgalhikgo xtamapakgsinkan Estados Unidos chu Reino Unido. ¿Tuku xlakata? Xlakata Biblia xlichuwinanit pi akxni umakgolh kachikinin xkgalhikgolh taʼakglhuwit, Dios xʼama wili akgtum tamapakgsin nema xʼama lakgpali kakilhtamaku.
Taʼakglhuwit «kxaʼawatiya kilhtamaku»
Daniel, maktum libro xalak Biblia, lichuwinan tuku lu xlakaskinka xʼama kgantaxtu. Anta, Dios lichuwinalh tuku xʼama la kxlikgalhsputni xaʼawatiya kilhtamaku. Umakgolh tachuwin nema tsokgwililh Daniel xʼama kgantaxtu kkilhtamaku nema aku xʼama min, akxni kakilhtamaku xʼama talakgpali (Daniel 2:28).
Dios masiyanilh mapakgsina xalak Babilonia kʼakgtum tamanixnat tuku xʼama la. Kʼuma tamanixnat, mapakgsina akxilhli akgtum lanka imagen nema xlitatlawanit tipalhuwa likan. Alistalh, palakachuwina Daniel lichuwinalh pi pulakatunu likan nema xlitatlawanit imagen, xkakilhchanima pulakatunu tamapakgsin nema xʼama tawila.a Chu alistalh, akgtum chiwix xʼama malakgsputu uma imagen. Uma chiwix xkilhchanima akgtum tamapakgsin, o gobierno, nema xʼama wili Dios (Daniel 2:36-45).
Xtamapakgsin Dios nema talichuwinan kxlibro Daniel xʼama tawila kxlakgxokgo putum tamapakgsin xalak kakilhtamaku. Wa uma Tamapakgsin nema Jesús kamasiyanilh kstalaninanin pi kskinikgolh Dios akxni wa: «Kamilh minTamapakgsin» (Mateo 6:10).
Pero ¿lichuwinalh Daniel pi tamapakgsin xala uku xʼamakgo kgalhikgo taʼakglhuwit? Lichuwinalh pi xtantun uma imagen xlitatlawanit «hierro nema talakgwilhakanit tiyat» (Daniel 2:33). Kajwatiya xtantun imagen xtalakgwilhakanit tiyat. Uma kilhchanima pi xʼama tawila akgtum tamapakgsin nema ni xtachuna xʼama wan la amakgapitsin tamapakgsin nema pulana xʼamakgo tawilakgo. ¿Tuku xʼama litalakgpali? Daniel kinkalitachuwinanan:
Chuna la wan umakgolh versículos, lanka tamapakgsin nema kilhchanima xtantun imagen ni lu tliwakga xʼama wan xlakata latamanin nema kamapakgsi xʼamakgo lakatakikgo chu uma xʼama tlawa pi xʼanalh taʼakglhuwit.
¿La kgantaxtuma tuku lichuwinalh Daniel?
Xtantun imagen wa kilhchanima tamapakgsin nema tlakg kgalhi litliwakga la uku, xtamapakgsinkan Estados Unidos chu Reino Unido. ¿Tuku lanit kkinkilhtamakujkan nema limasiya pi uma xlikana?
Chuna la lichuwinawa, xtantun imagen «litatlawanit hierro chu tiyat», pero kimputumkan katsiyaw pi hierro chu tiyat nila akxtum lakgo (Daniel 2:42). La uku, Estados Unidos chu Reino Unido nialh kgalhikgo lhuwa litliwakga xlakata latamanin nema kamapakgsikgo tapitsikgonit. La uku, kʼumakgolh akgtiy países latamanin lu latataʼakglhuwikgo. Nachuna, latamanin lakatakikgo mapakgsinanin chu xafuerza skinkgo pi kakamaxkika tuku kalakgchan. Chu tiku kapulalinkgo umakgolh latamanin tanu tanu tuku lakpuwankgo. Xlakata latamanin lu tapitsikgonit, maski umakgolh tamapakgsin wi tuku lakkaxwilikgonit nila makgantaxtikgo.
Taʼakglhuwit nema anan la uku ktamapakgsin xalak katiyatni, xtalichuwinanit kcapítulo 2 xla Daniel.
Kaʼakxilhwi makgapitsi tuku lichuwinalh Daniel, tuku kilhchanima chu la kgantaxtuma la uku.
Tuku xlichuwinankanit: «Tamapakgsin natapitsi, pero tliwakga nawan chuna la hierro» (Daniel 2:41).
Tuku kilhchanima: Maski kgalhikgo taʼakglhuwit, Estados Unidos chu Reino Unido na kgalhikgo lhuwa tuku litalatlawanankgo. Wa xlakata tlan wanaw pi lu lakgtliwakgan xtachuna la hierro.
La kgantaxtuma
Estados Unidos chu Reino Unido wa tiku tlakg laktlawakgolh tumin kkata 2023 xlakata nakgalhikgo tuku nalitalatlawanankgo nixawa atanu 12 países nema xmin klista xla países tiku na tlakg kgalhikgo tuku litalatlawanankgo (Stockholm International Peace Research Institute [Instituto Internacional de Estudios para la Paz de Estocolmo]).
«Chuna la Reino Unido chu Estados Unidos klamakgtayayaw [...] tlakg tatliwakglhnit. Ni anan atanu países tiku tlakg lamakgtayakgo nixawa akinin [...;] akxtum kskujaw, akxtum ktalatlawananaw» (Comando Estratégico, Ministerio de Defensa xalak Reino Unido, abril kata 2024).
Tuku xlichuwinankanit: «Chu xlakata laktsu tantun, litatlawanit hierro chu tiyat, tamapakgsin wi niku tliwakga nawan chu wi niku ni tliwakga katiwa» (Daniel 2:42).
Tuku kilhchanima: Maski kgalhikgo lhuwa litliwakga, Estados Unidos chu Reino Unido nila liwana mapakgsinankgo xlakata kamaxkikgo talakaskin latamanin nalaksakkgo xmapakgsinakan. Xlakata kaj makgapitsin latamanin tiku tatayakgo, umakgolh tamapakgsin nila makgantaxtikgo tuku lakkaxwilikgo.
La kgantaxtuma
«Makgapitsin tiku lakputasananikgo xlakata política, wankgo pi xlakata ni putum latamanin tatayakgo gobierno xalak Estados Unidos, na nila tlawa pi kaʼanalh takaksni chu lhuwa taskujut kxlikalanka katiyatni» (The Wall Street Journal).
«Xlakata anan lhuwa taʼakglhuwit, mapakgsinanin [xalak Gran Bretaña] nila lakgpalikgonit tuku talakaskin xlakata nakamakgtayakgo tiku kamapakgsikgo» (Institute for Government [Instituto de Gobierno]).
Tuku xlichuwinankanit: «Xlakan [uma tamapakgsin] nakatatalakgwilhakgo tiku xalak kachikin. Pero ni akxtum katilakgolh» (Daniel 2:43).
Tuku kilhchanima: Maski putum latamanin tlan wankgo tiku lakaskinkgo kalakgchalh pumapakgsin, alistalh anan lhuwa tapapitsit xlakata tanu tanu tuku xlakaskinkgo.
La kgantaxtuma
«La uku, lhuwa latamanin xalak Estados Unidos lu nitlan tuku wankgo xlakata mapakgsinanin xalak uma país chu xlakata política» (Centro de investigación Pew Research Center).
«Kʼumakgolh 50 kata tlakg tasiyanit pi latamanin xalak Gran Bretaña nialh kalipawankgo políticos chu mapakgsinanin» (National Centre for Social Research [Centro Nacional de Investigación Social]).
¿La nakgantaxtu tuku lichuwinalh Daniel?
Chuna la wa Daniel, tamapakgsin xalak Estados Unidos chu Reino Unido wa tiku xʼamakgolh mapakgsinankgo akxni xTamapakgsin Dios xtawi xlakgxokgo putum tamapakgsin xalak kakilhtamaku (Daniel 2:44).
Kʼatanu libro xalak Biblia, Apocalipsis, lichuwinan pi «putum mapakgsinanin kxliputum katiyatni» natamakxtumikgo xlakata natalatlawakgo Jehováb kʼArmagedón, akgtum guerra «nema natlawakan klanka xkilhtamaku Dios, Tiku kgalhi putum litliwakga» (Apocalipsis 16:14, 16; 19:19-21). Kʼuma guerra, Jehová nakamasputu putum mapakgsinanin xalak katiyatni, chu nipara tsinu katikalakapastakka tamapakgsin nema Daniel lichuwinalh pi xʼamakgo mapakgsinankgo.
Komo tlakg katsiputuna, kalikgalhtawakga artículo «¿Tuku Armagedón?».
¿Tuku xlakata lu xlakaskinka nakatsiyaw tuku kilhchanima?
Biblia liwana xlichuwinanit pi Estados Unidos chu Reino Unido nila liwana xʼamakgo mapakgsinankgo. Akxni liwana naʼakgatekgsa la kgantaxtuma tuku xlichuwinankanit, namakgtayayan naʼakxilha tuku lama chuna la xlilat.
Liwana naʼakgatekgsa tuku xlakata Jesús kawanilh kstalaninanin pi ni xmakgtanukgolh kpolítica (Juan 17:16). Chu naʼakgatekgsa tuku xlakata Jesús, tiku Dios laksaknit xlakata namapakgsinan kxTamapakgsin, wa: «KinTamapakgsin ni xalak uma kakilhtamaku» (Juan 18:36).
Nalipawana pi nialh makgas xTamapakgsin Dios nalakgpali tuku nitlan anan la uku chu nalimin lhuwa tasikulunalin, chuna la Dios malaknulh (Apocalipsis 21:3, 4).
Nialh katililakgaputsa pi taʼakglhuwit nema kgalhikgo mapakgsinanin namalakgsputu Katiyatni (Salmo 37:11, 29).
Tuku lichuwinalh Daniel limasiya pi xtamapakgsinkan Estados Unidos chu Reino Unido, nema kilhchanima xtantun imagen, wa xaʼawatiya tamapakgsin nema namapakgsinan. ¿Tuku nala alistalh? Lata kʼakgapun, xTamapakgsin Dios namapakgsinan kxlikalanka katiyatni.
Komo tlakg katsiputuna tuku natlawa xTamapakgsin Dios xpalakata latamanin, kaʼakxilhti video ¿Tuku xTamapakgsin Dios?
a Kaʼakxilhti recuadro «¿Tuku tamapakgsin xkakilhchanima tuku lichuwinalh Daniel?».
b Jehová wa xtukuwani Dios (Salmo 83:18). Kaʼakxilhti artículo «¿Tiku Jehová?».