¿Tuku xlakata tuwa nakgalhikan takaksni xlikalanka kakilhtamaku?

Biblia kinkamaxkiyan xatakgalhtin

Latamanin nila xʼakstukan katikgalhikgolh takaksni xlikalanka kakilhtamaku. Kaʼakxilhti tuku xlakata:

• «Liwana kkatsi pi chixku ni lakgchan namapakgsi xtiji. Chixku ni lakgchan x’akstu napulalinkan» (Jeremías 10:23). Latamanin ni kamalakatsukika xlakata xʼakstukan xkamapakgsika. Wa xlakata nila tlawakgo pi kaʼanalh takaksni putum kilhtamaku.

• «Ni kakalipawantit lakchixkuwin tiku kgalhikgo limapakgsin, chu ni para atanu chixku, xlakata nila liminkgo lakgtaxtut. Xlakata akxni nikgo, taspitparakgo kpokgxni; watiya ama kilhtamaku sputa xtalakapastaknikan» (Salmo 146:3, 4). Nipara tlakg xatlan mapakgsinanin tlan masputukgo tuku tlawa pi kaʼanalh guerra.

• «Kxaʼawatiya kilhtamaku, tuku natitaxtukan lu tuwa nawan chu lu kalipekua nawan. Xlakata lakchixkuwin […] xalakluku nawankgo, ni napaxkikgo tuku tlan, nakatlawanikgo tuku nitlan xʼamigos, laktsakatni nawankgo, lanka nakamakgkatsikan» (2 Timoteo 3:1-4). Lamaw «kxaʼawatiya kilhtamaku» xla uma lixkajni kakilhtamaku, niku nitlan xtayatkan latamanin tlawakgo pi ni kaʼanalh takaksni.

• «¡Kgoxota katiyatni chu pupunu! Xlakata Akgskgawini kalakgtaktanitan chu lu sitsinit, xlakata katsi pi nialh lhuwa kilhtamaku kgalhi» (Apocalipsis 12:12). Xtalamakgasitsin Dios, Akgskgawini, makaminkanit kKatiyatni chu tlawa pi latamanin lixkajni nalikatsikgo. Komo xla chuntiya «xmapakgsina uma kakilhtamaku» litaxtu, nila katikgalhiw takaksni (Juan 12:31).

• «[Xtamapakgsin Dios] nakalakxpula chu nakamasputu putum umakgolh tamapakgsin chu kajwatiya uma tamapakgsin natawila putum kilhtamaku» (Daniel 2:44). Xtamapakgsin Dios, chu ni wa xtamapakgsin latamanin, natlawa pi kaʼanalh takaksni putum kilhtamaku (Salmo 145:16).