¿La kinkalakgmaxtuyan Jesús?
Biblia kinkamaxkiyan xatakgalhtin
Jesús kalakgmaxtulh latamanin tiku ni makgxtakgkgo Dios akxni makamastalh xlatamat (Mateo 20:28). Wa xlakata Biblia wan pi Jesús wa «xLakgmaxtuna kakilhtamaku» (1 Juan 4:14). Chu na wan pi «ni anan tiku tlan lakgmaxtunan, xlakata ni anan atanu tukuwani kkatiyatni nema Dios xlaksakli kxlakgstipan latamanin xlakata xkinkalakgmaxtun» (Hechos 4:12).
Jesús nilh xpalakata putum tiku kanajlanikgo (Hebreos 2:9; Juan 3:16). Alistalh Dios malakastakwanilh chu Jesús taspitpa kʼakgapun la chatum espíritu (Hechos 3:15). Lata kʼakgapun, Jesús tlan «nakalakgmaxtu tiku tlawanikgo oración Dios kxtukuwani. Tlan nakalakgmaxtu xlakata putum kilhtamaku lama xlakata naskini Dios pi kakamakgtayalh» (Hebreos 7:25).
¿Tuku xlakata maklakaskinaw pi Jesús naskini Dios pi kakinkamakgtayan?
Xlakata putum akinin makglakgalhinanin (Romanos 3:23). Talakgalhin tlawa pi naniyaw chu na tlawa pi nila natalakatsuwiniyaw Dios (Romanos 6:23). Pero Jesús litaxtu la «chatum makgtayana» o xpalakachuwinakan tiku kanajlanikgo xtamakamastan (1 Juan 2:1). Xlakata Jesús nilh kimpalakatakan, tlan nakinkapalakachuwinanan kxlakatin Dios chu chuna Dios nakgaxmata kiʼoracioneskan chu nakinkatapatiyan kintalakgalhinkan (Mateo 1:21; Romanos 8:34). Dios kgaxmata tuku Jesús skini xlakata tuku xla skin wa xtalakaskin Dios. Xla malakgachalh Jesús kKatiyatni «xlakata latamanin xalak kakilhtamaku nalakgtaxtukgo xpalakata» (Juan 3:17).
¿Kajwatiya talakaskin nakanajlaniyaw Jesús xlakata nalakgtaxtuyaw?
Ni. Xlikana pi kilikanajlanitkan Jesús xlakata nalakgtaxtuyaw, pero ni kajwatiya uma tuku talakaskin (Hechos 16:30, 31). Biblia wan: «Chuna la akgtum makni nema ni kgalhi latamat xanin litaxtu, nachuna kitaxtu xlakata kintakanajlakan, komo ni kgalhi laktlan tatlaw xtachuna la xanin» (Santiago 2:26). Xlakata nalakgtaxtuyaw, talakaskin:
Nalakgapasaw Jesús chu xTlat, Jehová (Juan 17:3).
Nakanajlaniyaw Jehová chu Jesús (Juan 12:44; 14:1).
Nakgalhakgaxmataw xlimapakgsin xlakata chuna nalimasiyayaw kintakanajlakan (Lucas 6:46; 1 Juan 2:17). Jesús wa pi ni putum tiku xwanilh «Malana» xʼama lakgtaxtu, kajwatiya tiku xtlawalh xtalakaskin xTlat (Mateo 7:21).
Chuntiya nalimasiyayaw takanajla maski natitaxtuyaw tuku tuwa. Jesús wa: «Tiku natayani asta akxni namin lisputni nalakgtaxtu» (Mateo 24:13).