¿Tuku xlakata wankan pi Jesús xKgawasa Dios?
Biblia kinkamaxkiyan xatakgalhtin
Biblia wan pi Jesús wa «xKgawasa Dios» (Juan 1:49). Tachuwin «xKgawasa Dios» masiya pi Dios wa Malakatsukina chu wa masta latamat, uma wamputun pi na wa malakatsukilh Jesús (Salmo 36:9; Apocalipsis 4:11). Biblia ni wan pi Dios xTlat litaxtulh Jesús xtachuna la latamanin kgalhikgo xkamanankan.
Biblia na wan pi ángeles «xkamanan xaxlikana Dios» (Job 1:6). Nachuna, wan pi xapulana chixku, Adán, «xkgawasa Dios» xwanit (Lucas 3:38). Pero Biblia lichuwinan pi Jesús wa xKgawasa Dios nema tlakg xlakaskinka, xlakata wa tiku pulana malakatsukilh chu akxni Dios malakatsukilh Jesús niti makgtayalh.
¿Xlamaja Jesús kʼakgapun akxni nina xlakachin unu kKatiyatni?
Chuna. Akxni nina xlakachin kKatiyatni la chatum lataman, Jesús chatum espíritu xlitaxtu kʼakgapun. Xla wa pi “xtaktanit kʼakgapun” (Juan 6:38; 8:23).
Jesús wa xapulana xtamalakatsukin Dios. Akxni Biblia lichuwinan Jesús wan:
Xla «xapulana kam xliputum tamalakatsukin» (Colosenses 1:15).
Xla «xapulana xtamalakatsukin Dios» (Apocalipsis 3:14).
Jesús makgantaxtilh tuku xlichuwinankanit xlakata chatum tiku lata makgasa xlama (Miqueas 5:2; Mateo 2:4-6).
¿Tuku xtlawa Jesús kʼakgapun akxni nina xmin kKatiyatni?
Wi tuku lu xlakaskinka xlakgaya kʼakgapun. Wa uma tuku Jesús xlichuwinama akxni skinilh Dios: «Tlat, kakilimalanki kmimpaxtun lilanka nema xakkgalhi akxni nina xwi kakilhtamaku» (Juan 17:5).
Makgtayalh xTlat akxni malakatsukilh putum tuku anan. Jesús akxtum taskujli Dios «xtachuna la chatum skujni xapuxku» (Proverbios 8:30). Biblia wan xpalakata Jesús: «Xpalakata xla malakatsukika putum tuku xalak akgapun chu putum tuku xalak katiyatni» (Colosenses 1:16).
Dios maklakaskilh Jesús xlakata natlawa putum tuku anan: ángeles chu putum tuku anan kkakilhtamaku (Apocalipsis 5:11). Tlan nawanaw pi Dios chu Jesús akxtum skujkgolh xtachuna la skujkgo chatum arquitecto chu xtlawana chiki. Arquitecto wan la xlitasiyat chiki chu xtlawana chiki chuna tlawa.
Tachuwin xlitaxtu. Biblia wan pi Jesús xlimapakuwikan «Tachuwin» akxni nina xmin kKatiyatni (Juan 1:1). Uma wamputun pi Dios maklakaskilh xkgawasa xlakata xkamatitaxtinilh tamakatsinin chu tuku xlitlawatkan xwanit amakgapitsi xkamanan Dios.
Jesús xpalakachuwina Dios xlitaxtu chu xkamaxki tamakatsinin latamanin. Akxni Jehová kawanilh tuku xlitlawatkan xwanit Adán chu Eva kjardín xaʼEdén, max wa maklakaskilh Tachuwin, uma wamputun Jesús (Génesis 2:16, 17). Nachuna, max Jesús wa ángel tiku kapulalilh israelitas akxni titaxtukgolh kdesierto chu na wa xlitaxtu tachuwin nema xlikgalhakgaxmatatkan xwanit (Éxodo 23:20-23).a
a Dios ni kajwatiya Tachuwin maklakaskinit xlakata namasta tamakatsin. Akgtum liʼakxilhtit, Jehová kamaklakaskilh amakgapitsi ángeles xlakata xkamaxkilh Limapakgsin israelitas chu ni kajwatiya maklakaskilh xapulana xKgawasa (Hechos 7:53; Gálatas 3:19; Hebreos 2:2, 3).