¿Tuku wan Biblia xlakata makgankan skgata?
Takgalhtin nema masta Biblia
Biblia ni maklakaskin tachuwin makgankan skgata akxni lichuwinan chatum puskat tiku x’akstu laksaka namakgan kskgata. Pero lhuwa versículos kinkamakgtayakgoyan na’akgatekgsaw la akxilha Dios latamat, chu namakgtanuma xlatamat chatum skgata tiku nina lakachin.
Latamat akgtum xtamaskiwin Dios (Génesis 9:6; Salmo 36:9). Putum tuku staknan lu lanka xtapalh kxlakatin Dios, uma na kilhchanima xlatamat kskgata tiku wi kxpan xtse. Wa xlakata akxni wi tiku xʼakstu laksaka namakgan kskgata makgnina litaxtu.
Limapakgsin wantu kamaxkika israelitas xwan: «Komo chatum chixku natalachipa achatum chixku chu natlawanikgo tuku nitlan chatum puskat tiku nakgalhi kskgata chu nalakachin kskgata akxni nina chan xkilhtamaku pero niti naniy, tiku lin kuenta namaxokgekan wantuku nitlan tlawalh chuna la nawan xchixku puskat. Naxokgo chuna la nalakkaxwilikgo jueces. Pero komo wi tiku naniy, talakaskin pi latamat nalixokgokan latamat» (Éxodo 21:22, 23).a
¿Tuku kilhtamaku lakatsuku xlatamat chatum skgata?
Xpalakata Dios, latamat tsuku akxni skgata lakatsuku kxpan xtse. Kxtachuwin Biblia, Dios putum kilhtamaku lichuwinan chatum skgata tiku nina lakachin la atanu latamat. Ka’akxilhwi makgapitsi li’akxilhtit nema masiyakgo pi Dios akxtum ka’akxilha chatum skgata nema wijku kxpan xtse chu chatum tiku lakachinita.
Mapakgsina David wanilh Dios: «Milakgastapu kiʼakxilhkgolh akxni xakwi kxpan kintse» (Salmo 139:16). Dios x’akxilha David la chatum lataman maski nina xlakachin.
Ka’akxilhwi atanu li’akxilhtit. Dios xlaksaknita Jeremías xlakata palakachuwina xwa maski nina xlakachinit. Dios wanilh: «Akxni nina xakwiliyan xpan mintse, xaklakgapasana; chu akxni nina xlakachitana, klaksakni. Palakachuwina klimaxtun» (Jeremías 1:5).
Lucas, chatum tiku na tsokgli Biblia, tiku makuchina xwanit, maklakaskilh watiya tachuwin griego xlakata nalichuwinan chatum skgata tiku nina xlakachinit chu tiku aku xlakachinit (Lucas 1:41;2:12,16).
¿Matsankgenani Dios tiku akstu laksaka makgan skgata?
Chuna, Dios tlan matsankgeni tiku makganit kskgata. Komo tsuku katsini tuku lakpuwan Dios xlakata latamat, ni wi tuku xlakata chuntiya nitlan nalimakgkatsi. Biblia wan: «Jehová xalakgalhamana chu tlan likatsi […]. Chuna la xlimakgat lawilanikgolh niku taxtu chichini chu niku tatsekga, chuna xlimakgat wilinit kintalakgalhinkan» (Salmo 103:8-12).b Jehová nakamatsankgenani tiku xlikana nitlan limakgkatsikgo xlakata xtalakgalhinkan, uma na kilhchani tiku makgan skgata (Salmo 86:5).
¿Tlan makgankan skgata komo kalipekua wi xlatamat xatse o skgata?
Xlakata tuku wan Biblia xlakata xlatamat chatum skgata tiku nina lakachin, nitlan makgankan skgata maski kalipekua wi xlatamat xatse o skgata.
¿Chu tuku xlalh komo akxni lakachima aktsu skgata lakapala lay tuku nitlan chu talakaskin nalaksakkan komo nalatama xatse o skgata? Akxni chuna la, nema ni ankgalhin chuna la, kajwatiya tiku kalakgchan nalaksakkgo tiku nalatama.
a Makgapitsi biblias makgatekgsninankgo pi uma limapakgsin kaj xkilhchanima tuku xlanilh xatse chu ni skgata nema xwijku xpan xtse. Pero tatsokgni xahebreo kilhchanima tuku nitlan xlanikgolh xatse o skgata chu chatum xnilh.
b Biblia masiya pi xtukuwani Dios wa Jehová (Salmo 83:18).