Akgtum Biblioteca nema tlan chipayaw

«Makgasa max lu tuwa xlakpuwanaw pi xkinkamaxkikan tuku matliwakglha kintakanajlakan kxaformato electrónico». ¿Na chuna lakpuwana? Umakgolh tachuwin wa tuku wa tala Geoffrey Jackson akxni mastalh Xlipulakchaxan tamakatsin xla Lakgkgolotsin tiku Pulalinankgo xla kata 2020. Chu wampa: «Pero la uku lilakpuwanaw la xkintikakitaxtunin kʼuma pandemia komo ni xkgalhiw JW Library. Jehová lata makgasa kinkamakaxman xlakata nakatsiyaw tuku natlawayaw akxni wi tuku la chuna la uma pandemia».

¿Tuku tlawanit Jehová? ¿Tuku talakaskilh xlakata xtlawaka aplicación JW Library? ¿Chu tuku talakaskin xlakata chuntiya namasastikan?

Akgtum aplicación nema nitu xtachuna

Mayo kata 2013, lakgkgolotsin tiku pulalinankgo kawanilh tiku liskujkgo Programación de MEPS, akgtum departamento nema wi niku pulalinkan kintaskujutkan, pi xtlawakgolh akgtum aplicación nema xlimilh Traducción del Nuevo Mundo. Paul Willies, tiku skuja k’uma departamento, wa: «Nikxni xakmawakanitaw akgtum aplicación niku tlan kamaktikan aplicaciones. Xlakata tlan xaktlawaw, talakaskilh xakmalakgachokgow makgapitsi taskujut nema xaktlawamaw, kmamakxtumiw akgtum equipo chu kkataskujwi amakgapitsin departamento xalak Betel. Lu ktlawaniw oración Jehová chu kakxilhwi la kinkamakgtayan: kaj akgkitsis papaʼ alistalh, ktamakxtumit xla akgatunu kata taxtulh uma aplicación».

Xwi atanu tuku lu tuwa: xtalakaskin pi JW Library xlimilh xatakgatsin likgalhtawakga chu ktanu tanu tachuwin xtasiyalh. Enero kata 2015, aplicación lhuwata likgalhtawakga xlimin xaʼinglés chu, akgchaxan papaʼ alistalh, tlan anta xmaktikan likgalhtawakga klhuwa ciento tanu tanu tachuwin.

Natalan chuntiya liskujkgonit xlakata aplicación tlakg liwana naskuja. Akgtum liʼakxilhtit, wilikgonit videos chu akgtum pestaña niku limin putum tuku tamaklakaskin xlakata nalakaxwiliyaw tamakxtumit. Nachuna, akxni tanuyaw kBiblia tlan akxilhaw referencias xla Guía de estudio.

Ankgalhin masastikan aplicación

Liwaka 15 millones dispositivos litanukan kʼaplicación JW Library akgatunu papaʼ. Xliputum umakgolh, 8 millones litanukan chali chali kʼuma aplicación. ¿Tuku talakaskin xlakata uma aplicación chuntiya tlan naskuja maski klakalhuwa dispositivos malakkikanit? Paul Willies wan: «Uma taskujut nikxni sputa. Ankgalhin wi tuku xasasti ktamaknuniyaw, chu ktlawayaw pi ni tuwa namaklakaskinkan uma aplicación. Xlakata ankgalhin kamasastimaka tuku tlawa pi tlan naskujkgo dispocitivos electronicos, lu xlakaskinka pi akinin chuntiya nakliskujaw xlakata uma aplicación tlan namaklakaskinkan kʼumakgolh dispositivos. Chu xlakata tlakg anan grabaciones chu atanu likgalhtawakga nema tlan kaʼakxilhkan kJW Library, talakaskin pi nakmasastiyaw software nema liskuja». La uku, anta kJW Library anan max 200,000 likgalhtawakga chu liwaka 600,000 grabaciones xaʼaudio chu video ktanu tanu tachuwin.

Xlakata namasastikan uma aplicación, ni kaj xman wa talakaskin equipos informáticos. Na talakaskin natamawakan permisos xlakata nakamaklakaskinaw software. Chu kaj akgtum permiso kxokgoyaw 1,500 dólares akgatunu kata. Nachuna, Departamento de Programación de MEPS laktlawa10,000 dólares akgatunu kata xlakata naʼakxilha komo uma aplicación tlan skuja computadoras, tablets chu teléfonos nema tlakg xalaksasti.

Aplicación nema kinkamakgtayayan ni lhuwa tumin nalaktlawakan

Aplicación JW Library, kinkamakgtayanitan xlakata nialh lhuwa tumin naklaktlawayaw xlakata nakʼimprimirliyaw, nakslamayaw chu nakmalakgachayaw likgalhtawakga. Akgtum liʼakxilhtit, kalichuwinaw tuku lalh xpalakata folleto Texto nema Nalikgalhtawakgayaw chali chali. Kkata 2013, imprimirlika 12 millones folletos. Pero, kkata 2020, imprimirlika kajwatiya 5 millones folletos maski taliwakanit 700,000 publicadores kxlikalanka katiyatni. ¿Tuku xlakata chuna tlawaka? Xlakata lhuwa natalan likgalhtawakgakgo texto xla chali chali kʼaplicación JW Library.a

«¡Uma aplikación lu lhuwa xtapalh!»

Pulaklhuwa la tlan namaklakaskina JW Library. Akgtum liʼakxilhtit, Geneviève, tiku lama kCanadá, lakpuwan pi uma aplicación lu makgtayanit tlakg tlan nakgalhtawakga. Xla wan: «Komo xakmaklakaskilh lhuwa libro xlakata xakkgalhtawakgalh, ni chali chali chuna xaktlawalh. Pero xlakata anan uma aplicación, kaj watiya tablet kmaklakaskin, anta wi putum tuku nakmaklakaskin xlakata nakkgalhtawakga. Xlakata ankgalhin kkgalhtawakga, kimakgtayanit tlakg natatliwakglha kintakanajla chu tlakg naktalakatsuwini Jehová».

Uma aplicación lu tlan limaklakaskinkanit liwaka kpandemia xla COVID-19. Akgtum liʼakxilhtit, Charlyn, xalak Estados Unidos, wan: «Xlakata COVID-19 xtalakgatuminit xliputuminika katiyatni, liwaka akgtum kata ni kakxilhnit likgalhtawakga nema xalaksasti taxtunit kxakapsnat. Pero kJW Library tekgsaw putum tuku maklakaskinaw xlakata kintakanajlakan. Kpaxtikatsini Jehová xlakata uma lu stlan tamaskiwin».

Lhuwa tiku nachuna lakpuwankgo la Faye, tiku lama kFilipinas. Xla wan: «Uma aplicación lu tlan, limin putum tuku kmaklakaskin xlakata naktalakatsuwini Jehová. Kmaklakaskin tsisa xlakata nakgalhtawakga, chu akxni wi tuku ktlawama kkinchik kwili akgtum audio xlakata nakmatliwakglha kintakanajla, xlakata naklakkaxwili tuku natalichuwinan ktamakxtumit chu xlakata naklikgalhtawakga Biblia. Akxni nitu ktlawama, kmaklakaskin xlakata nakakxilha videos anta. Chu akxni wi tuku kgalhkgalhima, kmaklakaskin xlakata naklikgalhtawakga Biblia chu atanu likgalhtawakga. ¡Uma aplicación lu lhuwa xtapalh!».

Nachuna, uma aplicación lu kinkamakgtayayan akxni lichuwinanaw Dios. Akgtum liʼakxilhtit, chatum tala xalak Camerún lu lakgatilh akgtum texto nema maklakaskilh tala tiku x’anit talichuwinan Dios. Titaxtulh kilhtamaku uma tala na xmaklakaskimputun watiya uma texto, pero ni xlakapastaka tuku texto xwanit. Xla kinkawaniyan: «Xaklakapastaka makgapitsi tachuwin nema limin uma texto. Wa xlakata ktanulh kʼaplicación, kkalh niku wi Biblia chu kputsalh uma tachuwin anta kxalupa. Uma aplicación lu kimakgtaya nakkatekgsa textos nema nialh klakapastaka».

Xlakata mintuminkan nema xatapaxuwan mastayatit akxni maklakaskinatit donate.jw.org, tlan tlawakanit JW Library, masastitilhakan chu tlawakan pi tlakg tlan naskuja. Chu uma kamakgtayanit putum natalan kxlikalanka katiyatni. Lu kkapaxtikatsiniyan xlakata xatapaxuwan mastayatit mintuminkan.

La lakatsukulh JW Library

1. 

   Octubre kata 2013: Taxtulh aplicación nema xlimin Traducción del Nuevo Mundo kxaʼinglés.

2. 

   Enero kata 2015: Tamaknunika likgalhtawakga xaʼinglés chu alistalh, klhuwa ciento tanu tanu tachuwin.

3. 

   Noviembre kata 2015: Tamaknunika tuku tlawa pi tlan nalhtitkan letras.

4. 

   Mayo kata 2016: Tamaknunika ícono «Reuniones».

5. 

   Mayo kata 2017: Tamaknunika tuku makgtayanan nawilikan notas.

6. 

   Diciembre kata 2017: Tamaknuka Biblia de estudio kxaʼinglés.

7. 

   Marzo kata 2019: Tlawaka tuku makgtayanan namaktikan audios, antiya naʼakxilkan videos chu xlakata tlan naʼakxilhkan Tuku natalikgalhtawakga, Xlatamat chu xtaskujut kstalanina Cristo.

8. 

   Enero kata 2021: Tamaknunika tuku xasasti xlakata nalimakgalhtawakgenankan Biblia niku namaklakaskinkan libro chu folleto Kalipaxuwa latamat.