Nota

a Akxni lilakpuwanaw tiku tayaninit tuku lu tuwa, lakapastakaw Job. ¿Tuku tlan nakatsiniyaw xlakata tuku titaxtulh uma kskujni Jehová? Katsiniyaw pi Satanás nila tlawa pi namakgxtakgaw Jehová. Na katsiniyaw pi Jehová akxilha putum tuku titaxtuyaw. Chu xaʼawatiya, pi chuna la masputulh tuku nitlan xtitaxtuma Job, na namasputu tuku titaxtumaw. Komo limasiyayaw pi akxni wi tuku tlawayaw kanajlayaw uma, tlan nawanaw pi akinin lipawanaw takgalhkgalhin nema kinkamaxkiyan Jehová.