Génesis

42 Akxni Jacob katsilh pi kʼEgipto xʼanan liwat,* kawanilh xlakgkgawasan: «¿Tuku xlakata kaj lalakaʼakxilhwilatit chu nitu tlawapatit?». 2 Chu wampa: «Kkgaxmatnit pi anan liwat kʼEgipto. Kapitit anta chu katamawatit liwat xlakata chuntiya nalatamayaw chu ni naniyaw». 3 Wa xlakata kgalhkaw xnatalan José ankgolh tamawakgo liwat kʼEgipto. 4 Pero Jacob ni mastalh talakaskin pi Benjamín, xtala José, xkastalanilh xnatalan, chu kawanilh: «Ni klakaskin wi tuku naʼakgspula chu nani».

5 Wa xlakata xlakgkgawasan Israel kastalanikgolh amakgapitsi latamanin tiku na xʼamakgo tamawakgo liwat Egipto, xlakata tatsinkstat xchanit asta kxtiyat Canaán. 6 Chu José wa tiku xlakgaya putum tuku xʼanan kpaís chu wa tiku xkastamaxki liwat latamanin xalak tanu tanu kachikinin. Wa xlakata xnatalan José ankgolh niku xla xwi chu lakgtalakgatsokgostakgolh asta kkatiyatni. 7 Akxni José kaʼakxilhli xnatalan tunkun kalakgapasli, pero ni kawanilh tiku xla xwanit. Wa xlakata palha kakgalhskilh: «¿Niku xala wixin?». Xlakan kgalhtikgolh: «Akinin xalak xtiyat Canaán chu kmiw tamawayaw liwat».

8 Chuna José kalakgapasli xnatalan, pero xlakan ni lakgapaskgolh. 9 José tunkun lakapastakli tuku xlimanixnanit xlakata xnatalan chu kawanilh: «¡Wixin skgalananin! ¡Tanitantit akxilhatit niku tlan natalatlawayatit kachikin!». 10 Pero xlakan wanikgolh: «Nichuna, kimalana. Akinin kaj kminitaw tamawayaw liwat. 11 Kimputumkan kaj chatum kintlatkan. Ni kʼakgskgawinanaw. Akinin ni skgalananin». 12 Xla kawanilh: «¡Uma ni xlikana! ¡Tanitantit akxilhatit niku tlan natalatlawayatit kachikin!». 13 Pero xlakan kgalhtinankgolh: «Kgalhkutiy linatalan akinin. Kimputumkan xkamanan klitaxtuyaw chatum chixku xalak xtiyat Canaán. Xaʼawatiya tatamakgxtakgcha kintlatkan chu achatum nialh kinkatalaman».

14 Pero José kawanilh: «Kkawaninitana: “¡Wixin skgalananin!”. 15 Nakkaliʼakxilhan. Kkalitayaniyan kxtukuwani faraón pi ni katitaxtutit unu asta akxni xaʼawatiya mintalakan namin. 16 Chatum wixin kaʼalh putsa xaʼawatiya mintalakan chu amakgapitsin unu nakalakgachinukan. Chuna nakakxilhaw komo xlikana tuku wanatit. Chu komo nichuna, nakkatsiyaw pi wixin skgalananin». 17 Akxni chuna kawanikgolh, xputumkan kalakgachinulh akgtutu kilhtamaku.

18 Xliʼakgtutu kilhtamaku José kawanilh: «Akit kpekuani Dios, wa xlakata katlawatit tuku kkawaniyan chu chuna ni katinitit. 19 Komo wixin ni akgskgawinanatit, chatum katamakgxtakgli unu niku kalakgachinukanitantit chu amakgapitsin kaʼankgolh chu kakalinikgolh liwat xfamiliajkan xlakata nakgalhikgo tuku nawakgo. 20 Alistalh kalitantit xaʼawatiya mintalakan xlakata chuna nalimasiyayatit pi xlikana tuku wanatit, chu chuna ni katinitit». Chu xlakan makgamakglhtinankgolh tuku kawanika.

21 Chu tsukukgolh lawanikgo: «Max lakgaxokgomaw putum tuku tlawaniw kintalakan. Akxilhwi akxni kinkatasaskinin pi xlimasiyaniw talakgalhaman, pero ni kuentajtlawaniw. Wa xlakata la uku, akinin patimaw putum uma». 22 Rubén kawanilh: «¿Lakapastakatit pi kkawanin “nitu katlawanitit kgawasa” chu wixin ni kgaxpattit? Chu la uku namastayaw kuenta xlakata xkgalhni». 23 Pero xlakan ni xkatsikgo pi José xkaʼakgatekgsni, xlakata akxni xkatachuwinan wi tiku xkamatitaxtini kxtachuwinkan. 24 Wa xlakata, José tapanulh chu tsukulh tasa. Chu akxni taspitpa xlakata nakatachuwinan xnatalan, chipalh Simeón chu lichilh tasiw kxlakatinkan xnatalan. 25 Alistalh, José limapakgsinalh pi xkalimatsamanika talhtsi xkuxtalhkan chu pi xchatunukan xkamujuniparaka xtuminkan kxkuxtalhkan. Na limapakgsinalh pi xkamaxkika tuku xwakgolh ktiji. Chu chuna tlawaka.

26 Alistalh xlakan makukikgolh talhtsi xburroskan chu ankgolh. 27 Akxni chankgolh niku xʼamakgo lhtatakgo, chatum makgalhkgelh xkuxtalh xlakata namawi xburro chu akxilhli pi xtumin xtajuma kxkgalhni xkuxtalh. 28 Tunkun kawanilh xnatalan: «¡Kimaspitnika kintumin! ¡Kaʼakxilhtit! ¡Tajuma kkinkuxtalh!». Akxni kgaxmatkgolh, xputumkan lu pekuankgolh chu lhpipikgolh chu lawanikgolh: «¿Tuku xlakata Dios kinkatlawanin uma?».

29 Akxni chankgolh kxtiyat Canaán niku xwi Jacob, xtlatkan, litachuwinankgolh putum tuku xkaʼakgspulanit. Wanikgolh: 30 «Xmalana país palha kinkatachuwinan chu kinkalimawakan pi kaj xakanitaw skgalayaw país. 31 Pero akinin kwaniw: “Ni kʼakgskgawinanaw. Akinin ni skgalananin. 32 Kgalhkutiy linatalan akinin, kaj chatum kintlatkan. Chatum nialh kinkatalaman chu xaʼawatiya tatamakgxtakgcha kintlatkan kxtiyat Canaán”. 33 Pero xmalana país kinkawanin: “Nakkatsi pi ni akgskgawinanatit komo natlawayatit tuku nakkawaniyan. Kamakgxtakgtit unu chatum mintalakan. Kalipitit liwat xlakata mifamiliajkan nakgalhikgo tuku nawakgo chu kapitit. 34 Alistalh kakilitanitit xaʼawatiya mintalakan xlakata nakkatsi pi ni akgskgawinanatit chu ni skgalananin wixin. Chuna tlan nakkamaspitniparayan mintalakan chu tlan natamawayatit kpaís tuku lakaskinatit”».

35 Akxni puxtakgekgolh xkuxtalhkan, xchatunukan tekgskgolh xtuminkan kxkuxtalhkan. Akxni xlakan chu xtlatkan akxilhkgolh tumin, lu pekuankgolh. 36 Wa xlakata Jacob, xtlatkan, wa: «¡Wixin kimakglhtipatit kinkamanan! ¡José nialh kinkatalaman! ¡Simeón nialh kinkatawilan! ¡Chu la uku lipimputunatit Benjamín! ¡Akit tiku patima putum uma!». 37 Pero Rubén wanilh xtlat: «Komo ni nakmaspitniyan, tlan nakamakgniya chatiy kilakgkgawasan. Akit kakimakuentajli chu nakmaspitniyan». 38 Pero Jacob kgalhtinalh: «Kinkgawasa ni katikataʼan, xlakata xtala ninita chu kajwatiya xla akgataxtunit. Komo wi tuku naʼakgspula ktiji chu nani, natlawayatit pi talipuwan nakimakgni».*