Rut

3 Noemí, xputiatse,* wanilh: «Kintsumat, nakputsaniyan tiku natatamakgaxtokga xlakata nitu natsankganiyan. 2 Boaz kintalilakgapasnikan. Chu laktsuman tiku xmakimakgolh tachanan tiku kataskujti wa xlakskujnin. Kaʼakxilhti, uma katsisni xla nalakpaja cebada. 3 Wa xlakata kapaxti chu kalitlawakanti xamuksun aceite. Kawili tlakg xastlan milhakgat chu kapit niku lakpajnankan. Pero ni kamasta talakaskin pi xla naʼakxilhan asta akxni wayanita chu kgotnanita nawan. 4 Akxni naʼan lhtata, kaʼakxilhti niku natama. Nalakgpina, namatantukgeya chu anta natapaya. Xla nawaniyan tuku natlawaya».

5 Rut kgalhtilh: «Naktlawa putum tuku kiwanipat». 6 Wa xlakata alh anta niku xlakpajnankan chu tlawalh putum tuku xwaninit xputiatse. 7 Chu Boaz wayalh chu kgotnalh, chu xpaxuwama xnaku. Alistalh alh tama kxkilhpan niku makxtum xwilikanit talhtsi. Akxni xtamanita, Rut lakatsuku talakatsuwinilh, matantukgelh chu anta lakatsu kxtantun tamalh. 8 Itat tsisni, Boaz tsukulh lhpipi,* wa xlakata takilh chu akxilhli pi xma chatum puskat lakatsu kxtantun. 9 Boaz kgalhskilh: «¿Tiku wix?». Chu xla kgalhtilh: «Akit miskujni, Rut. Kamakgtaya miskujni,* xlakata wix xtalilakgapasni kimputiatlat wix tlan nalakkaxtlawaya kintaʼakglhuwitkan». 10 Boaz wanilh: «Jehová kasikulunatlawan, kintsumat. Tapaxkit nema ni makgxtakgnan nema limasiyapat la uku, tlakg lanka nixawa nema masiya xapulana. Xlakata ni putsanita tiku kajku kgawasa, tiku kgalhi lhuwa tumin o limaxkgen. 11 Wa xlakata, kintsumat, ni kapekuanti. Naktlawa putum tuku kiwaninita, xlakata kputum kachikin katsikan* pi wix lu tlan puskat. 12 Chuna, akit xtalilakgapasni mimputiatlat, pero wi achatum tiku tlakg xtalilakgapasni nixawa akit, tiku na tlan nalakkaxtlawa mintaʼakglhuwitkan. 13 Uma katsisni katamakgxtakgti unu. Komo chali tsisa, xla nawan pi nalakkaxtlawa mintaʼakglhuwitkan, lu tlan, chuna katlawalh. Pero komo xla ni nalakkaxtlawaputun mintaʼakglhuwitkan, kxtukuwani Jehová, xastakna Dios, kmalaknuniyan pi akit naklakkaxtlawa mintaʼakglhuwit. Unu katamakgxtakgti asta akxni naxkgakga».

14 Wa xlakata xla chuntiya tamalh lakatsu kxtantun chu tsisa takilh akxni nina kxkgakga, akxni ninajla tiku xlakgapasli. Alistalh Boaz wa: «Niti kakatsilh pi chatum puskat milh niku lakpajnankan». 15 Chu wampa: «Kalita tuku litamakgtlapanita, kastonkgti chu kachipa». Akxni xla stonkgli, Boaz mujunilh max puxamakitsis kilo* xla cebada. Alistalh maxkilh Rut xlakata xkukalh chu alh kkachikin.

16 Xla taspitli kxchik xputiatse, chu xla kgalhskilh: «Kintsumat, ¿la kitaxtunin?». Rut litachuwinalh tuku xwaninit Boaz 17 chu wanipa: «Kimaxkilh uma puxamakitsis kilo xla cebada chu kiwanilh “Wi tuku kalipi kxchik mimputiatse”». 18 Chu Noemí wanilh: «Kintsumat, kakgalhkgalhiw xlakata naʼakxilhaw tuku nala, xlakata xla ni katijaxli la uku asta akxni nalakkaxtlawa».