Rut
4 Boaz alh asta niku xwi xmalakcha kachikin chu anta tawi. Akxni akxilhli pi xtitaxtuma xtalilakgapasni Elimélec tiku xlichuwinanit, wanilh: «Wix, katat unu, katawila». Wa xlakata xla alh chu tawi. 2 Alistalh, Boaz katasanilh kgalhkaw lakgkgolotsin xalak kachikin chu kawanilh: «Unu katawilatit». Chu xlakan tawilakgolh.
3 Chu Boaz wanilh xtalilakgapasni Elimélec: «Noemí, tiku kitaspitli kMoab, xlistat pukuxtu nema xtapakgsini kintalilakgapasnikan Elimélec. 4 Klakpuwa pi xlilat nakatsiya tuku lama chu xlilat xakwanin: “Katamawa pukuxtu kxlakatin latamanin chu lakgkgolotsin xalak kinkachikin. Xlakata wix tlakg xtalilakgapasni Elimélec nixawa akit, tlan natamawaya. Pero, komo ni tamawaputuna, kakiwani xlakata nakkatsi. Xlakata akit xlichatiy tiku lakgchan natamawa pukuxtu”». Xtalilakgapasni Elimélec kgalhtinalh: «Akit naktamawa». 5 Wa xlakata Boaz wanilh: «Akxni namakgtamawaya xpukuxtu Noemí, na milimakgtamawat xpukuxtu Rut xalak Moab, tiku ninita xchixku, xlakata pukuxtu chuntiya nakatapakgsini xkamanan Mahlón». 6 Akxni xtalilakgapasni Elimélec kgaxmatli uma, wa: «Nila kaktitamawalh, xlakata max naktalimaxkgeni.* Wix katamawa xlakata akit nila kaktitamawalh».
7 Kxamakgan Israel xwi uma talismanin, akxni chatum chixku xlimasiyaputun pi xmaxkinit talakaskin achatum xtamawalh tuku xla xlakgchan natamawa, xlitatuxtut xwanit xtatunu* chu xlimaxkit xwanit achatum. Chuna xtlawakan talakkaxlan kʼIsrael. 8 Wa xlakata xtalilakgapasni Elimélec tatuxtulh xtatunu akxni wanilh Boaz «Wix katamawa». 9 Chu Boaz kawanilh lakgkgolotsin chu putum tiku anta xwilakgolh: «Wixin akxilhpatit la uku pi kmakgtamawama Noemí putum tuku xtapakgsini Elimélec chu putum tuku xkatapakgsini Kilión chu Mahlón. 10 Chu na naktatamakgaxtokga Rut tiku xalak Moab, tiku xpuskat Mahlón xwanit, xlakata pukuxtu chuntiya nakatapakgsini xkamanan, xlakata xtalilakgapasni chu latamanin xalak kachikin ni napatsankgakgo xtukuwani. Wixin akxilhpatit tuku ktlawama la uku».
11 Putum tiku xwilakgolh kxmalakcha kachikin chu lakgkgolotsin, wankgolh: «¡Kakxilhmaw! Jehová kasikulunatlawalh tsumat tiku natatamakgaxtokga xlakata nalitaxtu chuna la Raquel chu Lea, tiku xnatsetnikan israelitas litaxtukgolh. Lu tlan kakitaxtunin kʼEfrata chu lu tlan kaʼakxilhkgon tiku xalak Belén. 12 Jehová kamaxkilh talakaskin mimpuskat nakgalhi lhuwa kamanan, xlakata mifamilia lanka nawan chuna la xfamilia Pérez, xkgawasakan Tamar chu Judá».
13 Wa xlakata Boaz lilh Rut kxchik chu xpuskat litaxtulh. Tatalakgxtumilh, chu Jehová maxkilh talakaskin nakgalhi chatum kgawasa. 14 Chu lakpuskatin wanikgolh Noemí: «Katamalankilh Jehová, xlakata xla tlawanit pi xtalilakgapasni minchixku namakgtayayan. ¡Chu xtukuwani uma aktsu skgata kalichuwinanka kxlikalanka Israel! 15 Uma aktsu kgawasa maxkiparanitan milatamat chu xla nakuentajtlawayan akxni tlakg lhuwata kata nakgalhiya, xlakata wa xkgawasa mimpuwiti,* tiku paxkiyan chu tlakg tlan mimpalakata nixawa kgalhtujun kamanan». 16 Noemí chaxli aktsu skgata, chu wa tiku makgastakli. 17 Lakpuskatin tiku xtalakatsunin xwankgonit wilinikgolh xtukuwani aktsu skgata. Wankgolh «Noemí kgalhilh chatum kgawasa», chu limapakuwikgolh Obed. Xla xtlat* Jesé litaxtulh, chu Jesé xtlat David litaxtulh.
18 Wa umakgolh tiku minkgocha kxfamilia Pérez: Pérez xtlat Hezrón litaxtulh; 19 Hezrón xtlat Ram litaxtulh; Ram xtlat Aminadab litaxtulh; 20 Aminadab xtlat Nahsón litaxtulh; Nahsón xtlat Salmón litaxtulh; 21 Salmón xtlat Boaz litaxtulh; Boaz xtlat Obed litaxtulh; 22 Obed xtlat Jesé litaxtulh, chu Jesé xtlat David litaxtulh.