Rut
1 Kilhtamaku akxni jueces xlakputsananikgo kachikin, milh kilhtamaku akxni analh tatsinksni. Chu chatum chixku tiku xlama kBelén xalak Judá kataʼalh xpuskat chu chatiy xlakgkgawasan kkachikin Moab xlakata anta xmakgtawilakgolh. 2 Chixku xwanikan Elimélec,* xpuskat xwanikan Noemí,* chu chatiy xlakgkgawasan, Mahlón* chu Kilión.* Xalak Efrata xwankgonit, uma kilhchanima, xalak Belén nema wi kJudá. Chu chankgolh kkachikin Moab anta niku tamakgxtakgkgolh.
3 Titaxtulh kilhtamaku, Elimélec nilh. Wa xlakata Noemí, xpuskat, xʼakstu katatamakgxtakgli chatiy xlakgkgawasan. 4 Alistalh, xlakgkgawasan katatamakgaxtokgkgolh lakpuskatin xalak Moab: chatum xwanikan Orpá, chu achatum xwanikan, Rut. Max akgkaw kata latamakgolh anta. 5 Alistalh Mahlón chu Kilión na nikgolh, wa xlakata Noemí xʼakstu tamakgxtakgli, nialh xkgalhi xchixku chu nipara xlakgkgawasan. 6 Wa xlakata lakkaxwililh nataspita kxkachikin, xlakata akxni xlama kkachikin Moab kgaxmatli pi Jehová xlakapastaknit xkachikin chu xkamaxkiparanit tuku nawakgo. Xnapuwitin* akxtum taʼankgolh.
7 Wa xlakata Noemí taxtucha anta niku xlama, chu chatiy xnapuwitin taʼankgolh. Akxni xʼamakgolh kkachikin Judá, 8 Noemí kawanilh xnapuwitin: «Tlakg tlan nawan pi minchatunukan nakalakgtaspitatit minatsetnikan. Chu Jehová kakalimasiyanin tapaxkit nema ni makgxtakgnan, chuna la wixin kilalimasiyaninitaw akit chu kilakgkgawasan.* 9 Jehová kakamaxkin* minchatunukan chatum chixku xlakata nitu nakatsankganiyan». Alistalh xla kalakatsukli* chu xlakan pixlanka tsukukgolh tasakgo. 10 Chu xwanikgo: «Ni, ni ktitaspitwi. Nakkataʼanan chu akxtum nakkatalatamayan kminkachikin». 11 Pero Noemí kawanilh: «Kilaktsuman, kataspittit. ¿Tuku xlakata nakintapinatit? ¿Tlan nakkgalhipara kamanan xlakata nakatatamakgaxtokgatit? 12 Kataspittit, kilaktsuman, kapitit, xlakata akit lu klina kata chu nialhla ktitamakgaxtokgli. Chu komo tlan xaktamakgaxtokgli uma katsisni chu xakkgalhilh kamanan, 13 ¿xkgalhkgalhitit asta akxni kstakkgolh xlakata xkatatamakgaxtokgtit? ¿Putum uma kilhtamaku ni xtamakgaxtokgtit? Ni, kilaktsuman. Jehová kilakatakinit, chu akxni klilakpuwan la kamakgalipuwanan uma, lu nitlan klimakgkatsi».
14 Wa xlakata lu pixlanka tsukuparakgolh tasakgo. Alistalh Orpá lakatsukli xputiatse* chu taspitli, pero Rut ni makgxtakgputulh. 15 Wa xlakata Noemí wanilh: «Kaʼakxilhti, Orpá taspitli kxkachikin chu kalakgtaspitli xdioses. Na kataspitti».
16 Pero Rut kgalhtilh: «Nialh kakiwani pi kakmakgxtakgni, pi nialh kaktaʼan; xlakata anta niku napina na anta nakan, chu anta niku nalhtataya na anta naklhtata. Minkachikin kinkachikin nalitaxtu, chu miDios kiDios nalitaxtu. 17 Anta niku naniya na anta nakni chu anta nakimaknukan.* Jehová lu kakimalakgaxokgelh komo namin kilhtamaku nakmakgxtakgan. Nikxni ktimakgxtakgni asta akxni akit nakni o wix naniya».
18 Akxni Noemí akxilhli pi Rut liwana xlakpuwanit nataʼan, nialhtu wanilh. 19 Chu xchatiykan taspitkgolh kBelén. Akxni chankgolh, putum latamanin xalak kachikin kaks lilakawankgolh chu lakpuskatin xwankgo: «¿Wa uma Noemí?». 20 Chu xla xkawani: «Nialh kakilawaniw Noemí.* Kakilawaniw Mara,* xlakata Tiku kgalhi putum litliwakga tlawanit pi lu naklipuwan.* 21 Akxni kkalh lhuwa tuku xakkgalhi, pero Jehová tlawanit pi nialhtu naktataspita. ¿Tuku xlakata kilawaniyaw Noemí? Jehová kilakatakinit. Tiku kgalhi putum litliwakga lu kimakgapatinanit».
22 Wa uma tuku lalh akxni Noemí kitaspitli kMoab, chu akxtum xtaʼan Rut, xpuwiti* xalak Moab. Xtsukumaka makgalakan cebada akxni chankgolh kBelén.