Xlimaktum Samuel
6 Arca nema tapakgsini Jehová kitawi kxkachikinkan filisteos akgtujun papaʼ. 2 Filisteos katasanikgolh sacerdotes chu tiku xwankgo tuku aku xʼama la, chu kakgalhskinkgolh: «¿Tuku natlawaniyaw xʼArca Jehová? Kakilawaniw la nakmaspitaw niku tapakgsi». 3 Xlakan kgalhtinankgolh: «Komo namaspitatit arca xla talakkaxlan nema tapakgsini Jehová, Dios xalak Israel, katalipitit akgtum tamakamastan. Katamaspittit akgtum tamakamastan xpalakata tiku tlawalh tuku nitlan. Chu chuna tlan napaksatit chu nakatsiyatit tuku xlakata xmakan chuntiya kamalakgaxokgeman». 4 Chu kakgalhskinkgolh: «¿Tuku tamakamastan namalakgachaniyaw xpalakata tiku tlawalh tuku nitlan?». Kakgalhtika: «Xlakata xmapakgsinaninkan filisteos kgalhkitsis, kamalakgachatit akgkitsis tsitsi xaʼoro chu tankitsis tsiya xaʼoro. Xlakata chatunu chatunu wixin chu mimapakgsinaninkan watiya tuku kamakgapatinanitan. 5 Militlawatkan tatlawamakgxtu xla laktsu tsitsi* chu xla laktsu tsiya nema malakgsputumakgo kachikin. Chu namaxkiyatit kakni Dios xalak Israel. Max chuna nialh nakamalakgaxokgeyan wixin, midioskan chu minkachikinkan. 6 ¿Tuku xlakata natsakatnanatit chuna la tlawakgolh Egipto chu faraón? Akxni Dios xalak Israel nitlan kalikatsinilh, mastakgolh talakaskin pi israelitas xʼankgolh, chu israelitas taxtukgolh anta. 7 Wa xlakata kakaxtlawatit akgtum xasasti carreta chu kaputsatit tantiy wakax nema kgalhikgo xlakgskgatankan chu nikxni kawilinikanit akgtum mukiwi. Alistalh, kakachitit wakax kcarreta, pero xlakgskgatankan kakamaspittit, ni akxtum kakatamalakgachipitit. 8 Kawilitit kcarreta xʼArca Jehová chu kxpaxtun Arca kawilitit akgtum caja niku namujuyatit tuku litatlawanit oro chuna la akgtum tamakamastan xpalakata tiku tlawalh tuku nitlan. Alistalh kamaxkitit talakaskin naʼan 9 chu chuntiya kaʼakxilhtit. Komo natalakakxtu ktiji nema an kBet-Semes, anta kxkachikin, uma wamputun pi wa xDios Israel tiku kinkatlawanin putum uma tuku nitlan. Pero komo ni anta naʼan, nakatsiyaw pi ni wa xmakan kinkamalakgaxokgen, wata kaj xalan chuna lalh».
10 Lakchixkuwin tlawakgolh tuku kawanika. Putsakgolh tantiy wakax nema xkgalhikgo xlakgskgatankan chu kachikgolh kcarreta. Chu xlakgskgatankan kamaspitparakgolh. 11 Alistalh mujukgolh kcarreta xʼArca Jehová chu kcaja xtajumakgo tsiya xaʼoro chu xtatlawamakgxtu tsitsi nema kalitaxtunilh. 12 Chu wakax titum ankgolh ktiji niku xlakankan kBet-Semes, xtasatilhakgo chu nipara tsinu xpataxtukgo kxtijikan nipara kpakgastakat* chu kpakgxwiki.* Chu xmapakgsinaninkan filisteos xkastalanitilhakgo asta akxni chankgolh niku xkitapakgta Bet-Semes. 13 Latamanin xalak Bet-Semes xmakimakgolh trigo niku kxakaxtum. Akxni talakayawakgolh chu akxilhkgolh Arca, lu paxuwakgolh. 14 Carreta tanulh kxpukuxtu Josué tiku xalak Bet-Semes xwanit chu anta tachokgolh, lakatsu kʼakgtum lanka chiwix. Alistalh laktsu laktsu tlawakgolh carreta chu makamaxkika Jehová wakax chuna la akgtum xalhkun tamakamastan.
15 Levitas maktikgolh xʼArca Jehová chu caja niku xtajumakgolh tuku xlitlawakanit oro, chu kawilikgolh kʼakgtum chiwix. Ama kilhtamaku latamanin xalak Bet-Semes makamaxkikgolh Jehová xalhkun tamakamastan chu atanu tamakamastan.
16 Akxni akxilhkgolh uma, kgalhkitsis xmapakgsinaninkan filisteos taspitkgolh kʼEcrón watiya uma kilhtamaku. 17 Wa umakgolh tsitsi xaʼoro nema filisteos malakgachanikgolh Jehová, chuna la tamakamastan xpalakata tiku tlawalh tuku nitlan: akgtum xpalakata Asdod, akgtum xpalakata Gaza, akgtum xpalakata Asquelón, akgtum xpalakata Gat chu akgtum xpalakata Ecrón. 18 Chu tsiya xaʼoro nema kamalakgachaka xtachuna xwankgonit chuna la xlilhuwa xkachikinkan filisteos nema xkatapakgsinikgo kgalhkitsis mapakgsinanin (kachikinin nema xkgalhikgo xpatsapskan chu laktsu kachikinin).
Chu lanka chiwix niku wilikgolh xʼArca Jehová anta wi xlakata nalilakapastakkan tuku lalh asta la uku anta kxpukuxtu Josué tiku xalak Bet-Semes xwanit. 19 Pero Dios kamakgnilh lakchixkuwin xalak Bet-Semes, xlakata xʼakxilhkgonit xʼArca Jehová. Kamakgnilh 50,070* xalak kachikin. Chu kachikin tsukulh kalakgtasa xlakata Jehová lu palha xkamalakgaxokgenit. 20 Lakchixkuwin xalak Bet-Semes xwankgo: «¿Tiku tlan nataya kxlakatin Jehová, uma xasanto Dios? ¿Tiku nalakgan akxni nialh natawila unu?». 21 Wa xlakata kamalakgachanikgolh latamanin xalak Quiryat-Jearim makatsininanin xlakata xkawanikgolh: «Filisteos maspitkgonit xʼArca Jehová. Kapitit putsayatit chu kalipitit».