Xlimaktum Samuel
10 Alistalh Samuel tiyalh patum lameta niku xtajuma aceite chu akmawakalh Saúl. Lakatsukli* chu wanilh: «Jehová laksaknitan xlakata wix napulalipina xkachikin.* 2 La uku, akxni nakimakgxtakga chu natitaxtuya lakatsu kxputaknun Raquel, kxtiyat Benjamín kZelzá, nakatatanokglha chatiy lakchixkuwin. Xlakan nawanikgoyan: “Burros nema xkaputsapat katekgskaja. La uku mintlat nialhtu kalilakgaputsama burros, wata wixin kalilakgaputsaman, chu kilhwama: «¿Tuku naktlawa xlakata naktekgsa kinkgawasa?»”. 3 Wix chuntiya katlawanti asta akxni nachipina klanka kiwi nema ya kTabor. Anta nakatatanokglha kgalhtutu lakchixkuwin tiku talakakxtumakgolh kBetel xlakata nakakninanikgo xaxlikana Dios. Chatum lima nawan tantutu xalakgskgata cabras, chu achatum maktutu kaxtalanchu chu achatum patum xalanka xalu niku tajuma vino. 4 Nakgalhskinkgoyan la wila chu namaxkikgoyan maktiy kaxtalanchu. Wix kamakglhtinanti. 5 Alistalh nachipina kxsipi xaxlikana Dios, niku wi akgtum grupo xla soldados filisteos. Akxni nachipina kkachikin, nakaʼakxilha makgapitsi palakachuwinanin tiku taktamakgocha niku mastakan takaknin. Xlakan nakgalhchuwinantilhakgo chuna la kgalhchuwinankgo palakachuwinanin, chu kxlakatinkan amakgo nawan latamanin tiku tlakgtilhakgo akgtum litlakgni nema kgalhi cuerdas, pandereta, flauta chu arpa. 6 Xʼespíritu Jehová namaxkiyan litliwakga chu wix nakatapina chu na nachuwinantilhaya chuna la chuwinankgo palakachuwinanin. Tanu lataman nalitaxtuya. 7 Akxni kgantaxtukgonita nawan putum uma, naʼakxilha pi Dios makgtayaman, wa xlakata katlawa putum tuku militlawat. 8 Wix kakimpulani kʼGuilgal. Anta natanokglhachaw xlakata nakmakamasta xalhkun tamakamastan chu tamakamastan xla takaksni. Kakinkgalhkgalhi akgtujun kilhtamaku asta akxni akit nakchan, chu alistalh nakwaniyan tuku militlawat».
9 Akxni Saúl talakgaspitli xlakata naʼan, Dios tsukulh lakgpalini xnaku xlakata la atanu lataman nalitaxtu, chu uma kilhtamaku tsukulh kgantaxtu putum tuku Samuel xwanit. 10 Wa xlakata akxni talakakxtukgolh ksipi, katatanokglhkgolh makgapitsi palakachuwinanin. Ama kilhtamaku, xʼespíritu Dios maxkilh litliwakga, chu xla akxtum kataʼalh chu tsukulh chuwinan chuna la chuwinankgo palakachuwinanin. 11 Akxni tiku xlakgapaskgo Saúl akxilhkgolh pi akxtum xkataʼan palakachuwinanin chu pi xchuwinan chuna la xlakan, tsukukgolh lawanikgo: «¿Tuku akgspulanit xkgawasa Quis? ¿Na palakachuwina litaxtu Saúl?». 12 Alistalh chatum chixku xala anta wa: «¿Chu tiku xtlatkan putum umakgolh?». Anta taxtulh tachuwin «¿Na palakachuwina litaxtu Saúl?».
13 Akxni chuwinankgolh chuna la xchuwinankgo palakachuwinanin, alh niku xmastakan takaknin. 14 Alistalh xtala xtlat Saúl kgalhskilh xla chu kskujni: «¿Niku kilatit?». Saúl kgalhtilh: «Kkakiputsaw burros, pero xlakata ni xakkatekgsaw, klakgaw Samuel». 15 Xkuku Saúl kakgalhskilh: «¿Chu tuku kawanin Samuel? Kakiwanitit, katlawatit litlan». 16 Saúl kgalhtilh xkuku: «Kinkawanin pi burros xkatekgskanita». Pero Saúl ni litachuwinalh tuku xwaninit Samuel pi mapakgsina xʼama wan.
17 Alistalh Samuel tlawalh pi kachikin xtamakxtumilh kxlakatin Jehová anta kMizpá 18 chu kawanilh israelitas: «Wa uma tuku wan Jehová, xDios Israel: “Akit tiku kkatamakxtulh israelitas kʼEgipto chu akit tiku kkalakgmaxtulh kxmakankan egipcios chu putum mapakgsinanin tiku xkamakgapatinankgo. 19 Pero la uku wixin lakgmakganitantit miDioskan, miLakgmaxtunakan, tiku kalakgmaxtun kxliputum tuku nitlan xtitaxtupatit chu kmintalakgaputsitkan. Wantit: «Maski chuna, kalaksakti chatum mapakgsina xlakata nakinkamapakgsiyan». Chu, la uku, katayatit kxlakatin Jehová akgatunu tribus chu akgatunu familias”».
20 Wa xlakata Samuel tlawalh pi akgatunu akgatunu tribus xalak Israel xtalakatsuwikgolh, chu laksakka xtribu Benjamín. 21 Alistalh tlawalh pi xtalakatsuwilh akgatunu akgatunu familia xalak xtribu Benjamín. Chu familia nema laksakka wa xfamiliajkan matritas. Xaʼawatiya, laksakka Saúl, xkgawasa Quis. Pero putsakgolh chu ni niku tekgskgolh. 22 Wa xlakata kgalhskinkgolh Jehová: «¿Unu wija uma chixku?». Chu Jehová kakgalhtilh: «Anta wi, tatsekgnit kxlakgstipan tuku kaliminkanit». 23 Lakapala ankgolh putsakgo chu tamakxtukgolh. Akxni Saúl tayalh kxlakatin kachikin, akxilhkgolh pi lu chalhman xwanit, chu amakgapitsi latamanin kaj kxpakgxtun* xchanikgo. 24 Samuel wanilh kachikin: «¿Akxilhatit tiku Jehová laksaknit? Kxliputum kachikin ni anan tiku xtachuna». Chu xputumkan pixlanka tsukukgolh wankgo: «¡Katasikulunatlawalh mapakgsina!».
25 Alistalh Samuel litachuwinalh kachikin tuku xʼama kalakgchan mapakgsinanin, tsokgwililh kmaktum libro chu wililh kxlakatin Jehová. Alistalh kawanilh xputumkan pi xtaspitkgolh kxchikkan. 26 Saúl na taspitli kxchik, kʼGuibeá,* xkataʼan soldados tiku Jehová xkamalakpuwaninit chuna xtlawakgolh. 27 Pero makgapitsi lakchixkuwin tiku nitu xlitaxtukgo wankgolh: «¿La nakinkalakgmaxtuyan uma chixku?». Lakgmakgankgolh chu ni linikgolh nipara akgtum tamaskiwin,* pero xla nitu wa.*