Xlimaktum Samuel
14 Akgtum kilhtamaku, Jonatán, xkgawasa Saúl, wanilh xmakgtayana, tiku xlini tuku xlitalatlawanan: «Kaʼaw kxakilhtutu niku wilakgolh filisteos». Pero ni litachuwinalh xtlat. 2 Chu Saúl xtamakgxtakgma kxkilhtin Guibeá, kxtampin xakiwi granada nema ya kMigrón, chu akgchaxan ciento lakchixkuwin xtatamakgxtakgmakgo. 3 (Tiku xlin efod wa Ahíya xkgawasa Ahitub, xtala Icabod, xkgawasa Finehás, xkgawasa Elí, tiku ksacerdote Jehová xwanit kSiló). Chu soldados ni xkatsikgo niku xʼanit Jonatán. 4 Jonatán xchamputun niku xwilakgolh filisteos, xtitaxtumakgo kxatitsu tiji niku xwilakgolh laklanka chiwix nema xtasiyakgo la tatsan, akgtum xwanikan Bozez, chu atanu xwanikan Sené. 5 Akgtum lanka chiwix xwanit chuna la akgtum talayaw chu xya knorte, kxlakatin Micmash. Atanu xwi ksur, kxlakatin Gueba.
6 Wa xlakata Jonatán wanilh tiku xlini xʼescudo: «Kaʼaw niku wilakgolh umakgolh lakchixkuwin tiku ni kaʼakstilichukunikanit kxuwa xlichixkukan. Max Jehová wi tuku natlawa kimpalakatakan, xlakata Jehová tlan lhuwa o ni lhuwa tiku namaklakaskin xlakata nalakgmaxtunan». 7 Alistalh tiku xlini xʼescudo wanilh: «Katlawa tuku tlan akxilha. Kapit niku lakaskina. Akit nakstalaniyan kaniwa niku napina». 8 Alistalh Jonatán wa: «Natitaxtuyaw niku wilakgolh umakgolh lakchixkuwin chu namastayaw talakaskin pi nakinkaʼakxilhkgoyan. 9 Komo nakinkawanikgoyan “¡Katachokgotit, anta katamakgxtakgtit asta akxni nakchanachaw!”, anta natamakgxtakgaw chu ni katiʼaw niku xlakan wilakgolh. 10 Pero komo nakinkawanikgoyan “¡Katantit* kilatalatlawayaw!”, naʼanaw. Wa uma tuku nalitasiya pi Jehová nakamakamasta kkimakankan».
11 Alistalh xchatiykan mastakgolh talakaskin pi filisteos xkaʼakxilhkgolh. Chu filisteos wankgolh: «¡Kaʼakxilhtit! Hebreos taxtumakgolh klhuku niku xtatsekgkgonit». 12 Alistalh, soldados tiku makxtum xwilakgolh wanikgolh Jonatán chu tiku xlini xʼescudo: «¡Katantit unu, xlakata wi tuku nakkamasiyaniyan!». Jonatán tunkun wanilh tiku xlin xʼescudo: «Kakistalani xlakata Jehová nakamakamaxki israelitas». 13 Alistalh Jonatán tsukulh tawakatnan ktalhpan chu tiku xlin xʼescudo kstalanitilha. Jonatán lakatin xʼan chu xkatalatlawatilha filisteos, chu tiku xlin xʼescudo xkamakgnitilhama tiku xtamakgxtakgmakgolh. 14 Kʼuma xapulana tatalachipat, Jonatán chu tiku xlin xʼescudo kamakgnikgolh max kgalhpuxam lakchixkuwin, chu ni kalakgtilanka xwanit niku chuna tlawakgolh.
15 Alistalh putum soldados tiku makxtum xwilakgolh chu soldados tiku xwilakgolh ktalhpan lu pekuankgolh, chu nachuna grupos xla soldados tiku xkamalakgachakanit xlakata xtalatlawakgolh Israel. Tiyat tsukulh tachiki chu Dios tlawalh pi filisteos lu xlakgaputsakgolh. 16 Xkuentajtlawananin Saúl tiku xwilakgolh kʼGuibeá kxtiyat Benjamín akxilhkgolh pi filisteos lu xlakgaputsamakgo kxlilakgatum niku xwilakgo.
17 Saúl kawanilh lakchixkuwin tiku anta xtawilakgolh: «Katlawatit litlan, kakaputlekgetit xlakata nakatsiyaw tiku anit». Akxni kaputlekgeka, akxilhka pi Jonatán chu tiku xlini xʼescudo ni anta xwilakgolh. 18 Saúl limapakgsilh Ahíya: «¡Kalita Arca nema tapakgsini xaxlikana Dios!». (Amacha kilhtamaku Arca nema tapakgsini xaxlikana Dios xkatawi israelitas). 19 Akxni Saúl xtachuwinamajku sacerdote, niku xwilakgolh filisteos tlakg xtaʼakglhuwimakgolh. Chu Saúl wanilh sacerdote: «Kamakgxtakgti, nialh katlawa tuku tlawapat».* 20 Wa xlakata Saúl chu putum ksoldados tamakxtumikgolh chu ankgolh talatlawanankgo. Anta kaʼakxilhkgolh filisteos pi xʼakstukan xlalimakgnimakgolh xʼespadaskan. Lu xtaʼakglhuwimakgolh. 21 Nachuna, hebreos tiku akxtum xkatalakgonit filisteos chu akxtum xkataʼankgonit anta niku xwilakgolh, makxtum katalakgolh israelitas tiku akxtum xkatawilakgolh Saúl chu Jonatán. 22 Chu putum israelitas tiku xtatsekgkgonit kxkasipijni tribu xla Efraín kgaxmatkgolh pi filisteos xtsalamakgo. Wa xlakata na makgtanukgolh kʼguerra chu kaputsastalanikgolh. 23 Ama kilhtamaku Jehová lakgmaxtulh Israel, chu tatalachipat talakgatumilh asta kBet-Aven.
24 Pero putum israelitas lu xtlakgwankgonit ama kilhtamaku, xlakata Saúl tlawalh uma tamalaknun chu tlawalh pi lakchixkuwin xlitayakgolh pi xʼamakgolh makgantaxtikgo: «¡Kaʼakgspulalh tuku nitlan chixku tiku wi tuku nawa* akxni nina kgotanu, akxni akit nina kkamalakgaxokge nawan kintalatlawananin!». Wa xlakata nipara chatum wi tuku xwanit.
25 Alistalh xputumkan chankgolh klaklanka kakiwin chu kkatutsu xʼanan ksakgsi cera.* 26 Akxni tanukgolh klaklanka kakiwin, akxilhkgolh pi ksakgsi cera slankg slankg xtaktama. Pero xpekuankgo xlakata tamalaknun nema xtlawakanit, wa xlakata niti walh. 27 Pero Jonatán, ni xkgaxmatnit tamalaknun nema xtlat xtlawanit, chu xkawaninit ksoldados pi xmakgantaxtikgolh, wa xlakata litamakgastonkgli kgantum kiwi nema xchipanit chu limaklhtukulh xchaw cera. Akxni walh, tatliwakglhpa.* 28 Alistalh chatum soldado wanilh: «Mintlat kinkawanin pi xaklitayaw pi nakmakgantaxtiyaw uma lu tuwa tamalaknun. Wa: “¡Kaʼakgspulalh tuku nitlan chixku tiku wi tuku nawa la uku!”. Wa xlakata putum lu tlakgwankgonit». 29 Pero Jonatán kgalhtilh: «Kintlat tlawaninit tuku lu nitlan uma kachikin. Kaʼakxilhtit la ktatliwakglhpa* akxni kaj tsinu ksakgsi cera kwalh. 30 ¡Kalilakpuwantit komo la uku putum soldados tlan xliwayankgolh tuku kamakglhtikgolh xtalatlawananinkan! Tlakg lhuwa filisteos xtikamakgnitit».
31 Ama kilhtamaku soldados kamakgnitilhakgolh filisteos lata kMicmash asta kʼAyalón, chu lu xtlakgwankgonit. 32 Wa xlakata lakapala lakgankgolh tuku xkamakglhtikgonit xtalatlawananinkan: chipakgolh borregos, wakax chu xalakgskgatan wakax, kamakgnikgolh chu liwa tawakgolh kgalhni. 33 Wa xlakata makatsinika Saúl: «Kaʼakxilhti, lakchixkuwin makglakgalhinamakgo kxlakatin Jehová: wamakgolh liwa nema kgalhi kgalhni». Chu xla kawanilh: «Wixin tlawanitantit akgtum lanka talakgalhin. Kalakapalatit, kamakgolotit asta unu akgtum lanka chiwix». 34 Alistalh Saúl wa: «Katalakgatumitit kxlakgstipankan lakchixkuwin chu kakawanitit: “Chatunu chatunu wixin kalitantit* mintorojkan chu miborregojkan, chu unu kakamakgnitit; alistalh tlan nawayatit. Pero ni kalakgalhinantit kxlakatin Jehová chu ni katawatit liwa xkgalhni”». Ama katsisni chatunu chatunu lilh xtoro chu anta makgnilh. 35 Chu Saúl tlawanilh akgtum pumakamastan Jehová. Wa uma xapulana pumakamastan nema tlawanilh Jehová.
36 Alistalh, Saúl wa: «Kataktaw katsisni xlakata nakaputsastalaniyaw filisteos chu xlakata nakamakglhtikgoyaw putum tuku kgalhikgo asta akxni naxkgakga. Nipara chatum katilakgtaxtulh». Ksoldados kgalhtikgolh: «Katlawa tuku tlan akxilha». Alistalh sacerdote wa: «Unu kakgalhskiw xaxlikana Dios». 37 Chu Saúl kgalhskilh Dios: «¿Xlilat naktakta xlakata nakkaputsastalani filisteos? ¿Nakamakamastaya kxmakan Israel?». Pero Dios nitu kgalhtilh ama kilhtamaku. 38 Wa xlakata Saúl wa: «Wixin, xnapuxkun soldados, katalakatsuwitit chu kalakputsanantit xlakata nakatsiyatit tuku talakgalhin tlawakanit la uku. 39 Kmalaknu kxtukuwani Jehová, xastakna Dios, tiku lakgmaxtulh Israel, pi tiku lin kuenta nani, asta maski kinkgawasa Jonatán». Pero niti kgalhtilh. 40 Alistalh Saúl kawanilh putum israelitas: «Wixin unu katayatit, chu kinkgawasa Jonatán chu akit, naktayayaw alakgaputu». Chu xlakan kgalhtinankgolh: «Katlawa tuku tlan akxilha».
41 Chu Saúl wanilh Jehová: «¡Oh, Dios xalak Israel, kakilalikgalhtiw Tumim!». Chu Jonatán chu Saúl wa tiku kalaksakka; chu amakgapitsin lakgtaxtukgolh. 42 Chu Saúl wa: «Lhkgen kakamakapitit laktsu chiwix* xlakata nakatsiyaw komo akit o wa kinkgawasa Jonatán». Chu taxtucha pi wa Jonatán. 43 Alistalh Saúl wanilh Jonatán: «Kakiwani, ¿tuku tlawanita?». Chu Jonatán kgalhtilh: «Kajwatiya kkgalhwanalh tsinu ksakgsi cera, nema klikinkatlawalh kiwi nema kchipanit. ¡Unu kwi! ¡Tlantiya nakni!».
44 Chu Saúl wa: «Dios lu palha kakimalakgaxokgelh komo wix ni naniya, Jonatán». 45 Pero soldados wanikgolh Saúl: «¿Xlilat nani Jonatán, chixku tiku tlawalh pi Israel xtlajanalh?* ¡Nichuna! Kmalaknuyaw kxtukuwani Jehová, xastakna Dios, pi ni katixamanika nipara kgantum xchixit,* xlakata xla lipawa Dios xliputum tuku tlawalh la uku». Chuna xlakan lakgmaxtukgolh Jonatán chu xla ni nilh.
46 Wa xlakata Saúl nialh kaputsastalanilh filisteos, chu filisteos taspitkgolh kxkachikinkan.
47 Saúl matliwakglhli chuna la xmapakgsinama kʼIsrael chu katalatlawalh putum xtalamakgasitsin tiku xmakgstiliwilikgo: moabitas, ammonitas, edomitas, mapakgsinanin xalak Zobá chu filisteos. Kaniwa niku xʼan, xkamakgatlaja. 48 Ni pekualh akxni katalachipalh amalequitas chu kamakgatlajalh. Kalakgmaxtulh israelitas kxmakankan tiku xkamakgkgalhanankgo.
49 Wa umakgolh xwankgonit xlakgkgawasan Saúl: Jonatán, Isví chu Malki-Súa. Chu kgalhilh chatiy xlaktsuman. Tiku tlakg lankata xwanit xwanikan Merab chu xaʼaktsujku* xwanikan Mical. 50 Xpuskat Saúl xwanikan Ahinoham xtsumat Ahimáaz. Chu xpuxkukan ksoldados xwanikan Abner xkgawasa Ner, xkuku Saúl. 51 Quis wa xtlat Saúl xwanit, chu Ner, xtlat Abner, xkgawasa Abiel xwanit.
52 Putum kilhtamaku akxni mapakgsinalh Saúl, lu tuwa xwanit guerra nema xkatakgalhikgo filisteos. Wa xlakata, akxni Saúl xʼakxilha chatum chixku tiku tliwakga xwanit chu ni xpekuan, ksoldado xtlawa.