Xlimaktum Samuel

20 Alistalh, David tsalataxtucha kNayot nema tapakgsini Ramá. Alh akxilha Jonatán chu kgalhskilh: «¿Tuku ktlawanit? ¿Wi tuku nitlan ktlawanit? ¿Tuku talakgalhin ktlawaninit mintlat xlakata nakimakgniputun?». 2 Jonatán kgalhtilh: «¡Wix ni katini! ¡Nipara tsinu kalilakpuwanti! Kakgaxpatti, kintlat nitu tlawa komo ni pulana nakiwani. ¿Tuku xlakata nakimatsekgni uma? Ni, uma nichuna katilalh». 3 Pero David malaknulh chu wanilh: «Mintlat liwana katsi pi wix kimpaxkiya chu nalakpuwan: “Tlakg tlan pi Jonatán ni nakatsi xlakata ni napati”. ¡Xlikana kwaniyan, tuku kkilhwama kmilakatin chu kxlakatin Jehová ni akgtum taʼakgsanin, akit nialh makgas kkama niy!».

4 Chu Jonatán wanilh David: «Naktlawa mimpalakata tuku wix nakiskiniya». 5 Alistalh David wanilh Jonatán: «Chali skgata papaʼ, chu akit kilitawayanat mapakgsina. Wa uma tuku natlawayaw: wix nakimaxkiya talakaskin xlakata nakan chu akit naktatsekga kkapukuxtun asta xliʼakgtutu kilhtamaku akxni nakgotanu.* 6 Komo mintlat naʼakxilha pi akit ni kwi, wix kawani: “David kintasaskinilh pi xakmaxkilh talakaskin xlakata lakapala xʼalh kxkachikin, kBelén, xlakata anta amaka tlawakan tamakamastan xaʼakgatunu kata xpalakata xfamilia”. 7 Komo nawan “Tlan”, wamputun pi nitu kintiʼakgspulalh.* Pero, komo nasitsi, liwana kakatsi pi kintlawaniputun tuku nitlan. 8 Kakilimasiyani tapaxkit nema ni makgxtakgnan, xlakata kintatlawanita akgtum talakkaxlan kxlakatin Jehová. Pero komo akit klin kuenta wix kakimakgni. ¿Tuku xlakata nakimakamastaya kxmakan mintlat?».

9 Wa xlakata Jonatán wanilh: «¡Tuku xlakata chuna wana! Komo nakkatsi pi kintlat tlawaniputunan tuku nitlan, ¿ni lakpuwana pi nakwaniyan?». 10 Alistalh David kgalhskilh Jonatán: «Pero ¿tiku nakimakatsini komo mintlat nasitsi?». 11 Jonatán kgalhtilh David: «Katat, kaʼaw kkapukuxtun...». Wa xlakata xchatiykan ankgolh kkapukuxtun, 12 chu Jonatán wanilh David: «Jehová, Dios xalak Israel, liwana katsi tuku kwaniman, pi chali o tuxama max watiya uma hora, naktachuwinan kintlat xlakata nakkatsi tuku lakpuwan. Komo nakakxilha pi kgalhi tlan tapuwan mimpalakata,* wi tiku nakmalakgacha xlakata namakatsiniyan. 13 Jehová lu kakimalakgaxokgelh* komo nakkatsi pi kintlat tlawaniputunan tuku nitlan chu akit ni nakwaniyan pi katsala xlakata nitu naʼakgspulayan. Jehová kamakgtayan chuna la makgtayalh kintlat. 14 ¿Ni nakilimasiyaniya wix xtapaxkit Jehová nema ni makgxtakgnan akxni akit chuntiya klama nawan chu asta akxni akit kninita nawan? 15 Ankgalhin kakalimasiyani tapaxkit nema ni makgxtakgnan putum tiku xalak kinchik, chu asta akxni Jehová nakamalakgsputu kxlikalanka katiyatni putum mintalatlawananin».* 16 Chuna, Jonatán tatlawalh akgtum talakkaxlan xchik David. Na wa: «Jehová nakatalakkaxla xtalatlawananin David». 17 Chu Jonatán tlawalh pi David xmalaknunipa pi ankgalhin tlan xʼama talalin, xlakata xpaxki chuna la xʼakstu xpaxkikan.

18 Alistalh Jonatán wanilh: «Chali skgata papaʼ chu nakkalakapastakan xlakata kmilaktawilh natasiya pi niti wi. 19 Chu xlituxama tlakg natasiya pi ni anta wila. Alistalh natamparaya unu niku xtatsekgnita xapulana* chu lakatsu katawila niku wi uma chiwix. 20 Akit nakmakan kgantutu flecha kxpaxtun chiwix chuna la komo wi tuku ktalaputun. 21 Akxni nakmalakgacha kiskujni, nakwani: “Kapit putsaya flechas”. Komo nakgaxpata nakwani “¡Kaʼakxilhti! Flechas tlakg pakgmin makgolh, kakasakti”, uma nalitasiya pi tlan nataspita, xlakata kxtukuwani Jehová xastakna Dios, uma kilhchanima pi putum tlan wi chu nitu katiʼakgspulan. 22 Pero komo nakgaxpata pi nakwani kgawasa “¡Kaʼakxilhti! Flechas tlakg pakganacha makgocha”, uma wamputun pi militsalat, xlakata Jehová lakaskin pi katsala. 23 Jehová liwana kakatsilh tamalaknun nema latlawaninitaw».

24 Wa xlakata David tatsekgli kkapukuxtun. Chu akxni skgatalh papaʼ, mapakgsina tawilalh xlakata nawayan. 25 Chuna la xlismaninit, mapakgsina xwi kxlaktawilh lakatsu kpatsaps. Kxlakatin Saúl xwi Jonatán chu kxpaxtun xwi Abner. Pero niku xtawila David niti xwi. 26 Ama kilhtamaku Saúl nitu wa xlakata xlakpuwan: «Max wi tuku akgspulanit chu xataxkajwani wi. Chuna, max nina taskulunki». 27 Lichali akxni kskgatanit papaʼ, xliʼakgtiy kilhtamaku, niku xtawila David chuntiya niti xwi, Saúl kgalhskilh xkgawasa Jonatán: «¿Tuku xlakata xkgawasa Jesé ni milh wayan kgotan nipara la uku?». 28 Jonatán kgalhtilh Saúl: «David kintasaskinilh pi xakmaxkilh talakaskin xʼalh kBelén. 29 Kiwanilh: “Katlawa litlan, kimaxki talakaskin nakkan, xlakata kifamilia namakamasta akgtum tamakamastan kkachikin, chu kintala kiwanilh pi xakkalh. Wa xlakata komo wix tlan akxilha, ktasaskiniyan pi kimaxki talakaskin nakkan kaʼakxilha kinatalan”. Wa xlakata ni minit wayan kxmesa mapakgsina». 30 Saúl lu sitsinilh Jonatán chu wanilh: «¡Litaxtuya xkgawasa chatum puskat tiku lakatakinan! ¿Lakpuwana pi ni kkatsi pi tatayaya xkgawasa Jesé? ¡Miʼakstu mamaxanikana chu mamaxaniya mintse! 31 Komo xkgawasa Jesé chuntiya lama nawan, ni mapakgsina katilitaxtu chu mintamapakgsin ni liwana katitalakkaxtawilalh. Wa xlakata kamatasaninanti xlakata xlilat namakgnikan».*

32 Pero Jonatán kgalhtilh xtlat, Saúl: «¿Tuku xlakata namakgnikan? ¿Tuku tlawanit?». 33 Alistalh xlakata namakgni, Saúl lhkgen makgosunilh xlanza, chu Jonatán katsilh pi xtlat liwana xlakkaxwilinit namakgni David. 34 Tunkun, Jonatán xatasitsi tayalh. Chu ama xliʼakgtiy kilhtamaku lata kskgatanit papaʼ Jonatán nitu walh. Lu nitlan xlimakgkatsi xpalakata David chu xlakata xtlat xmamaxaninit.

35 Lichali tsisa, Jonatán alh kkapukuxtun, chuna la xtalakkaxlanit David chu taʼalh chatum kskujni tiku kgawasaku xwanit. 36 Anta wanilh kskujni: «Tokgosun kapit chu kaputsa flechas nema akit kkamakgosulh». Skujni tokgosun alh, chu Jonatán tlakg makgat makgosunilh kgantum flecha. 37 Akxni uma skujni chalh anta niku xma flecha nema Jonatán xmakgosunit, Jonatán pixlanka tsukulh wani: «¿Ni tlakg makgat kitamacha flecha wantu kmakgosulh?». 38 Chu Jonatán pixlanka wanipa: «¡Kalakapala! ¡Kakgosnanti! ¡Ni kamakgapala!». Skujni kasakli flechas chu lakgtaspitli xmalana. 39 Pero kskujni nitu katsilh; kajwatiya Jonatán chu David xkatsikgo tuku xkilhchanima putum uma. 40 Alistalh Jonatán maxkilh kskujni tuku xlitalatlawanan chu wanilh: «Kakalipita kkachikin».

41 Akxni kskujni alh, David taxtulh niku xtatsekgnit. Alistalh talakgatsokgostalh chu makgtutu takilhputalh. Alistalh lalakatsukkgolh* chu lalakgtasakgolh, pero David wa tiku tlakg tasalh. 42 Jonatán wanilh David: «Kapit chu nitu kalilakgaputsa, xlakata kinchatiykan malaknuw kxtukuwani Jehová, xastakna Dios. Malaknuw: “Jehová ankgalhin kakatsilh tamalaknun nema latlawaninitaw wix chu akit, chu niku na makgtanumakgolh kinkamanan chu minkamanan”».

Alistalh David alh chu Jonatán taspitli kkachikin.