Xlimaktum Samuel
22 Wa xlakata David taxtucha anta chu tatsekgli klhuku nema xwi kʼAdulam. Akxni xnatalan chu putum tiku xwilakgolh kxchik xtlat katsikgolh uma, lakgankgolh anta niku xwi. 2 Nachuna lakxtum talakgolh tiku xkgalhikgo taʼakglhuwit o xlaklinkgo tumin, chu nachuna tiku ni xlipaxuwakgo xlatamakan, chu David xpulalinakan litaxtulh. Akxtum xtawilakgolh max akgtati ciento lakchixkuwin.
3 Alistalh David taxtucha anta kMizpé xalak Moab chu wanilh mapakgsina xalak Moab: «Katlawa litlan kamasta talakaskin pi kintlat chu kintse unu nakatatamakgxtakgkgoyan asta akxni nakkatsi tuku natlawa Dios kimpalakata». 4 Wa xlakata akxtum katamakgxtakgli mapakgsina xalak Moab, chu xlakan anta tamakgxtakgkgocha putum kilhtamaku akxni David xwilacha niku xtatsekgnit, klhuku nema xwi kʼAdulam.
5 Alistalh, palakachuwina Gad wanilh David: «Ni katamakgxtakgti anta niku tatsekgnita. Kapit kxtiyat Judá». Wa xlakata David taxtucha anta chu tanulh klanka kakiwin Héret.
6 Saúl kgaxmatli pi xkatekgskanit David chu lakchixkuwin tiku akxtum xtaʼankgo. Makatsinika uma akxni xwi kxtampin kiwi tamarisco anta kʼaktsu sipi xalak Guibeá. Xchipanit xlanza, chu putum xlakskujnin xmakgstiliwilikgonit. 7 Alistalh Saúl kawanilh xlakskujnin tiku lakatsu xwilanikgolh: «Katlawatit litlan kakinkgaxpatnitit, lakchixkuwin xalak Benjamín. ¿Lakpuwanatit putum wixin pi xkgawasa Jesé nakamaxkiyan kapukuxtun chu anta niku chankanit uvas? ¿Lakpuwanatit pi napuxkun nakalimaxtuyan xla akgtum mil soldados chu napuxkun xla akgtum ciento soldados? 8 ¡Putum wixin makxtum lanitantit xlakata nakilakatakiyatit! ¡Nipara chatum wixin kiwanilh pi kinkgawasa xtatlawanit akgtum talakkaxlan xkgawasa Jesé! Niti kililakgaputsa chu niti kiwani pi wa kinkgawasa tlawanit pi kiskujni nakilipataxtu, chuna la lama la uku».
9 Alistalh Doeg tiku xalak Edom xwanit, tiku xpuxkukan xkalitaxtuni xlakskujnin Saúl, kgalhtinalh: «Kkakxilhli xkgawasa Jesé akxni chalh kNob xlakata natachuwinan Ahimélec xkgawasa Ahitub. 10 Chu Ahimélec putsanilh xtapulalit Jehová chu maxkilh David makgapitsi liwat. Chu asta maxkilh xʼespada filisteo Goliat». 11 Tunkun mapakgsina matasaninalh Ahimélec xkgawasa Ahitub tiku sacerdote xwanit chu putum sacerdotes xalak xchik xtlat, tiku xwilakgolh kNob. Chu xputumkan lakgankgolh mapakgsina.
12 Chu Saúl wa: «¡Xkgawasa Ahitub, kakinkgaxpatni!». Xla kgalhtilh: «Unu kwi, malana». 13 Saúl wanilh: «¿Tuku xlakata wix chu xkgawasa Jesé makxtum lanitantit xlakata nakilakatakiyatit? ¿Tuku xlakata maxki kaxtalanchu chu kgantum espada, chu putsani xtapulalit Dios? Xla kintalatlawana chu kilipataxtuputun, chu wa uma tuku lama la uku». 14 Akxni Ahimélec kgaxmatli uma, kgalhtilh mapakgsina: «¿Kgalhiya chatum miskujni tiku tlan lipawankan* chuna la David? Xla xpuwiti* mapakgsina, xpuxkukan soldados tiku kuentajtlawakgoyan chu maxkikan kakni anta kminchik. 15 ¿Ni xlikana pi uma ni xlimakgtumku akxni kputsanima xtapulalit Dios? ¡Akit nikxni xaktlawalh tuku wix lichuwinampat! Kimalana, nitu kakilalimawakaw akit chu nipara chatum tiku xalak xchik kintlat. Nitu xakkatsi xlakata uma».
16 Pero mapakgsina wanilh: «¡Naniya Ahimélec! Wix chu putum tiku xalak xchik mintlat». 17 Alistalh, mapakgsina kawanilh soldados tiku xkuentajtlawakgo chu lakatsu xwilanikgolh: «¡Tunkun kakamakgnitit ksacerdotes Jehová! ¡Xlakan tatayakgonit David! ¡Xkatsikgo pi xkintsalanima chu nitu kiwanikgolh!». Pero tiku xkuentajtlawamakgo mapakgsina nitu katlawaniputunkgolh ksacerdotes Jehová. 18 Wa xlakata Saúl limapakgsilh Doeg, tiku xalak Edom xwanit: «¡Kapit chu wix kakamakgni!». Doeg tunkun alh kamakgni sacerdotes. Ama kilhtamaku kamakgnilh 85 lakchixkuwin tiku xlilhakganankgonit xapakgaxtuluwa lhakgat nema xlitatlawanit lino. 19 Na kamakgnilh latamanin xalak Nob, xkachikinkan sacerdotes. Kalimakgnilh xʼespada lakchixkuwin chu lakpuskatin, laktsu kamanan chu lakgskgatan, nachuna toros, burros chu borregos.
20 Pero Ahimélec, xkgawasa Ahitub xkgalhi chatum xkgawasa tiku xwanikan Abiatar xla lakgtaxtulh chu tsalalh xlakata lakxtum xtalalh David. 21 Abiatar wanilh David: «Saúl kamakgninit ksacerdotes Jehová». 22 Akxni David kgaxmatli uma, wanilh Abiatar: «Xakkatsiya. Ama kilhtamaku akxni kakxilhli anta Doeg, tiku xalak Edom, kkatsilh pi xʼama wani Saúl. Akit klin kuenta xlakata kamakgnika putum tiku xalak xchik mintlat. 23 Unu kakintatamakgxtakgti. Ni kapekuanti, xlakata, komo wi tiku namakgniputunan, nalitaxtu xtachuna la akit xkimakgniputulh. Akit nakkuentajtlawayan».