Xlimaktum Samuel
23 Titaxtulh kilhtamaku wanika David: «Filisteos talatlawamakgo kachikin Queilá chu kgalhamakgo talhtsi niku lakpajnankan». 2 Chu David kgalhskilh Jehová: «¿Xlilat nakan katalatlawa filisteos?». Jehová kgalhtilh: «Chuna, kapit katalatlawaya filisteos chu kalakgmaxtu kachikin Queilá». 3 Pero ksoldados David wanikgolh: «Komo pekuamawa akxni wilawku unu kJudá, ¡kalilakpuwanti komo naʼanaw kQueilá xlakata nakatalatlawayaw filisteos!». 4 Alistalh David kgalhskimpa Jehová, chu ama kilhtamaku Jehová kgalhtilh: «Kapit. Katakta kQueilá, xlakata nakkamakamasta filisteos kmimakan». 5 Wa xlakata David kataʼalh ksoldados kQueilá chu katalatlawalh filisteos. Lhuwa kamakgnilh chu kalilh xʼanimaleskan. David chuna kalakgmaxtulh latamanin xalak Queilá.
6 Pero akxni Abiatar xkgawasa Ahimélec alh kQueilá xlakata lakxtum natala David, xlin maktum efod.* 7 Alistalh makatsinika Saúl: «David wi kQueilá». Chu Saúl wa: «Dios kimakamaxkinit,* xlakata xla tanunit kʼakgtum kachikin niku anan malakcha chu likgextukun, chu la uku nila tsala». 8 Wa xlakata Saúl kamamakxtumilh putum ksoldados xlakata naʼankgo talatlawanankgo, xlakata xʼankgolh kQueilá chu xmakgstiliwilikgolh David chu lakchixkuwin tiku kstalanikgo. 9 Akxni David katsilh tuku Saúl xtlawaniputun, wanilh sacerdote Abiatar: «Unu kalita efod».* 10 Chu David wa: «Jehová, xDios Israel, kkgaxmatnit pi Saúl mimputun kQueilá chu masputuputun kachikin kaj kimpalakata. 11 ¿Nakimakamastakgo xpulalinanin* kachikin Queilá? ¿Xlikana natakta Saúl chuna la kgaxmatnit uma miskujni? Jehová, xDios Israel, kawani miskujni, katlawa litlan». Jehová kgalhtilh: «Chuna, natakta». 12 Chu David kgalhskilh: «¿Nakinkamakamastakgoyan xpulalinanin kachikin Queilá kxmakan Saúl, akit chu putum kisoldados?». Jehová kgalhtilh: «Chuna, nakamakamastakgoyan».
13 Alistalh David chu putum ksoldados tunkun taxtukgolh kQueilá, max akgchaxan ciento, chu lakatum lakatum xʼankgo. Akxni Saúl katsilh pi David xtsalataxtunit kQueilá, lakkaxwililh nialh naputsastalani. 14 David tatsekgli niku lu tuwa xchankan kxakaskakni tiyat, kxkasipijni kxakaskakni xtiyat Zif. Saúl chuntiya putsalh, pero Jehová ni makamaxkilh. 15 Akxni David xwi kxakaskakni xtiyat Zif, anta kʼHores, xkatsi pi* Saúl xtaxtunit xlakata xmakgniputun.
16 Jonatán xkgawasa Saúl alh kʼHores xlakata na’akxilha David chu makgtayalh tlakg xlipawa Jehová. 17 Wanilh: «Ni kapekuanti, xlakata kintlat Saúl ni katitekgsni. Wix mapakgsina nalitaxtuya kʼIsrael, chu akit nakmakgtayayan. Chu kintlat Saúl liwana katsi uma». 18 Alistalh xchatiykan tlawakgolh akgtum talakkaxlan kxlakatin Jehová. Jonatán alh kxchik chu David tamakgxtakgli kʼHores.
19 Titaxtulh kilhtamaku, lakchixkuwin xalak Zif talakakxtukgolh kʼGuibeá, niku xwi Saúl, chu wanikgolh: «David tatsekgnit lakatsu niku kwilaw, niku lu tuwa chankan kʼHores, aktsu sipi nema wi kʼHakilá, nema wi ksur* Jesimón.* 20 Mapakgsina, akxni nalakaskina katakta. Akinin nakkamakamaxkiyaw mapakgsina». 21 Saúl kakgalhtilh: «Jehová kakasikulunatlawan, xlakata kilakgalhamanitantit. 22 Katlawatit litlan, kapitit chu kaputsatit niku tatsekgnit chu tiku akxilhli anta, xlakata kiwanikanit pi lu katsini akgskgawinan. 23 Liwana kaputsatit niku tatsekga chu wi tuku kakilaliminiw xlakata nakkatsi pi anta wi. Alistalh nakkataʼanan chu komo anta kkachikin wi, nakputsa kxliputum xfamilias* Judá».
24 Wa xlakata xlakan pulanikgolh Saúl chu ankgolh kZif. Pero David chu ksoldados xwilakgolh kxakaskakni xtiyat Maón, anta kʼArabá, ksur Jesimón. 25 Alistalh Saúl chu ksoldados chinkgolh xlakata naputsakgo. Akxni David katsilh taktalh klanka chiwix chu tamakgxtakgli kxakaskakni xtiyat Maón. Akxni Saúl katsilh, tsukulh putsastalani asta kxakaskakni xtiyat Maón. 26 David xkatawi ksoldados kxpaxtun sipi akxni Saúl chalh kxaʼalakgaputu. David lakapala tsalalh, pero Saúl chu ksoldados atsinu ni xkamataxtukkgo xlakata nakachipakgo. 27 Pero milh chatum makatsinina chu wanilh Saúl: «¡Kalakapala! ¡Militaspitat! ¡Filisteos talachipamakgolh kachikin!». 28 Xlakata uma, Saúl nialh putsastalanilh David chu alh katalatlawa filisteos. Wa xlakata niku Saúl chu David tapapitsikgolh limapakuwika Lanka chiwix xla Tapapitsit.
29 Alistalh David takxtucha anta chu tatsekgli niku tuwa xchankan kʼEn-guedí.