Xlimaktiy Samuel
16 Akxni David xtaktamacha kxʼakgspun* sipi, anta xkgalhkgalhima Zibá, kskujni Mefibóset, xkamakaxnit tantiy burros chu xkamakukinit akgtiy ciento kaxtalanchu, akgtum ciento xatalakchitani pasas nema xmaskakakanit, akgtum ciento xatalakchitani tawakat nema xmakgalakan akxni klhkaknan* chu akgtum lanka xalu niku xtajuma vino. 2 Mapakgsina kgalhskilh Zibá: «¿Tuku xlakata kalita uma?». Zibá kgalhtinalh: «Umakgolh burros kkalimilh xlakata nakgetawilakgo putum tiku xalak xchik mapakgsina, kaxtalanchu chu tawakat nema makgalakan akxni lhkaknan tlan nawakgo putum lakchixkuwin, chu vino tlan nawakgo tiku natlakgwankgo kxakaskakni tiyat». 3 Alistalh mapakgsina kgalhskilh: «¿Chu niku wi xtanat* mimalana?». Zibá kgalhtilh mapakgsina: «Tamakgxtakgcha kJerusalén, xlakata wa: “La uku xchik Israel nakimaspitni xtamapakgsin kintata”».* 4 Mapakgsina wanilh Zibá: «Kakgaxpatti, putum tuku Mefibóset kgalhi, mila». Chu Zibá wanilh: «Ankgalhin kakmakgapaxuwan, malana tiku kgalhiya lhuwa kakni».
5 Akxni mapakgsina David chalh kBahurim, taxtucha chatum chixku tiku xalak xfamilia Saúl, tiku xwanikan Simeí, xkgawasa Guerá, lakgalh chu pixlanka xwanitilha laklixkajni tachuwin. 6 Xkalakgmakama chiwix David chu putum xlakskujnin, chu nachuna amakgapitsin, asta xalakgtliwakga ksoldados mapakgsina David, tiku xʼamakgo kxpakgastakat chu kxpakgxwiki.* 7 Simeí lu lixkajni tuku xwani: «¡Kataxtu, alakatanu kapit! ¡Makgnina, tiku nitu litaxtuya! 8 Jehová limalakgaxokgeman putum kgalhni nema stajmakganti kxchik Saúl, tiku makglhti tamapakgsin. Wa xlakata Jehová wilinit tamapakgsin kxmakan minkgawasa Absalón. ¡La uku akgspulaman tuku lu nitlan xlakata wix chatum makgnina!».
9 Alistalh Abisái xkgawasa Zeruyá wanilh mapakgsina: «¿Tuku xlakata uma xanin chichi nawani laklixkajni tachuwin kimalana tiku kgalhi lhuwa kakni? Katlawa litlan, kakimaxki talakaskin nakan chu nakpixkakti». 10 Pero mapakgsina kgalhtilh: «¿Tuku xlakata makgtanuyatit, xlakgkgawasan Zeruyá? Kamaxkitit talakaskin kakiwanilh laklixkajni tachuwin, xlakata wa Jehová tiku wanilh: “¡Kawani David laklixkajni tachuwin!”. ¿Tuku xlakata wi tiku nawani pi nichuna katlawalh?». 11 Alistalh David wanilh Abisái chu putum xlakskujnin: «Kaʼakxilhtit, kinkgawasa, tiku lin kinkgalhni, kimakgniputun, ¡tlakg liwaka chatum benjaminita! ¡Nitu kawanitit! ¡Kamaxkitit talakaskin kakiwanilh laklixkajni tachuwin, xlakata wa Jehová tiku wanilh pi chuna xtlawalh! 12 Max Jehová naʼakxilha chuna la kpatinama chu Jehová nakimaxki tasikulunalin chu ni nakiʼakgspula tuku lixkajni kiwanimaka la uku». 13 Akxni wankgolh uma, David chu ksoldados chuntiya ankgolh kxtijikan chu Simeí xkapaxtutlawama ksipi, xwanima laklixkajni tachuwin chu xlakgmakama chiwix chu lhuwa pokgxni.
14 Alistalh, mapakgsina chu putum latamanin tiku akxtum xtaʼankgo chankgolh niku xʼamakgolh. Lu xtlakgwankgonit, wa xlakata tachokgokgolh xlakata najaxkgo.
15 Pero Absalón chalh kJerusalén chu putum lakchixkuwin xalak Israel. Chu Ahitofel na xtaʼan. 16 Akxni Husái tiku arkita xwanit, xʼamigo* David, tanulh niku xwi Absalón, tsukulh wani: «¡Katasikulunatlawalh mapakgsina! ¡Katasikulunatlawalh mapakgsina!». 17 Akxni Absalón kgaxmatli uma kgalhskilh Husái: «¿Chuna limasiyaniya miʼamigo tapaxkit nema ni makgxtakgnan? ¿Tuku xlakata ni tapi miʼamigo?». 18 Husái kgalhtilh Absalón: «Ni. Akit ktataya tiku Jehová laksaknit chu tiku laksakkgonit umakgolh lakchixkuwin chu putum amakgapitsin lakchixkuwin xalak Israel. Chu wa naktatamakgxtakga. 19 Amakgtum kwaniparayan, ¿tiku nakskujnani? ¿Ni wa nakskujnani xkgawasa kiʼamigo? Chuna la kskujnanilh mintlat, nachuna nakskujnaniyan».
20 Alistalh Absalón wanilh Ahitofel: «Kakimaxki tastakyaw, ¿tuku natlawayaw?». 21 Ahitofel kgalhtilh Absalón: «Kakatatalakgxtupi xlakpuskatin mintlat, tiku kamakgxtakgli xlakata nakuentajtlawakgo chiki. Chuna putum Israel nakatsi pi mintlat lu sitsiniyan, chu tiku tatayakgoyan natatliwakglhkgo». 22 Wa xlakata kxʼakgstin chiki tlawanika Absalón akgtum chiki xaxuwa chu xla katatalakgxtumilh xlakpuskatin xtlat kxlakatinkan israelitas.
23 Amacha kilhtamaku, xtastakyaw Ahitofel xliʼakxilhkan xtachuna xtachuwin* xaxlikana Dios. Chuna xliʼakxilhkgo xtastakyaw Ahitofel, David chu Absalón.