Xlimaktiy Samuel
17 Alistalh Ahitofel wanilh Absalón: «Katlawa litlan, kakimaxki talakaskin nakkalaksaka akgkutiy mil soldados chu nakputsastalani David uma katsisni. 2 Kaj xalan naklipataxtuyacha akxni tlakgwanit chu taxlajwaninit,* chu naktlawa pi lu napekuan. Alistalh putum latamanin tiku tawilakgolh natsalakgo, chu kajwatiya nakmakgni mapakgsina. 3 Alistalh nakkaliminiparayan putum latamanin. Komo chixku tiku putsapat nani, putum latamanin tlan nataspitkgo chu putum kachikin nakgalhi takaksni». 4 Tuku wa Ahitofel lu tlan akxilhkgolh Absalón chu putum lakgkgolotsin xalak Israel.
5 Chu Absalón wa: «Katlawatit litlan na katasanitit Husái tiku arkita litaxtu chu kakgaxmatwi tuku xla nawan». 6 Wa xlakata Husái lakgalh Absalón, chu Absalón wanilh: «Wa uma tuku kinkalistakyawan Ahitofel. ¿Tlan nakstalaniyaw xtastakyaw? Komo nichuna, wix kakilawaniw tuku naktlawayaw». 7 Husái wanilh Absalón: «La uku, xtastakyaw Ahitofel nitlan».
8 Husái chuntiya wanilh: «Wix katsiya pi mintlat chu ksoldados lu lakgtliwakgan. Chu xlakan lu sitsimakgo, chuna la tantum osa tiku kamakgatsankganit xlakgskgatan kkakiwin. Nachuna, mintlat chatum soldado chu ni akxtum nakatalhtata latamanin tiku kataʼan. 9 La uku tatsekgnit kʼakgtum lhuku* o alakatanu. Chu komo xla pulana nakinkatalachipayan, tiku nakgaxmatkgo uma tamakatsinin nawankgo: “¡Tiku tatayakgo Absalón kamakgatlajaka!”. 10 Asta chixku tiku ni pekuan, chu tiku kgalhi xnaku chuna la xnaku tantum león, lu napekuan. Xlakata putum Israel katsi pi mintlat lu tliwakga chu pi ksoldados ni pekuankgo. 11 Wa uma kintastakyaw: kakamamakxtupi lakchixkuwin xalak Israel, lata kDan asta kBeer-Seba, chuna la xlilhuwa muntsaya nema wi kxkilhtun pupunu, chu wix nakapulalipina ktatalachipat. 12 Natalachipayaw kaniwa niku natawila, nakalakgchanaw chuna la monkganat takta kxkgalhni katiyatni. Nipara chatum katilakgtaxtulh, nipara xla chu nipara ksoldados. 13 Chu komo natatsekga kʼakgtum kachikin, putum Israel nalinkgo tasiw, chu naxwatalinaw kachikin asta niku kxakaxtum asta akxni ni natamakgxtakga nipara akgtum aktsu chiwix».
14 Alistalh Absalón chu putum lakchixkuwin xalak Israel wankgolh: «¡Xtastakyaw Husái tiku arkita tlakg tlan nixawa xla Ahitofel!». Xlakata Jehová xlakkaxwilinit* nalaktlawa xatlan xtastakyaw Ahitofel. Chuna Jehová xʼama tlawa pi Absalón nitlan xkitaxtunilh.
15 Alistalh, Husái kawanilh sacerdotes Sadoc chu Abiatar: «Wa uma tuku Ahitofel kalistakyawalh Absalón chu lakgkgolotsin xalak Israel. Pero wa uma tuku akit kkalistakyawalh. 16 Chu, la uku, lakapala kamalakgachipinitit David uma tamakatsinin: “Ni katamakgxtakgti uma katsisni niku patakutkan kgalhtuchokgo Jordán xlakata nachankan kxakaskakni tiyat. Kapatakuttit kgalhtuchokgo. Komo nichuna natlawayatit, mapakgsina chu putum latamanin tiku makgtayakgo nakamasputukgoyan”».*
17 Jonatán chu Ahimáaz xtamakgxtakgmakgo anta kʼEn-Roguel. Xlakata ni xlakaskinkgo xkaʼakxilhka pi xtanumakgolh kkachikin, chatum skitiwina alh chu kamaxkilh uma tamakatsin, chu xlakan ankgolh makatsinikgo mapakgsina David. 18 Pero chatum kgawasa kaʼakxilhli chu wanilh Absalón. Wa xlakata xchatiykan lakapala ankgolh chu chankgolh kBahurim, kxchik chatum chixku tiku xkgalhi akgtum pozo kxkilhtin. Anta tatsekgkgolh, 19 chu xpuskat uma chixku likgalhtlapalh pozo maktum lhakgat chu kgalhmawakalh xatapakglhni* talhtsi. Niti kaʼakxilhli. 20 Xlakskujnin Absalón chankgolh kxchik puskat chu kgalhskininankgolh: «¿Niku wilakgolh Ahimáaz chu Jonatán?». Puskat kgalhtinalh: «Ankgolh niku wi chuchut». Soldados kaputsakgolh pero ni katekgskgolh, wa xlakata taspitkgolh kJerusalén.
21 Akxni ankgolh lakchixkuwin, xlakan takutkgolh kpozo chu ankgolh wanikgo mapakgsina David: «Wa uma tuku Ahitofel listakyawanalh pi xkatlawanikantit. Wa xlakata lakapala kapatakuttit kgalhtuchokgo». 22 David chu putum latamanin tiku xtaʼankgonit, lakapala ankgolh chu patakutkgolh kgalhtuchokgo Jordán. Akxni xkgakgalh putum xpatakutkgonit kgalhtuchokgo Jordán.
23 Akxni Ahitofel akxilhli pi ni xtlawakanit tuku xlistakyawananit, kgetlapalh xburro chu alh kxchik, kxkachikin. Akxni xkamaxkinita tastakyaw tiku xalak xchik, tapixchitawakalh chu chuna nilh. Maknuka* niku xkamaknukanit xalakgmakgan xnatlatni.
24 Chu David alh kMahanaim, chu Absalón patakutli kgalhtuchokgo Jordán, xkataʼan lakchixkuwin xalak Israel. 25 Absalón xpuxkukan soldados limaxtulh Amasá xlakgxokgo Joab. Amasá xkgawasa xwanit chatum chixku tiku xwanikan Itrá tiku israelita xwanit, tiku tatalakgxtumilh Abigaíl, xtsumat Nahás, xtala Zeruyá, xtse Joab. 26 Absalón chu putum soldados xalak Israel tamakgxtakgkgolh kxtiyat Galaad.
27 David chalh kMahanaim, chu Sobí xkgawasa Nahás, xalak Rabá, tiku ammonita xwanit, chu Makir xkgawasa Amiel, xalak Lo-Debar, chu Barzilái tiku galaadita xwanit, xalak Roguelim, tunkun 28 liminkgolh putama, pulatu, tlamank, trigo, cebada, harina, xatachuchu talhtsi, awax,* lentejas, atanu liwat nema xchuchukanit, 29 ksakgsi cera,* mantequilla, borregos chu queso. Putum uma liminikgolh David chu latamanin tiku xtawilakgo xlakata xwayankgolh, xlakata xwankgo: «Umakgolh latamanin tiku wilakgo kxakaskakni tiyat tsinksmakgo chu kgalhputimakgo, chu tlakgwankgonit».