Xlimaktiy Samuel
23 Wa umakgolh xaʼawatiya xtachuwin David:
«Xtachuwin David xkgawasa Jesé,
xtachuwin chixku tiku malankika,
xtalaksakni xDios Jacob
chu xkilhtlina xtakilhtlin Israel tiku lu paxkikan.
2 Xʼespíritu Jehová kimpulalilh xlakata nakchuwinan;
xtachuwin xwilakgolh kkisimakgat.
3 Dios xalak Israel chuwinalh,
Dios xalak Israel tiku la akgtum lanka chiwix nema litatsekgkan kiwanilh:
“Akxni tiku kamapakgsi latamanin xaʼakgstitum
chu akxni mapakgsinama limasiya pi pekuani Dios,
4 uma litaxtu chuna la xkgakganat xala tsisa akxni makaxkgakgenan chichini,
xtachuna la akxni xkgakga chu ni anan puklhni.
Xtachuna la xkgakganat akxni aku senankgonit,
nema tlawa pi napulha tuwan kkatiyatni”.
5 ¿Nichuna akxilha Dios kifamilia?
Xlakata xla kintatlawanit akgtum talakkaxlan nema putum kilhtamaku namakgapala,
liwana wanit la nakgantaxtu chu la nala,
uma talakkaxlan kilhchanima kilakgtaxtut chu kintapaxuwan,
¿ni wa xlakata tlawa pi tlan kakitaxtunilh kifamilia?
6 Pero latamanin tiku lixkajni likatsikgo kalakgmakgankan xtachuna la laktsu kiwi
nema kgalhikgo lhtukun, nema nila kaxamakan.
7 Xlakata chatum chixku nakaxama,
xlikgalhit akgtum liskujni xalikan chu xkiwi kgantum lanza,
chu putum xlilhkuyuwilit anta niku wilakgolh».
8 Wa umakgolh xtukuwanikan xalakgtliwakga ksoldados David: Joseb-Basébet, chatum tahkemonita, xpuxkukan kgalhtutu lakgtliwakga soldados. Akgtum kilhtamaku kalimakgnilh xlanza akgtsayan ciento lakchixkuwin. 9 Tiku kstalani wa Eleazar, xkgawasa Dodó, xkgawasa Ahohí. Xla na xmakgtapakgsi xlikgalhtutu lakgtliwakga soldados tiku akxtum xtawilakgolh David akxni katalatlawakgolh filisteos. Filisteos xtamakxtumikgonita anta xlakata xtalatlawanankgolh chu akxni lakchixkuwin xalak Israel tamakgatlikgolh, 10 xla kaks tayalh chu kamakgnilh filisteos asta akxni pakgatlakgwalh pero chuntiya xchipanit xʼespada. Ama kilhtamaku Jehová tlawalh pi xtlajanankgolh;* chu soldados kstalanitilhakgo xlakata nakamakglhtikgo tuku lhuwa xtapalh tiku xnikgonita.
11 Tiku kstalani wa Samá* xkgawasa Agué tiku hararita xwanit. Akxni filisteos tamakxtumikgolh kLehí, niku xwi akgtum pukuxtu niku xchankanit lentejas, soldados katsalanikgolh filisteos. 12 Pero xla kaks tayalh kxlakʼitat pukuxtu, ni mastalh talakaskin pi xʼakgchipaka chu kamakgnilh filisteos, chu chuna Jehová tlajanalh.*
13 Xwilakgolh puxamakaw napuxkun chu kgalhtutu taktakgolh akxni xmakgalananamaka, ankgolh akxilhkgo David klhuku nema xwi kʼAdulam. Akgtum grupo xla filisteos xtamakgxtakgmakgolh kxakaxtum Refaím. 14 David xwi kputatsekgni chu akgtum grupo xla soldados filisteos xwilakgolh kBelén. 15 Alistalh David wa: «¡Tlan xwa komo xakwalh tsinu chuchut xalak pozo nema wi lakatsu kxmalakcha Belén!». 16 Akxni kgaxmatkgolh uma, kgalhtutu tlakg xalakgtliwakga soldados xafuerza tanukgolh niku xtamakgxtakgmakgolh filisteos, makutukgolh chuchut kpozo nema wi lakatsu kxmalakcha Belén chu linikgolh David. Pero xla ni likgotnamputulh chu xtakgamakganilh Jehová. 17 Wa: «¡Jehová, akit nikxni xaktlawalh uma! ¿La naklikgotnan akit xkgalhnikan umakgolh lakchixkuwin tiku kilakgolh chu katuwa wilikgolh xlatamatkan?». Wa xlakata ni likgotnamputulh. Wa uma tuku tlawakgolh kgalhtutu xalakgtliwakga ksoldados.
18 Abisái xtala Joab, xkgawasa Zeruyá, kgalhtutu tiku puxku xkalitaxtuni. Xla kalimakgnilh xlanza akgtutu ciento lakchixkuwin, chu na lu lakgapaska chuna la kgalhtutu xalakgtliwakga ksoldados David. 19 Maski xla lu xlakgapaskan chu puxku xkalitaxtuni akgalhtutu, nikxni kamakgalakgchalh xapulana kgalhtutu xalakgtliwakga soldados.
20 Benaya xkgawasa Jehoiadá xwanit chatum chixku tiku ni xpekuan* chu tlawalh lhuwa tuku kaks malakawaninan kCabzeel. Kamakgnilh chatiy xlakgkgawasan Ariel xalak Moab, chu akgtum kilhtamaku akxni xtaktama miki, kitajulh niku xakapulhman chu makgnilh tantum león. 21 Nachuna makgnilh chatum egipcio tiku lu lanka xwanit. Xla kaj kgantum kiwi xlin, pero egipcio xchipanit kgantum lanza. Maski chuna, talachipalh egipcio, makglhtilh xlanza chu wa limakgnilh. 22 Wa uma tuku tlawalh Benaya xkgawasa Jehoiadá, chu na lu lakgapaska chuna la kgalhtutu xalakgtliwakga soldados. 23 Pero maski xla lu xlakgapaskan nixawa puxamakaw, ni kamakgalakgchalh kgalhtutu tlakg xalakgtliwakga soldados. Pero David xapuxku xkuentajtlawana limaxtulh.
24 Asahel, xtala Joab, xmakgtanuma kpuxamakaw soldados, nachuna Elhanán xkgawasa Dodó xalak Belén, 25 Samá tiku xalak Harod xwanit, Elicá tiku xalak Harod xwanit, 26 Hélez tiku paltita xwanit, Irá xkgawasa Iqués tiku xalak Tecoa xwanit, 27 Abí-Ézer tiku xalak Anatot xwanit, Mebunái tiku xalak Husá xwanit, 28 Zalmón tiku ahohíta xwanit, Maharái tiku xalak Netofá xwanit, 29 Héleb xkgawasa Baaná tiku xalak Netofá xwanit, Ittái xkgawasa Ribái tiku xalak Guibeá* xla Benjamín xwanit, 30 Benaya, chatum piratonita, Hidái xalak xakaxtum Gaas, 31 Abí-Albón tiku xalak Arbá xwanit, Azmávet tiku xalak Bahurim xwanit, 32 Eliahbá tiku saalbonita xwanit, xlakgkgawasan Jasén, Jonatán, 33 Samá tiku hararita xwanit, Ahiam xkgawasa Sarar tiku hararita xwanit, 34 Elifélet, xkgawasa Ahasbái, xkgawasa maacatita, Eliam xkgawasa Ahitofel tiku xalak Guiló xwanit, 35 Hezró tiku xalak Carmelo xwanit, Paarái tiku xalak Arab xwanit, 36 Igal xkgawasa Natán tiku xalak Zobá xwanit, Baní tiku xalak Gad xwanit, 37 Zélec tiku xalak Ammón xwanit, Naharái tiku xalak Beerot xwanit, tiku xlin xʼescudo Joab xkgawasa Zeruyá, 38 Irá tiku itrita xwanit, Gareb tiku itrita xwanit 39 chu Urías tiku hitita xwanit; xlitakgatsikgo puxamakutujun.