Xlimaktiy Samuel
24 Amakgtum Jehová kasitsinipa israelitas akxni wi tiku tlawalh pi David xkatlawanilh tuku nitlan. Wanilh: «Katlawa pi kakaputlekgeka putum tiku wilakgolh kʼIsrael chu kJudá». 2 Wa xlakata mapakgsina wanilh Joab, xpuxkukan soldados, tiku anta xtalama: «Katlawa litlan kapit kxlakgstipan putum tribus xalak Israel lata kDan asta kBeer-Seba, chu kaputlekge putum kachikin, xlakata nakkatsi la xlilhuwa latamanin wilakgolh». 3 Pero Joab wanilh mapakgsina: «Jehová miDios akgtum ciento kamalhuwilh kachikin chu kimalana tiku kgalhi lhuwa kakni kaʼakxilhli, pero ¿tuku xlakata tlawaputuna uma kimalana tiku kgalhiya lhuwa kakni?».
4 Pero xtachuwin mapakgsina tlakg tliwakga litaxtulh nixawa xla Joab chu xnapuxkun soldados. Wa xlakata Joab chu xnapuxkun soldados taxtukgolh kxlakatin mapakgsina xlakata xkaputlekgekgolh tiku xwilakgolh kʼIsrael. 5 Patakutkgolh Jordán chu tsinu tawilakgolh kʼAroer, kxpakgastakat* kachikin nema wi kxlakʼitat kxakaxtum, chu ankgolh anta niku lakankan xtiyatkan gaditas chu alistalh kJazer. 6 Alistalh ankgolh kʼGalaad chu kxtiyat Tahtim-Hodsí, chuntiya ankgolh asta kDan-Jaán chu talakgspitkgolh xlakata xʼankgolh kSidón. 7 Alistalh ankgolh kkachikin nema kgalhi patsaps xalak Tiro chu putum xkachikinkan heveos chu xkachikinkan cananeos, chu xaʼawatiya masputukgolh kNégueb xalak Judá, kBeer-Seba. 8 Chuna lakgatsalakgolh putum país chu taspitkgolh kJerusalén akxni xtitaxtunit akgnajatsa papaʼ chu akgpuxam kilhtamaku. 9 Chu Joab wanilh mapakgsina la xlilhuwa xwankgonit kkachikin. Israel xkgalhi 800,000 soldados tiku xkgalhikgo xʼespadajkan chu Judá xkgalhi 500,000 soldados.
10 Pero, akxni xkaputlekgekgonita tiku xalak kkachikin, xnaku* David mamakgkatsinilh pi xtlawanit tuku lu nitlan, chu wanilh Jehová: «Xlakata ktlawanit uma, lu klakgalhinanit. La uku katlawa litlan Jehová, katapati tuku nitlan tlawalh miskujni xlakata lu xatonto klitaxtunit». 11 Akxni David lu tsisa takilh, palakachuwina Gad, chixku tiku xmalakawanikan tiku xmakgtaya David, makgamakglhtinalh uma xtamakatsin* Jehová: 12 «Kapit chu kawani David: “Wa uma tuku wan Jehová: «Anan pulaktutu tuku tlan naktlawaniyan. Wix kalaksakti nema nalakaskina»”». 13 Wa xlakata Gad alh kxlakatin David chu wanilh: «¿Tuku nalaksaka? ¿Akgtujun kata kaʼanalh tatsinksni kpaís? ¿Akgtutu papaʼ kaputsastalanikgon mintalamakgasitsin chu wix natsalaya? ¿O akgtutu kilhtamaku kaʼanalh lixkajni tajatat kpaís? La uku liwana kalilakapastakti chu kakiwani tuku nakkgalhti tiku kimakamincha». 14 David kgalhtilh Gad: «Lu tuwa kmakgkatsi uma. Tlakg tlan xwa pi wa Jehová xkinkatlawanin tuku nitlan, xlakata xla lhuwa talakgalhaman limasiya. Pero ni klakaskin pi chatum lataman nakintlawani tuku nitlan».
15 Wa xlakata Jehová malakgachalh akgtum lixkajni tajatat kʼIsrael, nema makgapalalh lata tsisa asta kkilhtamaku nema xlaklhkawilikanit, chu nikgolh 70,000 latamanin lata kDan asta kBeer-Seba. 16 Akxni ángel tapakgastonkgli xlakata xmalakgsputulh Jerusalén, Jehová nitlan makgkatsilh xlakata tuku nitlan xlama, chu wanilh ángel tiku xkamalakgsputuma israelitas: «¡Katachokgo! Kamakti mimakan». Xʼángel Jehová lakatsu xwi niku xlakpajnan Arauna tiku jebuseo xwanit.
17 Pero akxni David akxilhli ángel tiku xkatlawanima tuku nitlan israelitas, wanilh Jehová: «Akit klakgalhinanit, akit tiku ktlawalh tuku nitlan, pero uma kachikin,* ¿tuku tlawanit? Katlawa litlan, akit kakimalakgaxokge, chu nachuna xchik kintlat».
18 Wa xlakata ama kilhtamaku Gad lakgalh David chu wanilh: «Katakxtu* chu katlawani akgtum pumakamastan Jehová anta niku lakpajnan Arauna tiku jebuseo litaxtu». 19 Chu David alh chuna la wanilh Gad chu chuna la limapakgsilh Jehová. 20 Akxni Arauna lakalh pakgalhu chu akxilhli pi xtakxtumachi mapakgsina chu xlakskujnin, tunkun taxtulh chu lakgtakilhputalh mapakgsina kkatutsu. 21 Arauna kgalhskilh: «¿Tuku xlakata kimalana tiku kgalhi lhuwa kakni minit akxilha kskujni?». David kgalhtilh: «Kminit makgtamawayan niku lakpajnana xlakata naktlawani akgtum pumakamastan Jehová chu chuna natachokgo tuku nitlan akgspulama kachikin». 22 Pero Arauna wanilh David: «Kimalana tiku kgalhiya lhuwa kakni katapakgsinin chu kamakamasta anta tuku nalakaskina.* Unu wilakgolh toros xlakata xalhkun namakamastaya, kiwi nema lilakgchitakan talhtsi chu mukiwi xlakata nalimalhkuyuya. 23 Mapakgsina, kmaxkiyan* putum uma». Chu Arauna na wanipa: «Jehová miDios kasikulunatlawan».
24 Pero mapakgsina kgalhtilh Arauna: «Ni, xlilat nakxokgoniyan. Ni ktimakamaxkilh Jehová kiDios xalhkun tamakamastan nema nitu kxokgonit». Wa xlakata David makgtamawalh xtoros chu niku xlakpajnan chu lixokgonilh itat kilo* plata. 25 Chu David anta tlawanilh Jehová akgtum pumakamastan, chu makamaxkilh xalhkun tamakamastan chu tamakamastan xla takaksni. Alistalh Jehová kgaxmatnilh tuku xtasaskima xpalakata kachikin chu tachokgolh tuku nitlan xʼakgspulama Israel.