Jonás

1 Jehová wanilh Jonás* xkgawasa Amitái umakgolh tachuwin: 2 «Kapit klanka kachikin Nínive chu kakawani latamanin pi nakkamalakgaxokge xlakata kakxilhnit tuku nitlan tlawamakgolh».

3 Pero Jonás ni kgalhakgaxmatli Jehová chu lakpuwa naʼan kTarsis; alh kJope chu anta tekgsli akgtum barco nema xʼama kTarsis. Wa xlakata xokgolh xpasaje chu tawakalh kbarco xlakata akxtum xkataʼalh kTarsis tiku anta xʼankgo; chuna tsalanilh Jehová.

4 Wa xlakata, Jehová tlawalh pi tliwakga xʼunalh kpupunu, chu tsukulh akgtum tliwakga unisen nema atsinu ni laktukxmilh barco. 5 Tiku kskujkgo kbarco lu xpekuamakgo* chu asta xchatunukan tsukukgolh skinikgo tamakgtay xdioskan. Chu tsukukgolh makankgo kpupunu tuku xlinkgo kbarco xlakata chuna ni lu tsinka xwa. Pero Jonás xtanunit kxpulakni barco chu anta aklhtatatamalh. 6 Tiku xpulalin barco talakatsuwinilh chu wanilh: «¿Tuku xlakata lhtatapat? ¡Kataki, chu kakilhpini midios! Max xaxlikana Dios nakinkalilakgaputsayan chu ni katiniw».

7 Chu tsukukgolh lawanikgo xchatunukan: «Kalimakaw suerte xlakata nakatsiyaw tiku xkuenta tuku lama». Chu taxtucha pi wa Jonás xlin kuenta. 8 Wanikgolh: «Katlawa litlan, kakilawaniw, ¿tiku xkuenta xlakata tuku nitlan titaxtumaw? ¿Tuku liskuja? ¿Niku xala wix, niku minkachikin chu tukuya familia tapakgsiya?».

9 Xla kgalhtinalh: «Akit hebreo chu kkakninani Jehová, Dios xalak akgapun, tiku tlawalh pupunu chu katiyatni».

10 Akxni kgaxmatkgolh uma, lakchixkuwin tlakg pekuankgolh chu kgalhskinkgolh: «¿Tuku tlawanita?». (Lakchixkuwin xkatsikgo pi xtsalanima Jehová, xlakata Jonás xkalitachuwinanit). 11 Chu wanikgolh Jonás: «¿Tuku nakkatlawaniyan xlakata pupunu natakaksa?». Xlakata pupunu tlakg lipekua xtakgayawama. 12 Xla kakgalhtilh: «Kakinchaxtit chu kakimakapitit kpupunu, chuna tlan natakaksa; xlakata kkatsi pi uma tliwakga unisen tsukulh kimpalakata». 13 Pero lakchixkuwin xliputum xlitliwakgakan xlimputunkgo barco kxkilhtun pupunu; pero nila chuna tlawakgolh, xlakata pupunu tlakg lipekua xtakgayawama.

14 Chu tsukukgolh tasaskinikgo Jehová: «¡Ay, Jehová, katlawa litlan, ni kamasta talakaskin nakniyaw xpalakata uma chixku! Oh, Jehová, uma chuna lama xlakata mintalakaskin, wa xlakata ni kakilalimawakaw kuenta komo nani uma chixku». 15 Alistalh chaxkgolh Jonás chu makankgolh kpupunu; chu pupunu takaksli. 16 Akxni lakchixkuwin akxilhkgolh uma, limasiyanikgolh kakni Jehová, tlawanikgolh tamakamastan chu tsukukgolh tlawanikgo tamalaknun Jehová.

17 Chu Jehová malakgachalh tantum lanka skiti* xlakata xkgotwalh Jonás, chu Jonás tawi kxpulakni skiti akgtutu kilhtamaku chu akgtutu tsisni.