Jesús katamakxtu lhuwa demonios

Akxni tamakgalhtawakgen titaxtukgo tuku nitlan kpupunu, chankgo kxakilhtutu, niku akxilhkgo atanu tuku kamakgapekuan. Chatiy lu xalakluku lakchixkuwin tiku kgalhikgo demonio taxtukgoyacha kputaknun nema lakatsu wi chu lakapala lakgankgo Jesús. Marcos chu Lucas kaj chatum tiku lichuwinankgo. ¿Tuku xlakata? Max xlakata wa tiku tlakg luku chu tlakg makgasata laktanumakgo demonios.

Uma chixku nitu lhakgananit. Tantaku chu tantaskaka “pixlanka katasa kputaknun chu kkasipijni chu xʼakstu limakchukukan chiwix” (Marcos 5:5). Lu luku, wa xlakata latamanin ni titaxtuputunkgo ktiji niku xla lama. Makgapitsi latamanin lichiwilikgonit cadenas, pero xla putum kilhtamaku lakpucha. Niti kgalhi litliwakga xlakata nachipa.

Chixku talakatsuwini Jesús chu lakgtakilhputa. Demonios nema laktanukgonit tlawakgo pi pixlanka nawan: «¿Tuku lakgtanita unu, Jesús, xKgawasa Dios Tiku xala talhman? Kawanti kxtukuwani Dios pi ni kintimapatini». Alistalh Jesús masiya pi tlan kamapakgsi xalaklixkajni espíritus akxni kawani: «Demonio, kalaktaxtu uma chixku» (Marcos 5:7, 8).

Uma chixku lhuwa demonios laktanumakgo. Wa xlakata, akxni Jesús kgalhskin xtukuwani, xla wan: «Kintukuwani Legión, xlakata kinchalhuwakan» (Marcos 5:9). Akgtum legión xla soldados romanos litakgatsi lhuwa mil soldados, wa xlakata, xtukuwani masiya pi lhuwa demonios laktanuma. Uma xalixkajni espíritus, tiku lakgatikgo makgapatikgo chixku, tasaskinikgo Jesús pi ni kakamalakgachalh «kkapulhman». Tasiya pi katsikgo tuku nakaʼakgspula xlakan chu tiku kapulalin, Satanás (Lucas 8:31).

Ni lu makgat wilakgolh max 2,000 paxni, animales nema Limapakgsin wan pi xataxkajwani chu nema judíos ni xlikgalhitkan. Wa xlakata demonios skinikgo Jesús: «Kakilamalakgachaw niku lamakgolh lhuwa paxni, xlakata nakkalaktanuyaw» (Marcos 5:12). Xlakata Jesús kamaxki talakaskin, taxtunikgo chixku chu laktanukgo paxni. Ama kilhtamaku, 2,000 paxni lakapala tamokgoskgo ktalhpan chu muxtukgo kpupunu.

Akxni tiku kuentajtlawakgo paxni akxilhkgo uma, lakapala ankgo chu kawanikgo latamanin tiku wilakgo kkachikin chu tiku wilakgo kkakiwin tuku lalh. Wa xlakata latamanin ankgo akxilhkgo tuku lalh. Akxni chankgo, akxilhkgo chixku tiku xkgalhi demonio, tiku la uku tlan wi chu akgstitum kgalhi xtalakapastakni. Na lhakgananit chu lakatsu lakgawi Jesús.

Tiku katsikgo tuku lanit o akxilhkgo chixku lu pekuankgo, xlakata lakpuwankgo pi Jesús wi tuku nakatlawani. Wa xlakata, wanikgo pi kataxtulh kxkachikinkan. Akxni Jesús tawaka kbarco, tiku xkgalhi demonio tasaskini pi kamaxkilh talakaskin nataʼan. Pero Jesús wani: «Kapit kminchik chu kakalakgpi tiku xalak mifamilia, chu kakawani putum tuku Jehová tlawanit mimpalakata chu la limasiyaninitan talakgalhaman» (Marcos 5:19).

Akxni Jesús tlawa milagros kawani latamanin pi ni kakawanikgolh amakgapitsin tuku tlawanit xpalakatakan, xlakata ni lakaskin pi latamanin kaj katuwa tuku nalakpuwankgo. Pero la uku, xliʼakxilhtit chixku tiku xkgalhi demonio masiya xlitliwakga Jesús chu xla tlan nakalitachuwinan amakgapitsin tiku max nila katikgaxmatnikgolh Jesús. Nachuna, akxni amakgapitsin tanu tuku nawankgo, uma chixku nalichuwinan tuku xlikana lalh akxni paxni muxtukgolh. Wa xlakata chixku an chu tsuku lichuwinan kxlikalanka Decápolis tuku Jesús tlawanit xpalakata.