Lu xlakaskinka natapatinanaw

Pedro aku kgaxmatli xtastakyaw Jesús pi talakaskin pi natalan nalatachuwinan komo kgalhikgo akgtum taʼakglhuwit. La uku Pedro katsiputun la xlimakglhuwa chuna natlawa.

Pedro kgalhskin Jesús: «Malana, ¿asta niku makglit nakintlawani tuku nitlan kintala chu naktapati? ¿Asta makgtujun?». Makgapitsi xpulalinanin takanajla masiyakgo pi kaj makgtutu tlan nalatapatikan. Wa xlakata max Pedro lakpuwan pi lu tlan likatsi xlakata tapatinamputun «asta makgtujun» (Mateo 18:21).

Pero Jesús ni masiyalh pi kiliputlekgatkan la xlimakglhuwa kinkatlawanikanan tuku nitlan. Wa xlakata, Jesús stakyawa Pedro chu wani: «Ni kwaniyan pi kaj makgtujun, wata asta tutupuxamakutujun» (Mateo 18:22). Uma wamputun pi ankgalhin natapatinanaw. Talakaskin pi Pedro ankgalhin natapatinan.

Alistalh, xlakata nakamakgtaya nakatsikgo pi xlitapatinatkan, Jesús litachuwinan Pedro chu amakgapitsi xtamakgalhtawakgen akgtum liʼakxilhtit. Lichuwinan skujni tiku ni chuna likatsilh la xalakgalhamanina xmalana. Uma malana mapakgsina xwanit. Akgtum kilhtamaku xkatalakkaxlaputun kskujnin xlakata xlaklinikgo o xlakgawilanikgo. Wa xlakata linka kxlakatin chatum skujni nema xlaklini 10,000 talentos (60 millones xla denarios). Xlakata skujni nila kxokgo tuku xlaklin, mapakgsina wa pi xkastaka xla, xpuskat chu xkamanan xlakata chuna kxokgolh tuku xlaklin. Akxni skujni kgaxmatli uma, lakgtatsokgostalh xmalana chu tasaskinilh: «Kakinkgalhkgalhi, chu putum nakxokgoniyan» (Mateo 18:26).

Mapakgsina lu lakgalhamalh chu tapatilh tuku xlaklini. Akxni chuna xlanita, uma skujni tatanokglhli xtaskujni nema xlaklini 100 denarios, chipalh chu tsukulh pixpita chu pixlanka xwanima: «Kakixokgoni putum tuku kilaklipiniya». Pero xtaskujni lakgtatsokgostalh chu tsukulh wani: «Kakinkgalhkgalhi, chu nakxokgoniyan» (Mateo 18:28, 29). Pero skujni nema mapakgsina xtapatinit tuku xlaklini ni chuna likatsilh la xmalana. Wata tlawalh pi xtamaknuka xtaskujni kpulachin asta akxni kxokgolh tuku xlaklini maski ni lhuwa xlaklinikan.

Amakgapitsi xtaskujni akxilhkgolh pi uma skujni ni lakgalhamaninalh chu wanikgolh xmalanakan. Xla lu sitsilh, matasaninalh uma skujni chu wanilh: «Skujni, lixkajni likatsiya, akit ktapatin putum tuku xkilaklipiniya akxni kintasaskini. ¿Ni xlilat xwanit na nalakgalhamana mintaskujni chuna la akit klakgalhaman?». Mapakgsina lu sitsilh chu matamaknuninalh kpulachin uma nitlan skujni asta akxni kxokgokgolh putum tuku xlaklin. Alistalh Jesús wan: «Nachuna nakalikatsiniyan kinTlat xalak akgapun minchatunukan komo ni natapatiyatit mintalakan kminakujkan» (Mateo 18:32-35).

¡Lhuwa tuku kinkamasiyaniyan uma liʼakxilhtit xlakata nalatapatiyaw! Akxni Dios kinkatapatiyan xtachuna la nialh kxokgoniw tuku lakliniyaw. Chu tuku nitlan kinkatlawanikgoyan kinatalankan ni xtachuna tuku akinin tlawayaw kxlakatin Jehová. Chu xla ni kaj makgtum kinkatapatiyan. Wa xlakata, ¿ni xlilat nakatapatiyaw kinatalankan maski nitlan limakgkatsiyaw tuku kinkatlawanikgon? Jesús masiyalh ktaʼakgchuwin xalak Sipi: Dios nakinkatapatiyan tuku «lakliniyaw chuna la katapatiyaw tiku kinkalaklinikgoyan» (Mateo 6:12).