Chatum centurión tiku kgalhi lanka takanajla

Akxni makgalhsputu xTaʼakgchuwin xalak Sipi, an kCapernaúm. Anta talakatsuwinikgo makgapitsi xpulalinanin judíos, wa kamalakgachalh chatum chixku xalak atanu kachikin, xapuxku soldado xalak Roma o centurión.

Chatum kskujni uma chixku lu snun tatatla, nima. Nila tlawan, macha kchiki «chu lu patinama» (Mateo 8:6). Maski xapuxku soldado ni judío, putsa xtamakgtay Jesús. Xpulalinanin judíos wanikgo Jesús pi uma chixku minini namakgtaya, chu wanikgo tuku xlakata: «Paxki kinkachikinkan, chu xla matlawinalh sinagoga» (Lucas 7:4, 5).

Jesús chu lakgkgolotsin tunkun ankgo kxchik xapuxku soldado. Akxni talakatsuwimakgolha, xapuxku soldado kamalakgacha x’amigos xlakata nawanikgo Jesús: «Malana, ni kalilakgaputsa, xlakata ni kilakgchan pi wix natanuya kkinchik. Wa xlakata klakpuwa pi ni kiminini naklakganachan» (Lucas 7:6, 7). ¡Uma chixku tiku lismaninit namasta limapakgsin taʼaktuju! Xtachuwin na masiya pi xla ni xtachuna amakgapitsi romanos tiku nitlan kalikatsinikgo xlakskujnin (Mateo 8:9).

Uma chixku katsi pi chatum judío ni xlilat natalalin tiku xalak alakatanu kachikin (Hechos 10:28). Max wa xlakata malakgacha x’amigos xlakata nawanikgo Jesús: «Kawanti kaj akgtum tachuwin chu kiskujni napaksa» (Mateo 7:7).

Jesús kaks lilakawan akxni kgaxmata uma tachuwin chu wan: «Kkawaniyan, pi niti ktekgsnit kʼIsrael tiku kgalhi lanka takanajla» (Lucas 7:9). Akxni x’amigos xapuxku soldado taspitkgo kchiki, kawanikan pi skujni tiku xtatatla paksnita.

Jesús na masiya pi latamanin tiku ni judíos namakglhtinankgo lhuwa tasikulunalin komo nakgalhikgo takanajla. Wan: «Lhuwa tiku naminkgoyacha niku taxtu chichini chu niku tatsekga chichini chu akxtum natawayankgo kmesa Abrahán, Isaac chu Jacob kTamapakgsin xalak akgapun». Pero ¿tuku naka’akgspula judíos tiku ni kgalhikgo takanajla? Jesús wan pi «nakatamakxtukan kkilhtin niku kapukswa. Anta natasakgo chu namalaksanikgo xtatsankan» (Mateo 8:11, 12).

Dios pulana nakamaxki talakaskin judíos natamapakgsinankgo Cristo kxTamapakgsin, pero komo xlakan ni namakgamakglhtinankgo, Dios nakalakgmakgan. Chu makgapitsi latamanin tiku ni judíos xtachuna pi natawilakgo kxmesa Jesús anta «kTamapakgsin xalak akgapun».