¿Tuku xlakata xtamakgalhtawakgen Jesús ni kgalhxtakgnankgo?

Juan tiku Mununan tamaknuka kpulachin akxni nina makgas xtitaxtunit lata Jesús xtlawanit Pascua kkata 30, chu la uku tanumajku kpulachin. Juan xlakaskin pi xtamakgalhtawakgen wa kstalanikgolh Jesús, pero ni putum chuna tlawakgonit.

La uku, akxni atsinu tsankga natlawakan Pascua kkata 31, makgapitsi xtamakgalhtawakgen Juan lakgankgo Jesús chu kgalhskinkgo: «¿Tuku xlakata akinin chu fariseos kkgalhxtakgnanaw, pero mintamakgalhtawakgen ni kgalhxtakgnankgo?» (Mateo 9:14). Fariseos kgalhxtakgnankgo xlakata chuna lismanikgonit. Alistalh, Jesús lichuwinalh fariseo tiku lu tlankajwa xwanit chu xtlawama oración: «Dios, kpaxtikatsiniyan xlakata akit ni xtachuna la putum amakgapitsin [...]. Akgatunu semana makgtiy kkgalhxtakgnan» (Lucas 18:11, 12). Max chuna la uma chixku, xtamakgalhtawakgen Juan kgalhxtakgnankgo kaj xlakata chuna lismanikgonit. O max chuna tlawakgo xlakata lilipuwankgo pi Juan tanuma kpulachin. Komo chuna, max kakgalhskinkan tuku xlakata xtamakgalhtawakgen Jesús ni kgalhxtakgnankgo xlakata nalimasiyakgo pi na lilipuwankgo tuku akgspulama Juan.

Jesús maklakaskin liʼakxilhtit xlakata nakakgalhti: «Xʼamigos litatawilat kgawasa ni anan tuku nalilakgaputsakgo akxni anta akxtum katawijku, ¿ni xlikana? Pero namin kilhtamaku akxni litatawilat kgawasa nakamakglhtikan, asta akxniku nakgalhxtakgnankgo» (Mateo 9:15).

«Litatawilat kgawasa» wa Jesús, chuna la xlichuwinanit Juan (Juan 3:28, 29). Xlakata Jesús katawijku ni talakaskin nakgalhxtakgnankgo. Pero akxni nani, natasakgo chu nialh katiwayamputunkgolh. Pero akxni namalakastakwanikan, nialh katitalakaskilh nakgalhxtakgnankgo, xlakata lu napaxuwakgo.

Jesús kawilinipara akgtiy liʼakxilhtit: «Nitiku lakatsapawaka pakgtsu xasasti lhakgat kxalakgwan lhakgat, xlakata xasasti lhakgat nalakalhtanka xalakgwan chu tlakg liwaka natalakaxtita. Nachuna ni mujukan xasasti vino kxalakgwan xuwa niku makikan. Komo anta namujukan, xuwa niku makikan vino nalakgpankga chu vino natamakgan chu xuwa nialhla katimaklakaskinka. Wata xasasti vino mujukan kxasasti xuwa» (Mateo 9:16, 17). ¿Tuku kamasiyaniputun?

Jesús kamasiyaniputun pi xtamakgalhtawakgen ni talakaskin nastalanikgo xamakgan xtalismaninkan judíos, la akxni kgalhxtakgnankan. Xla ni milh laktsapami o ni milh matliwakglha xalakgwan takanajla nema nialh makgas nalakgmakgankan. Wata masiyama atanu la tlan nakakninanikan Dios ni xtachuna la lismanikgonit judíos, tiku stalanikgo xtalismaninkan latamanin. Liwana tasiya pi ni tsapawakama xasasti lhakgat kmaktum xalakgwan lhakgat, chu ni mujuma xasasti vino kʼakgtum xalakgwan xuwa nema palhata.