Chatum kgawasa kaʼakxilha latamanin tiku chamakgolh kPukgalhtawakga

KAMANAN KGALHSKININANKGO

¿Tuku xlakata kiliʼanat ktamakxtumit kPukgalhtawakga?

Xtatayananin Jehová tamakxtumikgo makgtiy akgatunu semana kxPukgalhtawakgakan. ¿Tuku tlawakgo anta? ¿La namakgtayayan komo napina ktamakxtumit?

¿Tuku tlawakan kPukgalhtawakga?

Anta kPukgalhtawakga xla xtatayananin Jehová masiyakan tuku wan Biblia nema nakinkamakgtayayan kkilatamatkan. Tamakxtumit nema tatlawa anta namakgtayayan:

Nakatsiya tuku xaxlikana xlakata Dios.
Naʼakgatekgsa tuku wamputun putum tuku lama la uku.
Tlakg tlan nalikatsiya.
Nakatekgsa xaxlikana amigos.

¿Tuku xlakata lu tlan komo napina?

Tuku lichuwinankan anta namakgtayayan. Tastakyaw nema mastakan kxtamakxtumitkan xtatayananin Jehová namakgtayayan skgalala nawana (Proverbios 4:5). Uma wamputun pi Biblia namakgtayayan tlan tuku nalaksaka kmilatamat. Na mastakan xtakgalhtin makgapitsi xlakaskinka takgalhskinin, chuna la umakgolh:

¿Tuku xlakata minitaw latamayaw kkakilhtamaku?
¿Xkuenta Dios tapatin nema anan?
¿Ankgo latamakgo alakatanu tiku nikgonita?

Wa uma makgapitsi taʼakgchuwin nema mastakan ksputat semana:

¿Tuku xlakata namastayaw talakaskin pi Biblia nakinkapulalinan?
¿Tiku tlan nakinkamakgtayayan akxni katuwa tuku lilakgaputsayaw?
¿Tuku tlawama xTamapakgsin Dios kimpalakatakan?

«Chatum kincompañero xalak escuela kilachi ktamakxtumit. Akxtum kinkatatawilan chu kmasakwaniw kilibrojkan. Alistalh kiwanilh pi lu lakgatilh la xkgalhtinankgo putum tiku anta xwilakgo akxni xtlawakan takgalhskinin. Na kiwanilh pi kxpusikulan ni kgalhikgo likgalhtawakga nema akinin kgalhiyaw» (Brenda).

¿Xkatsiyata uma? Ni pukikan tumin chu na ni xokgokan xlakata tlan natanuya kPukgalhtawakga.

Latamanin tiku nakalakgapasa anta namatliwakglhkgoyan. Biblia wan pi pulaktum tuku xlakata kstalaninanin Cristo tamakxtumikgo wa pi nalamatliwakglhkgo chatunu chatunu (Hebreos 10:24, 25). Lu matliwakglhnan akxni kalakgapaskan latamanin tiku lakgapasputunkgo Dios chu kalilakgaputsakgo amakgapitsin maski lamaw kkakilhtamaku niku nialh lapaxkikan.

«Akxni kgotanu, kmakgkatsi pi lu ktlakgwanit chu klipuwan, pero tiku ankgo ktamakxtumit ankgalhin tlan kimamakgkatsinikgo. Akxni sputa tamakxtumit chu ktaspita kkinchik kpaxuwa chu kmakgkatsi pi tlan naktayanipara lichali» (Elisa).

¿Xkatsiyata uma? Kxlikalanka Katiyatni anan liwaka 120,000 congregaciones xla xtatayananin Jehová chu liwaka 60,000 niku tamakxtumikan. Akgatunu kata max 1,500 Pukgalhtawakga tlawakan xlakata tlakg taliwakama tiku ankgo ktamakxtumit.a

¿Tuku wankgo makgapitsi kamanan?

«Akxni aktsujku xakwanit, kkitalachi ktamakxtumit chatum kincompañera xalak escuela chu lakgatilh pi akxtum tamakxtumikgo tiku tanu tanu kata kgalhikgo. Nina makgas kilhtamaku na kilachi ktamakxtumit kimalana chu lu kaks lilakawa pi lu kmaklakaskinaw Biblia. Akxni kakxilhli pi lu lakgatilh, kimakgtayalh tlakg xlakaskinka nakliʼakxilha tamakxtumit» (Jessica).

«Kakxilhnit pi tamakxtumit kimakgtaya nialh lu naklilakgaputsa kintaʼakglhuwit. Anta kinkamasiyanikanan nalipaxuwayaw kilatamatkan, tlakg tlan nalikatsiyaw chu atanu tuku na kinkamakgtayayan. Ankgalhin xatapaxuwan kkitaspita ktamakxtumit chu lu kimatliwakglha» (Timothy).

«Chatum chixku tiku kwanilh pi xʼalh ktamakxtumit kiwanilh: “Kmilh akxilha komo wi tuku ni xaxlikana masiyayatit. ¡Pero kakxilhli pi kintakanajla wa tuku nixaxlikana!”. Na kaks lilakawa pi xtatayananin Jehová lu tlan likatsinikgolh. Xla wa: “Maski aku xakkalakgapasma, kilikatsinikgolh la komo makgasata xkilakgapaskgo”» (Jacob).

«Min kilhtamaku klakpuwan: “Lakapala naktaxtu akxni nasputa tamakxtumit”. Pero akxni kwi ktamakxtumit, nialh klakapastaka. Akxni sputa tamakxtumit ktsuku katachuwinanan amakgapitsin chu nialh klakapastaka tuku xaklakpuwanit. Komo ni xʼanalh tamakxtumit, nila xakkgalhilh xalaktlan amigos nema kkgalhi» (Madison).

a Xlakata nakatsiya niku tlawakan akgtum tamakxtumit, katanu niku wan «Xtamakxtumitkan xtatayananin Jehová» chu kapitani niku wan «Kaputsa niku pimputuna».