SECCIÓN 1
Malakatsukina kamaxki paraíso latamanin
Dios malakatsuki kakilhtamaku chu latamat kKatiyatni; malakatsuki chixku chu puskat tiku ni kgalhikgo talakgalhin, kawili kjardín chu kamaxki limapakgsin xlakata xkgalhakgaxmatkgolh
«KXAPULANA, Dios tlawalh akgapun chu katiyatni.» (Génesis 1:1.) Wankan pi wa uma xapulana tachuwin nema tlakg lakgapaskan. Uma ni xatuwa tachuwin chu lilakgatit, lichuwinan tiku tlakg xlakaskinka: Jehová, Dios tiku kgalhi xliputum litliwakga, tiku Malakatsukilh putum tuku anan chu Katiyatni. Alistalh, lichuwinan pi lhuwa kata, nema Biblia wani kilhtamaku, Dios malakatsukilh kKatiyatni putum tuku lu lakglilakgatit anan kkakilhtamaku.
Wantuku tlakg xlakaskinka nema Jehová malakatsukilh kKatiyatni, wa chixku. Xapulana chixku litlawalh pokgxni nema tiyalh kkatiyatni. Tlawalh chuna la Xla, uma wamputun, pi na tlan paxkinan, kgalhi liskgalala chu atanu tayat nema kgalhi Dios. Limapakuwilh Adán chu wililh kparaíso, nema xwanikan Edén. Uma jardín wa tuku Dios xtlawanit chu lhuwa kiwi xkgalhi nema xmasta xakgama tawakat.
Akgtum kilhtamaku, Dios lakapastakli pi xlakgchanita kilhtamaku xlakata chixku xlikgalhit xpuskat. Wa xlakata, limaklakaskilh xtapalukut Adán chu malakatsukilh Eva, xapulana puskat chu maxkilh xlakata xpuskat xwa. Adán lu paxuwalh asta wa uma lu lilakgatit tachuwin: «Uma lu xlikana kilukut chu kiliwa». Chu Biblia wan: «Chixku namakgxtakga xtlat chu xtse chu ni namakgxtakga xpuskat, chu kaj akgtum makni nawankgo» (Génesis 2:22-24; 3:20).
Adán chu Eva xkgalhakgaxmatkgolh akgtiy limapakgsin nema xkamaxkinit Dios. Xapulana, xkuentajtlawakgolh Katiyatni, xchananankgolh chu lhuwa kamanan xkgalhikgolh. Chu xlipulaktiy, Dios kawanilh pi ni xwakgolh xtawakat kgantum kiwi, kajwatiya kgantum xliputum jardín: «kiwi nema lilakgapaskan tuku xatlan chu tuku ni xatlan» (Génesis 2:17). ¿Tuku xkaʼakgspulalh komo ni xkgalhakgaxmatnankgolh? Xnikgolh. Uma limapakgsin xkamaxki talakaskin pi xmapakgsinakan xliʼakxilhkgolh komo xkgalhakgaxmatkgolh Dios, chu na xlimasiyakgolh pi xpaxkikgo chu lu xpaxtikatsinikgo. Xlikana, Adán chu Eva xkgalhikgo putum tuku tlan xkamakgtayalh xlakata liwana xkgalhakgaxmatkgolh xapaxkina xMalakatsukinakan. Ni xkgalhikgo tuku xkamatlawiputulh tuku nitlan chu na nixkgalhikgo talakgalhin, xlakata Biblia wan: «Akxilhli Dios putum tuku xtlawanit chu ¡kaʼakxilhti!, lu tlan paks tuku xtlawanit» (Génesis 1:31).
(Takilhtinit kGénesis kcapítulo 1 chu 2.)