Tuku xlakata chu la malakatsukika tamakgaxtokgat
«Jehová Dios wa: “Nitlan xakstu nalatama chixku. Naktlawani xmakgtayana, xlakata nalitakgatsi”» (GÉN. 2:18).
1, 2. 1) ¿La lakatsukulh tamakgaxtokgat? 2) ¿Tuku katsikgolh xapulana chixku chu xapulana puskat xlakata tamakgaxtokgat? (Kaʼakxilhti xapulana dibujo).
LATAMANIN tlan akxilhkgo natamakgaxtokgkan. Pero ¿tuku xlakata chu la malakatsukika tamakgaxtokgat? Komo nakatsiyaw nakinkamakgtayayan naʼakxilhaw la xlilat chu tasikulunalin nema limin. Dios malakatsukilh xapulana chixku, Adán, chu skinilh xkawilinilh xtukuwanikan animales. Adán akxilhli pi animales xkgalhikgo xtatakgatsin pero chixku ni xkgalhi xmakgtayana. Wa xlakata Jehová tlawalh pi Adán klhtatalh, chu maxtunilh kgantum xtapalukut chu tlawalh chatum puskat. Jehová liminilh Adán chu xpuskat litaxtulh (kalikgalhtawakga Génesis 2:20-24). Chuna la akxilhaw, tamakgaxtokgat akgtum xtamaskiwin Jehová.
2 Lhuwa kata alistalh, Jesús wampa tuku Jehová xwanit kjardín xla Edén: «Nchixku nalimakgaxtakga xtlat, chu xtsi, na wa natatalakgxtumiy xpuskat, na xchatuykan mana watiya akgtum liwa nawankgoy» (Mat. 19:4, 5). Xlakata Dios makglhtilh kgantum xtapalukut Adán xlakata xtlawalh Eva, xchatiykan katsikgolh pi xlatapakgsinikgo. Jehová ni xlakaskin pi chatum chixku xmakgxtakgli xpuskat o xkgalhilh chalhuwa xlakpuskatin.
JEHOVÁ MALAKATSUKILH TAMAKGAXTOKGAT XLAKATA NAMAKGANTAXTI XTALAKASKIN
3. ¿Tuku xmakgantaxtiputun Dios akxni malakatsukilh tamakgaxtokgat?
3 Adán lu paxuwalh xlakata xkgalhi xpuskat, tiku alistalh limapakuwilh Eva. Litaxtulh xtatakgatsin chu xmakgtayana. Komo akxtum xtawilakgolh, Adán chu Eva xʼamakgo lipaxuwakgo xtamakgaxtokgatkan (Gén. 2:18). Pulaktum tuku limalakatsukika tamakgaxtokgat wa xlakata Katiyatni xlitatsamakgolh latamanin (Gén. 1:28). Lakgkgawasan chu laktsuman xʼamakgo paxkikgo xnatlatnikan pero xʼama chan kilhtamaku xʼamakgo tamakgaxtokgkgo chu xʼamakgo kgalhikgo xfamiliajkan. Latamanin xʼamakgo matsamakgo katiyatni chu akgtum paraíso xtlawakgolh.
4. ¿La kitaxtunilh xapulana tamakgaxtokgat?
4 Xapulana tamakgaxtokgat nitlan kitaxtulh akxni Adán chu Eva ni kgalhakgaxmatkgolh Jehová. «Xapulana luwa» akgskgawilh Eva chu wanilh pi komo xwalh xtawakat «kiwi nema lilakgapaskan tuku tlan chu tuku nitlan», xʼamakgo katsikgo tuku lu xlakaskinka. Wanilh pi xʼama makgtaya nakatsi tuku tlan chu tuku nitlan. Eva ni limasiyalh pi xʼakxilha Adán la xʼakgxakga familia, xlakata ni maxkilh kakni chu xakstu laksakli nawa xtawakat kiwi chu ni pulana wanilh. Chu Adán ni kgalhakgaxmatli Dios akxni walh tawakat nema maxkilh xpuskat (Apocalipsis [Revelación] 12:9; Gén. 2:9, 16, 17; 3:1-6).
Xlakata tlan nakakitaxtuni tiku tamakgaxtokgkgonit, talakaskin nakgalhakgaxmatkgo Jehová chu nalitayakgo tuku tlawakgo
5. ¿Tuku kinkamasiyaniyan la kgalhtinankgolh Adán chu Eva?
5 Akxni Jehová kakgalhskilh Adán chu Eva tuku xtlawakgonit, Adán limawakalh xpuskat. Xla wanilh: «Puskat tiku kimaxki xlakata xkintatawi, wa tiku kimaxkilh xtawakat kiwi, wa xlakata kwalh». Chu Eva limawakalh luwa xlakata xakgskgawinit (Gén. 3:12, 13). Ni xlilat xwanit tuku wankgolh Adán chu Eva. Ni kgalhakgaxmatnankgolh chu lakatsalakgolh xlimapakgsin Dios chu xla katalakkaxlalh. ¿Tuku kinkamasiyaniyan ni tlan xliʼakxilhtitkan Adán chu Eva? Pi komo tiku tamakgaxtokgkgonit lakaskinkgo tlan kakakitaxtunilh, talakaskin nakgalhakgaxmatkgo Jehová chu nalitayakgo tuku tlawakgo.
6. ¿Tuku kilhchanima Génesis 3:15?
6 Maski lu nitlan tuku lalh kʼEdén, Jehová kamaxkilh latamanin akgtum takgalhkgalhin. Uma takgalhkgalhin wa xapulana tuku Biblia wan pi nala (kalikgalhtawakga Génesis 3:15). Uma tuku tatsokgnit, wan pi Jehová nalimaklakaskin «xkam» chatum «puskat» xlakata namasputu Satanás. Kʼakgapun, wilakgolh millones ángeles tiku xaʼakgstitum chu lu tlan talalinkgo Dios. Wa xlakata Biblia wan pi litaxtukgo la xpuskat Jehová. Xla xʼama laksaka chatum tiku makgtapakgsi uma grupo xlakata xmalakgsputulh Satanás chu xtlawalh pi latamanin tiku xkgalhakgaxmatnankgolh xkgalhiparakgolh tuku Adán chu Eva makgatsankgakgolh. Tiku xkgalhakgaxmatkgolh Dios tlan xlatamakgolh kKatiyatni putum kilhtamaku chuna la Jehová xlakaskin xapulana (Juan 3:16).
7. 1) ¿Tuku titaxtukgonit tamakgaxtokgat lata akxni Adán chu Eva ni kgalhakgaxmatkgolh Dios? 2) ¿Tuku wan Biblia pi xlitlawatkan lakchixkuwin chu lakpuskatin?
7 Xlakata Adán chu Eva ni kgalhakgaxmatnankgolh tlawalh pi xkgalhikgolh lhuwa taʼakglhuwit kxtamakgaxtokgatkan chu na nitlan kakitaxtunilh tamakgaxtokgat nema aku xʼama tawilakgo. Akgtum liʼakxilhtit, Eva chu amakgapitsin lakpuskatin lu xʼamakgo patinankgo akxni xkgalhikgolh xlakgskgatankan. Nachuna, lu xʼamakgo lakaskinkgo pi xlakchixkuwinkan xkapaxkilh chu kuenta xkatlawanilh, pero xlakchixkuwinkan xʼama kapulalin chu asta xʼama min kilhtamaku nitlan xkalikatsinikgolh, chuna la akxilhaw la uku (Gén. 3:16). Jehová lakaskin pi lakchixkuwin nalimasiyakgo tapaxkit akxni napulalinkgo xfamiliajkan, chu lakaskin pi lakpuskatin namaxkikgo kakni limapakgsin nema kgalhikgo xlakchixkuwinkan (Efes. 5:33). Akxni akgtum tamakgaxtokgat lamakgtayakgo, ni lhuwa taʼakglhuwit anan.
TAMAKGAXTOKGAT LATA XKILHTAMAKU ADÁN ASTA AKXNI MILH MUNKAKLAT
8. ¿Tuku titaxtunit tamakgaxtokgat lata xkilhtamaku Adán asta akxni milh Munkaklat?
8 Akxni Adán chu Eva nina xnikgo, kgalhikgolh xlakgkgawasankan chu xlaktsumankan (Gén. 5:4). Xapulana xkgawasakan, Caín, tatamakgaxtokgli chatum xtala tsumat. Xkgawasa Caín, Laméc, wa tiku xapulana wan Biblia pi kgalhilh chatiy xlakpuskatin (Gén. 4:17, 19). Lata xkilhtamaku Adán asta xkilhtamaku Noé, ni lhuwa latamanin kakninanikgolh Jehová. Makgapitsi tiku ni makgxtakgkgolh Jehová wa Abel, Enoc, Noé chu xfamilia. Biblia wan pi kxkilhtamaku Noé «xkaman xaxlikana Dios tsukukgolh akxilhkgo xlaktsuman lakchixkuwin pi lakswan xwankgonit». Wa xlakata «tsukukgolh laksakkgo xlakata xlakpuskatinkan nawankgo». Xlakata uma ni xlilat xwanit, amakgolh ángeles chu lakpuskatin kgalhikgolh xlakgkgawasankan tiku lixkajnit xlikatsikgo chu kalimapakuwika nefilim. Amacha kilhtamaku «tuku nitlan xtlawakgo lakchixkuwin xtalhuwinit kkatiyatni» chu «putum xtalakapastakni xnakujkan putum kilhtamaku nitlan xwanit» (Gén. 6:1-5).
9. 1) ¿Tuku tlawalh Jehová xlakata lu xʼanan tuku nitlan kxkilhtamaku Noé? 2) ¿Tuku kinkamasiyaniyan tuku lalh amacha kilhtamaku?
9 Jehová limilh munkaklat kkatiyatni xlakata xkamasputulh latamanin tiku lixkajnit xlikatsikgo. «Noé nti ntiliakgchuwinalh lantla Dios natlaway [xaʼakgstitum]», kawanilh amakgolh latamanin pi xʼama min Munkaklat (2 Ped. 2:5). Pero ni kgaxmatnikgolh Noé xlakata lu xlilakgaputsakgo tuku xala chali chali, la tamakgaxtokgat. Jesús tamalakxtumilh kinkilhtamakujkan xkilhtamaku Noé (kalikgalhtawakga Mateo 24:37-39). La uku, atsinu ni putum latamanin ni kgaxmatputunkgo akxni lichuwinanaw xlakata xTamapakgsin Dios. Lichuwinamaw uma tamakatsin akxni nina masputukan uma lixkajni kakilhtamaku. ¿Tuku kinkamasiyaniyan xlakata tuku lalh akxni xʼama min Munkaklat? Pi ni namastayaw talakaskin pi tamakgaxtokgat chu kgalhikan kamanan tlakg xlakaskinka nalitaxtu chu nialh nalakapastakaw pi xkilhtamaku Jehová lu lakatsuwa wi.
TAMAKGAXTOKGAT LATA AKXNI MILH MUNKAKLAT ASTA XKILHTAMAKU JESÚS
10. 1) ¿Tuku talismanin xkgalhikgo lhuwa kachikinin xlakata talakgxtumit? 2) ¿La wilikgolh lu tlan liʼakxilhtit kxtamakgaxtokgatkan Abrahán chu Sara?
10 Noé chu kgalhtutu xlakgkgawasan kaj chatum xlakpuskatinkan xkgalhikgo. Pero, akxni xtitaxtunita Munkaklat, lhuwa lakchixkuwin ni kaj chatum puskat kgalhikgolh. Klhuwa kachikinin, lu xtalismani xtlawakan talakgxtumit nema ni xlitatlawat, chu asta chuna xtlawakgo akxni xkakninanikgo xdioseskan. Akxni Abrahán chu Sara ankgolh latamakgo kCanaán, akxilhkgolh pi xwilakgolh lhuwa tiku xtlawakgo talakgxtumit nema ni xlitatlawat chu ni xmaxkikgo kakni tamakgaxtokgat. Wa xlakata Jehová kamasputulh Sodoma chu Gomorra xlakata lu xtlawakgo talakgxtumit nema ni xlitatlawat. Abrahán ni chuna xwanit la amakgolh latamanin. Lu tlan liʼakxilhtit wililh xlakata lu tlan pulalilh xfamilia, chu nachuna Sara xlakata xmaxki kakni xchixku (kalikgalhtawakga 1 Pedro 3:3-6). Abrahán putsanilh xkgawasa Isaac tsumat tiku xkakninani Jehová xlakata xtatamakgaxtokgli. Isaac nachuna makgtayalh xkgawasa Jacob. Kxfamilia Jacob minkgocha 12 tribus xla Israel.
11. ¿La kakuentajtlawalh israelitas xLimapakgsin Moisés?
11 Alistalh, Jehová katatlawalh akgtum talakkaxlan kachikin Israel. Kamaxkilh xLimapakgsin Moisés, uma kamakgtayalh chuntiya tlan natalalinkgo Dios. Akgtum liʼakxilhtit, xlimin limapakgsin xlakata tamakgaxtokgat, la lhuwa nakgalhikan lakpuskatin chu ni xkamaxkikan talakaskin nakatatamakgaxtokgkgo tiku xkakninanikgo ni xaxlikana dioses (kalikgalhtawakga Deuteronomio 7:3, 4). Komo akgtum tamakgaxtokgat xtitaxtukgo tuku lu tuwa, lakgkgolotsin tlan xkamakgtayakgo. Na xwilakgolh limapakgsin xlakata akxni akgskgawikan tiku tatamakgaxtokgkanit, akxni lalakgsitsikan chu akxni nitlan tuku nalakpuwaniya achatum. Xmastakan talakaskin pi tiku xtamakgaxtokgkgonit xlamakgxtakgkgolh, pero xwilakgolh limapakgsin nema xkamakgtaya xachixku o xapuskat. Akgtum liʼakxilhtit, chatum chixku tlan xmakgxtakga xpuskat komo xtekgsni «tuku xalixkajni» (Deut. 24:1). Biblia ni liwana wan tuku kilhchanima «tuku xalixkajni», pero xachixku nila xmaklakaskin kaj tsinu tuku nitlan xtlawalh xpuskat xlakata namakgxtakga (Lev. 19:18).
NI KAMAKGATSANKGANANI TIKU TATAMAKGAXTOKGNITA
12, 13. 1) ¿La xkalikatsinikgo xlakpuskatinkan makgapitsi lakchixkuwin kxkilhtamaku Malaquías? 2) La uku, ¿tuku max nakitaxtu komo chatum tiku tumununit natatalakgxtumi xpuskat o xchixku achatum chu natatamakgaxtokga?
12 Kxkilhtamaku Malaquías, lhuwa judíos katuwa tuku xlikilhankgo xlakata namakgxtakgkgo xlakpuskatinkan. Amakgolh lakchixkuwin xmakgxtakgkgo xlakpuskatinkan xlakata xkatatamakgaxtokgkgolh tiku tlakg laktsumanku o tiku ni kskujnanikgo Jehová. Kxkilhtamaku Jesús, judíos chuntiya xkamakgxtakgkgo xlakpuskatinkan «kaxatu kawa ntu xpalakata» (Mat. 19:3). Jehová Dios ni xakxilhputun pi chuna xtlawaka (kalikgalhtawakga Malaquías 2:13-16).
13 La uku, lu nitlan pi tiku skujnani Jehová naʼakgskgawi xpuskat o xchixku, chu uma ni lu chuna la. Pero kalakpuwanti pi chatum tiku tamununit chu tamakgaxtokgnit tatlawa talakgxtumit nema ni xlitatlawat achatum tiku tamakgaxtokgnit, makgxtakga xpuskat o xchixku chu tatamakgaxtokga tiku tatlawalh talakgxtumit. Komo uma lataman ni makgxtakga tuku nitlan tlawama, xlilat namaxtukan kcongregación xlakata ni nataxkajwani xkachikin Dios (1 Cor. 5:11-13). Komo taspitputun kcongregación xlilat namakgxtakga tuku nitlan tlawama (Luc. 3:8; 2 Cor. 2:5-10). ¿La xlilhuwa kilhtamaku xlititaxtut xlakata tlan namakgamakglhtinamparakan kcongregación? Ni talakkaxwilinit la xlimakgas. Pero max natitaxtu akgtum o akglhuwa kata asta akxni tiku lakgalhinanit nalimasiya pi xlikana makgxtakgnit tuku nitlan xtlawama chu namakgamakglhtinamparakan kcongregación. Chu maski namakgamakglhtinamparakan, wa Dios tiku lakgchan natalakkaxla (Rom. 14:10-12; kaʼakxilhti La Atalaya 15 xla febrero kata 1980, páginas 29 chu 30).
XTAMAKGAXTOKGATKAN KSTALANINANIN CRISTO
14. ¿La makgtayanalh xLimapakgsin Moisés?
14 Israelitas maklakaskinkgolh xLimapakgsin Moisés liwaka 1,500 kata. Uma limapakgsin pulaklhuwa la kamakgtayalh. Akgtum liʼakxilhtit, kamaxkilh tastakyaw nema xʼama kamakgtaya nalakkaxtlawakgo taʼakglhuwit nema xʼamakgo kgalhikgo familias. Na kamakgtayalh xlakata nalakgapaskgo Mesías (Gál. 3:23, 24). Akxni Jesús nilh, sputli Limapakgsin chu Dios tlawalh xasasti talakkaxlan (Heb. 8:6). Pero makgapitsi tuku xLimapakgsin Moisés xmasta talakaskin natlawakan, nialh kamaxkika talakaskin natlawakgo kstalaninanin Cristo.
15. 1) ¿La xliwanat akgtum tamakgaxtokgat xla kstalaninanin Cristo? 2) ¿Tuku xlilakapastakat chatum kstalanina Cristo komo makgxtakgputun xchixku o xpuskat kxlakatin mapakgsinanin?
15 Akgtum kilhtamaku fariseos wi tuku kgalhskinkgolh Jesús xlakata tamakgaxtokgat. Xla wa pi Dios xkamaxkinit talakaskin israelitas, namakgxtakgkgo xchixkukan o xpuskatkan akxni xwi xLimapakgsin Moisés maski ni chuna xlakapastaknit Jehová lata pulana (Mat. 19:6-8). Xtakgalhtin Jesús limasiyalh pi kstalaninanin Cristo chuntiya xlimakgantaxtitkan xwanit tuku Dios pulana xlakapastaknit xpalakata tamakgaxtokgat (1 Tim. 3:2, 12). Xlakata tiku tamakgaxtokgkgonit kaj akgtum makni nalitaxtukgo, putum kilhtamaku akxtum xlitawilatkan. Xlakata akxtum natawilakgo, xlipaxkitkan Jehová chu nalapaxkikgo. Komo tiku tamakgaxtokgkgonit xlamakgxtakgkgolh kxlakatin mapakgsinanin pero niti tlawanit talakgxtumit nema ni xlitatlawat, nila natamakgaxtokgparakgo (Mat. 19:9). Tiku tamakgaxtokgnit max nalaksaka natapati xchixku o xpuskat tiku makgatsankgananilh. Chuna lalh akxni palakachuwina Oseas tapatilh xpuskat Gómer, tiku xʼakgskgawinit, chu akxni Jehová katapatilh israelitas tiku xmakgxtakgkgonit tuku nitlan (Os. 3:1-5). Nachuna, komo tiku tamakgaxtokgnit katsi pi xchixku o xpuskat akgskgawilh chu tatalakgxtumipara, uma kilhchanima pi tapati. Nialh anan tuku xlakata nalamakgxtakgkgo kxlakatin mapakgsinanin.
16. ¿Tuku wa Jesús xlakata tiku ni tamakgaxtokgkgonit?
16 Jesús wa pi akgtum tamakgaxtokgat xla kstalaninanin Cristo kajwatiya tlan nalamakgxtakgkgo komo wi tiku natlawa talakgxtumit nema ni xlitatlawat. Alistalh lichuwinalh «wa nti yama ntamaxkinit» ni natamakgaxtokgkgo, chu wa: «Wa nti ntlan makgamakglhtinan yuma ntachuwin, kamakgamakglhtinalh» (Mat. 19:10-12). Lhuwa kstalaninanin Cristo laksakkgo ni natamakgaxtokgkgo xlakata nitu nakamalaktlawi chuna la skujnanimakgolh Jehová chu xlilat nakawaniyaw pi lu tlan tuku laksakkgonit.
17. ¿Tuku namakgtaya chatum kstalanina Cristo nalaksaka komo natamakgaxtokga o ni?
17 ¿Tuku namakgtaya chatum kstalanina Cristo nalaksaka komo natamakgaxtokga o ni? Liwana xlilakpuwanat komo tlan nawili kxtalakapastakni pi ni natamakgaxtokga. Apóstol Pablo wa pi tlakg tlan ni natamakgaxtokgkan. Pero na wa: «Xpalakata mpi lhuwa anan [talakgxtumit nema ni xlitatlawat], chatunu nchixku kakgalhilh xpuskat, chu lakchajan, chatunu nkakgalhilh xchixkukan». Chu wampa: «Mpala pi ni la ntalakgoy, pus xatlan [katamakgaxtokgkgolh], sampi xaliwaka ntlan [natamakgaxtokgkgo], ni xawa wa ntaji naʼakgchichixwanankgoy». Chuna, wi tiku max nalakapastaka natamakgaxtokga xlakata ni natlawa tuku nalimakgkatsi pi wi tiku tatalakgxtumima o talakgxtumit nema ni xlitatlawat. Lakgkgawasan chu laktsuman, xlilakpuwanatkan komo xlikana kgalhikgoya kata xlakata natamakgaxtokgkgo. Pablo kawanilh: «Komo wi tiku lakpuwan pi nitlan tuku tlawama, chu akchanita xkata, chu chuna xlitatlawat, katlawalh tuku tlawaputun; ni lakgalhinan. Katamakgaxtokgli» (1 Cor. 7:2, 9, 36; 1 Tim. 4:1-3). Ni xlilat wi tiku nawaniyaw pi katamakgaxtokgli kaj xlakata lu talakgxtumiputun chuna la makgkatsikgo tiku aku stakmakgolh. Uma lataman max nina stakkgonit chu nila katimakgantaxtilh tuku lakgchan natlawa ktamakgaxtokgat.
18, 19. 1) ¿Tuku xlimakgantaxtitkan kstalaninanin Cristo tiku tamakgaxtokgputunkgo? 2) ¿Tuku naʼakxilhaw kʼartículo nema aku namin?
18 Xlakata akgtum tamakgaxtokgat xla kstalaninanin Cristo tlan natsuku, talakaskin chatum chixku chu chatum puskat tiku tamunukgonit chu paxkikgo Jehová xliputum xnakujkan. Talakaskin lu nalapaxkikgo xlakata akxtum nalatamaputunkgo putum kilhtamaku. Jehová nakasikulunatlawa xlakata kgalhakgaxmatkgolh xtastakyaw pi kajwatiya natatamakgaxtokgkgo tiku «kanajlaniy nkimPuchinakan» (1 Cor. 7:39). Chu lu tlan nakakitaxtuni kxtamakgaxtokgatkan komo chuntiya kgalhakgaxmatkgo xtastakyaw Biblia.
19 La uku lamaw kxaʼawatiya kilhtamaku, chu lhuwa latamanin ni kgalhikgo tayat nema talakaskin xlakata tlan natawila tamakgaxtokgat (2 Tim. 3:1-5). Kʼartículo nema aku namin, nalichuwinanaw lu laktlan tastakyaw xalak Biblia nema nakamakgtaya kstalaninanin Cristo napaxuwakgo maski anan taʼakglhuwit. Uma nakamakgtaya chuntiya natlawankgo ktiji nema linan klatamat nema ni katisputli (Mat. 7:13, 14).