Tuku tlakg nitlan, komo Eva chu Adán masiyanikgolh Caín chuna nalakpuwan, xtlawamakgo pi tlakg lanka xmakgkatsika. Alistalh, Eva kgalhilh xlichatiy xkgawasa pero ni wa laktlan tachuwin la xapulana. Limapakuwikgolh Abel chu kilhchanima «Jaxanat» o «Nitu litaxtu» (Génesis 4:2). Xlakata Eva chuna xwilinilh xtukuwini Abel ¿xwamputun Eva pi ni xlipawan chuna la Caín? Max chuna pero ni katsiyaw komo xlikana.

Akxni kstakmakgo chatiy xlakgkgawasan, Adán max kamasiyanilh taskujut tuku tlan xkalikuentajtlawakgolh xfamiliajkan. Caín chanana wa chu Abel xkuentajtlawana borrego.

Abel max xlimaxtu kilhtamaku xlakata nalilakapastaka Jehová. Kalakpuwanti pi akxilhpat la kuentajtlawama xborregos. Tiku kuentajtlawa borregos talakaskin lhuwa natlawan. Xkalin xborregos niku kaxtum, niku anan kgalhtuchokgo..., putum kilhtamaku xputsa xaxtakni tuwan, tlakg xatlan niku xkgotnankgolh chu niku klhtatakgolh. Xliputum animales nema katlawalh Dios, borregos wa tlakg xlitakuentajtlawat chu talakaskin nakapulalinkan. ¿Xʼakxilha Abel pi xlakaskin xpulalilh, xmakgtayalh chu xkuentajtlawalh chatum Tiku tlakg skgalala chu tliwakga nixawa lataman? Max chuna kskin akxni xtlawa xʼoración chu chuna tatliwakglhli xtakanajla.