«Maʼakgatakgsnikgonita wanti lhuwa nitu [...] xlakgasikan»

¿Katsiputuna tuku xaxlikana xlakata Dios? ¿Tiku Dios? ¿Tuku lakgati chu tuku ni lakgati? ¿Tuku xtalakaskin? Anta kxTachuwin, Biblia, Jehová kinkawaniyan la likatsi. Pero ni putum tiku likgalhtawakgakgo tlan naʼakgatekgskgo uma. ¿Tuku xlakata? Xlakata tlan naʼakgatekgsaw tuku xla Dios akgtum talakgalhaman; ni putum latamanin makglhtinankgo. Kaʼakxilhwi tuku lichuwinalh Jesús xlakata uma. (Kalikgalhtawakga Mateo 11:25.)

Uma versículo chuna litsuku: «Akxni yama nkilhtamaku, tiwa Jesús». Tuku xʼama wan max wa malakpuwanilh tuku aku xlanit: kakilhnilh latamanin xalak akgtutu kachikinin nema tapakgsikgo kʼGalilea xlakata ni kanajlakgolh milagros nema tlawalh anta (Mateo 11:20-24). Pero ¿tuku xlakata wi tiku ni nastalaniputun Jesús maski naʼakxilha xmilagros? Chuna tlawakgolh xlakata palha xnakujkan xwanit (Mateo 13:10-15).

Jesús xkatsi pi xlakata tlan xʼakgatekgskgolh xaxlikana xlakata Dios nema wi kBiblia pulaktiy tuku talakaskin: xtamakgtay Dios chu tlan xtapuwankan xkgalhikgolh. Chuna la tatsokgnit kMateo 11:25, xla wa: «Kmaxkiyan paxkatkatsinit, wix Tata wanti xmalana akgapun, chu katiyatna, pi matsekgwilinikgonita xatlan mintalakapastakni wanti lhuwa kgalhikgoy xlakgasi, chu lakgskgalalan chixkuwin puwankgoy; wata wa maʼakgatakgsnikgonita wanti lhuwa nitu [...] xlakgasikan». ¿Akxilha pi akgtum talakgalhaman xlakata tlan naʼakgatekgskan tuku xaxlikana xlakata Dios? Jehová «xmalana akgapun, chu katiyatna» lakgchan namatsekga o namasiya chuna la nalakaskin. Pero uma ni wamputun pi kaj akglakgwa chuna tlawa o kaj ni lakaskin nakatsikan. Pero ¿tuku xlakata chuna tlawa?

Jehová tlan kaʼakxilha tiku taktujukgo, ni wa tiku laktlankajwa (Santiago 4:6). Jehová kamatsekgni tuku xaxlikana «wanti lhuwa kgalhikgoy xlakgasi, chu lakgskgalalan chixkuwin puwankgoy», tiku lakpuwankgo pi ni maklakaskinkgo Dios xlakata lhuwa tuku katsinikgonit kkakilhtamaku (1 Corintios 1:19-21). Pero kamasiyani tiku «wanti lhuwa nitu [...] xlakgasikan», tiku xliputum xnakujkan skinikgo kakamakgtayalh, tiku tataktujukgo la laktsu kamanan (Mateo 18:1-4; 1 Corintios 1:26-28). Xkgawasa Dios kalakgapasli umakgolh latamanin. Lhuwa tiku xpulalinkgo takanajla chu tiku lu xkgalhtawakgakgonit ni akgatekgskgolh tuku wa Jesús, pero skitinanin tiku xtataktujukgo akgatekgskgolh (Mateo 4:18-22; 23:1-5; Hechos 4:13). Nachuna, xwilakgo tiku lhuwa tumin xkgalhikgo chu lhuwa tuku xkatsikgo tiku xlikana tataktujukgolh chu stalanikgolh Jesús (Lucas 19:1, 2, 8; Hechos 22:1-3).

Kaʼakxilhparaw takgalhskinin nema tlawaw xapulana: «¿Katsiputuna tuku xaxlikana xlakata Dios?». Chuna la akxilhwi, Dios ni kalaksaka tiku lakpuwankgo pi lakgskgalalan kkakilhtamaku wata kamakgamakglhtinan tiku xlakan kalakgmakgankgo. Komo xliputum mintalakapastakni chu xliputum minaku likgalhtawakgaya xTachuwin Dios, na namaxkiyan tuku lu xlakaskinka: naʼakgatekgsa tuku xaxlikana xlakata Dios. Komo naʼakgatekgsa tuku xaxlikana namakgtayayan xlakata lipaxuw nalatapaya chu napina ktiji xla xaxlikana latamat, latamat nema ni kgalhi xlisputni kxasasti kakilhtamaku nema Dios kinkamalaknuninitan (1 Timoteo 6:12, 19; 2 Pedro 3:13).a