¿Xaʼakgstitum xwanit Limapakgsin nema kamaxkilh xkachikin Dios?

NINA makgas, akgtum tribunal xala akgtum país kʼOccidente, wa pi xʼamaka kamakgnikan chatiy lakchixkuwin xlakata xwankan pi wi tiku xmakgnikgonit. Kʼuma pulaktiy juicios, ni liwana xtakatsi komo xlikana wa xmakgninankgonit. Akxni katsika pi ni wa xmakgninankgonit, chu lhuwa liskujkgolh abogados lakgmaxtukgolh chatum. Pero ni para chatum abogado tiku lu katsini lakkaxtlawa taʼakglhuwit xlakgmaxtulh achatum, xlakata xmakgnikanita.

Uma tuku nitlan lalh min kilhtamaku chuna la, klakalhuwa países. Wa xlakata, Biblia limapakgsinan: «Xaʼakgstitum nastalaniya» (Deuteronomio 16:20). Akxni Jueces xaʼakgstitum likatsikgo, kimputumkan makgkatsiyaw pi kinkakuentajtlawakanan. Dios kamaxkilh israelitas akgtum Limapakgsin nema ni xlaksakpaxkinan chu xaʼakgstitum xwanit. Kalichuwinaw komo xlikana «xtiji Dios xaʼakgstitum» (Deuteronomio 32:4).

JUECES LAKGSKGALALAN, LIWANA LAKAPASTAKNANKGO CHU KATSINIKGO LA NALAKKAXTLAWAKGO

Komo jueces liwana katsikgo la nalakkaxtlawakgo taʼakglhuwit, xaʼakgstitum chu ni mastakgo talakaskin wi tuku nakamaxkikan kaj xlakata natlawa tuku nitlan, kamakgtaya latamanin. Xlimapakgsin Dios lu xlakaskinka xkaʼakxilha uma jueces. Xlikana, akxni xʼamakgolh kdesierto, wanika Moisés pi xkaputsalh «lakchixkuwin tiku liwana skujkgo, pekuanikgo Dios, lakchixkuwin tiku tlan kalipawankan, nachuna xkajnikgo tuku ni xaʼakgstitum» (Éxodo 18:21, 22). Tipuxum kata titaxtulh, Moisés kamalakapastakapa pi lu xlakaskinka naputsakan «lakchixkuwin tiku lakgskgalalan chu liwana lakpuwan tuku nawan chu katsinikgo la nalakkaxtlawakgo» xlakata jueces xlitaxtukgolh (Deuteronomio 1:13-17).

Akxni lhuwa siglos titaxtulh, Jehosafat,a mapakgsina xalak Judá, kalimapakgsilh jueces: «Kaʼakxilhtit tuku tlawayatit, xlakata ni xla lakchixkuwin tuku lakkaxtlawapatit, wa xla Jehová; chu xla katawilan akxni wi tuku lakkaxtlawapatit. Kakgalhinitit tapekua Jehová chu kakatatawilan. Kuentakatlawatit chu katlawatit, xlakata Jehová xaʼakgstitum, ni laksakpaxkinan chu nitu makgamakglhtinan xlakata natlawa tuku nitlan» (2 Crónicas 19:6, 7). Wa uma tachuwin tuku kawanilh mapakgsina, kamalakapastakalh komo xlaksakpaxkinankgolh chu lhuwa tuku xkgalhiputunkgolh, Dios xkamalakgaxokgelh komo nitlan tuku xkitaxtulh.

Akxni jueces xkgalhakgaxmatkgo uma tastakyaw, putum kachikin lu tlan xlimakgkatsikgo. Pero ni kajwatiya kamaxkilh xLimapakgsin na kamaxkilh tastakyaw nema xkamakgtayalh xlakata nakatsikgo la nalaksakkgo tuku xalakatitum, maski lu laktuwa. Kaʼakxilhwi makgapitsi tastakyaw.

TASTAKYAW NEMA TLAWA PI LU TLAN NAKITAXTU

Maski jueces lakgskgalalan lakchixkuwin xwankgolh chu xmakgantaxtikgolh limapakgsin, ni xakstukan xkalipawankan chu xliskgalalakan; Jehová kamaxkilh tastakyaw nema xʼama kamakgtaya xlakata nakatsikgo lakkaxtlawakgo taʼakglhuwit. Makgapitsi wa uma:

Liwana nalakputsanankan. Jehová maklakaskilh Moisés xlakata xkalimapakgsilh jueces xalak Israel: «Akxni nakatalakkaxlayatit minatalankan, xaʼakgstitum natlawayatit» (Deuteronomio 1:16). Chatum juez talakaskin putum nakatsi xlakata nawan la natalakkaxtlawa taʼakglhuwit. Wa xlakata, Dios kawanilh tiku juez xlitaxtukgo pi liwana xlakputsananikgolh taʼakglhuwit. Xtalakaskin pi jueces liwana xkatsikgolh pi xlikana tuku xlimawakamaka chatum lataman chu alistalh xwankgolh tuku xtlawanikan (Deuteronomio 13:14; 17:4).

Kakgaxmatnikan tiku katsikgo tuku lanit. Lu xlakaskinka xwanit nakakgaxmatnikan tiku xkatsikgo tuku xlanit akxni xlakputsanankan. Limapakgsin xwan: «Ni kaj chatum nawan tuku tlawalh achatum, xlakata tuku nitlan o atanu talakgalhin. Talakaskin chatiy o chatutu nawankgo tuku lalh» (Deuteronomio 19:15). Chu tiku xwankgo tuku xlanit, xLimapakgsin Dios xkawani pi ni wa nawankgo tuku xwankgonita amakgapitsin chu ni natalakkaxlakgo tiku nitlan tuku xlimawakanama kaj xlakata naʼakgsaninankgo (Éxodo 23:1).

Talakaskin xaʼakgstitum nalikatsikan. Chuna la xmalakgaxokgekan tiku xwan taʼakgsanin xkalimasiyani amakgapitsin xlakata ni chuna xtlawakgolh. Limapakgsin xwan: «Jueces liwana [nalakputsanankgo] komo tiku tatayanama kaj akgsanina chu tuku wa xlakata xtala ni xlikana, wa xlakata wixin chuna natlawaniyatit la xlakpuwanit natlawani xtala, chu namasputuya tuku ni tlan kmilakgstipan» (Deuteronomio 19:18, 19). Akgtum liʼakxilhtit, komo chatum chixku xʼakgsaninan xlakata xmakglhtiputulh tuku xlakgchan achatum, xmaxokgekan chuna la xkgalhi xtapalh nema xmakglhtinanputun. Komo kaj xʼakgsaninan xlakata xmakgnika achatum, xtalakaskin namakgnikan tiku xʼakgsaninama. Uma Limapakgsin liwana xkamakgtaya pi latamanin xwankgolh tuku xaxlikana.

Ni nalaksakpaxkinankan akxni wi tiku talakkaxlakan. Akxni xkgalhikgo tuku xlimasiya xaxlikana, jueces liwana xʼakxilhkgo chu xwankgo tuku xʼama tatlawa. Akxni chuna xʼama tlawakan xtalakaskin xʼakxilhkgolh xLimapakgsin Dios: «Ni nalaksakpaxkinana akxni natalakkaxlaya tiku ni kgalhi tumin, o tiku kgalhi tumin. Xaʼakgstitum nakatalakkaxlaya» (Levítico 19:15). Akxni xlakkaxtlawakgo taʼakglhuwit, jueces xtalakaskin putum nakatsikgo tuku xlanit, ni kaj la xtasiyakgo o komo xkgalhikgo o ni xkgalhikgo tumin tiku xkatalakkaxlakan.

Uma tastakyaw, nema akglhuwata siglos wi kBiblia nema Dios kamaxkilh israelitas, la uku lu xkamakgtayalh jueces. Komo jueces chuna xtatlawalh, putum xkamalakgaxokgeka tiku xlikana lin kuenta.

Chatum juez kakgaxmatnima chatiy lakchixkuwin kʼakgtum tribunal kkinkilhtamakujkan — Komo chuna natlawakan la wan xLimapakgsin Dios, ni katitlawaka tuku ni xaʼakgstitum akxni nakatalakkaxlakan latamanin

KACHIKIN LIPAXUWALH TUKU XAʼAKGSTITUM

Moisés katlawanilh takgalhskinin israelitas: «¿Tiku lanka kachikin kgalhi limapakgsin chu xaʼakgstitum lakkaxtlawa taʼakglhuwit, la uma limapakgsin nema kkamaxkiman uku?» (Deuteronomio 4:8). Xlikana pi nipara atanu kachikin chuna lipaxuwalh la xlakkaxtlawakan xtakglhuwitkan. Akxni mapakgsinalh Salomón, tiku kgawasaku xwanit lakputsalh la natlawa xlimapakgsin Jehová, israelitas «xatapaxuwan latamakgolh nitu xlipekuankgo» xkgalhikgo takaksni chu lhuwa tuku kgalhikgolh; putum «xwayankgo chu xkgotnankgo chu xpaxuwakgo» (1 Reyes 4:20, 25).

Lu nitlan tuku lalh, israelitas nialh kgalhakgaxmatkgolh Dios. Xla limaklakaskilh palakachuwina Jeremías, Dios wa: «Xlakan lakgmakgankgonit xtachuwin Jehová, chu ¿tuku liskgalala kgalhikgo?» (Jeremías 8:9). Uma tlawalh Jerusalén xlitaxtulh akgtum «kachikin lin kuenta tiku kamakgnikan», chu litatsamalh «tuku laklixkajni». Wa xlakata malakgsputuka chu makgxtakgka tutumpuxamakaw kata (Ezequiel 22:2; Jeremías 25:11).

Akxni latamalh palakachuwina Isaías lu tuwa xwanit kakilhtamaku kʼIsrael. Akxni lakapastakli tuku xlanit makgasa, tlawalh pi xwa tuku xaxlikana xlakata Jehová chu xLimapakgsin: «Akxni katalakkaxlaya latamanin, xaʼakgstitum tuku katsinikgo latamanin xalak katiyatni» (Isaías 26:9).

Isaías na lichuwinalh xTamapakgsin Mesías, Jesucristo: «Xla ni katilakputsanalh kaj xlakata tuku naʼakxilha, chu ni katistakyawanalh kaj xlakata tuku kgaxmatnit. Chu xaʼakgstitum nakatalakkaxla tiku ni kgalhikgo tumin» (Isaías 11:3, 4). ¡Lu stlan latamat nakgalhikgo tiku nalatamakgo kxTamapakgsin Dios chu xTamapakgsin xMesías! (Mateo 6:10.)

a Tukuwani Jehosafat wamputun «Jehová Wa Juez».

¿Xmasta talakaskin xLimapakgsin Dios namalakgaxokgenankan?

Tachuwin «tiku maxtu lakgastapu na namaxtunikan xlakgastapu tiku namakti tatsan na namaktinikan xtatsan», nema wi kʼÉxodo 21:24, tlawanit pi latamanin tanu tanu la nalakpuwankgo. Makgapitsi latamanin lakpuwanankgo pi uma tachuwin liwana limasiya pi Dios masta talakaskin namalakgaxokgenankan. Pero uma tapuwan nichuna masiya xLimapakgsin Dios: «Ni nakamalakgaxokgeya ni nakasitsiniya xkamanan minkachikin» (Levítico 19:18). Wa xlakata, ¿tuku wamputun uma tachuwin xla Éxodo?

Éxodo 21:22 limasiya akgtum taʼakglhuwit niku chatiy lakchixkuwin xlachipamakgolh chu komo xkgaxilh chatum puskat tiku nialh xakstu chu xlakachin skgata akxni nina xlilakachinat. Komo xatse chu aktsu skgata nitu xlanilh, xchixku uma puskat nila xmalakgaxokgenalh. Wata tiku xlin kuenta «xmaxokgekan tuku nitlan xtlawanit chuna la xwili xmalana puskat; chu xla kxokgolh kxlakatinkan jueces». Uma wamputun, jueces xtlawakgo pi chixku kxokgonilh xmalana puskat. Pero komo puskat o aktsu skgata xnilh, jueces xtlawakgo pi xmakgnika chixku.

Akxni chuna xla, wa tribunal tiku xtlawa pi namakgantaxtikan limapakgsin chu ni wa tiku xtlawanikanit tuku nitlan «tiku xmakgninan na xmakgnikan, tiku maxtu lakgastapu na xmaxtunikan xlakgastapu tiku xmakti tatsan na xmaktinikan xtatsan» (Éxodo 21:23, 24). Uma xkamalakapastaka jueces pi ni namalakatsalikgo limapakgsin o ni liwana namakgantaxtikgo. Xlakputsana Biblia wanikan Richard Elliott Friedman wa: «Max xapulana tuku xtalakaskin pi xkamalakgaxokgeka la mininikgo tuku xtlawanit chu ni xtalakaskin pi ni xmalakatsalikgolh».

Wa xlakata, ¿niku kilhtsukulh uma talakapastakni pi xLimapakgsin Dios xmasta talakaskin namalakgaxokgenankan? Lu xlakaskinka uma tachuwin nema Jesús wa kMateo 5:38, 39: «Tikgaxpattit wantu ntiwanikgoka xamakgan: “Mpi wanti xmaxtulh lakgastapu, na [...] namaxtunikan xlakgastapu, chu wanti xtamakaktilh ntatsan, na [...] natamakaktinikan xtatsan”. Wampi wa nchu nkit kkawaniyan: Ni kalakgapaxtokgtit nti nitlan nkapuwaniyan, chi wampi wa nkaxatikawa nti xmasipanan kmilakgxtipakgstakat, kalakgxtipini alakgxtitu». Max makgapitsin tiku xmasiyakgo xtachuwin Dios xkilhtamaku Jesús xlaktamaknukgonit limapakgsin nema wanikan talión, o wanti xmaxtulh lakgastapu, na [...] namaxtunikan xlakgastapu, tuku xlichuwinankgo. Chu chuna mastakgolh talakaskin pi namalakgaxokgenankan. Pero, Jesús liwana limasiyalh pi uma tuku xtlawakgo ni xtakilhtinit kxLimapakgsin Dios nema xkamaxkikanit israelitas.